መጽሐፈ ነገሥት ፫ 14

1 ወናሁ ፡ ብእሴ ፡ እግዚአብሔር ፡ መጽአ ፡ እምነ ፡ ይሁዳ ፡ ውስተ ፡ ቤቴል ፡ በቃለ ፡ እግዚአብሔር ፡ ወኢዮርብዓምሰ ፡ ይቀውም ፡ ውስተ ፡ ምሥዋዕ ፡ ከመ ፡ ይሡዕ ። 2 ወጸውዖ ፡ ለውእቱ ፡ ምሥዋዕ ፡ ብእሴ ፡ እግዚአብሔር ፡ በቃለ ፡ እግዚአብሔር ፡ ወይቤ ፡ ምሥዋዕ ፡ ምሥዋዕሰ ፡ ከመዝ ፡ ይቤ ፡ እግዚአብሔር ፡ ናሁ ፡ ወልድ ፡ ይትወለድ ፡ ለቤተ ፡ ዳዊት ፡ ኢዮስያስ ፡ ስሙ ፡ ወይሠውዕ ፡ ላዕሌከ ፡ ገነውተ ፡ አማልክት ፡ እለ ፡ ሦዑ ፡ በዲቤከ ፡ ወአዕጽምተ ፡ እጓለ ፡ እመሕያው ፡ ያውዒ ፡ ወያነድድ ፡ ላዕሌከ ። 3 ወይከውን ፡ ይእተ ፡ አሚረ ፡ ተኣምር ፤ ዝንቱ ፡ ቃል ፡ ዘይቤ ፡ እግዚአብሔር ፤ ዝንቱ ፡ ምሥዋዕ ፡ ለይንቃዕ ፡ ወይትከዐው ፡ ዘውስቴቱ ፡ ጽንሓሒሁ ። 4 ወእምዝ ፡ ሶበ ፡ ሰምዐ ፡ ኢዮርብዓም ፡ ቃሎ ፡ ለብእሴ ፡ እግዚአብሔር ፡ ዘነበበ ፡ በዲበ ፡ ምሥዋዕ ፡ ዘውስተ ፡ ቤቴል ፡ አንሥአ ፡ እዴሁ ፡ ንጉሥ ፡ በዲበ ፡ ምሥዋዕ ፡ ወይቤ ፡ አኀዝዎ ፡ ወእምዝ ፡ የብሰት ፡ እዴሁ ፡ እንተ ፡ አንሥአ ፡ ላዕሌሁ ፡ ወስእነ ፡ አግብኦታ ፡ ኀቤሁ ። 5 ወነቅዐ ፡ ውእቱ ፡ ምሥዋዕ ፡ ወተክዕወ ፡ ዘውስቴቱ ፡ ጽንሓሒሁ ፡ በከመ ፡ ተኣምር ፡ ዘገብረ ፡ ውእቱ ፡ ብእሴ ፡ እግዚአብሔር ፡ በቃለ ፡ እግዚአብሔር ። 6 ወይቤሎ ፡ ኢዮርብዓም ፡ ለብእሴ ፡ እግዚአብሔር ፡ ሰአል ፡ ሊተ ፡ ቅድመ ፡ ገጹ ፡ ለእግዚአብሔር ፡ አምላክከ ፡ ወትግባእ ፡ እዴየ ፡ ላዕሌየ ፡ ወሰአለ ፡ ሎቱ ፡ ብእሴ ፡ እግዚአብሔር ፡ ኀበ ፡ እግዚአብሔር ፡ ወገብአት ፡ እዴሁ ፡ ለንጉሥ ፡ ኀቤሁ ፡ ወኮነት ፡ ከመ ፡ ቀዳሚ ። 7 ወይቤሎ ፡ ንጉሥ ፡ ለብእሴ ፡ እግዚአብሔር ፡ ባእ ፡ ምስሌየ ፡ ውስተ ፡ ቤትየ ፡ ወምሳሕ ፡ ምስሌየ ፡ ውስተ ፡ ቤትየ ። 8 ወይቤሎ ፡ ብእሴ ፡ እግዚአብሔር ፡ ለንጉሥ ፡ እመ ፡ ሠሀብከኒ ፡ መንፈቀ ፡ ቤትከ ፡ ኢይበውእ ፡ ምስሌከ ፡ ወኢይበልዕ ፡ እክለ ፡ ወኢይሰቲ ፡ ማየ ፡ በዝንቱ ፡ መካን ። 9 እስመ ፡ ከመዝ ፡ አዘዘኒ ፡ እግዚአብሔር ፡ ወይቤለኒ ፡ ኢትብላዕ ፡ እክለ ፡ ወኢትስተይ ፡ ማየ ፡ ወኢትግባእ ፡ ፍኖተ ፡ እንተ ፡ ባቲ ፡ ሖርከ ። 