መጽሐፈ ነገሥት ፬ 13

1 አመ ፡ ፳ወ፫ዓመተ ፡ መንግሥቱ ፡ ለኢዮያስ ፡ ወልደ ፡ አካዝያስ ፡ ንጉሠ ፡ ይሁዳ ፡ ነግሠ ፡ ዮአካስ ፡ ወልደ ፡ ኢዩ ፡ በሰማርያ ፡ ፲ወ፯ክረምተ ። 2 ወገብረ ፡ እኩየ ፡ ቅድመ ፡ እግዚአብሔር ፡ ወሖረ ፡ ወተለወ ፡ ኀጢአተ ፡ ኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ፡ ወኢኀደገ ፡ ኪያሃ ። 3 ወተምዕዐ ፡ እግዚአብሔር ፡ መዐተ ፡ ላዕለ ፡ እስራኤል ፡ ወአግብኦሙ ፡ ውስተ ፡ እዴሁ ፡ ለአዛሔል ፡ ንጉሠ ፡ ሶርያ ፡ ወውስተ ፡ እዴሁ ፡ ለወልደ ፡ አዴር ፡ ወልደ ፡ አዛሔል ፡ በኵሉ ፡ መዋዕል ። 4 ወተጋነየ ፡ ዮአካዝ ፡ ለገጸ ፡ እግዚአብሔር ፡ እስመ ፡ ርእየ ፡ ሕማሞሙ ፡ ለእስራኤል ፡ እስመ ፡ ሣቀዮሙ ፡ ንጉሠ ፡ ሶርያ ። 5 ወፈነወ ፡ እግዚአብሔር ፡ መድኀኒተ ፡ ለእስራኤል ፡ ወአውፅኦሙ ፡ እምውስተ ፡ እዴሆሙ ፡ ለሶርያ ፡ ወነበሩ ፡ ደቂቀ ፡ እስራኤል ፡ ውስተ ፡ አብያቲሆሙ ፡ ከመ ፡ ዘልፈ ። 6 ወባሕቱ ፡ ኢኀደጉ ፡ ኀጢአተ ፡ ቤተ ፡ ኢዮርብዓም ፡ ዘአስሐቶሙ ፡ ለእስራኤል ፡ ወተለዉ ፡ ኪያሃ ፡ ወምሕራመ ፡ ዖምኒ ፡ ቆመ ፡ ውስተ ፡ ስማርያ ። 7 እስመ ፡ አልቦ ፡ ሕዝብ ፡ ዘተረፈ ፡ ለኢዮአክስ ፡ ዘእንበለ ፡ ፶አፍራስ ፡ ወ፲ሰረገላት ፡ ወ[፼]ብእሲ ፡ አጋር ፡ እስመ ፡ ቀተሎሙ ፡ ለኵሎሙ ፡ ንጉሠ ፡ ሶርያ ፡ ወረሰዮሙ ፡ ወኬዶሙ ፡ ከመ ፡ መሬት ። 8 ወኵሉ ፡ ነገሩ ፡ ለኢዮአክስ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ናሁ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕሊሆሙ ፡ ለነገሥተ ፡ እስራኤል ። 9 ወሰከበ ፡ ዮአክስ ፡ ምስለ ፡ አበዊሁ ፡ ወቀበርዎ ፡ ውስተ ፡ ሰማርያ ፡ ወነግሠ ፡ ዮአስ ፡ ወልዱ ፡ ህየንቴሁ ። 10 አመ ፡ ፴ወ፯ዓመተ ፡ መንግሥቱ ፡ ለኢዮአስ ፡ ንጉሠ ፡ ይሁዳ ፡ ነግሠ ፡ ዮአስ ፡ ወልደ ፡ ዮአክስ ፡ ለእስራኤል ፡ በሰማርያ ፡ ፲ወ፮ዓመተ ። 11 ወገብረ ፡ እኩየ ፡ ቅድመ ፡ እግዚአብሔር ፡ ወኢኀደገ ፡ ኵሎ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ፡ ወኪያሃ ፡ ተለወ ። 12 ወኵሉ ፡ ነገሩ ፡ ለዮአስ ፡ ወኵሉ ፡ ዘገብረ ፡ ወኵሎ ፡ ኀይሉ ፡ ናሁ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያት ፡ መዋዕሊሆሙ ፡ ለነገሥተ ፡ [እስራኤል] ። 