መጽሐፈ ነገሥት ፫ 11

1 ወንግሥተ ፡ ሳባእ ፡ ሰምዐት ፡ ስሞ ፡ ለሰሎሞን ፡ ወስሞ ፡ ለእግዚአብሔር ፡ ወመጽአት ፡ ትፍትኖ ፡ ምስለ ፡ ጥበብ ። 2 ወመጽአት ፡ ኢየሩሳሌም ፡ በኀይል ፡ ክቡድ ፡ ፈድፋደ ፡ ወአግማል ፡ ይጸውሩ ፡ አፈዋተ ፡ ወወርቀ ፡ ብዙኀ ፡ ፈድፋደ ፡ ወዕንቈ ፡ ክቡረ ፡ ወቦአት ፡ ኀበ ፡ ሰሎሞን ፡ ወተናገረቶ ፡ ኵሎ ፡ ዘሀሎ ፡ ውስተ ፡ ልባ ። 3 ወፈከረ ፡ ላቲ ፡ ሰሎሞን ፡ ኵሎ ፡ ቃላቲሃ ፡ ወአልቦ ፡ ቃለ ፡ ዘተሰወረ ፡ እምንጉሥ ፡ ዘኢፈከረ ፡ ላቲ ። 4 ወርእየት ፡ ንግሥተ ፡ ሳባእ ፡ ኵሎ ፡ ጥበቢሁ ፡ ለሰሎሞን ፡ ወቤተኒ ፡ ዘሐነጸ ፤ 5 ወመባልዕቲሁኒ ፡ ለሰሎሞን ፡ ወትርሲተ ፡ አግብርቲሁ ፡ ወዕቃሜ ፡ እለ ፡ ይትለአክዎ ፡ ወአልባሲሁኒ ፡ ወቀዳሕቶኒ ፡ ወምሥዋዓቲሁኒ ፡ ዘይሠውዕ ፡ ቤተ ፡ እግዚአብሔር ፡ ወተደመት ። 6 ወትቤሎ ፡ ለንጉሥ ፡ ሰሎሞን ፡ አማን ፡ ውእቱ ፡ ነገር ፡ ዘሰማዕኩ ፡ በምድርየ ፡ በእንተ ፡ ቃለ ፡ ዚአከ ፡ ወበእንተ ፡ ጥበብከ ። 7 ወኢአመንክዎሙ ፡ ለእለ ፡ ዜነዉኒ ፡ እስከ ፡ ሶበ ፡ በጻሕኩ ፡ ወርኢኩ ፡ በአዕይንትየ ፡ ወናሁ ፡ ወኢመንፈቀ ፡ አልቦ ፡ ዘዜነዉኒ ፤ ፈድፋደ ፡ ርኢኩ ፡ ተወሰከ ፡ ሠናየ ፡ እምነ ፡ ዜና ፡ ዘዜነዉኒ ፡ በምድርየ ። 8 ብጹዓት ፡ አንስቲያከ ፡ ወብጹዓ[ን] ፡ አግብርቲከ ፡ እ[ሎ]ንቱ ፡ እለ ፡ ይቀውሙ ፡ ቅድሜከ ፡ ወትረ ፡ እለ ፡ ይሰምዑ ፡ ኵሎ ፡ ጥበቢከ ። 9 ለይኩን ፡ እግዚአብሔር ፡ አምላክከ ፡ ቡሩክ ፡ ዘሠምረ ፡ ያንብርከ ፡ ላዕለ ፡ አትሮንሰ ፡ እስራኤል ፡ እስመ ፡ አፍቀሮ ፡ እግዚአብሔር ፡ ለእስራኤል ፡ ያቅም ፡ እስከ ፡ ለዓለም ፡ ወአንገሠከ ፡ ላዕሌሆሙ ፡ ትግበር ፡ ፍትሐ ፡ ወጽድቀ ፡ በአፍታሔሆሙ ። 