መጽሐፈ ነገሥት ፫ 4

1 ወሰሎሞንሰ ፡ ወልደ ፡ ዳዊት ፡ ነግሠ ፡ ላዕላ ፡ እሰራኤል ፡ ወላዕለ ፡ ይሁዳ ፡ በኢየሩሳሌም ፤ እንዘ ፡ የዐጥኑ ፡ ውስተ ፡ አድባር ፡ እስመ ፡ ኢተሐንጸ ፡ ቤተ ፡ እግዚአብሔር ፡ ይእተ ፡ አሚረ ። 3 ወአፍቀሮ ፡ ሰሎሞን ፡ ለእግዚአብሔር ፡ ከመ ፡ ይሖር ፡ በትእዛዘ ፡ ዳዊት ፡ አቡሁ ፡ ወባሕቱ ፡ ውስተ ፡ አውግር ፡ ይሠውዕ ፡ ወየዐጥን ። 4 ወተንሥአ ፡ ወሖረ ፡ ውስተ ፡ ገባኦን ፡ ከመ ፡ ይሡዕ ፡ በህየ ፡ እስመ ፡ ደእቲ ፡ ትነውኅ ፡ ወተዐቢ ፤ ፲፻መሥዋዕተ ፡ ገብረ ፡ ሰሎሞን ፡ በገባኦን ። 5 ወአስተርአዮ ፡ እግዚአብሔር ፡ ለሰሎሞን ፡ ሌሊተ ፡ በሕልም ፡ ወይቤሎ ፡ እግዚአብሔር ፡ ለሰሎሞን ፡ ሰአል ፡ ለከ ፡ ስእለተ ። 6 ወይቤ ፡ ሰሎሞን ፡ አንተ ፡ ገበርከ ፡ ለገብርከ ፡ ዳዊት ፡ አቡየ ፡ ምሕረተ ፡ ዐቢየ ፡ በከመ ፡ ሖረ ፡ ቅድሜከ ፡ በጽድቅ ፡ ወበርትዕ ፡ ወበንጽሐ ፡ ልብ ፡ ምሰሌከ ፡ ወዐቀብከ ፡ ሎቱ ፡ ዘንተ ፡ ምሕረተ ፡ ዐቢየ ፡ ከመ ፡ ታንብሮ ፡ ለወልዱ ፡ ላዕለ ፡ መንበሩ ፡ በዛቲ ፡ ዕለት ። 7 ወይእዜኒ ፡ እግዚኦ ፡ አምላኪየ ፡ አንተ ፡ ረሰይከ ፡ ለገብርከ ፡ ህየንተ ፡ ዳዊት ፡ አቡየ ፡ ወአንሰ ፡ ሕፃን ፡ ንስቲት ፡ ወኢያአምር ፡ ሙፃእየ ፡ ወሙባእየ ። 8 ወገብርከሰ ፡ ሀለወ ፡ ማእከለ ፡ ሕዝብከ ፡ ዘኀረይከ ፡ ሕዝበ ፡ ብዙኀ ፡ ዘኢይትኌለቍ ። 9 ወሀበ ፡ ለገብርከ ፡ ልበ ፡ በዘ ፡ ይሰምዕ ፡ ወያገብእ ፡ ፍትሐ ፡ በጽድቅ ፡ ለሕዝብከ ፡ ወከመ ፡ ያእምር ፡ ሠናየ ፡ እምነ ፡ እኩይ ፡ ወይፍልጥ ፡ እስመ ፡ አልቦ ፡ ዘይክል ፡ ኰንኖቶ ፡ ለዝንቱ ፡ ሕዝብከ ፡ ክቡድ ። 10 ወአደሞ ፡ ቅድሜሁ ፡ ለእግዚአብሔር ፡ እስመ ፡ ሰአሎ ፡ ሰሎሞን ፡ ዘንተ ፡ ነገረ ። 11 ወይቤሎ ፡ እግዚአብሔር ፡ እስመ ፡ ሰአልከ ፡ እምኀቤየ ፡ ዘንተ ፡ ቃለ ፡ ወኢሰአልከ ፡ ለከ ፡ ብዙኀ ፡ መዋዕለ ፡ ወኢሰአልከ ፡ ለከ ፡ ነፍሰ ፡ ፀርከ ፡ አላ ፡ ሰአልከ ፡ ለከ ፡ ከመ ፡ ታእምር ፡ ሰሚዐ ፡ ፍትሕ ፤ ናሁ ፡ ገበርኩ ፡ ለከ ፡ በከመ ፡ ትቤ ፤ 12 ናሁ ፡ ወሀብኩከ ፡ ልበ ፡ ጠቢበ ፡ ወለባዌ ፡ ከመ ፡ አልቦ ፡ ዘኮነ ፡ ዘእምቅድሜከ ፡ ወእምድኅሬከኒ ፡ ኢደትነሣእ ፡ ዘከማከ ። 13 ወዘሂ ፡ ኢሰአልከኒ ፡ እሁበከ ፡ ብዕለ ፡ ወክብረ ፡ ከመ ፡ ኢኮነ ፡ ሰብእ ፡ ከማከ ፡ በመንግሥቱ ። 14 ወእመ ፡ ሖርከ ፡ በፍኖትየ ፡ ወዐቀብከ ፡ ትእዛዝየ ፡ ወሥርዐትየ ፡ በከመ ፡ ሖረ ፡ ዳዊት ፡ አቡከ ፡ ኣበዝኀ ፡ መዋዕሊከ ። 