ጥበበ ሲራክ 9

1 ኢታቅንኣ ፡ ለብእሲተ ፡ ሕፅንከ ፤ ወኢትትመሀር ፡ ላዕሌከ ፡ ትምህርተ ፡ እኩየ ። 2 ኢትመጥዋ ፡ ለብእሲት ፡ ነፍሰከ ፤ ከመ ፡ ኢትትካየድ ፡ ላዕለ ፡ ኀይልከ ። 3 ኢትስሐጥ ፡ ብእሲተ ፡ ባዕድ ፤ ከመ ፡ ኢትደቅ ፡ ውስተ ፡ መሥገርታ ። 4 ኢትዛዋዕ ፡ ምስለ ፡ መሰንቃዊት ፤ ከመ ፡ ኢታሥግርከ ፡ በማሕሌታ ። 5 ኢትስሐጣ ፡ ለድንግል ፤ ከመ ፡ ኢያስሕትከ ፡ ፈቃዳ ። 6 ኢትመጥዋ ፡ ለዘማ ፡ ነፍሰከ ፤ ከመ ፡ ኢትህጐል ፡ ርስተከ ። 7 ኢትሀስክ ፡ ውስተ ፡ ፍናወ ፡ ሀገር ፤ ወኢያስሕትክ ፡ ጽጐጕሃ ። 8 ሚጥ ፡ ዐይነከ ፡ እምነ ፡ ብእሲት ፡ ሠናይት ፤ ወኢያፍቱከ ፡ ሥና ፡ ለብእሲተ ፡ ባዕድ ፤ ብዙኃን ፡ እለ ፡ ስሕቱ ፡ በሥነ ፡ ብእሲት ፤ ወበእንተዝ ፡ ይነድድ ፡ ፍቅር ፡ ከመ ፡ እሳት ። 9 ኢትንበር ፡ ምስለ ፡ ብእሲተ ፡ ብእሲ ፤ ወኢትስከር ፡ ምስሌሃ ፡ በስታይ ፤ ከመ ፡ ኢትግምጽ ፡ ነፍስከ ፡ መንገሌሃ ፤ ወኢትድኀፅ ፡ መንፈስከ ፡ ውስተ ፡ ሞት ። 10 ወኢትኅድግ ፡ ዐርከከ ፡ ዘትካት ፤ እስመ ፡ ኢይከውነከ ፡ ከማሁ ፡ ዐርከ ፡ ግብት ። ዐርክ ፡ ሐዲስ ፡ ወይን ፡ ሐዲስ ፤ ወእመሰ ፡ ከረመ ፡ ስትዮ ፡ በትፍሥሕት ። 11 ኢያቅንእከ ፡ ብዕሎሙ ፡ ለኃጥኣን ፤ እስመ ፡ ኢታአምር ፡ ዘከመ ፡ ይትገፈትኡ ። 12 ወኢያፍቱከ ፡ ተድላሆሙ ፡ ለረሲዓን ፤ ተዘከር ፤ ከመ ፡ ኢይጸድቁ ፡ እስከ ፡ አመ ፡ ይመውቱ ። 13 ረሐቅ ፡ እምነ ፡ መኰንን ፡ ዘነፍሰ ፤ ይኴንን ፤ ወኢይርከብከ ፡ ትሕዝብተ ፡ ሞት ፤ እመኒ ፡ ቀረብከ ፡ ኢትነስሕ ፤ ከመ ፡ ኢትግድፍ ፡ ሕይወተከ ፤ ወአእምር ፡ ባሕቱ ፡ ከመ ፡ ማእከለ ፡ መሥገርት ፡ ተኀልፍ ፤ ወከመ ፡ ዘማእከለ ፡ ቀልቀል ፡ ታንሶሱ ። 14 በአምጣነ ፡ ትክል ፡ አሠኒ ፡ ለቢጽክ ፤ ወምስለ ፡ ጠቢባን ፡ ተማከር ። 15 ወምስለ ፡ ማእምራን ፡ ይኩን ፡ ትካዝከ ፤ ወኵሉ ፡ ነገርከ ፡ በሕገ ፡ እግዚአብሔር ፡ ይኩንከ ። 16 ወዕደው ፡ ጸድቃን ፡ የሀልዉ ፡ ውስተ ፡ ምሳሕከ ፤ ወበፍርሀተ ፡ እግዚአብሔር ፡ ይኩን ፡ ምክሕከ ። 17 በውስተ ፡ እደ ፡ ኬንያሁ ፡ ይትለማዕ ፡ ግብሩ ፤ ወለመልአከ ፡ አሕዛብኒ ፡ ይንእድዎ ፡ በጥበበ ፡ ቃሉ ። 18 ግሩም ፡ ውእቱ ፡ ብእሲ ፡ ነባቢ ፡ በውስተ ፡ ሀገሩ ፤ ወይጸልእዎ ፡ ለዝሉ[ፍ] ፡ እምነ ፡ ቃሉ ።