10 ወወሀበቶ ፡ ለሰሎሞን ፡ ፻ወ፳መክሊተ ፡ ዘወርቅ ፡ ወአፈዋተ ፡ ፈድፋደ ፡ ብዙኀ ፡ ወዕንቁ ፡ ክቡረ ፡ ወአልቦ ፡ አመ ፡ መጽአ ፡ ብዙኃ ፡ አፈዋተ ፡ ዘከመ ፡ አሜሃ ፡ ዘወሀበት ፡ ንግሥተ ፡ ሳባእ ፡ ለሰሎሞን ። 11 ወሐመረ ፡ ኪራምኒ ፡ እንተ ፡ ታመጽእ ፡ ወርቀ ፡ ሶፌር ፡ አምጽአት ፡ ዕፀ ፡ ጽሩበ ፡ ፈድፋደ ፡ ብዙኀ ፡ ወዕንቈ ፡ ክቡረ ። 12 ወገብረ ፡ ንጉሥ ፡ ኪያሁ ፡ ዕፀ ፡ ጽሩበ ፡ መሳውቃተ ፡ ለቤተ ፡ እግዚአብሔር ፡ ወለቤተ ፡ ንጉሥ ፡ ወለመዝሙር ፡ ወለመሰንቆ ፡ ዘማሕልይ ፡ ወአልቦ ፡ አመ ፡ መጽአ ፡ ዘከማሁ ፡ ዕፀ ፡ ጽሩበ ፡ በዲበ ፡ ምድር ፡ ወኢያስተርአየ ፡ ወኢበአይቴሂ ፡ በውስተ ፡ ምድር ፡ ዘከማሁ ፡ እስከ ፡ ይእቲ ፡ ዕለት ። 13 ወንጉሥ ፡ ሰሎሞንሂ ፡ ወሀባ ፡ ለንግሥተ ፡ ሳባእ ፡ ኵሎ ፡ ዘፈቀደት ፡ እምኵሉ ፡ ዘሰአለቶ ፡ ዘእንበለ ፡ ዘጸገዋ ፡ እምእዴሁ ፡ ንጉሥ ፡ ወተመይጠት ፡ ወአተወት ፡ ብሔራ ፡ ይእቲሂ ፡ ወአግብርቲሃ ። 14 ወኮነ ፡ መድሎቱ ፡ ለወርቅ ፡ ዘይመጽእ ፡ ለሰሎሞን ፡ በበ ፡ ዓመት ፡ ፮፻ወ፷ወ ፮መካልይ ፡ ዘወርቅ ፤ 15 ዘእንበለ ፡ ዘይገብእ ፡ ጸባሕተ ፡ እምኀበ ፡ እለ ፡ ይነግዱ ፡ ወእምኵሎሙ ፡ ነገሥት ፡ እለ ፡ ፀውዱ ፡ ወእምኵሉ ፡ መኳንንተ ፡ ምድር ። 16 ወገብረ ፡ ሰሎሞን ፡ ኰያንወ ፡ ዘወርቅ ፡ ፫፻ዝብጦ ፡ [፫፻]ሰቅል ፡ ለለ፩ኵናት ፡ መድሎቱ ። 17 ወገብረ ፡ ፫፻ወላትወ ፡ ዘወርቅ ፡ ዝብጦ ፡ ወሠለስቱ ፡ ምናን ፡ ዘወርቅ ፡ ለለአሐዱ ፡ ወልታ ፡ መድሎቱ ፤ ወአንበሮን ፡ ውስተ ፡ ቤት ፡ ዘሐቅል ፡ ዘሊባኖስ ። 18 ወገብረ ፡ ንጉሥ ፡ እትሮንሰ ፡ ዘቀርነ ፡ ነጌ ፡ ዐቢየ ፡ ወቀብኦ ፡ ወርቀ ፡ ንጹሐ ። 