መጽሐፈ ነገሥት ፫ 13

1 ወሖረ ፡ ንጉሥ ፡ ሮብዓም ፡ ውስተ ፡ ሰቂማ ፡ እስመ ፡ ውስተ ፡ ሰቂማ ፡ ይመጽእ ፡ ኵሉ ፡ እስራኤል ፡ ከመ ፡ ያንግሥዎ ። 3 ወተናገርዎ ፡ ሕዝብ ፡ ለሮብዓም ፡ እንዘ ፡ ይብሉ ፤ 4 አቡከ ፡ አክበደ ፡ ላዕሌነ ፡ ጋጋ ፡ ወአንተ ፡ ይእዜ ፡ አቅልል ፡ ለነ ፡ እምነ ፡ ግብርናተ ፡ አቡከ ፡ ክቡድ ፡ ወእምጋግ ፡ ክቡድ ፡ ዘወደየ ፡ ላዕሌነ ፡ አቡከ ፡ ወንከውነከ ፡ አግብርተ ። 5 ወይቤሎሙ ፡ ሖሩ ፡ እስከ ፡ ሠሉስ ፡ መዋዕል ፡ ወግብኡ ፡ ኀቤየ ፡ ወኀለፉ ። 6 ወነገሮሙ ፡ ንጉሥ ፡ ለሊቃናት ፡ እለ ፡ ቆሙ ፡ ቅድመ ፡ ሰሎሞን ፡ አቡሁ ፡ አመ ፡ ሕያው ፡ ውእቱ ፡ ወይቤሎሙ ፡ ምንተ ፡ ታመክሩኒ ፡ አንትሙ ፡ ቃለ ፡ ዘአውሥኦሙ ፡ ለዝንቱ ፡ ሕዝብ ። 7 ወይቤልዎ ፡ ዮምሰ ፡ ገብሮሙ ፡ አንተ ፡ ለዝንቱ ፡ ሕዝብ ፡ ወተቀነይ ፡ ሎሙ ፡ ወአውሥኦሙ ፡ ሠናየ ፡ ቃለ ፡ ወይከውኑከ ፡ አግብርቲከ ፡ በኵሉ ፡ መዋዕል ። 8 ወኀደገ ፡ ምክሮሙ ፡ ለሊቃናት ፡ ዘአምከርዎ ፡ ወተማከረ ፡ ምስለ ፡ ደቂቅ ፡ እለ ፡ ተሐፅኑ ፡ ምስሌሁ ፡ እለ ፡ ይቀውሙ ፡ ቅድመ ፡ ገጹ ። 9 ወይቤሎሙ ፡ ምንተ ፡ ታመክሩኒ ፡ አንትሙ ፡ ወምንተ ፡ ኣወሥኦሙ ፡ ለእሉ ፡ ሕዝብ ፡ እለ ፡ ከመዝ ፡ ይብሉኒ ፡ አቅልል ፡ ለነ ፡ እምነ ፡ ጋግ ፡ ዘወደየ ፡ አቡከ ፡ ላዕሌነ ። 10 ወይቤልዎ ፡ እሙንቱ ፡ ደቂቅ ፡ እለ ፡ ተሐፅኑ ፡ ምስሌሁ ፡ እለ ፡ ይቀውሙ ፡ ቅድመ ፡ ገጹ ፡ እንዘ ፡ ይብሉ ፡ ከመዝ ፡ ተናገሮሙ ፡ ለዝ ፡ ሕዝብ ፡ ለእለ ፡ ሰአሉከ ፡ እንዘ ፡ ይብሉ ፡ አቡከ ፡ አክበደ ፡ ጋጋ ፡ ላዕሌነ ፡ ወአንተ ፡ ይእዜ ፡ አቅልል ፡ ለነ ፡ ከመዝ ፡ አጠይቆሙ ፡ ቅጠንየ ፡ ይገዝፍ ፡ እምነ ፡ ሐቌሁ ፡ ለአቡየ ። 