ዘዘካርያስ ነቢይ 8

ወኮነ ፡ ቃለ ፡ እግዚአብሔር ፡ ዘኵሎ ፡ ይመልክ ፡ ወይቤ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ቀናእኩ ፡ ላዕለ ፡ ኤሩሳሌም ፡ ወላዕለ ፡ ጽዮን ፡ ዐቢየ ፡ ቅንአተ ፡ ወተመዓዕክዋ ፡ ዐቢየ ፡ መዐተ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ እትመየጣ ፡ ለጽዮን ፡ ወአኀድር ፡ ማእከለ ፡ ኢየሩሳሌም ፡ ወትሰመይ ፡ ኤሩሳሌም ፡ ሀገረ ፡ ቅድስት ፡ ወደብረ ፡ እግዚአብሔር ፡ ዘኵሎ ፡ ይመልክ ፡ ደብረ ፡ መቅደሱ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ዓዲ ፡ ይነብሩ ፡ አእሩግ ፡ ወሊቃውንት ፡ ውስተ ፡ መርሕባ ፡ ለኤሩሳሌም ፡ ወለኵሎሙ ፡ ምርጕዞሙ ፡ ውስተ ፡ እዴሆሙ ፡ በብዝኀ ፡ መዋዕል ። ወይመልእ ፡ መርሕበ ፡ ሀገር ፡ ደቅ ፡ ወአዋልድ ፡ ዘይትዌነይ ፡ ውስተ ፡ መርሕባ ፡ ለኤሩሳሌም ። ይቤ ፡ እግዚአብሔር ፡ ዘኵሎ ፡ ይመልክ ፤ ለእመ ፡ ተስእኖሙ ፡ ለሕዝብየ ፡ ለእሉ ፡ እለ ፡ ተርፉ ፡ በቅድሜሆሙ ፡ በቅድሜየኒ ፡ ይስእኑኒ ፤ ይቤ ፡ እግዚአብሔር ፡ ዘኵሎ ፡ ይመልክ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ናሁ ፡ አነ ፡ ኣድኅኖሙ ፡ ለሕዝብየ ፡ እምብሔረ ፡ ጽባሕ ፡ ወእምብሔረ ፡ ዐረብ ። ወእወስዶሙ ፡ ወኣኀድሮሙ ፡ ማእከለ ፡ ኤሩሳሌም ፡ ወበህየ ፡ ይከውኑኒ ፡ ሕዝብየ ፡ ወአነኒ ፡ እከውኖሙ ፡ አምላኮሙ ፡ በጽድቅ ፡ ወበርትዕ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ይጸንዓ ፡ እደዊሆሙ ፡ ለእለ ፡ ሰምዑ ፡ በእላንቱ ፡ መዋዕል ፡ ዘንተ ፡ ነገረ ፡ እምአፈ ፡ ነቢያት ፡ እምአመ ፡ ሣረሩ ፡ ቤተ ፡ እግዚአብሔር ፡ ኵሎ ፡ ይመልክ ፡ ወእምአመ ፡ ተሐንጸ ፡ ቤተ ፡ እግዚአብሔር ። እምቅድመ ፡ እላንቱ ፡ መዋዕል ፡ ሰብእኒ ፡ ኢረከበ ፡ ዕሴቶ ፡ ወእንስሳኒ ፡ ኢረከበ ፡ ዐስቦ ፡ ወኢያዕረፈ ፡ ዘይበውእኒ ፡ ወዘይወፅእኒ ፡ እምሕማም ፡ ወእፌኑ ፡ ኵሎ ፡ ሰብአ ፡ ላዕለ ፡ ቢጹ ። ወይእዜኒ ፡ አኮ ፡ ከመ ፡ መዋዕለ ፡ ቀዲሙ ፡ ዘእገብር ፡ አነ ፡ ለእሉ ፡ እለ ፡ ተርፉ ፡ ሕዝብየ ፤ ይቤ ፡ እግዚአብሔር ፡ ዘኵሎ ፡ ይመልክ ። ዳእሙ ፡ ኣርኢ ፡ ሰላመ ፡ ወወይንሂ ፡ ይሁብ ፡ ፍሬሁ ፡ ወምድርኒ ፡ ትሁብ ፡ ማእረራ ፡ ወሰማይኒ ፡ ይሁብ ፡ ዝናሞ ፡ ወኣወርሶሙ ፡ ለእለ ፡ ተርፉ ፡ ሕዝብየ ፡ ዘንተ ፡ ኵሎ ። ወበከመ ፡ ኮንክሙ ፡ መርገመ ፡ ውስተ ፡ አሕዛብ ፡ ቤተ ፡ ይሁዳ ፡ ወቤተ ፡ እስራኤል ፡ ከማሁ ፡ ኣድኅነክሙ ፡ ወትከውኑኒ ፡ ለበረከት ፤ አጥብዑ ፡ ወአጽንዑ ፡ እደዊክሙ ። እስመ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ በከመ ፡ መሐልኩ ፡ ኣሕሥም ፡ ላዕሌክሙ ፡ በዘ ፡ አምዕዑኒ ፡ አበዊክሙ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወኢነሳሕኩ ። ከማሁ ፡ መከርኩ ፡ ወሐለይኩ ፡ በእላንቱ ፡ መዋዕል ፡ ከመ ፡ እግበር ፡ ሠናየ ፡ ለኤሩሳሌም ፡ ወለቤተ ፡ ይሁዳ ፤ ተአመኑ ፡ እንከ ። ከመ ፡ ይከውን ፡ ዝንቱ ፡ ነገር ፡ ወተናገሩ ፡ ጽድቀ ፡ ምስለ ፡ ኵሉ ፡ ሰብእ ፡ ወምስለ ፡ ቢጽክሙ ፡ ኵነኔ ፡ ሰላም ፡ ኰንኑ ፡ በውስተ ፡ አናቅጺክሙ ። ኵልክሙ ፡ ኢትጾሩ ፡ እኩየ ፡ በልብክሙ ፡ ለቢጽክሙ ፤ ኢታፍቅሩ ፡ እንከ ፡ ምሒለ ፡ መሐላ ፡ በሐሰት ፡ እስመ ፡ ዘንተ ፡ ኵሎ ፡ ጸላእኩ ፡ አነ ፤ ይቤ ፡ እግዚአብሔር ፡ ዘኵሎ ፡ ይመልክ ። ወኮነ ፡ ቃለ ፡ እግዚአብሔር ፡ ዘኵሎ ፡ ይመልክ ፡ ኀቤየ ፡ ወይቤለኒ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ጾመ ፡ ረቡዕአ ፡ ወጾመ ፡ ኀሙስ ፡ ወጾመ ፡ ሰቡዕ ፡ ወጾመ ፡ ዐሡር ፡ ይከውን ፡ ለቤተ ፡ ይሁዳ ፡ ለፍሥሓ ፡ ወለሐሤት ፡ ወለበዓላት ፡ ሠናይ ፡ ወትትፌሥሑ ፡ ወአፍቅሩ ፡ እንከ ፡ ሰላመ ። ናሁ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ወዓዲ ፡ ይመጽኡ ፡ አሕዛብ ፡ እለ ፡ ይነብሩ ፡ ውስተ ፡ ብዙኅ ፡ አህጉር ። ወይበውኡ ፡ ሰብአ ፡ ኀምሳ ፡ አህጉር ፡ ውስተ ፡ አሐቲ ፡ ሀገር ፡ ወይብሉ ፤ ንሖር ፡ ወንትጋነይ ፡ ለገጸ ፡ እግዚአብሔር ፡ ዘኵሎ ፡ ይመልክ ፡ ወንኅሥሥ ፡ ገጸ ፡ እግዚአብሔር ፡ ዘኵሎ ፡ ይመልክ ፡ ወአሐውር ፡ አነሂ ። ወይመጽኡ ፡ ብዙኃን ፡ አሕዛብ ፡ ወብዙኅ ፡ ሕዝብ ፡ እንዘ ፡ የኀሥሡ ፡ ገጸ ፡ እግዚአብሔር ፡ ዘኵሎ ፡ ይመልክ ፡ በኤሩሳሌም ፡ ወይትመሀለሉ ፡ ለገጸ ፡ እግዚአብሔር ፡ ዘኵሎ ፡ ይመልክ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ይእተ ፡ አሚረ ፡ ይእኅዙ ፡ ዐሠርቱ ፡ ዕደው ፡ ዘእምኵሉ ፡ በሓውርተ ፡ አሕዛብ ፡ ጽንፈ ፡ ልብሰ ፡ ብእሲ ፡ አይሁዳዊ ፡ ወይብልዎ ፤ ንሖር ፡ ምስሌከ ፡ እስመ ፡ ሰማዕነ ፡ ከመ ፡ እግዚአብሔር ፡ ምስሌከ ።