መጽሐፈ ነገሥት ፫ 17

1 ወኮነ ፡ ቃለ ፡ እግዚአብሔር ፡ ኀበ ፡ አዩ ፡ ወልደ ፡ አናኒ ፡ በእንተ ፡ በአስ ፡ ወይቤሎ ፤ 2 እስመአ ፡ አልዐልኩከአ ፡ እምነ ፡ ምድርአ ፡ ወረሰይኩከአ ፡ ንጉሥአ ፡ ለሕዝብየአ ፡ እስራኤልአ ፡ ወሖርከ ፡ በፍኖቱ ፡ ለኢዮርብዓም ፡ ዘአስሐቶሙ ፡ ለሕዝብየ ፡ እስራኤል ፡ ከመ ፡ ያምዕዑኒ ፡ ዘከንቶሙ ፤ 3 ናሁ ፡ አነ ፡ ኣነሥእ ፡ ድኅሬሁ ፡ ለባአስ ፡ ወድኅረ ፡ ቤቱ ፡ ወእሬስዮ ፡ ከመ ፡ ቤተ ፡ ኢዮርብዓም ፡ ወልደ ፡ ናባጥአ ። 2 አብድንቲሁ ፡ ለባአስ ፡ ዘውስተ ፡ ሀገር ፡ ከለባትአ ፡ ይበልዕዎሙአ ፡ ወአብድንቲሆሙአ ፡ ዘውስተ ፡ ገዳምአ ፡ አዕዋፈ ፡ ሰማይ ፡ ይበልዕዎሙአ ። 5 ወኵሉ ፡ ነገሩ ፡ ለባአስ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ መዋዕለ ፡ መንግሥቶሙ ፡ ለእስራኤል ። 6 ወሰከበ ፡ በአስ ፡ ምስለ ፡ አበዊሁ ፡ ወተቀብረ ፡ ውስተ ፡ ተርሳ ፡ ወነግሠ ፡ ኤላ ፡ ወልዱ ፡ ህየንቴሁ ፡ አመ ፡ ፳ዓመተ ፡ መንግሥቱ ፡ ለአሳ ። 7 ወነበቦ ፡ እግዚአብሔር ፡ በእደ ፡ እዩ ፡ ወልደ ፡ አናኒ ፡ ላዕለ ፡ በአስ ፡ ወላዕለ ፡ ቤቱ ፡ በእንተ ፡ ኵሉ ፡ እኪት ፡ ዘኮነ ፡ እንተ ፡ ገብረ ፡ ቅድመ ፡ እግዚአብሔር ፡ ከመ ፡ ያምዕዖ ፡ በግብረ ፡ እደዊሁ ፡ ከመ ፡ ይኩን ፡ ከመ ፡ ቤተ ፡ ኢዮራብዓም ፡ ወከመ ፡ ይቅትልዎ ። 8 ወነግሠ ፡ ኤላ ፡ ወልደ ፡ በአስ ፡ ላዕለ ፡ እስራኤል ፡ ፪ዓመተ ፡ በተርሳ ። 9 ወአስተጋብአ ፡ ዘንበሪ ፡ ደቆ ፡ ላዕሌሁ ፡ መልአክ ፡ መንፈቀ ፡ ኀይለ ፡ አፍራስ ፡ ወኤላሰ ፡ ሀለወ ፡ ውስተ ፡ ቴርሳ ፡ ይሰቲ ፡ ወይሰክር ፡ በቤቱ ፡ ለዖሳ ፡ መጋቢሁ ፡ ዘቲርሳ ። 10 ወቦአ ፡ ዘንበሪ ፡ ወረገዞ ፡ ወቀተሎ ፡ ወነግሠ ፡ ህየንቴሁ ። 