11 ወይእዜኒ ፡ አቡየሰ ፡ አዕነቀክሙ ፡ ጋጋ ፡ ክቡደ ፡ ወአነሂ ፡ እዌስክ ፡ ላዕለ ፡ ጋግክሙ ፤ አቡየ ፡ ቀሠፈክሙ ፡ በመቅሠፍት ፡ ወአነ ፡ እቀሥፈክሙ ፡ በዐቃርብት ። 12 ወመጽኡ ፡ ኵሉ ፡ እስራኤል ፡ ኀበ ፡ ሮብዓም ፡ ንጉሥ ፡ አመ ፡ ሣልስት ፡ ዕለት ፡ በከመ ፡ ይቤሎሙ ፡ ንጉሥ ፡ ግብኡ ፡ ኀቤየ ፡ እስከ ፡ ሣልስት ፡ ዕለት ። 13 ወአውሥኦሙ ፡ ንጉሥ ፡ ለሕዝብ ፡ እኩየ ፡ ወኀዶገ ፡ ሮብዓም ፡ ምክሮሙ ፡ ለሊቃናት ፡ ዘአምከርዎ ። 14 ወይቤሎሙ ፡ በከመ ፡ አምከርዎ ፡ እልክቱ ፡ ደቅ ፡ አቡየ ፡ አክበደ ፡ ጋጋክሙ ፡ ወአነሂ ፡ እዌስከ ፡ ላዕለ ፡ ጋጋክሙ ፤ አቡየ ፡ ቀሠፈክሙ ፡ በመቅሠፍት ፡ ወአነ ፡ እቀሥፈክሙ ፡ በዐቃርብት ። 15 ወአበየ ፡ ሰሚዖቶሙ ፡ ንጉሥ ፡ ለሕዝብ ፡ እስመ ፡ እምኀበ ፡ እግዚአብሔር ፡ መጽአት ፡ ዕልወት ፡ ከመ ፡ ያቅም ፡ እግዚአብሔር ፡ ቃሎ ፡ ዘነበበ ፡ በአፈ ፡ አኪያ ፡ ሰሎናዊ ፡ በእንተ ፡ ኢዮርብዓም ፡ ወልደ ፡ ናባጥ ። 16 ወርእዩ ፡ ኵሉ ፡ እስራኤል ፡ ከመ ፡ አበየ ፡ ሰሚዖቶሙ ፡ ንጉሥ ፡ ወአውሥእዎ ፡ ሕዝብ ፡ ለንጉሥ ፡ ወይቤልዎ ፡ ምንተ ፡ ብነ ፡ ክፍለ ፡ ምስለ ፡ ዳዊት ፡ ወአልብነ ፡ ርስተ ፡ ምስለ ፡ ወልደ ፡ እሴይ ፤ እቱ ፡ እስራኤል ፡ ውስተ ፡ አብያቲከ ፡ ወእምይእዜ ፡ ረዐይ ፡ ዳዊት ፡ ቤተከ ፡ ወአተዉ ፡ እስራኤል ፡ ውስተ ፡ አብያቲሆሙ ። 18 ወለአከ ፡ ንጉሥ ፡ ኀቤሆሙ ፡ ለእስራኤል ፡ መልአከ ፡ ጸባሕት ፡ ወወገርዎ ፡ ኵሉ ፡ እስራኤል ፡ በእብን ፡ ወሞተ ፡ ወሮብዓምሰ ፡ ንጉሥ ፡ ተንሥአ ፡ ይጕየይ ፡ ውስተ ፡ ኢየሩሳሌም ። 19 ወዐለውዎ ፡ እስራኤል ፡ ለቤተ ፡ ዳዊት ፡ እስከ ፡ ዛቲ ፡ ዕለት ። 