19 ወ፮መዓርጉ ፡ ለአትሮንስ ፡ ወአግለፎ ፡ አልህምተ ፡ እንተ ፡ ድኅሬሁ ፡ እንተ ፡ ለፌሂ ፡ ወእንተ ፡ ለፌሂ ፡ ልጹቀ ፡ አትሮንስ ፡ ወ፪በናብስት ፡ በላዕለ ፡ እደዊሁ ፡ ለአትሮንስ ። 20 ወ፲ወ፪ዐናብስት ፡ ይቀውሙ ፡ ላዕለ ፡ ፮መዓርጊሁ ፡ ለአትሮንስ ፡ እንተ ፡ ለፌሂ ፡ ወእንተ ፡ ለፌሂ ፡ ወኢተገብረ ፡ ዘከማሁ ፡ ወኢበአይ ፡ መንግሥት ። 21 ወኵሉ ፡ ንዋይ ፡ ዘአግበረ ፡ ሰሎሞን ፡ ዘወርቅ ፡ ወመቃልድኒ ፡ ዘወርቅ ፡ ወኵሉ ፡ ንዋየ ፡ ውእቱ ፡ ቤት ፡ ዘሐቅለ ፡ ሊባኖስ ፡ በወርቅ ፡ አቅፈሎ ፡ ወአልቦ ፡ ዘብሩር ፡ እስመ ፡ አልቦ ፡ ኍልቈ ፡ ብሩር ፡ በመዋዕለ ፡ ሰሎሞን ። 22 እስመ ፡ አሕማረ ፡ ተርሴስ ፡ በቱ ፡ ንጉሥ ፡ ውስተ ፡ ባሕር ፡ ምስለ ፡ አሕማረ ፡ ኪረም ፤ ምዕረ ፡ ለለ፫ዓመት ፡ ታአቱ ፡ ሐመር ፡ እምነ ፡ ተርሌስ ፡ ለንጉሥ ፡ ወርቀ ፡ ወብሩረ ፡ ወዕንቈ ፡ ግሉፈ ፡ ወስኩዐ ። ወዝንቱ ፡ ተግባሩ ፡ ለሰሎሞን ፡ ንጉሥ ፡ ዘሠርዐ ፡ በዘየሐንጽ ፡ ቤተ ፡ እግዚአብሔር ፡ ወቤተ ፡ መንግሥቱ ፡ ወአረፍተ ፡ ኢየሩሳሌም ፡ ጸናፌ ፡ በዘ ፡ ይፌጽም ፡ ቅጽረ ፡ ሀገረ ፡ ዳዊት ፡ ወአሶር ፡ ወመጌዶን ፡ ወጋዜር ፤ ወቤቶሮም ፡ ላዕላይ ፤ ወኢያቴርምተ ፡ ወኵሎ ፡ አህጉረ ፡ ሰረገላቲሁ ፡ ወኵሎ ፡ አህጉረ ፡ አፍራሲሁ ፡ ወተግባሩ ፡ ለሰሎሞን ፡ ዘተገብረ ፡ በዘየሐንጽ ፡ በኢየሩሳሌም ፡ ወበኵሉ ፡ ምድር ፡ ከመ ፡ ኢይማእዎ ፡ ኵሉ ፡ አሕዛብ ፡ እለ ፡ ተረፉ ፡ እምነ ፡ ኬጤዎን ፡ ወአሞሬዎን ፡ ወፌርዜዎን ፡ ወከናኔዎን ፡ ወኤዌዎን ፡ ወኢያቡሴዎን ፡ ወጌርጌሴዎን ፡ ወእለ ፡ ኢኮኑ ፡ እምነ ፡ ደቂቀ ፡ እስራኤል ፡ እለ ፡ ተረፉ ፡ ምስሌሆሙ ፡ ውስተ ፡ ምድር ፡ እምነ ፡ ውሉዶሙ ፡ እለ ፡ ስእኑ ፡ ደቂቀ ፡ እስራኤል ፡ ሠርዎቶሙ ፡ ወረሰዮሙ ፡ ሰሎሞን ፡ መጸብሔ ፡ እስከ ፡ ዮም ፤ ወእምነ ፡ ደቂቀ ፡ እስራኤልሰ ፡ አልቦ ፡ ዘሤመ ፡ ሰሎሞን ፡ ውስተ ፡ ግብር ፡ እስመ ፡ ዕደው ፡ መስተቃትላን ፡ እሙንቱ ፡ ወደቂቁሂ ፡ ወመላእክተ ፡ ሰረገላቲሁኒ ፡ ወመስተጽዕናኒሁኒ ። 23 ወዐብየ ፡ ሰሎሞን ፡ ፈድፋደ ፡ እምነ ፡ ኵሉ ፡ ነገሥተ ፡ ምድር ፡ በብዕል ፡ ወበጥበብ ። 24 ወኵሉ ፡ ነገሥተ ፡ ምድር ፡ የኀሥሡ ፡ ይርአዩ ፡ ገጾ ፡ ለሰሎሞን ፡ ወይስምዑ ፡ ጥበቦ ፡ ዘወሀቦ ፡ እግዚአብሔር ፡ ልቦ ። 25 ወእሙንቱኒ ፡ ኵሎሙ ፡ ያመጽኡ ፡ አምኃሁ ፡ ንዋየ ፡ ወርቅ ፡ ወአልባሰ ፡ ወማየ ፡ ልብን ፡ ወአፈዋተ ፡ ወአፍራሰ ፡ ወአብቅለ ፡ በበዓመት ። 26 ወቦ ፡ ሰሎሞን ፡ አፍራስ ፡ አንስተ ፡ ፬፼ለሰረገላቲሁ ፡ ወ፼(ለሀገሩ ፡) ወ፳፻አፍራሰ ፡ ጸብእ ፡ ወአንበሮሙ ፡ ውስተ ፡ አህጉረ ፡ ሰረገላሁ ፡ ወቦ ፡ ዘኀበ ፡ ንጉሥ ፡ ውስተ ፡ ኢየሩሳሌም ፡ ወንጉሥ ፡ ሰሎሞን ፡ ውእቱ ፡ ላዕለ ፡ ኵሉ ፡ ነገሥት ፡ እምነ ፡ ፈለጎሙ ፡ እስከ ፡ ምድረ ፡ ኢሎፍሊ ፡ ወእስከ ፡ ደወለ ፡ ግብጽ ። 27 ወረሰዮ ፡ ንጉሥ ፡ ለወርቅ ፡ ወለብሩር ፡ ከመ ፡ እብን ፡ ወከመ ፡ ዕፀወ ፡ ዘቄድሮስ ፡ ወዕፀወ ፡ ቄድሪኖንሰ ፡ በኀቤሁ ፡ ከመ ፡ ዕፀወ ፡ ሰግላ ፡ ዘውስተ ፡ ገዳም ፡ እምነ ፡ ብዝኁ ፡ ከማሁ ፡ ኮነ ። 28 ወምእታወ ፡ አፍራሲሁ ፡ ለሰሎሞን ፡ እምነ ፡ ግብጽ ፡ ወእምነ ፡ ቱቃሄ ፡ ተገበሩ ፡ ለንጉሥ ፡ ወይነሥእ ፡ እምነ ፡ ቱቃሔ ፡ በተውላጥ ። 29 ወያአቱ ፡ እምነ ፡ ግብጽ ፡ ሰረገላተ ፡ በ፻ብሩር ፡ ወፈረስ ፡ በ፶ብሩር ፡ ወከማሁ ፡ ለኵሉ ፡ ነገሥተ ፡ ኬጤኤም ፡ ወለነገሥተ ፡ ሶርያ ፡ እለ ፡ እመንገለ ፡ ባሕር ፡ ሙፃኦሙ ።