11 ወኮነ ፡ እምድኅረ ፡ ነግሠ ፡ ወነበረ ፡ ላዕለ ፡ መንበረ ፡ መንግሥቱ ፡ ቀተለ ፡ ኵሎ ፡ ቤተ ፡ ባአስ ፤ 12 በከመ ፡ ነበበ ፡ እግዚአብሔር ፡ ላዕለ ፡ ቤተ ፡ ባአስ ፡ በከመ ፡ ተናገረ ፡ በአፉሁ ፡ ለኢዩ ፡ ነቢይ ፤ 13 በእንተ ፡ ኵሉ ፡ ኀጢአቱ ፡ ለባአስ ፡ ወለኤላ ፡ ወልዱ ፡ ዘከመ ፡ አስሐቶሙ ፡ ለእስራኤል ፡ ከመ ፡ ያምዕዕዎ ፡ ለእግዚአብሔር ፡ አምላከ ፡ እስራኤል ፡ በርኵሰ ፡ ዚአሆሙ ። 14 ወዘተረፈ ፡ ነገሩ ፡ ለኤላ ፡ ዘገብረ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 15 ወዝንበሪ ፡ ነግሠ ፡ ፯ዓመተ ፡ በተርሳ ፡ ወተዓይኒሆሙሰ ፡ ለእስራኤል ፡ ውስተ ፡ ገባቶን ፡ ዘኢሎፍሊ ። 16 ወሰምዑ ፡ ሕዝብ ፡ ውስተ ፡ ተዓይን ፡ እንዘ ፡ ይብሉ ፡ ዐለወ ፡ ዝንበሪ ፡ ወቀተሎ ፡ ለንጉሥ ፡ ወነግሠ ፡ ለእስራኤል ፡ ህየንቴሁ ፡ ወከመዝ ፡ ሰምዑ ፡ ወአንገሥዎ ፡ ለዝንበሪ ፡ መልአከ ፡ ሰራዊት ፡ በይእቲ ፡ ዕለት ፡ በውስተ ፡ ትዕይንት ። 17 ወዐርገ ፡ ዝንበሪ ፡ ወኵሉ ፡ እስራኤል ፡ ምስሌሁ ፡ እምገባቶን ፡ ወዐገትዋ ፡ ለቴርሳ ፡ ወነበሩ ፡ ውስቴታ ። 18 ወእምዝ ፡ ሶበ ፡ ርእየ ፡ ዝንበሪ ፡ እስመ ፡ ተዐግተት ፡ ሀገር ፡ ወከመ ፡ አውዐዩ ፡ ቤተ ፡ ንጉሥ ፡ ወአውዐየ ፡ ውእቱሂ ፡ በቤተ ፡ ንጉሥ ፡ ወሞተ ፤ 19 በእንተ ፡ ኀጣውኢሁ ፡ ዘገብረ ፡ እኩየ ፡ ቅድመ ፡ እግዚአብሔር ፡ ዘሖረ ፡ በፍኖተ ፡ ኢዮራብዓም ፡ ወልደ ፡ ናባጥ ፡ ወበኀጢአቱ ፡ ዘአስሐቶሙ ፡ ለእስራኤል ። 20 ወተረፈ ፡ ነገሩ ፡ ለዝንበሪ ፡ ወኵሉ ፡ ዘገብረ ፡ ናሁ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 21 ወአሜሃ ፡ ተከፍለ ፡ ሕዝበ ፡ እስራኤል ፤ መንፈቀ ፡ ሕዝብ ፡ ተለውዎ ፡ ለተምኒ ፡ ወልደ ፡ ጎታን ፡ ከመ ፡ ያንግሥዎ ፤ ወመንፈቀ ፡ ሕዝብ ፡ ተለውዎ ፡ ለዝንበሪ ። 22 ወሕዝብ ፡ ዘተለውዎ ፡ ለዝንበሪ ፡ ጸንዕዎሙ ፡ ለሕዝብ ፡ እለ ፡ ተለውዎ ፡ ለተምኒ ፡ ወልደ ፡ ጎታን ፡ ወሞተ ፡ ተምኒ ፡ ወኢዮራም ፡ እኁሁ ፡ በውእቱ ፡ መዋዕል ፡ ወነግሠ ፡ ዝንበሪ ፡ እምድኅረ ፡ ተምኒ ። 