20 ወእምዝ ፡ ሶበ ፡ ሰምዑ ፡ ኵሉ ፡ እስራኤል ፡ ከመ ፡ አተወ ፡ ኢዮርብዓም ፡ እምግብጽ ፡ ወለአኩ ፡ ወጸውዕዎ ፡ ውስተ ፡ ማኅበሮሙ ፡ ወአንገሥዎ ፡ ላዕለ ፡ እስራኤል ፡ ወአልቦ ፡ ዘተለዎ ፡ ለቤተ ፡ ዳዊት ፡ ዘእንበለ ፡ በትረ ፡ ይሁዳ ፡ ወብንያም ፡ ባሕቲቶሙ ። 21 ወሮብዓምሰ ፡ ቦአ ፡ ውስተ ፡ ኢየሩሳሌም ፡ ወአስተጋብኦሙ ፡ ለማኅበረ ፡ ይሁዳ ፡ ወለተረፈ ፡ ብንያም ፡ ፲፼ወ፳፻ወራዙተ ፡ መስተቃትላነ ፡ ከመ ፡ ይትቃተሎሙ ፡ ለቤተ ፡ እስራኤል ፡ ከመ ፡ ትግባእ ፡ መንግሥተ ፡ ሮብዓም ፡ ወልደ ፡ ሰሎሞን ። 22 ወኮነ ፡ ቃለ ፡ እግዚአብሔር ፡ ኀበ ፡ ሳምያ ፡ ብእሴ ፡ እግዚአብሔር ፡ እንዘ ፡ ይብል ፤ 23 በሎ ፡ ለሮብዓም ፡ ወልደ ፡ ሰሎሞን ፡ ንጉሠ ፡ ይሁዳ ፡ ወለኵሉ ፡ ቤተ ፡ ይሁዳ ፡ ወለብንያም ፡ ወለእለ ፡ ተርፉ ፡ እምሕዝብ ፡ እንዘ ፡ ትብል ፤ 24 ከመዝ ፡ ይቤ ፡ እግዚአብሔር ፡ ኢትዕርጉ ፡ ወኢትትቃተሉ ፡ ምስለ ፡ አኀዊክሙ ፡ ደቂቀ ፡ እስራኤል ፡ ተመየጡ ፡ ውስተ ፡ አብያቲክሙ ፡ እስመ ፡ እምኀቤየ ፡ ኮነ ፡ ዝንቱ ፡ ነገር ፡ ወሰምዑ ፡ ቃለ ፡ እግዚአብሔር ፡ ወኀደጉ ፡ ሐዊረ ፡ በእንተ ፡ ቃለ ፡ እግዚአብሔር ። 1 ወንጉሥ ፡ ሰሎሞን ፡ ስከበ ፡ ምስለ ፡ አበዊሁ ፡ ወቀበርዎ ፡ ምስለ ፡ አበዊሁ ፡ በሀገረ ፡ ዳዊት ፡ ወነግሠ ፡ ሮብዓም ፡ ወልዱ ፡ ህየንቴሁ ፡ በኢየሩሳሌም ፤ ወልደ ፡ ፲ወ፮ዓመት ፡ አመ ፡ ይነግሥ ፡ ወ፲ወ፷ዓመተ ፡ ነግሠ ፡ በኢየሩሳሌም ። 2 ወስማ ፡ ለእሙ ፡ ናሐኖን ፡ ወለተ ፡ አኖን ፡ ወልደ ፡ ነአስ ፡ ንጉሦሙ ፡ ለደቂቀ ፡ ዐሞን ፡ ወገብረ ፡ እኩየ ፡ በቅድመ ፡ እግዚአብሔር ፡ ወኢተለወ ፡ ፍኖተ ፡ ዳዊት ፡ አቡሁ ። 