መጽሐፈ ነገሥት ፫ 3

1 ወበዝኀ ፡ ጥበቡ ፡ ለሰሎሞን ፡ ፈድፋደ ፡ እምነ ፡ ጥበቦሙ ፡ ለደቂቀ ፡ ቀደምት ፡ ወእምነ ፡ ኵሎሙ ፡ ጠቢባነ ፡ ግብጽ ። 2 ወነሥአ ፡ ወለተ ፡ ፈርዖን ፡ ወአእተዋ ፡ ውስተ ፡ ሀገረ ፡ ዳዊት ፡ እስከ ፡ ይፌጽም ፡ ነዲቀ ፡ ቤቱ ፡ ወቤተ ፡ እግዚአብሔር ፡ ዘቀደመ ፡ ወአረፍተ ፡ ኢየሩሳሌም ፡ ዘቅጽራ ፤ በ፯ዓመት ፡ ገብረ ፡ ወፈጸሙ ። 3 ወቦ ፡ ሰሎሞን ፡ ፯፼ጸዋሬ ፡ ዕፀ ፡ አርሶን ፡ ወ፰፼ወቀርተ ፡ እለ ፡ ውስተ ፡ ደብር ። 4 ወገብረ ፡ ሰሎሞን ፡ ባሕረ ፡ ወተቅዋማቲሃ ፡ ወመዓክክተ ፡ ዐበይተ ፡ ወአዕማደኒ ፡ ወጽጌያተ ፡ ወነደቃ ፡ ለቅጽራሂ ፡ ወአፀፍፀፋ ፡ ወነሰታ ፡ ለሀገረ ፡ ዳዊት ። 5 ወእምዝ ፡ ዐርገት ፡ ወለተ ፡ ፈርዖን ፡ እምሀገረ ፡ ዳዊት ፡ ውስተ ፡ ቤታ ፡ ዘነደቀ ፡ ላቲ ፡ ወውእተ ፡ አሚረ ፡ ነደቃ ፡ ለአቀራን ። 6 ወሰሎሞንሰ ፡ ያዐርግ ፡ መሥዋዕተ ፡ ሥልሰ ፡ ለለዓመት ፡ ወ[ዘ]ሰላም ፡ ውስተ ፡ ምሥዋዕ ፡ ዘነደቀ ፡ ለእግዚአብሔር ፡ ወየዐጥን ፡ ቅድመ ፡ እግዚአብሔር ፡ ወፈጸሞ ፡ ለውእቱ ፡ ቤት ። 7 ወእሉ ፡ እሙንቱ ፡ እለ ፡ ሤመ ፡ ሰሎሞን ፡ ላዕለ ፡ ግብር ፡ ፴፻ወ፮፻ሊቃናተ ፡ ሕዝብ ፡ እለ ፡ ይገብሩ ፡ ግብረ ። 8 ወነደቆን ፡ ለአሱር ፡ ወለመግዶ ፡ ወለጋዜር ፡ ወለቤቶሮን ፡ እንተ ፡ ላዕሉ ፡ ወ[ለ]ባላት ። 9 ወእምድኅረ ፡ ነደቀ ፡ ቤተ ፡ እግዚአብሔር ፡ ወአረፋተ ፡ ኢየሩሳሌም ፡ ወእምድኅረ[ዝ] ፡ ነደቆን ፡ ለእላንቱ ፡ አህጉር ። 10 ወእንዘ ፡ ዓዲሁ ፡ ሕያው ፡ ውእቱ ፡ ዳዊት ፡ አዘዞ ፡ ለሰሎሞን ፡ ወይቤሎ ፡ ናሁ ፡ ኀቤከ ፡ ሳሚ ፡ ወልደ ፡ ጌራ ፡ ወልደ ፡ ዘርአ ፡ ኢያሚን ፡ ዘእምነ ፡ ባቱሪም ፡ ወውእቱ ፡ ረገመኒ ፡ እኩየ ፡ መርገመ ፡ አመ ፡ መዋዕለ ፡ አሐውር ፡ በተዓይን ፡ ወወረደ ፡ ውእቱ ፡ ወተቀበለኒ ፡ ውስተ ፡ ዮርዳኖስ ። 11 ወመሐልኩ ፡ ሎቱ ፡ በእግዚአብሔር ፡ ወእቤሎ ፡ ከመ ፡ ኢይመውት ፡ በኀፂን ። 12 ወይእዜኒ ፡ ኢታንጽሖ ፡ እስመ ፡ ብእሲ ፡ ጠቢብ ፡ አንተ ፡ ወታአምር ፡ ዘከመ ፡ ትሬስዮ ፡ ወታወርድ ፡ ሢበቲሁ ፡ በደም ፡ ውስተ ፡ መቃብር ። 