መጽሐፈ ነገሥት ፬ 12

1 አመ ፡ ሳብዕ ፡ ዓመተ ፡ መንግሥቱ ፡ ለኢዩ ፡ ነግሠ ፡ ኢዮአስ ፡ ወ፵ክረምተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ አብያ ፡ ወለተ ፡ ቤርሳቤሕ ። 2 ወገብረ ፡ ኢዮአስ ፡ ጽድቀ ፡ ቅድመ ፡ እግዚአብሔር ፡ በኵሉ ፡ መዋዕል ፡ ዘመሀሮ ፡ ዮዳሔ ፡ ካህን ። 3 ወባሕቱ ፡ አብያተ ፡ አማልክት ፡ ኢያሰሰለ ፡ ወሕዝብኒ ፡ ህየ ፡ ዳእሙ ፡ የዐጥኑ ፡ ወይሠውዑ ፡ ውስተ ፡ ቤተ ፡ አማልክት ። 4 ወይቤሎሙ ፡ ኢዮአስ ፡ ለካህናት ፡ ኵሎ ፡ ወርቀ ፡ ዘይቄድሱ ፡ ወያበውኡ ፡ ለቤተ ፡ እግዚአብሔር ፡ ወወርቀኒ ፡ ዘቤዘ ፡ ወኵሎ ፡ ወርቀ ፡ ዘበፈቃዱ ፡ ያበውእ ፡ ሰብእ ፡ ለቤተ ፡ እግዚአብሔር ፤ 5 ለይንሥኡ ፡ ካህናት ፡ ለርእሶሙ ፡ ኵሉ ፡ ብእሲ ፡ እምውስተ ፡ ተግባሩ ፡ ወለሊሆሙ ፡ ይዕቀቡ ፡ ቤዴቀ ፡ ዘበቤቱ ። 6 ወእምዝ ፡ አመ ፡ ፴ወ፫ዓመተ ፡ መንግሥቱ ፡ ለኢዮአስ ፡ ሶበ ፡ ርእየ ፡ ኢዮአስ ፡ ካህናት ፡ ከመ ፡ ኢዐቀቡ ፡ ቤዴቀ ፡ ዘውስተ ፡ ቤቱ ፤ 7 ጸውዖ ፡ ኢዮአስ ፡ ንጉሥ ፡ ለዮዳሔ ፡ ካህን ፡ ወለካህናትኒ ፡ ወይቤሎሙ ፡ በእፎ ፡ ኢዐቀብክሙ ፡ ቤዴቀ ፡ ዘውስተ ፡ ቤት ፤ እምይእዜ ፡ እንከ ፡ ኢትንሥኡ ፡ ወርቆ ፡ ለተግባርክሙ ፤ ለቤዴቅ ፡ ዘውስተ ፡ ቤት ፡ ያብእዎ ። 8 ወተካየዱ ፡ ካህናት ፡ ከመ ፡ ኢይንሥኡ ፡ እንከ ፡ ወርቀ ፡ መባእ ፡ ዘሕዝብ ፡ ወከመ ፡ ይዕቀቡ ፡ ቤዴቀ ፡ ዘውስተ ፡ ቤት ። 9 ወነሥአ ፡ ዮዳሔ ፡ ካህን ፡ አሐተ ፡ ታቦተ ፡ ወሰቈራ ፡ ውስተ ፡ ሰሌዳሃ ፡ ወአንበራ ፡ ኀበ ፡ አሚቢን ፡ ውስተ ፡ ቤቱ ፡ ለመጋቤ ፡ ቤተ ፡ እግዚአብሔር ፡ ወአግብኡ ፡ ካህናት ፡ ኵሎ ፡ ወርቆ ፡ ዘተረክበ ፡ ውስተ ፡ ቤተ ፡ እግዚአብሔር ፡ በመድሎቱ ። 10 ወሶበ ፡ ርእዩ ፡ ከመ ፡ ብዙኅ ፡ ወርቁ ፡ ዘተረክበ ፡ ውስተ ፡ ታቦት ፡ ዐርገ ፡ ጸሓፌ ፡ ንጉሥ ፡ ወካህናት ፡ ወኈለቍዎ ፡ ወርቆ ፡ ወአስርዎ ፡ ዐቍሮሙ ፡ ኵሎ ፡ ወርቀ ፡ ዘረከቡ ፡ ውስተ ፡ ቤተ ፡ እግዚአብሔር ። 