15 ወነቅሀ ፡ ሰሎሞን ፡ ወአእመረ ፡ ከመ ፡ ሕልም ፡ ውእቱ ፡ ወተንሥአ ፡ ወሖረ ፡ ኢየሩሳሌም ፡ ወቆመ ፡ ቅድመ ፡ ምሥዋዕ ፡ ዘቅድመ ፡ ታቦተ ፡ ሕጉ ፡ ለአግኪኡበሔር ፡ በጽዮን ፡ ወአብአ ፡ መሥዋዕተ ፡ ወገብረ ፡ በሰላም ፡ ወገብረ ፡ ምሳሐ ፡ ዐቢየ ፡ ሎቱ ፡ ወለሰብኡ ። 16 ወይእተ ፡ አሚረ ፡ መጽኣ ፡ ፪አንስት ፡ ዘማት ፡ ኀበ ፡ ንጉሥ ፡ ወቆማ ፡ ቅድሜሁ ። 17 ወትቤ ፡ አሐቲ ፡ ብእሲት ፡ ስምዐኒ ፡ እግዚእየ ፡ አነ ፡ ወዛቲ ፡ ብእሲት ፡ ነኀድር ፡ ውስተ ፡ ፩ቤት ፡ ወወለድነ ፡ በ ፩መካን ። 18 ወአመ ፡ ሣልስት ፡ ዕለት ፡ አምዘ ፡ ወለድኩ ፡ አነ ፡ ወለደት ፡ ዛቲኒ ፡ ብእሲት ፡ ወንነብር ፡ ኅቡረ ፡ ወአልቦ ፡ ምስሌነ ፡ ወኢመኑሂ ፡ እንበለ ፡ ክልኤነ ፡ ውስተ ፡ ውእቱ ፡ ቤት ። 19 ወሞተ ፡ ወልዳ ፡ ለይእቲ ፡ ብእሲት ፡ በሌሊት ፡ እስመ ፡ ሰከበት ፡ ላዕሌሁ ። 20 ወተንሥአት ፡ መንፈቀ ፡ ሌሊት ፡ ወነሥአት ፡ ወልድየ ፡ እምነ ፡ ሕፅንየ ፡ ወአስከበቶ ፡ ውስተ ፡ ሕፅና ፡ ወወልደ ፡ ዚአሃ ፡ ዘሞተ ፡ አስከበቶ ፡ ውስተ ፡ ሕፅንየ ። 21 ወሶበ ፡ ነቃህኩ ፡ በጽባሕ ፡ ከመ ፡ ኣጥቡ ፡ ሕፃንየ ፡ ረከብኩ ፡ ዝክተ ፡ ምውተ ፡ ወሶበ ፡ ጸብሐ ፡ ርኢክዎ ፡ ወናሁ ፡ ኢኮነ ፡ ዚአየ ፡ ወልድየ ፡ ዘወለድኩ ። 22 ወትቤ ፡ እንታክቲ ፡ ብእሲት ፡ ካልእት ፡ አልቦ ፤ ወልድየ ፡ ዝንቱ ፡ ዘሕያው ፡ ወወልድኪ ፡ ዝከቱ ፡ ምውት ፡ ወተባሀላ ፡ በቅድመ ፡ ንጉሥ ። 23 ወይቤሎን ፡ ንጉሥ ፡ አንቲኒ ፡ ትቤሊ ፡ ከመ ፡ ዝንቱ ፡ ሕያው ፡ ወልድየ ፡ ወወልደ ፡ ዚአሃ ፡ ዘሞተ ፡ ወአንቲኒ ፡ ትቤሊ ፡ አልቦ ፤ ወልደ ፡ ዚአየ ፡ ውእቱ ፡ ሕያው ፡ ወወልደ ፡ ዚአኪ ፡ በሞተ ። 24 ወይቤ ፡ ንጉሥ ፡ አምጽኡ ፡ መጥባሕተ ፡ ወአምጽኡ ፡ መጥባሕተ ፡ ቅድመ ፡ ንጉሥ ። 25 ወይቤ ፡ ንጉሥ ፡ ምትርዎ ፡ ለዝንቱ ፡ ሕፃን ፡ ዘሕያው ፡ ለክልኤ ፡ ወሀቡ ፡ መንፈቆ ፡ ለዛቲ ፡ ወመንፈቆ ፡ ለእንታክቲ ። 26 ወአውሥአት ፡ እንታክቲ ፡ ብእሲት ፡ እንተ ፡ ሕያው ፡ ሕፃና ፡ ወትቤሎ ፡ ለንጉሥ ፡ እሰመ ፡ ተህውከ ፡ ማኅፀና ፡ በእንተ ፡ ወልዳ ፡ ወትቤ ፡ ሀባ ፡ እግዚኦ ፡ ሕፃነ ፡ ሕያዎ ፡ ወቀቲለሰ ፡ ኢትቅትልዎ ፤ ወትቤ ፡ እንታክቲ ፡ ኢሊተ ፡ ኢይኩን ፡ ወኢላቲ ፤ ከፍሉነ ። 27 ወአውሥአ ፡ ንጉሥ ፡ ወይቤ ፡ ሀብዋ ፡ ሕፃና ፡ ለዛቲ ፡ ብእሲት ፡ እንተ ፡ ትቤ ፡ ሀብዋ ፡ ኪያሁ ፡ ወቀቲለሰ ፡ ኢትቅትልዎ ፤ ይእቲ ፡ እሙ ። 28 ወሰምዑ ፡ ኵሎሙ ፡ እስራኤል ፡ ዘንተ ፡ ፍትሐ ፡ ዘፈትሐ ፡ ንጉሥ ፡ ወፈርሁ ፡ እምቅድመ ፡ ገጹ ፡ ለንጉሥ ፡ እስመ ፡ ርእዩ ፡ ከመ ፡ ጥበቡ ፡ ለእግዚአብሔር ፡ ሀሎ ፡ ላዕሌሁ ፡ ከመ ፡ ይግበር ፡ ኵነኔ ።