36 ወጸውዖ ፡ ሰሎሞን ፡ ለሳሚ ፡ ወይቤሎ ፡ ንድቅ ፡ ለከ ፡ ቤተ ፡ ውስተ ፡ ኢየሩሳሌም ፡ ወንበር ፡ ህየ ፡ ወኢትፃእ ፡ እምህየ ፡ ወኢአይቴ ። 37 ወአመ ፡ ዕለተ ፡ ትወፅእ ፡ ወተዐዱ ፡ ፈለገ ፡ ቄድሮን ፡ አእምር ፡ ከመ ፡ ሞተ ፡ ትመውት ፡ ወደምከ ፡ ይገብእ ፡ ላዕለ ፡ ርእስከ ፡ ወአምሐሎ ፡ ንጉሥ ፡ ይእተ ፡ አሚረ ። 38 ወይቤሎ ፡ ሳሚ ፡ ለንጉሥ ፡ ሠናየ ፡ ነበብከ ፡ ቃለ ፡ እግዚእየ ፡ ንጉሥ ፡ ወከማሁ ፡ ይገብር ፡ ገብርከ ፡ ወነበረ ፡ ሳሚ ፡ ውስተ ፡ ኢየሩሳሌም ፡ ፫ዓመተ ። 39 ወአምድኅረ ፡ ፫ዓመት ፡ ተኀጥእዎ ፡ ፫አግብርቲሁ ፡ ለሳሚ ፡ ኀበ ፡ እንኵስ ፡ ወልደ ፡ ሜካ ፡ ንጉሠ ፡ ጌት ፡ ወአይድዕዎ ፡ ለሳሚ ፡ ወይቤልዎ ፡ ሀለዉ ፡ አግብርቲከ ፡ ውስተ ፡ ጌት ። 40 ወተንሥአ ፡ ሳሚ ፡ ወረሐነ ፡ አድጎ ፡ ወሖረ ፡ ውስተ ፡ ጌት ፡ ኀበ ፡ እንኵስ ፡ ይኅሥሥ ፡ አግብርቲሁ ፡ ወሖረ ፡ ሳሚ ፡ ወአእተዎሙ ፡ ለአግብርቲሁ ፡ እምነ ፡ ጌት ። 41 ወአይድዕዎ ፡ ለሰሎሞን ፡ ወይቤልዎ ፡ ሖረ ፡ ሳሚ ፡ ውስተ ፡ ጌት ፡ እምነ ፡ ኢየሩሳሌም ፡ ወአእተዎሙ ፡ ለአግብርቲሁ ። 42 ወለአከ ፡ ንጉሥ ፡ ወይቤሎ ፡ ለሳሚ ፡ አኮኑ ፡ አምሐልኩከ ፡ በእግዚአብሔር ፡ ወአስማዕኩ ፡ ለከ ፡ እንዘ ፡ አብል ፡ አመ ፡ ትወፅእ ፡ እምኢየሩሳሌም ፡ ወተሕውር ፡ አው ፡ ለየማን ፡ አው ፡ ለፀጋም ፡ አእምሮ ፡ አእምር ፡ ከመ ፡ ሞተ ፡ ትመውት ፡ አንተ ። 43 ወበእፎ ፡ ኢዐቀብከ ፡ ትእዛዘ ፡ እግዚአብሔር ፡ ወመሐላሁ ፡ ዘአዘዝኩከ ። 44 ወይቤሎ ፡ ንጉሥ ፡ ለሳሚ ፡ ለሊከ ፡ ታአምር ፡ ኵሎ ፡ እከየከ ፡ ወደቀልየከ ፡ ልብከ ፡ ዘገበርከ ፡ ላዕለ ፡ ዳዊት ፡ አቡየ ፡ ወአግብኣ ፡ እግዚአብሔር ፡ ለእከይከ ፡ ላዕለ ፡ ርእስከ ። 45 ወሰሎሞንሰ ፡ ቡሩክ ፡ ንጉሥ ፡ ወመንበረ ፡ ዳዊት ፡ ድልው ፡ ለዓለም ፡ ቅድመ ፡ እግዚአብሔር ። 46 ወአዘዞ ፡ ሰሎሞን ፡ ንጉሥ ፡ ለብንያስ ፡ ወልደ ፡ ዮዳሔ ፡ ወወፅአ ፡ ወቀተሎ ። 