የደብረ ታቦር ማኅሌት

ሥላሴክሙ ሥላሴ ይረስየኒ መካነ

ድኅረ ተዋሐድኩሰ ዘሥላሴሁ ብርሃነ

ዮርዳኖሰክሙ ዝየ እስመ ኵለንታየ ኮነ

ኢየሐሥሥ እምዮርዳኖስ ሰማዕተክሙ ምዕመነ

ወኢይትሜነዮ ለታቦር እስመ ታቦር አነ።

ስምዓ ኮነ በእንተ ወልዱ እንዘ ይብል፤ ዝንቱ ውእቱ ወልድየ ዘአፈቅር፤ እስመ ሠመርክዎ አነ ሐረይክዎ ወሎቱ ስምዕዎ።

ዳዊት ነቢይ እምነ አድባራት ዘአልዓላ

አምሳለ ኪሩቤል አስተማሰላ

አመ ወዓለ ባቲ ክርስቶስ ርእሰ መሐላ

በደብረ ታቦር ካልዕተ ጸናፊ ጌልጌላ

ናሁ ተመነየ በማዕከላ ጴጥሮስ ከመ ይሣርር ሠቀላ።

ደብር ዘበእንቲአሁ ጸርሐ ዳዊት ነቢይ እንዘ ይብል ወሰምዓኒ እምደብረ መቅደሱ።

ሰላም ለፍልሰተ ሥጋኪ ስቡሐ ዘተሰብሐ

እምሥነ ፀሐይ ወወርኅ ሥነ ሰብሐቲሁ አብርሃ

እንቤሌኪ ድንግል ወእንበይነ ወልድኪ በኵረ ፍሥሐ

አልቦ ለሞት ማእሰሪሁ ዘፈትሐ

ወሙታነ ዘሲዖል አንቅሐ።

እግዝእትየ ፍትህኒ እማዕሠሩ ለሰይጣን

እሙ ለመድኅን ወለተ ብርሃን።

ማኅፀንኪ እግዝእትየ ማርያም ይከብር ምስብዒተ

እምጽርሐ አርያም ዘላዕሉ ወእምኪሩቤል ትርብዕተ

፱ ተ አውራኃ ወ ፭ ተ ዕለተ

ፆረ ዘኢይፀወር መለኮተ አግመረ ዘኢይትገመር እሳተ

ይትባረክ ስምኪ ማርያም ዘአውፃእክነ እምጸድፍ

በርኅራኄኪ ትሩፍ

ይዌድሱኪ ኪሩቤል በዘኢያረምም አፍ

ሐራ ሰማይ ትጉሃን እኁዛነ ሰይፍ

ዄላቋሆሙ አእላፍ

አምሳለ ደመና ይኬልሉኪ በክንፍ።

ሰላም ለዝክረ ስምኪ ዘመንክር ጣዕሙ

ለወልድኪ አምሳለ ደሙ

መሠረተ ሕይወት ማርያም ወጥንተ መድኃኒት ዘእምቀዲሙ

ኪያኪ ሠናይተ ዘፈጠረ ለቤዛ ዓለሙ

እግዚአብሔር ይትባረክ ወይትአኰት ስሙ።

ሰላም ለልሳንከ በደብረ ታቦር ዘአልኆሰሰ

ለብርሃን ዐቢይ እስከ ጽላሎቱ ተሐውሰ

ነበልባለ እሳት ክርስቶስ ዘተዋሃድከ ጳጦሰ

በዋዕየ ፍቅርከ እስከ ሥርወ አዕዋም የብሰ

ውሳጤ ሕሊናየ ነደ ወልብየ ጤሰ።

ወሪዶሙ እምደብር እምደብረ ታቦር አዘዞሙ ኢይንግሩ ዘርእዩ በደብር እስከ አመ ይትፌጸም በዕድሜሁ።

ሰላም ለሰኰናከ እንተ ያስተጋብእ ኵሎ

ኀበ ኀደገ ወቀጽአ ውስተ ሰሌዳ ኰኵሕ ሥዒሎ

ኢየሱስ ክርስቶስ ለመልአከ ዓለም ዘትትቤቀሎ

ስብሐቲከ እርዓይ እግዚኦ እምቅድመ ዓለማት ዘሀሎ

መንጦላዕተ ዓይንየ ቅላዕ ወአብርህ ጸዳሎ።

ስብሐቲሁ ዘእምኀቤሁ ወውዳሴሁ እምዚአሁ አኃዜ ዓለም ለሊሁ፤ ሰይፈ በቀል ውስተ እዴሁ ፍትሐ ግፉዓን ይወጽእ እምጽርሑ ።

ደብር ርጉዕ ወደብር ጥሉል ለምንት ይትነሥኡ አድባር ርጉዓን ደብር ዘሠምሮ የኀድር ውስቴቱ እግዚአብሔር አማን ተሰብሐ ዘደብረ ታቦር።