3 ወሀሎ ፡ ብእሲ ፡ እምደብረ ፡ ኤፍሬም ፡ ገብረ ፡ ሰሎሞን ፡ ወስሙ ፡ ኢዮርብዓም ፡ ወስማ ፡ ለእሙ ፡ ሳሪራ ፡ ወዘማ ፡ ብእሲታ ፡ ወሤሞ ፡ ሰሎሞን ፡ መልአከ ፡ ሰቄጤሌም ፡ ላዕለ ፡ ግብር ፡ ዘቤተ ፡ ዮሴፍ ። 4 ወሐነጸ ፡ ሰሎሞን ፡ ሰሪራ ፡ ሀገር ፡ እንተ ፡ ውስተ ፡ ደብረ ፡ ኤፍሬም ፡ ወቦቱ ፡ ሰረገላተ ፡ ፫፻ዘአፍራስ ። 5 ውእቱ ፡ ሐነጻ ፡ ለጥቅም ፡ ውስተ ፡ ግብር ፡ ዘቤተ ፡ ኤፍሬም ፤ ውእቱ ፡ ዐፀዋ ፡ ለሀገረ ፡ ዳዊት ፡ ወነበረ ፡ ያዐቢ ፡ ርእሶ ፡ ላዕለ ፡ መንግሥት ፡ ወፈቀደ ፡ ሰሎሞን ፡ ይቅትሎ ። 6 ወፈርሀ ፡ ወጐየ ፡ ኀበ ፡ ሱስቀም ፡ ንጉሠ ፡ ግብጽ ፡ ወነበረ ፡ ኀቤሁ ፡ እስከ ፡ አመ ፡ ሞተ ፡ ሰሎሞን ። 7 ወሰምዐ ፡ ኢዮርብዓም ፡ ከመ ፡ ሞተ ፡ ሰሎሞን ፡ ወይቤሎ ፡ ለሱስቀም ፡ ንጉሠ ፡ ግብጽ ፡ ፈንወኒ ፡ እእቱ ፡ ብሔርየ ፡ አነ ። 8 ወይቤሎ ፡ ሱሰቀም ፡ ሰአል ፡ ዘኮነ ፡ ስእለተ ፡ ዘእሁበከ ፡ ወአስተዋሰቦ ፡ ሱስቀም ፡ ሐኖሃ ፡ እኅታ ፡ ለቴቄምናስ ፡ እንተ ፡ ትልህቅ ፡ እምነ ፡ ብእሲቱ ፡ ወዐባይ ፡ ይእቲ ፡ በማእከለ ፡ አዋልደ ፡ ንጉሥ ። 9 ወወለደት ፡ ለኢዮርብዓም ፡ አብያሃ ፡ ወልዶ ፤ ወይቤሎ ፡ ኢዮርብዓም ፡ ለሱስቀም ፡ እእቱ ፡ ወወፅአ ፡ ኢዮርብዓም ፡ እምነ ፡ ግብጽ ። 10 ወበጽሐ ፡ ውስተ ፡ ሰሪራ ፡ እንተ ፡ ውስተ ፡ ደብረ ፡ ኤፍሬም ፡ ወተጋብኡ ፡ ህየ ፡ ኵሉ ፡ በትረ ፡ ኤፍሬም ፡ ኀበ ፡ ኢዮርብዓም ፡ ወሐነጸ ፡ ኢዮርብዓም ፡ ህየ ፡ ቅጽረ ። 11 ወደወየ ፡ ወልዱ ፡ ደዌ ፡ ዐቢየ ፡ ጥቀ ፡ ወሖረ ፡ ኢዮርብዓም ፡ ይስአ ፡ ል ፡ በእንተ ፡ ወልዱ ፡ ወይቤላ ፡ ለሐኖን ፡ ብእሲቱ ፡ ተንሥኢ ፡ ወሖሪ ፡ ተሰአሊ ፡ እግዚአብሔርሃ ፡ በእንተዝ ፡ ሕፃን ፡ እመ ፡ የሐዩኑ ፡ እምነ ፡ ደዌሁ ። 