13 ወንጉሥሰ ፡ ሰሎሞን ፡ ማእምር ፡ ወጠቢብ ፡ ፈድፋደ ፡ ወይሁዳ ፡ ወእስራኤል ፡ ብዙኃን ፡ አሙንቱ ፡ ፈድፋደ ፡ ከመ ፡ ኆፃ ፡ ባሕር ፡ ብዝኆሙ ፡ ወይበልዑ ፡ ወደሰትዩ ፡ ወይትፌሥሑ ። 14 ወሰሎሞንሰ ፡ ኵነነ ፡ ኵሎ ፡ መንግሥታተ ፡ ወያመጽኡ ፡ ለሰሎሞን ፡ አምኃ ፡ ወተቀንዩ ፡ ሎቱ ፡ በኵሉ ፡ መዋዕለ ፡ ሕይወቱ ። 15 ወአኀዘ ፡ ሰሎሞን ፡ ያእቱ ፡ እምውስተ ፡ ዐበይት ፡ ዕፀወ ፡ ሊባኖስ ፡ ወውእቱ ፡ ነደቃ ፡ ለተርሜ ፡ በገዳም ። 16 ወዝንቱ ፡ ውእቱ ፡ ምሳሑ ፡ ለሰሎሞን ፡ ለለአሐቲ ፡ ዕለት ፤ ፴በመስፈርተ ፡ ቆሮስ ፡ ስንዳሌ ፡ ወ፷ቆሮስ ፡ ልቱም ፡ ወ፲አልህምተ ፡ መጋዝእት ፡ ወ፳አልህምት ፡ አስዋር ፡ ወ፻አባግዕ ፡ ዘእንበለ ፡ ወይጠል ፡ ወሀየል ፡ ወመጋዝአ ፡ ደዋርህ ። 17 እስመ ፡ አልቦ ፡ መልአከ ፡ በኵሉ ፡ ማዕዶተ ፡ ፈለግ ፡ እምነ ፡ ራፊ ፡ እስከ ፡ ጋዛ ፡ በኵሉ ፡ መንግሥታተ ፡ ዘማዕዶተ ፡ ፈለግ ፡ ወስንኣ ፡ ምስሌሁ ፡ ኵሎሙ ፡ እለ ፡ ይዳወልዎ ፡ እለ ፡ በውዱ ። 18 ወይኑበሩ ፡ ይሁዳ ፡ ወእስራኤል ፡ ኵሎሙ ፡ ተአሚኖሙ ፡ ታሕተ ፡ ወይኖሙ ፡ ወበለሶሙ ፡ ወይበልዑ ፡ ወይሰትዩ ፡ እምነ ፡ ዳን ፡ እስከ ፡ ቤርሳቤሕ ፡ በኵሉ ፡ መዋዕሊሁ ፡ ለሰሎሞን ። 19 ወእሉ ፡ እሙንቱ ፡ መላእክቲሁ ፡ ለሰሎሞን ፡ አዛርያስ ፡ ወልደ ፡ ሳዶቅ ፡ ካህን ፡ ወኦርኒ ፡ ወልደ ፡ ናታን ፡ መልአኮሙ ፡ ለእለ ፡ ይቀውሙ ፡ ኀቤሁ ፡ ወኤድሮንሰ ፡ ላዕለ ፡ ቤቱ ፡ ወሱባ ፡ ጸሓፊ ፡ ወባሳ ፡ ወልደ ፡ አኪታለም ፡ መዘክር ፤ 20 ወአቢያ ፡ ወልደ ፡ ኢዮአብ ፡ መልአከ ፡ ሰርዌ ፡ ወአኪሬ ፡ ወልደ ፡ ኢድራይ ፡ ላዕለ ፡ አርሶስ ፡ ወብንያስ ፡ ወልደ ፡ ዮዳሔ ፡ ላዕለ ፡ ኵሉ ፡ ኀይሉ ፡ ወላዕለ ፡ ጰልንትዩ ፡ ወዝኩር ፡ ወልደ ፡ ናታን ፡ መዝክር ። 21 ወቦ ፡ ሰሎሞን ፡ ፬፼አፍራሰ ፡ እለ ፡ ይስሕቡ ፡ ሰረገላተ ፡ ወ፼ወ፳፻አፍራሰ ፡ መራድ ። 22 ወውእቱ ፡ መኰንን ፡ ለኵሉ ፡ መንግሥታት ፡ እምነ ፡ ተከዚ ፡ እስከ ፡ ምድረ ፡ ኢሎፍሊ ፡ ወእስከ ፡ ደወለ ፡ ግብጽ ።