10 ወአተወ ፡ እንተ ፡ ካልእ ፡ ፍኖት ፡ ወኢገብአ ፡ በፍኖተ ፡ እንተ ፡ መጽአ ፡ ውስተ ፡ ቤቴል ። 11 ወሀሎ ፡ ብእሲ ፡ ነቢይ ፡ ልሂቅ ፡ ውስተ ፡ ቤቴል ፡ ዘይነብር ፡ ወመጽኡ ፡ ደቂቁ ፡ ወነገርዎ ፡ ኵሎ ፡ ግብረ ፡ ዘገብረ ፡ ብእሴ ፡ እግዚአብሔር ፡ ይእተ ፡ አሚረ ፡ በቤቴል ፡ ወቃሎ ፡ ዘከመ ፡ ይቤሎ ፡ ለንጉሥ ፡ ወተምዖሙ ፡ አቡሆሙ ። 12 ወይቤሎሙ ፡ እንተ ፡ አይ ፡ ፍኖት ፡ ሖረ ፡ ወአርአይዎ ፡ ደቁ ፡ ፍኖተ ፡ እንተ ፡ ባቲ ፡ ሖረ ፡ ብእሴ ፡ እግዚአብሔር ፡ ዘመጽአ ፡ እምይሁዳ ። 13 ወይቤሎሙ ፡ ለደቁ ፡ ረሐሉ ፡ ሊተ ፡ አድግየ ፡ ወረሐሉ ፡ ሎቱ ፡ አድጎ ፡ ወተጽዕነ ። 14 ወሖረ ፡ ወዴገኖ ፡ ለብእሴ ፡ እግዚአብሔር ፡ ወረከቦ ፡ ይነብር ፡ ታሕተ ፡ ዕፅ ፡ ወይቤሎ ፡ አንተኑ ፡ ውእቱ ፡ ብእሴ ፡ እግዚአብሔር ፡ ዘመጻእከ ፡ እምይሁዳ ፡ ወይቤሎ ፡ አነ ፡ ውእቱ ። 15 ወይቤሎ ፡ ነዓ ፡ ምስሌየ ፡ ወብላዕ ፡ እክለ ። 16 ወይቤሎ ፡ ኢይክል ፡ ገቢአ ፡ ምስሌከ ፤ ኢይበልዕ ፡ እክለ ፡ ወኢይሰቲ ፡ ማየ ፡ በዝንቱ ፡ መካን ። 17 እስመ ፡ ከማሁ ፡ አዘዘኒ ፡ ቃለ ፡ እግዚአብሔር ፡ ወይቤለኒ ፡ ኢትብላዕ ፡ እክለ ፡ ወኢትስተይ ፡ ማየ ፡ በህየ ፡ ወኢትግባእ ፡ በፍኖት ፡ እንተ ፡ ባቲ ፡ ሖርከ ። 18 ወይቤሎ ፡ ዝክቱ ፡ አነኒ ፡ ነቢይ ፡ አነ ፡ ዘከማከ ፡ ወመልአክ ፡ ነበበኒነ ፡ በቃለ ፡ እግዚአብሔር ፡ ወይቤለኒ ፡ አግብኦ ፡ ኀቤከ ፡ ውስተ ፡ ቤትከ ፡ ወይብላዕ ፡ እክለ ፡ ወይስተይ ፡ ማየ ፡ ወሐሰዎ ። 19 ወአግብኦ ፡ ወበልዐ ፡ እክለ ፡ ወሰትየ ፡ ማየ ፡ በቤቱ ። 20 ወእምዝ ፡ እንዘ ፡ ይነብር ፡ ውስተ ፡ ማእድ ፡ ወመጽአ ፡ ቃለ ፡ እግዚአብሔር ፡ ኀበ ፡ ዝክቱ ፡ ነቢይ ፡ ዘአግብኦ ። 21 ወይቤሎ ፡ ለብእቤ ፡ እግዚአብሔር ፡ ዘመጽአ ፡ እምይሠሁዳ ፡ ከመዝ ፡ ይቤ ፡ እግዚአብሔር ፡ እስመ ፡ አምረርካሁ ፡ ለቃለ ፡ እግዚአብሔር ፡ ወኢዐቀብከ ፡ ትእዛዞ ፡ ዘአዘዘከ ፡ እግዚአብሔር ፡ አምላክከ ፤ 23 ወገባእከ ፡ ወበላዕከ ፡ እክለ ፡ ወሰተይከ ፡ ማየ ፡ በዝንቱ ፡ መካን ፡ ዘይቤለከ ፡ ኢትብላዕ ፡ እክለ ፡ ወኢትስተይ ፡ ማየ ፡ ኢይባእ ፡ ሥጋከ ፡ ውስተ ፡ መቃብረ ፡ አቡከ ። 