12 ወሀለወ ፡ ብእሲ ፡ ውስተ ፡ ሴሎም ፡ ወስሙ ፡ አኪያ ፡ ወልደ ፡ ፷ዓም ፡ ወቃለ ፡ እግዚአብሔር ፡ ላዕሌሁ ። 13 ወይቤላ ፡ ኢዮርብዓም ፡ ለብእሲቱ ፡ ተንሥኢ ፡ ወንሥኢ ፡ ምስሌኪ ፡ ለብእሴ ፡ እግዚአብሔር ፡ ኅብስተ ፡ ወጸራይቀ ፡ ለደቂቁ ፡ ወአስካለ ፡ ወግምዔ ፡ መዓር ። 14 ወተንሥአት ፡ ብእሲቱ ፡ ወነሥአት ፡ ምስሌሃ ፡ ኅብስተ ፡ ወክልኤ ፡ ጸራይቀ ፡ ወአስካለ ፡ ወግምዔ ፡ መዓር ፡ ለአኪያ ፤ ወልሂቅ ፡ ውእቱ ፡ ብእሲሁ ፡ ወተሐምገ ፡ አዕይንቲሁ ፡ ወኢይጤይቅ ። 15 ወተንሥአት ፡ ወሖረት ፡ እምነ ፡ ሰሪራ ፡ ወእምዝ ፡ ሶበ ፡ ቦአት ፡ ኀበ ፡ አኪያ ፡ ሴሎናዊ ፡ ውስተ ፡ ሀገር ፡ ወይቤሎ ፡ አኪያ ፡ ለወልዱ ፡ ሖር ፡ ተቀበለ ፡ ለሐኖን ፡ ብእሲተ ፡ ኢዮርብዓም ፡ ወበላ ፡ ባኢአ ፡ ወኢትቁሚአ ፡ እስመ ፡ ከመዝ ፡ ይቤ ፡ እግዚአብሔር ፡ ላዕሌኪአ ። 16 ወቦአት ፡ ሐኖን ፡ ኀበ ፡ ብእሴ ፡ እግዚአብሔር ፡ ወይቤላ ፡ አኪያ ፡ ለምንት ፡ አምጻእኪ ፡ ሊተ ፡ ኅብስተ ፡ ወአስካለ ፡ ወጸራይቀ ፡ ወግምዔ ፡ መዓር ። 17 ከመዝ ፡ ይቤ ፡ እግዚአብሔር ፡ ናሁ ፡ ተሐውሪ ፡ አንቲ ፡ እምኀቤየ ፡ ወሶበ ፡ ቦእኪ ፡ አንቀጸ ፡ ሳሪራ ፡ ይወፅኣ ፡ አዋልድኪ ፡ ይትቀበላኪ ፡ ወይብላኪ ፡ ሞተ ፡ ሕፃንኪ ። 18 እስመ ፡ ከመዝ ፡ ይቤ ፡ እግዚአብሔር ፡ ናሁአ ፡ አነአ ፡ እሤርዎአ ፡ ለኢዮርብዓምአ ፡ እስከ ፡ ዘያስተአዝብ ፡ በኀበ ፡ አረፍት ፡ ወአብድንቲሁ ፡ ለኢዮርብዓም ፡ እለ ፡ ውስተ ፡ ሀገር ፡ ይበልዕዎሙ ፡ ከለባት ፤ እለ ፡ ውስተ ፡ ገዳም ፡ ይበልዕዎሙ ፡ አዕዋፈ ፡ ሰማይ ። 19 ወለሕፃንኒ ፡ ይበክይዎ ፡ ወይብልዎ ፡ ወይ ፡ እግዚእየ ፡ እስመ ፡ ቦቱ ፡ ትትረከብ ፡ ሠናይት ፡ በኀበ ፡ እግዚአብሔር ። 