መልእክተ ዮሐንስ

መልእክተ ዮሐንስ ሐዋርያ ወልደ ዘብዴዎስ ቀዳማዊ

ንዜንወክሙ በእንተ ውእቱ ዘሀሎ እምቅድመ ውእቱ ዘሰማዕናሁ በዕዘኒነ ወዘርኢናሁ በአዕይንቲነ ወዘጠየቅናሁ ወዘገሠሣሁ እደዊነ በእንተ ነገረ ሕይወት።

እስመ ሕይወት ተዐውቀት ለነ ወርኢናሃ ወስምዓ ኮነ ወንዜንወክሙ ንሕነ ለክሙኒ ሕይወተ እንተ ለዓለም እንተ ሀለወት ኀበ አብ ወተዐውቀት ለነ።

ወርኢናሃ ወሰማዕናሃ ወንዜንወክሙ ለክሙኒ ከመ አንትሙኒ ትኩኑ ሱታፌ ምስሌነ። ወሱታፌነሰ ምስለ አብ ወምስለ ወልዱ ኢየሱስ ክርስቶስ።

ወዘንተ ንጽሕፍ ለክሙ ከመ ትፍሥሕትክሙ ፍጽምተ ትኩን ብክሙ

ወዛቲ ይእቲ ዜና እንተ ሰማዕናሃ ትካት እምኔሁ ወንዜንወክሙ ከመ እግዚአብሔር ብርሃን ውእቱ ወጽልመትሰ አልቦ ኀቤሁ ወኢአሐቲኒ

ወእመሰ ንቤለክሙ ብነ ሱታፌ ምስሌሁ ወውስተ ጽልመት ነሐውር ንሔሱ ወኢንገብራ ለጽድቅ ወለርትዕ

ወእመሰ ውስተ ብርሃን ነሐውር በከመ ውእቱ ውስተ ብርሃን ውእቱ ሱቱፋን ንሕነ በበይናቲነ ወደሙ ለኢየሱስ ክርስቶስ ያነጽሐነ እምኵሉ ኃጣውኢነ ፥

ወእመሰ ንብል አልብነ ኃጢአት ንጌጊ ለርእስነ ወአልቦ ርትዕ ኀቤነ።

ወእመሰ ነገርነ ወአመነ ኃጢአተነ ምእመን ውእቱ ወጻድቅ ከመ ይኅድግ ለነ ኃጣውኢነ ወያነጽሐነ እምኵሉ አበሳነ ።

ወእመሰ ንቤ ኢአበስነ ሐሳዌ ንሬስዮ ሎቱ ወቃሉኒ ኢሀሎ ኀቤነ ።