13 ወሰከበ ፡ ምስለ ፡ አበዊሁ ፡ ወካልእ ፡ ኢዮርብዓም ፡ ነግሠ ፡ ወነበረ ፡ ውስተ ፡ መንበሩ ፡ በሰማርያ ፡ ምስለ ፡ ደቂቀ ፡ እስራኤል ። 14 ወኤልሳዕኒ ፡ ደወየ ፡ ደዌሁ ፡ ዘዘልፈ ፡ እንተ ፡ ባቲ ፡ ይመውት ፡ ወወረደ ፡ ኀቤሁ ፡ ኢዮአስ ፡ ንጉሠ ፡ እስራኤል ፡ ወበከየ ፡ በቅድሜሁ ፡ ወይቤለመ ፡ አባ ፡ አባ ፡ ሰረገላቲሆሙ ፡ ለእስራኤል ፡ ወአፍራሲሆሙ ። 15 ወይቤሎ ፡ ኤልሳዕ ፡ ንሣእ ፡ ቀስተከ ፡ ወሐጸከ ። 16 ወይቤሎ ፡ ለንጉሥ ፡ ምስክ ፡ ቀስተከ ፡ ወወስቅ ፡ ሐጸከ ፡ ወወሰቀ ፡ ዮአስ ፡ ወመሰከ ፡ ቀስቶ ፡ በእዴሁ ፡ ወወደየ ፡ ኤልሳዕ ፡ እዴሁ ፡ ላዕለ ፡ እዴሁ ፡ ለንጉሥ ። 17 ወይቤሎ ፡ አርኁ ፡ መሰኮተ ፡ መንገለ ፡ ጽባሕ ፡ ወአርኀወ ፡ ወይቤሎ ፡ ኤልሳዕ ፡ ንድፍ ፡ ወነደፈ ፡ ወይቤሎ ፡ ኤልሳዕ ፡ ሐጸ ፡ መድኀኒቱ ፡ ለእግዚአብሔር ፡ ወሐጸ ፡ ተምውእቶሙ ፡ ለሶርያ ፡ ወትቀትሎሙ ፡ ለሶርያ ፡ እምነ ፡ አፌቅ ፡ እስከ ፡ ጽንፋ ። 18 ወይቤሎ ፡ ኤልሳዕ ፡ ንሣእ ፡ ቀስተ ፡ ወንድፍ ፡ ውስተ ፡ ምድር ፡ ወነደፈ ፡ ንጉሥ ፡ ሥልሰ ፡ ወኀደገ ። 19 ወተከዘ ፡ ብእሴ ፡ እግዚአብሔር ፡ ወይቤሎ ፡ ሶበ ፡ ነደፍከ ፡ ስብዐ ፡ ወእመ ፡ አኮ ፡ ስድሰ ፡ እምቀተልኮሙ ፡ ለሶርያ ፡ ወእምአኅለቆሙ ፡ ወይእዜሰ ፡ ሥልሰ ፡ ትቀትሎሙ ፡ ለሶርያ ። 20 ወሞተ ፡ ኤልሳዕ ፡ ወቀበርዎ ፡ ወበውእቱ ፡ ዓመት ፡ ሮድዎሙ ፡ ብሔሮሙ ፡ ሞአብ ። 21 ወእንዘ ፡ ይቀብርዎ ፡ በኤልሳዕ ፡ አምጽኡ ፡ ካልአ ፡ ብእሴ ፡ ይቅብሩ ፡ ወሶበ ፡ ይሬእዩ ፡ ይረውድዎሙ ፡ ገደፍዎ ፡ በድኖ ፡ ለውእቱ ፡ ብእሲ ፡ ውስተ ፡ መቃብረ ፡ ኤልሳዕ ፡ ወወረደ ፡ ውእቱ ፡ በድን ፡ ላዕሰ ፡ ኤልሳዕ ፡ ወለከፎ ፡ ውእቱ ፡ በድን ፡ ለበድነ ፡ ኤልሳዕ ፡ ወሐይወ ፡ ውእቱ ፡ ብእሲ ፡ ወተንሥአ ፡ ወቆመ ፡ በእገሪሁ ። 22 ወሣቀዮሙ ፡ አዛሔል ፡ ለእስራኤል ፡ በኵሉ ፡ መዋዕሊሁ ፡ ለዮአስ ። 23 ወመሐሮሙ ፡ እግዚአብሔር ፡ ወተሣሀሎሙ ፡ በእንተ ፡ ማሕላሁ ፡ ዘመሐለ ፡ ለአብርሃም ፡ ወለይስሐቅ ፡ ወለያዕቆብ ፡ ወኢፈቀደ ፡ እግዚአብሔር ፡ ያጥፍኦሙ ፡ ወኢገደፎሙ ፡ እምቅድመ ፡ ገጹ ። 24 ወሞተ ፡ አዛሔል ፡ ንጉሠ ፡ ሶርያ ፡ ወነግሠ ፡ ወልደ ፡ አዴር ፡ ወልዱ ፡ ህየንቴሁ ። 25 ወተመይጠ ፡ ዮአስ ፡ ወልደ ፡ ዮአክስ ፡ ወሄደ ፡ አህጉሪሁ ፡ ለወልደ ፡ አዴር ፡ ወልደ ፡ አዛሔል ፡ እለ ፡ ነሥአ ፡ እምኀበ ፡ ዮአክስ ፡ አቡሁ ፡ ወአመ ፡ ተቃተሎ ፡ ሥልሰ ፡ ቀተሎ ፡ ዮአስ ፡ ወሄደ ፡ አህጉሪሆሙ ፡ ለእስራኤል ።