20 ወአተወት ፡ ይእቲ ፡ ብእሲት ፡ እምዘ ፡ ሰምበት ፡ ወእምዝ ፡ ሶበ ፡ ቦአት ፡ ውስተ ፡ ሰሪራ ፡ ሞተ ፡ ውእቱ ፡ ሕፃን ፡ ወወፅኡ ፡ በአውያት ፡ ይትቀበልዋ ። 21 ወሖረ ፡ ኢዮርብዓም ፡ ውስተ ፡ ሰቂማ ፡ እንተ ፡ ውስተ ፡ ደብረ ፡ ኤፍሬም ፡ ወተጋብኡ ፡ በህየ ፡ ሕዝበ ፡ እስራኤል ፡ ወዐርገ ፡ ሮብዓምኒ ፡ ወልደ ፡ ሰሎሞን ፡ ህየ ። 22 ወኮነ ፡ ቃለ ፡ እግዚአብሔር ፡ ኀበ ፡ ሳሚያ ፡ ኤልማዊ ፡ ወይቤሎ ፡ ንሣእ ፡ ለከ ፡ ልብሰ ፡ ሐዲሰ ፡ ዘኢተወድየ ፡ ውስተ ፡ ማይ ፡ ወሥጥጦ ፡ ፲ወ፪ሥጠተ ፡ ወሀብ ፡ ለኢዮርብዓም ፡ ወበሎ ፡ ከመዝ ፡ ይቤ ፡ እግዚአብሔር ፡ ንሣእ ፡ ለከ ፡ ፲ሥጠተ ፡ ዘትለብስ ፡ ወነሥአ ፡ ኢዮርብዓም ። 23 ወይቤሎ ፡ ሰሚያ ፡ ከመዝ ፡ ይቤ ፡ እግዚአብሔር ፡ ላዕለ ፡ ፲ሕዝበ ፡ እስራኤል ፡ ትነግሥ ። 24 ወይቤልዎ ፡ ሕዝብ ፡ ለሮብዓም ፡ አቡከ ፡ አክበደ ፡ ጋጋ ፡ ላዕሌነ ፡ ወአብዝኀ ፡ ዘይሠርዕ ፡ ሲሳዮ ፡ ውስተ ፡ ማእዱ ፡ ወይእዜኒ ፡ እመ ፡ ታቀልለነ ፡ አንተ ፡ ንትቀነይ ፡ ለከ ። 25 ወይቤሎሙ ፡ ሮብዓም ፡ ለሕዝብ ፡ ሖሩ ፡ ወእስከ ፡ ሠሉስ ፡ መዋዕል ፡ እነግረክሙ ፡ ቃልየ ። 26 ወይቤ ፡ ሮብዓም ፡ ጸውዑ ፡ ሊተ ፡ ሊቃናት ፡ ወእት ፡ ማከር ፡ ዘከመ ፡ ኣየድዖሙ ፡ ለሕዝብ ፡ ቃልየ ፡ አመ ፡ ሣልስት ፡ ዕለት ። 27 ወነገሮሙ ፡ ሮብዓም ፡ ዘከመ ፡ ይቤልዎ ፡ ሕዝብ ፡ ወይቤልዎ ፡ ሊቃናተ ፡ ሕዝብ ፡ ከማሁ ፡ በከመ ፡ ይቤሉከ ፡ ሕዝብ ፡ በሎሙ ፡ አንተኒ ፡ ለሕዝብ ። 28 ወኀደጋ ፡ ሮብዓም ፡ ለምክሮሙ ፡ እስመ ፡ ኢአደመቶ ፡ ቅድሜሁ ፡ ወለአከ ፡ ወአስተጋብኦሙ ፡ ለእለ ፡ ተሐፅኑ ፡ ምስሌሁ ፡ ወይቤሎሙ ፡ ከመዝ ፡ ለአኩ ፡ ኀቤየ ፡ ሕዝብ ። 