መጽሐፈ ነገሥት ፫ 18

1 ወይቤሎ ፡ ኤልያስ ፡ ትስብያዊ ፡ ነቢይ ፡ ዘእምነ ፡ ቴሰበን ፡ ዘገለአድ ፡ ይቤሎ ፡ ለአካአብ ፡ ሕያው ፡ እግዚአብሔር ፡ አምላከ ፡ ኀይል ፡ አምላከ ፡ እስራኤል ፡ ዘቆምኩ ፡ ቅድሜሁ ፡ ከመ ፡ ኢይወርድ ፡ ዝናም ፡ በእሉ ፡ ዓመት ፡ ዘእንበለ ፡ በቃለ ፡ አፉየ ። 2 ወኮነ ፡ ቃለ ፡ እግዚአብሔር ፡ ኀበ ፡ ኤልያስ ፡ ወይቤሎ ፤ 3 ሖር ፡ መንገለ ፡ ጽባሕ ፡ ወተኀባእ ፡ ውስተ ፡ ፈለገ ፡ ከረት ፡ ዘመንገለ ፡ ገጸ ፡ ዮርዳኖስ ። 4 ወስተይ ፡ ማየ ፡ እምውእቱ ፡ ፈለግ ፡ ወእኤዝዝ ፡ ለቋዓት ፡ ይሴስዩከ ፡ በህየ ። 5 ወገብረ ፡ ኤልያስ ፡ በከመ ፡ ይቤሎ ፡ እግዚአብሔር ፡ ወነበረ ፡ ውስተ ፡ ፈለገ ፡ ከረት ፡ ዘቀድመ ፡ ዮርዳኖስ ። 6 ወቋዓት ፡ ያመጽኡ ፡ ሎቱ ፡ በአፈ ፡ ጽባሕ ፡ ኅብስተ ፡ ወፍና ፡ ሰርክ ፡ ሥጋ ፡ ወእምፈለግ ፡ ይሰቲ ፡ ማየ ። 7 ወእምድኅረ ፡ ብዙኅ ፡ መዋዕል ፡ የብሰ ፡ ውእቱ ፡ ፈለግ ፡ ወዝናምኒ ፡ ኢዘንመ ፡ ውስተ ፡ ምድር ። 8 ወኮነ ፡ ቃለ ፡ ኢግዚአብሔር ፡ ኀበ ፡ ኤልያስ ፡ ወይቤሎ ፤ 9 ተንሥእ ፡ ወሖር ፡ ውስተ ፡ ሰሬጵጣ ፡ ዘሲዶና ፡ ወናሁ ፡ አዘዝኩ ፡ በህየ ፡ ትሴስይከ ፡ ብእሲት ፡ መበለት ። 10 ወተንሥአ ፡ ወሖረ ፡ ውስተ ፡ ሰርጵጣ ፡ ወበጽሐ ፡ ውስተ ፡ አንቀጸ ፡ ሀገር ፡ ወረከበ ፡ በህየ ፡ ብእሲተ ፡ መበለተ ፡ ተሐጥብ ፡ ዕፀወ ፡ ወጸውዐ ፡ እምድኅሬሃ ፡ ኤልያስ ፡ ወይቤላ ፡ አምጽኢ ፡ ሊተ ፡ ሕቀ ፡ ማየ ፡ በግምዔ ፡ ወእስተይ ። 11 ወሖረት ፡ ታምጽእ ፡ ወጸውዐ ፡ እምድኅሬሃ ፡ ወይቤላ ፡ ተማልዒ ፡ ሊተ ፡ ምስሌኪ ፡ ፍታ ፡ ኅብስተ ። 12 ወትቤሎ ፡ ይእቲ ፡ ብእሲት ፡ ሕያው ፡ እግዚአብሔር ፡ አምላክከ ፡ ከመ ፡ አልብየ ፡ እክለ ፡ እንበለ ፡ ምልአ ፡ እድ ፡ ሐሪጽ ፡ ውስተ ፡ ቀሡት ፡ ወሕዳጥ ፡ ቅብእ ፡ ውስተ ፡ ልኵንት ፡ ወናሁ ፡ አስተጋብእ ፡ ክልኤተ ፡ ዕፀወ ፡ ወአሐውር ፡ ወእገብር ፡ ለከ ፡ ወለደቂቅየ ፡ ወንበልዕ ፡ ወንመውት ። 