23 አመ ፡ ፴ወ፩ዓመተ ፡ መንግሥቱ ፡ ለአሳ ፡ ነግሠ ፡ ዝንበሪ ፡ ለእስራኤል ፡ ፲ወ፪ዓመተ ፡ ወ፮ዓመተ ፡ ነግሠ ፡ በቴርሳ ። 24 ወተሣየጦ ፡ ዝንበሪ ፡ ለደብረ ፡ ሰምሮን ፡ በኀበ ፡ ሴምር ፡ እግዚኡ ፡ ለውእቱ ፡ ደብር ፡ በክልኤ ፡ መካልየ ፡ ብሩር ፡ ወሐነጾ ፡ ለውእቱ ፡ ደብር ፡ ወሰመዩ ፡ ስሞ ፡ ለውእቱ ፡ ደብር ፡ ዘሐነጸ ፡ በስመ ፡ ሴሜር ፡ እግዚኡ ፡ ለውእቱ ፡ ደብር ፡ ሴሜሮን ። 25 ወገብረ ፡ ዝንበሪ ፡ እኩየ ፡ ቅድመ ፡ እግዚአብሔር ፡ ወአፈድፈደ ፡ ገቢረ ፡ እኪት ፡ ፈድፋደ ፡ እምነ ፡ ኵሎሙ ፡ እለ ፡ ኮኑ ፡ እምቅድሜሁ ። 26 ወሖረ ፡ በፍኖተ ፡ ኢዮራብዓም ፡ ወልደ ፡ ናባጥ ፡ ወበኀጢአቱ ፡ ዘአስሐቶሙ ፡ ለእስራኤል ፡ ከመ ፡ ያምዕዕዎ(ሙ) ፡ በከንቶሙ ። 27 ወኵሉ ፡ ነገሩ ፡ ለዝንበሪ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ናሁ ፡ ውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ መዋዕሊሆሙ ፡ ለነገሥተ ፡ እስራኤል ። 28 ወሰከበ ፡ ዝንበሪ ፡ ምስለ ፡ አበዊሁ ፡ ወቀበርዎ ፡ ውስተ ፡ ሰማርያ ፡ ወነግሠ ፡ አካአብ ፡ ወልዱ ፡ ህየንቴሁ ። 2 አመ ፡ ፲ዓመቱ ፡ ለዝንበሪ ፡ ነግሠ ፡ ዮሳፍጥ ፡ ወልደ ፡ አሳ ፤ 3 ፴ወ፭ዓመቱ ፡ ሎቱ ፡ አመ ፡ ይነግሥ ፡ ወ፳ወ፭ዓመተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ ገቡዛ ፡ ወለተ ፡ ሴሌሕ ። 4 ወሖረ ፡ በፍኖተ ፡ አቡሁ ፡ አሳ ፡ ወኢተግሕሠ ፡ እምኔሃ ፡ ከመ ፡ ይግበር ፡ ጽድቀ ፡ ቅድመ ፡ እግዚአብሔር ፡ 5 ወባሕቱ ፡ ኢያሰሰለ ፡ አማልክቲሆሙ ፡ ዘውስተ ፡ አድባር ፡ ወይሠውዑ ፡ ወየዐጥኑ ፡ ሎሙ ፡ ሕዝብ ፡ በውስተ ፡ አድባር ። 