29 ወይቤልዎ ፡ እለ ፡ ተሐፅኑ ፡ ምስሌሁ ፡ ከመዝ ፡ በሎሙ ፡ ለሕዝብ ፡ ቍጠጠ ፡ ዚአየ ፡ ይገዝፍ ፡ እምነ ፡ ሐቌ ፡ አቡየ ፤ አቡየሰ ፡ ቀሠፈክሙ ፡ በመቅሠፍት ፡ ወአንሰ ፡ እቀሥፈክሙ ፡ በዐቃርብት ፡ ወአደሞ ፡ ለሮብዓም ፡ ውእቱ ፡ ቃል ። 30 ወአውሥኦሙ ፡ ለሕዝብ ፡ በከመ ፡ አምከርዎ ፡ ደቅ ፡ እለ ፡ ተሐፅኑ ፡ ምስሌሁ ፡ ወተባሀሉ ፡ ኵሎሙ ፡ ሕዝብ ፡ ኅቡረ ፡ ከመዘ ፡ ፩ብእሲ ፡ ወጸርኁ ፡ ኵሎሙ ፡ ወይቤሉ ፤ 31 አልብነ ፡ ክፍለ ፡ ምስለ ፡ ዳዊት ፡ ወአልብነ ፡ ርስተ ፡ ምስለ ፡ ወልደ ፡ እሴይ ፤ እቱ ፡ አብያቲከ ፡ እስራኤል ፡ እስመ ፡ ዝንቱ ፡ ብእሲ ፡ ኢይሰፍን ፡ ለነ ፡ ወኢይኴንነነ ። 32 ወተዘርዉ ፡ ሕዝብ ፡ እምነ ፡ ሰቂማ ፡ ወአተዉ ፡ ኵሎሙ ፡ ውስተ ፡ አብያቲሆሙ ። 33 ወተኀየለ ፡ ሮብዓም ፡ ወሖረ ፡ ወዐርገ ፡ ውስተ ፡ ሰረገላሁ ፡ ወቦአ ፡ ውስተ ፡ ኢየሩሳሌም ፡ ወተለውዎ ፡ ኵሉ ፡ በትረ ፡ ይሁዳ ፡ ወበትረ ፡ ብንያም ፡ ኵሎሙ ። 34 ወእምዝ ፡ በዓመቱ ፡ አስተጋብኦሙ ፡ ሮብዓም ፡ ለኵሎሙ ፡ ሰብአ ፡ ይሁዳ ፡ ወብንያም ፡ ወዐርገ ፡ ይትቃተሎሙ ፡ ለእስራኤል ፡ በሰቂማ ። 35 ወኮነ ፡ ቃለ ፡ እግዚአብሔር ፡ ኀበ ፡ ሰሚያ ፡ ብእሴ ፡ እግዚአብሔር ፡ ወይቤሎ ፡ በሎ ፡ ለሮብዓም ፡ ንጉሠ ፡ ይሁዳ ፡ ወለኵሎሙ ፡ ቤተ ፡ ይሁዳ ፡ ወብንያም ፡ ወለኵሉ ፡ ሕዝብ ፡ እለ ፡ ተርፉ ። 36 በሎሙ ፡ ከመዝ ፡ ይቤ ፡ እግዚአብሔር ፡ ኢትዕርጉአ ፡ ወኢትትቃተሉአ ፡ ምስለ ፡ አኀዊክሙ ፡ ደቂቀ ፡ እስራኤል ፡ ወተመየጡአ ፡ ወእትዉ ፡ ኵልክሙ ፡ ውስተ ፡ አብያቲክሙ ፡ እስመአ ፡ እምኀቤየአ ፡ ኮነአ ፡ ዝንቱአ ፡ ነገርአ ። 37 ወሰምዑ ፡ ቃለ ፡ እግዚአብሔር ፡ ወኀደጉ ፡ ሐዊረ ፡ በእንተ ፡ ቃለ ፡ እግዚአብሔር ። 