ዘዘካርያስ ነቢይ 7

ወእምዝ ፡ በራብዕ ፡ ዓመተ ፡ መንግሥቱ ፡ ለዳርዮስ ፡ ንጉሥ ፡ ኮነ ፡ ቃለ ፡ እግዚአብሔር ፡ ኀበ ፡ ዘካርያስ ፡ አመ ፡ ረቡዑ ፡ ለሠርቀ ፡ ታስዕ ፡ ወርኅ ፡ ወወርኁ ፡ ወርኀ ፡ ካሴል ። ወፈነዎሙ ፡ ንጉሥ ፡ እምቤቴል ፡ ለእስራኤል ፡ ወለአሴር ፡ ወሰብኡሂ ፡ ከመ ፡ ይስአሉ ፡ ቃለ ፡ እግዚአብሔር ። ወይቤልዎሙ ፡ ለካህናት ፡ እለ ፡ ቤተ ፡ እግዚአብሔር ፡ ዘኵሎ ፡ ይመልክ ፡ ወለነቢያት ፡ ወይቤልዎሙ ፤ ቦኑ ፡ ዘቦአ ፡ ዝየ ፡ ቅድሳት ፡ በኃምስ ፡ ወርኅ ፡ እምጕንዱይ ፡ ዓመት ። ወኮነ ፡ ቃለ ፡ እግዚአብሔር ፡ ኀቤየ ፡ ወይቤለኒ ። በሎሙ ፡ ለሕዝበ ፡ ምድር ፡ ወለካህናት ፤ ቦኑአ ፡ ዘጾምክሙ ፡ አመ ፡ ኀሙስ ፡ ወአመ ፡ ሰቡዕ ፡ እምሰብዓ ፡ ዓመት ፡ ቦኑ ፡ ጾመ ፡ ዘጾምክሙ ፡ ሊተ ። ወእመሂ ፡ በላዕክሙ ፡ ወእመሂ ፡ ሰተይክሙ ፡ አኮኑ ፡ ለርእስክሙ ፡ ትበልዑ ፡ ወለርእስክሙ ፡ ትሰትዩ ። አኮኑ ፡ ዝንቱ ፡ ነገሩ ፡ ዘነበበ ፡ እግዚአብሔር ፡ በእደ ፡ ነቢያቲሁ ፡ ቀደምት ፡ አመ ፡ ትነብር ፡ ኢየሩሳሌም ፡ ወትትፌሣሕ ፡ ወአህጉርኒ ፡ ዘአድያሚሃ ፡ ወአሕቃላቲሃ ፡ ወበሓውርቲሃኒ ፡ ንቡር ። ወኮነ ፡ ቃለ ፡ እግዚአብሔር ፡ ኀበ ፡ ዘካርያስ ፡ ወይቤሎ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ኵነኔ ፡ ጽድቅ ፡ ኰንኑ ፡ ወግበሩ ፡ ምጽዋተ ፡ ወምሕረተ ፡ ላዕለ ፡ ቢጽክሙ ፡ ኵልክሙ ። ወእቤረ ፡ ወእጓለ ፡ ማውታ ፡ ወፈላሴ ፡ ወነዳየ ፡ [ወ]ኢትትአገሉ ፡ ወኢትትቀየሙ ፡ ቢጸክሙ ፡ ወኢትጾሩ ፡ ሎሙ ፡ እከየ ። ወአበዩ ፡ አፅምኦ ፡ ወሜጡ ፡ ዘባኖሙ ፡ ወአስተሐቀሩ ፡ ወሜጡ ፡ እዝኖሙ ፡ ከመ ፡ ኢይስምዑ ። ወዐለዉ ፡ ልቦሙ ፡ ይክሐዱ ፡ ከመ ፡ ኢይስምዑ ፡ ሕግየ ፡ ወቃልየ ፡ ዘለአከ ፡ እግዚአብሔር ፡ ኀቤሆሙ ፡ ዘኵሎ ፡ ይመልክ ፡ በመንፈሱ ፡ በእደ ፡ ነቢያት ፡ ቀደምት ፤ ወኮነ ፡ ዐቢይ ፡ መዐተ ፡ እግዚአብሔር ፡ ዘኵሎ ፡ ይመልክ ። ወበከመ ፡ ይቤሎሙ ፡ ወአበዩ ፡ ሰሚዐ ፡ ከማሁ ፡ ይኬልሑ ፡ ወኢይሰምዖሙ ፤ ይቤ ፡ እግዚአብሔር ፡ ዘኵሎ ፡ ይመልክ ። ወእዘርዎሙ ፡ ውስተ ፡ ኵሉ ፡ አሕዛብ ፡ ዘኢያአምሩ ፡ ወትማስን ፡ ምድሮሙ ፡ በድኅሬሆሙ ፡ በሑረት ፡ ወበግብአት ፡ ወ<እ>ሬስያ ፡ ሙስንተ ፡ ለምድር ፡ ኅሪት ።