6 ወዘከመ ፡ ረሰየ ፡ ዮሳፍጥ ፡ ምስለ ፡ ንጉሠ ፡ እስራኤል ፡ ወኵሉ ፡ ኀይሉ ፡ ዘገብረ ፡ ወዘጸብአ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕሊሆሙ ፡ ለነገሥተ ፡ ይሁዳ ። 7 ወኵሎ ፡ ዘአምለኩ ፡ በመዋዕለ ፡ አቡሁ ፡ አሰሰለ ፡ እምነ ፡ ምድር ። 8 ወአልቦ ፡ ንጉሠ ፡ በሶርያ ፡ ዘናሴብ ። 9 ወገብረ ፡ ኢዮሳፍጥ ፡ ንጉሥ ፡ ሐመረ ፡ በተርሴስ ፡ እንተ ፡ ተሐውር ፡ ውስተ ፡ ሳፍር ፡ ታእቱ ፡ ወርቀ ፡ ወ[ኢ]ሖረት ፡ እስመ ፡ ተ[ሰ]ብረት ፡ ሐመራ ፡ በጋስዮን ፡ ዘጋቢር ። 10 ወይቤሎ ፡ ንጉሠ ፡ እስራኤል ፡ ለኢዮሳፍጥ ፡ ንፈኑ ፡ ደቀከ ፡ ወደቅየ ፡ በሐመር ፡ ወአበየ ፡ ኢዮላፍጥ ። 11 ወሰከበ ፡ ኢዮሳፍጥ ፡ ምስለ ፡ አበዊሁ ፡ በሀገረ ፡ ዳዊት ፡ ወነግሠ ፡ ኢዮራም ፡ ወልዱ ፡ ህየንቴሁ ። 29 ወአመ ፡ ካልእት ፡ ዓመተ ፡ መንግሥቱ ፡ ለኢዮሳፍጥ ፡ ንጉሠ ፡ ይሁዳ ፡ ነግሠ ፡ አካአብ ፡ ወልደ ፡ ዝንበሪ ፡ ለእስራኤል ፡ በሰማርያ ፡ ፳ወ፪ዓመተ ። 30 ወገብረ ፡ አካአብ ፡ እኩየ ፡ ቅድመ ፡ እግዚአብሔር ፡ ወአፈድፈደ ፡ ገቢረ ፡ እኩይ ፡ እምኵሉ ፡ እለ ፡ እምቅድሜሁ ። 31 ወኢመጠኑ ፡ ይሖሩ ፡ በፍኖተ ፡ ኀጢአቱ ፡ ለኢዮራብዓም ፡ ወልደ ፡ ናባጥ ፡ ወአውሰበ ፡ ብእሲተ ፡ እንተ ፡ ስማ ፡ ኢያዜብል ፡ ወለተ ፡ ኢየተባሔል ፡ ንጉሠ ፡ ሲዶና ፡ ወሖረ ፡ ወተቀንየ ፡ ለበዓል ፡ ወሰገደ ፡ ሎቱ ። 32 ወገብረ ፡ ምሥዋዐ ፡ ለበዓል ፡ በውስተ ፡ [ቤተ ፡] አማልክቲሁ ፡ ዘሐነጸ ፡ በሰማርያ ። 33 ወገብረ ፡ አካአብ ፡ ምሕራማተ ፡ ዖም ፡ ወወሰከ ፡ ገቢረ ፡ በዘያምዕዖ ፡ ወያመርር ፡ በዘ ፡ ትሤሮ ፡ ነፍሱ ፡ ወአፈድፈደ ፡ ገቢረ ፡ እኪት ፡ እምነ ፡ ኵሉ ፡ ነገሥተ ፡ እስራኤል ፡ እለ ፡ ነግሡ ፡ አምቅድሜሁ ። 34 ወሐነጸ ፡ አኪያል ፡ ቤተሌዊ ፡ ወሣረራ ፡ [ለኢያሪኮ ፡] በአብሮን ፡ በኵሩ ፡ ወአቀመ፡ ኆኃቲሃ ፡ በዜጉብ ፡ ወሬዛሁ ፡ በከመ ፡ ቃለ ፡ እግዚአብሔር ፡ ዘነበበ ፡ በእደ ፡ ኢያሱ ፡ ወልደ ፡ ነዌ ።