25 ወሐነጻ ፡ ኢዮርብዓም ፡ ለሰቂማ ፡ እንተ ፡ ውስተ ፡ ደብረ ፡ ኤፍፊም ፡ ወነበረ ፡ ውስቴታ ፡ ወወፂኦ ፡ እምህየ ፡ ሐነጸ ፡ ፋኑኤል ። 26 ወይቤ ፡ ኢዮርብዓም ፡ በልቡ ፡ ናሁ ፡ ይእዜ ፡ ትገብእ ፡ መንግሥት ፡ ለቤተ ፡ ዳዊት ። 27 ለእመ ፡ ዐርጉ ፡ እሉ ፡ ሕዝብ ፡ ያበውኡ ፡ መሥዋዕተ ፡ ውስተ ፡ ቤተ ፡ እግዚአብሔር ፡ በኢየሩሳሌም ፡ ወይገብእ ፡ ልቡ ፡ ለሕዝብ ፡ ኀበ ፡ እግዚአብሔር ፡ ወእግዚአብሔር ፡ ያገብኦሙ ፡ ኀበ ፡ ሮብዓም ፡ ንጉሠ ፡ ይሁዳ ፡ ወይቀትሉኒ ። 28 ወመከረ ፡ ንጉሥ ፡ ወሖረ ፡ ወገብረ ፡ ፪አልህምተ ፡ ዘወርቅ ፡ ወይቤሎሙ ፡ ለሕዝብ ፡ ኮነክሙ ፡ ዐሪግ ፡ ውስተ ፡ ኢየሩሳሌም ፤ ናሁ ፡ አማልክቲከ ፡ እስራኤል ፡ እለ ፡ አውፅኡከ ፡ እምግብጽ ። 29 ወአንበረ ፡ ፩ውስተ ፡ ቤቴል ፡ ወ፩ውስተ ፡ ዳን ። 30 ወኮነ ፡ ዝንቱ ፡ ነገር ፡ ጌጋየ ፡ ወየሐውሩ ፡ ሕዝብ ፡ ቅድመ ፡ አሐቲ ፡ እንተ ፡ ውስተ ፡ ዳን ። 31 ወገብረ ፡ ውስተ ፡ አውግር ፡ አብያተ ፡ አማልክት ፡ ወገብረ ፡ ገነውተ ፡ አማልክት ፡ እምውስተ ፡ ሕዝብ ፡ እለ ፡ ኢኮኑ ፡ እምደቂቀ ፡ ሌዊ ። 32 ወገብረ ፡ ኢዮርብዓም ፡ በዓለ ፡ በሳምን ፡ ወርኅ ፡ አመ ፡ ፲ወ፭ለሠርቀ ፡ ወርኅ ፡ ከመ ፡ በዓል ፡ ዘምድረ ፡ ይሁዳ ፡ ወዐርገ ፡ ውስተ ፡ ምሥዋዕ ፡ ዘቤቴል ፡ ዘገብረ ፡ ከመ ፡ ይሡዕ ፡ ለእሙንቱ ፡ አልህምት ፡ እለ ፡ ገብረ ፡ ወአቀሞሙ ፡ ለእልክቱ ፡ ገነውተ ፡ አማልክት ፡ እለ ፡ ገብረ ። 33 ወዐርገ ፡ ውስተ ፡ ምሥዋዕ ፡ ዘገብረ ፡ አመ ፡ ፲ወ፭ለሠርቀ ፡ ሳምን ፡ ወርኅ ፡ በውእቱ ፡ መዋዕል ፡ ዘፈጠረ ፡ እምልቡ ፡ ወገብረ ፡ በዓለ ፡ ለደቂቀ ፡ እስራኤል ፡ ወዐርገ ፡ ውስተ ፡ ውእቱ ፡ ምሥዋዕ ፡ ከመ ፡ ይሡዕ ።