11 ወአዘዘ ፡ ይንሥኡ ፡ መገብተ ፡ ቤተ ፡ እግዚአብሔር ፡ ወርቀ ፡ ዘይበውእ ፡ ለፃእፃእ ፡ ይኩኖሙ ፡ ዘይሁቡ ፡ ለጸረብተ ፡ ዕፅ ፡ ወለነደቅት ፡ እለ ፡ የሐንጹ ፡ ቤተ ፡ እግዚአብሔር ፤ 12 ወለመገይራን ፡ ወለወቀርተ ፡ እብን ፡ በዘ ፡ ይሣየጡ ፡ እብነ ፡ ውቁረ ፡ ወዕፀ ፡ ጽሩበ ፡ በዘየዐቅቡ ፡ ቤዴቀ ፡ ዘውስተ ፡ ቤተ ፡ እግዚአብሔር ፡ ወለኵሉ ፡ ፃእፃአ ፡ ቤተ ፡ እግዚአብሔር ፡ በዘ ፡ የዐቅቡ ፤ 13 እንበለ ፡ መዓጹት ፡ ዘብሩር ፡ ዘይገብሩ ፡ ለቤተ ፡ እግዚአብሔር ፡ ወፍያላትኒ ፡ ወአቅርንትኒ ፡ ወኵሉ ፡ ንዋየ ፡ ወርቅ ፡ ወብሩር ፡ ዘይበውእ ፡ ለቤተ ፡ እግዚአብሔር ፤ 14 አዘዘ ፡ ይመጥውዎሙ ፡ ለእለ ፡ ይገብሩ ፡ ግብሮ ፡ ወቦቱ ፡ ይዕቀቡ ፡ ቤተ ፡ እግዚአብሔር ። 15 ወኢትትሓሰብዎሙ ፡ ለእሙንቱ ፡ ዕደው ፡ እለ ፡ ይነሥኡ ፡ ወርቆ ፡ ወያስተዋፅእዎ ፡ ለግብሮሙ ፡ በሃይማኖቶሙ ። 16 ወወርቅሰ ፡ ዘበእንተ ፡ ኀጢአት ፡ ወዘበእንተ ፡ ንስሓኒ ፡ ዘይበውእ ፡ ለቤተ ፡ እግዚአብሔር ፡ ለካህናት ፡ ውእቱ ። 17 ወበውእቱ ፡ መዋዕል ፡ ዐርገ ፡ አዛሔል ፡ ንጉሠ ፡ ሶርያ ፡ ወተቃተሎሙ ፡ ለጌት ፡ ወነሥኣ ፡ ለጌት ፡ ወአስተጋብኣ ፡ ወፈነወ ፡ አዛሔል ፡ ሰራዊት ፡ ይዕርጉ ፡ ኢየሩሳሌም ፡ አቅዲሞ ፡ እምኔሁ ። 18 ወነሥአ ፡ ኢዮአስ ፡ ንጉሠ ፡ ይሁዳ ፡ ዘቅድሳ[ት] ፡ ኵሎ ፡ ዘቀደሱ ፡ አበዊሁ ፡ ዮሳፍጥ ፡ ወኢዮራም ፡ ወአካዝያስ ፡ ነገሥተ ፡ ይሁዳ ፡ ወዚአሁኒ ፡ ዘቀደሰ ፡ ለሊሁ ፡ ወኵሎ ፡ ወርቀ ፡ ዘተረክበ ፡ ውስተ ፡ መዝገበ ፡ ቤተ ፡ እግዚአብሔር ፡ ወዘቤተ ፡ ንጉሥኒ ፡ ወፈነወ ፡ ለአዛሔል ፡ ንጉሠ ፡ ሶርያ ፡ ወገብአ ፡ አዛሔል ፡ ወኀደጋ ፡ ለኢየሩሳሌም ። 19 ወኵሉ ፡ ነገሩ ፡ ለኢዮአስ ፡ ወኵሉ ፡ ዘገብረ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ መዋዕሊሆሙ ፡ ለነገሥተ ፡ ይሁዳ ። 20 ወተንሥኡ ፡ አግብርቲሁ ፡ ወአስተቋጸሩ ፡ ሎቱ ፡ በኵለሄ ፡ ማዕሌተ ፡ ወቀተልዎ ፡ ለኢዮአስ ፡ በቤተ ፡ ማኅሎ ፡ ዘውስተ ፡ ገዳም ። 21 ኢያዜክር ፡ ወኢያሙሐድ ፡ ወኢያዛብድ ፡ ወልዱ ፡ እሉ ፡ አግብርቲሁ ፡ እለ ፡ ቀተልዎ ፡ ወሞተ ፡ ወቀበርዎ ፡ ምስለ ፡ አበዊሁ ፡ ውስተ ፡ ሀገረ ፡ ዳዊት ፡ ወነግሠ ፡ አሜስያስ ፡ ወልዱ ፡ ህየንቴሁ ።