13 ወይቤላ ፡ ኤልያስ ፡ ተአመኒ ፡ ወሖሪ ፡ ወግበሪ ፡ በከመ ፡ ትቤሊ ፡ ወባሕቱ ፡ ሊተ ፡ ቅድሚ ፡ ግበሪ ፡ እምውስቴቱ ፡ ንስቲተ ፡ ዳፍንተ ፡ ወአምጽኢ ፡ ሊተ ፡ ወለኪሰ ፡ ወለደቂቅኪ ፡ ድኅረ ፡ ትገብሪ ። 14 እስመ ፡ ከመዝ ፡ ይቤ ፡ እግዚአብሔር ፡ ቀሡትኪኒአ ፡ አንተ ፡ ሐሪጽአ ፡ ኢተኀልቅአ ፡ ወልኵንትኪኒአ ፡ እንተ ፡ ቅብእአ ፡ ኢተኀልቅአ ፡ እስከ ፡ ይሁብአ ፡ እግዚአብሔርአ ፡ ዝናመ ፡ ላዕለአ ፡ ምድርአ ። 15 ወሖረት ፡ ይእቲ ፡ ብእሲት ፡ ወገብረት ፡ ወበልዑ ፡ [ውእቱ ፡ ወ]ይእቲ ፡ ወደቂቃ ። 16 ወውእቱኒ ፡ ቀሱታ ፡ እንተ ፡ ሐሪጽ ፡ ኢኀልቀት ፡ ወልኵንትኒ ፡ እንተ ፡ ቅብእ ፡ ኢኀልቀ ፡ በከመ ፡ ይቤ ፡ እግዚአብሔር ፡ በእደ ፡ ኤልያስ ፡ ገብሩ ። 17 ወእምዝ ፡ ደወየ ፡ ወልዳ ፡ ለይእቲ ፡ ብእሲት ፡ በዐልተ ፡ ቤት ፡ ወከብደ ፡ ደዌሁ ፡ እስከ ፡ ወፅአት ፡ ነፍሱ ፡ በላዕሌሁ ። 18 ወትቤሎ ፡ ለኤልያስ ፡ ሚሊተ ፡ ወለከ ፡ ብእሴ ፡ እግዚአብሔር ፤ መጻእከ ፡ ኀቤየ ፡ ከመ ፡ ትዝክር ፡ ኀጢአትየ ፡ ወይሙት ፡ ወልድየ ። 19 ወይቤላ ፡ ኤልያስ ፡ ለይእቲ ፡ ብእሲት ፡ ሀብንዮ ፡ ለወልድኪ ፡ ወነሥኦ ፡ እምነ ፡ ሕፅና ፡ ወአዕረጎ ፡ ውስተ ፡ ጽርሔ ፡ ኀበ ፡ የኀድር ፡ ውእቱ ፡ ወአስከቦ ፡ ወሰከበ ። 20 ወጸርኀ ፡ ኤልያስ ፡ ወይቤ ፡ እሌሊተ ፡ እግዚኦ ፡ ስምዓ ፡ ለዛቲ ፡ መበለት ፡ እስመሁ ፡ አነ ፡ ኀደርኩ ፡ ኀቤሃ ፡ ለዛቲ ፡ መበለት ፡ አሕሠምከ ፡ ላዕሌሃ ፡ ወቀተልከ ፡ ወልዳ ። 21 ወነፍሖ ፡ ለውእቱ ፡ ሕፃን ፡ ሥልሰ ፡ ወጸውዖ ፡ ለእግዚአብሔር ፡ ወይቤ ፡ እግዚአብሔር ፡ አምላኪየ ፡ ትግባእ ፡ ነፍሱ ፡ ለዝንቱ ፡ ሕፃን ፡ ላዕሌሁ ። 22 ወኮነ ፡ ከማሁ ፡ ወበከየ ፡ ውእቱ ፡ ሕፃን ። 23 ወአውረዶ ፡ እምጽርሕ ፡ ውስተ ፡ ቤት ፡ ወመጠዋ ፡ ለእሙ ፡ ወይቤላ ፡ ኤልያስ ፡ ነዋ ፡ ርእዪ ፡ ከመ ፡ ሐይወ ፡ ወልድኪ ። 24 ወትቤሎ ፡ ይእቲ ፡ ብእሲት ፡ ለኤልያስ ፡ ናሁ ፡ አእመርኩ ፡ ከመ ፡ ብአሴ ፡ እግዚአብሔር ፡ አንተ ፡ ወቃለ ፡ እግዚአብሔር ፡ ዘበጽድቅ ፡ ውስተ ፡ አፉከ ።