23 ወእምዝ ፡ እምድኅረ ፡ በልዐ ፡ እክለ ፡ ወስትየ ፡ ማየ ፡ ወረሐሉ ፡ ሎቱ ፡ እድጎ ፡ ወተንሥአ ፡ ወሖረ ። 24 ወረከቦ ፡ ዐንበሳ ፡ በፍኖት ፡ ወቀተሎ ፡ ወተገድፈ ፡ በድኑ ፡ ውስተ ፡ ፍኖት ፡ ወአድጉሂ ፡ ቆመ ፡ ኀቤሁ ፡ ወውእቱኒ ፡ ዐንበሳ ፡ ቆመ ፡ ኀቤሁ ። 25 ወመጽኡ ፡ ዕደው ፡ እለ ፡ የኀልፉ ፡ ሠረከቡ ፡ በድኖ ፡ ግዱፈ ፡ ውስተ ፡ ፍኖት ፡ ወይቀውም ፡ ዐንበሳ ፡ ኀበ ፡ በድኑ ፡ ወቦኡ ፡ ወዜነዉ ፡ ኀበ ፡ ሀሎ ፡ ይነብር ፡ ዝክቱ ፡ ነቢይ ፡ ልሂቅ ። 26 ወሰምዐ ፡ ውእቱ ፡ ዘአግብኦ ፡ ወይቤ ፡ ዝክቱ ፡ ብእሴ ፡ እግዚአብሔር ፡ ውእቱ ፡ ዘአምረረ ፡ ቃለ ፡ እግዚአብሔር ። 28 ወሖረ ፡ ወረከቦ ፡ በድኖ ፡ ግዱፈ ፡ ውስተ ፡ ፍኖት ፡ ወአድጉ ፡ ወዐንበሳ ፡ ይቀውሙ ፡ ውስተ ፡ በድኑ ፡ ወኢበልዖ ፡ ውእቱ ፡ ዐንበሳ ፡ ሥጋሁ ፡ ለብእሴ ፡ እግዚአብሔር ፡ ወአድጎሂ ፡ ኢቀተለ ። 29 ወነሥአ ፡ በድኖ ፡ ዝክቱ ፡ ነቢይ ፡ ለብእሴ ፡ እግዚአብሔር ፡ ወጸዐኖ ፡ ላዕለ ፡ አድጉ ፡ ወአእተዎ ፡ ሀገረ ፡ ውእቱ ፡ ነቢይ ፤ 30 ከመ ፡ ይቅብሮ ፡ ውስተ ፡ መቃብረ ፡ ዚአሁ ፡ ወበከይዎ ፡ ወላሐውዎ ። 31 ወእምድኅረ ፡ ላሐውዎ ፡ ይቤሎሙ ፡ ለደቁ ፡ አመ ፡ ሞትኩ ፡ ቅብሩኒ ፡ ውስተ ፡ ዝንቱ ፡ መቃብር ፡ ኀበ ፡ ተቀብረ ፡ ብእሴ ፡ እግዚአብሔር ፡ ኀበ ፡ ሀለዉ ፡ አዕፅምቲሁ ፡ ደዩኒ ፡ ኪያየ ፡ ከመ ፡ ይሕየዉ ፡ አዕፅምትየ ፡ ምስለ ፡ አዕፅምቲሁ ። 32 እስመ ፡ ኮነ ፡ ቃሉ ፡ ዘነበበ ፡ በቃለ ፡ እግዚአብሔር ፡ ላዕለ ፡ ምሥዋዕ ፡ ዘቤቴል ፡ ወላዕለ ፡ አብያተ ፡ አማልክቲሆሙ ፡ ዘውስተ ፡ ሰማርያ ። 33 ወእምድኅረ ፡ ዝንቱ ፡ ነገር ፡ ኢተመይጠ ፡ ኢዮርብዓም ፡ እምነ ፡ እከዩ ፡ ወገብአ ፡ ወገብረ ፡ ገነውተ ፡ አማልክቲሆሙ ፡ እምውስተ ፡ ሕዝብ ፡ ወለዘፈቀደ ፡ ይኩን ፡ ገነውተ ፡ አማልክቲሆሙ ፡ ይፈቱ ፡ ወይከውን ። 34 ወኮነ ፡ ዝንቱ ፡ ነገር ፡ ኀጢአተ ፡ ላዕለ ፡ ቤተ ፡ ኢዮርብዓም ፡ ለተሠርዎ ፡ ወለማስኖ ፡ እምገጸ ፡ ምድር ።