ወተወለጠ ራእዩ በቅድሜሆሙ ወአልባሲሁኒ ኮነ ፀዓዳ ከመ በረድ ይቤሎ ጴጥሮስ ለኢየሱስ ሊቅ ንንበር ዝየ ወንግበር ሠለስተ ማኅደረ አሐደ ለከ ወአሐደ ለሙሴ ወአሐደ ለኤልያስ ንግበር ማኅደረ ።

ሰላም ለክሙ ኦማኅበራኒሁ ለክርስቶስ እለ ተጋባዕክሙ ውስተ ዝንቱ ደብር ጳጳሳት ቀሳውስት ወዲያቆናት ሰላም ለከ ኦ ደብር ታቦር ዘከለሎ ብርሃን ይሤኒ ላሕዩ እምኵሉ አድባር።

በ፭ ሃሌ ሉያ፤ ሃሌ ሉያ፤ ሃሌ ሉያ፤ሃሌ ሃሌ ሃሌ ሉያ መንክረ ከሠተ እግዚአብሔር ለውሉደ ሰብእ እስመ ይቤ አብ ለወልዱ እንዘ ኅቡር ህላዌከ ምስሌየ ወከመ ሕፃን ውስተ ማኅፀና ለማርያም ተሠወርከ፤ ወምስሌየኒ እንዘ ሀሎከ በጽርሐ ቅድሳተ ስብሐቲከ፤ ይቤ ወልድ አባ ወአቡየ ሰብሐኒ በስብሐቲከ ዘሀሎ ምስሌከ እምቅድመ ይትፈጠር ዓለም ይቤ አብ ሰባሕኩከ በዮርዳኖስ በቅድመ ዮሐንስ መጥምቅ ሰባሕኩከ በደብር በቅድመ ሙሴ ወኤልያስ ነቢያት ምዕመናኒከ ሰባሕኩከ፤ ሰባሕኩከ ወዓዲ እሴብሐከ።

ሰባሕኩከ በደብር በቅድመ ሙሴ ወኤልያስ በደብር በደብረ ታቦር ሰባሕኩከ በደብር እንዘ ምስሌየ ህላዌከ ኅቡር ሰባሕኩከ በደብር።

በ፩ - ሃሌ ሉያ በቅድመ ሙሴ ነቢይ ለእሥራኤል ኖላዊ፤ ወበቅድመ ኤልያስ ቴስብያዊ ኮሬባዊ፤ ስምዓ ለወልዱ ኮነ ሰማያዊ፤ ወይቤ ሠመርክዎ፤ ወይቤ ሎቱ ስምዕዎ።

ወአመ ሰዱስ ነሥኦሙ ኢየሱስ ለጴጥሮስ ወለያዕቆብ ወለእኁሁ ዮሐንስ ወአዕረጎሙ ደብረ ነዋሐ እንተ ባሕቲቶሙ ወተወለጠ አርዓያሁ በቅድሜሆሙ ወአልባሲሁኒ ኮነ ፀዓዳ ከመ በረድ ዘኢይክል መሐፒል አፃዕድዎቶ በምድር ዮም በደብረ ታቦር አስተርዓየ ዘኢተዘርዓ ኅብስተ ሕይወት ወዘኢይትከዓው ጣዕሙ ጽዋዓ መድኃኒት ተከሥተ ለአርድዕት ወለክልዔቱ ነቢያት፤ ስምዓ ኮነ አብ በእንተ ወልዱ እንዘ ይብል፤ ዝንቱ ውእቱ ወልድየ ዘአፈቅር እስመ ሠመርክዎ አነ ሐረይክዎ ወሎቱ ስምእዎ።

1ኛ / ስብሐቲሁ ዘእምኃቤሁ ወውዳሴሁ እምዚአሁ

አኃዜ ዓለም ለሊሁ ዓለም አኃዜ ዓለም

2ኛ/ አሐደ ለከ ወአሐደ ለሙሴ

ወአሐደ ለኤልያስ ንግበር ማኅደረ

3ኛ/ ይቤሎ ጴጥሮስ ለኢየሱስ ንንበር ዝየ ሊቅ ንንበር ዝየ

አሐደ ለከ ወአሐደ ለሙሴ ወአሐደ ለኤልያስ ንግበር ማኅደረ።