የሰኔ ሚካኤል ማኅሌት

ሰላም ለጕርዔክሙ ስቴ አንብዐ ደም ዘሐሠሠ

ብዑላነ ሞገስ ሥላሴ ኢታንድዩኒ ሞገሰ፣

እመ ትትኀየዩኒሰ ወተሀድጉኒ ጽኑሰ

ሚካኤልኑ ለአውፅኦ ሥጋየ ጌሠ

ወእመ አኮ ገብርኤል ወሀበኒ ነፍሰ።

ኢይጽሕቅ ዘይመክሮ ወኢየሃሥሥ ዘይረድኦ አልቦቱ ጥንት ወኢተፍጻሜት ኢየኃልቅ መንግሥቱ ወአልቦ ዘይክል መዊዓ ኃይሉ ወአልቦሙ ኍልቁ ለሠራዊተ መላእክት እለ ይትለአክዎ አንተ ውእቱ አቡሃ ለጥበብ ገባሬ ኵሉ ፍጥረት ወገባሪሃ ለሕግ።

ጐሥአ ልብየ ጥበበ ወልቡና

ለውዳሴከ ጥዑመ ዜና

ቅዱስ ሚካኤል ዘልማድከ ግብረ ትሕትና

አንተኑ ዘመራህኮሙ ፍና

ወአንተኑ ለእሥራኤል ዘአውረድከ መና።

አዝነመ ሎሙ መና ይብልዑ ፀአዳ

ከመ በረድ ወርእየቱ ከመ ተቅዳ

ኅብስተ እም ሰማይ ወሀቦሙ

አውኀዘ ሎሙ ማየ ሕይወት

ዘትረ ኰኵሕ ፈልፈለ ነቅዕ

ዘኢይነጽፍ ኅብስተ እምሰማይ ወሀቦሙ።

ማኅፀንኪ እግዝእትየ ማርያም ይከብር ምስብዒተ

እምጽርሐ አርያም ዘላዕሉ ወእምኪሩቤል ትርብዕተ

፱ ተ አውራኃ ወ ፭ ተ ዕለተ

ፆረ ዘኢይፀወር መለኮተ አግመረ ዘኢይትገመር እሳተ

ይትባረክ ስምኪ ማርያም ዘአውፃእክነ እምጸድፍ

በርኅራኄኪ ትሩፍ

ይዌድሱኪ ኪሩቤል በዘኢያረምም አፍ

ሐራ ሰማይ ትጉሃን እኁዛነ ሰይፍ

ዄላቋሆሙ አእላፍ

አምሳለ ደመና ይኬልሉኪ በክንፍ።

ሰላም ለዝክረ ስምኪ ዘመንክር ጣዕሙ

ለወልድኪ አምሳለ ደሙ

መሠረተ ሕይወት ማርያም ወጥንተ መድኃኒት ዘእምቀዲሙ

ኪያኪ ሠናይተ ዘፈጠረ ለቤዛ ዓለሙ

እግዚአብሔር ይትባረክ ወይትአኰት ስሙ።

ሰላም ለዝክረ ስምከ ምስለ ስመ ልዑል ዘተሳተፈ

ወልደ ያሬድ ሄኖክ በከመ ጸሐፈ

ሶበ እጼውእ ስመከ ከሢትየ አፈ

ረዳኤ ምንዱባን ሚካኤል በከመ ታለምድ ዘልፈ

ለረዲኦትየ ነዓ ሰፊሐከ ክንፈ።

ሃሌ ሉያ ሃሌ ሉያ ዓቢተነ በመድኃኒትከ

ደግወነ ንጸውዕ ስምከ

ኖላዊነ ኄር ትጉህ ዘኢትነውም

ሰላመከ ሀበነ።

ሰላም ዕብል ለአስናኒከ ዘመንፈስ

ዘኢይረክቦን ጥረስ

ሚካኤል ረዳኢ ለእለ ውስተ ባሕር ወየብስ

እስመ ረሰየከ ካህነ ምሥዋዑ ክርስቶስ

መፍትው ሊተ ትተንብል ቀሲስ።

ባህራንኒ ይቤ ዘነገደ ባሕረ ምስሌሁ ርኢክዎ ለሚካኤል ወሰዕንኩ ጠይቆቶ። ዮም ሰማያዊ በምድር አስተርአየ።

ሰላም ለእስትንፋስከ ቊሱላነ ነፍስ ለአጥዕዮ

ዘይነፍሕ ፄና አንህዮ

ሚካኤል ነዓ ኵናተከ በተረስዮ

ለገቢር ከመ ቀዳሚ ለአርዌ ዓመፃ ደርብዮ

እሰመ ኢኀደገ እንከ ዘትካት እከዮ።

ወከሢቶ ለነ ኀበ ይብል እዜንዎሙ ለነዳያን ፈነወኒ

ወእስብክ ሎሙ ግዕዛነ ለፂውዋን ወእፈወሶሙ ለቊሱላነ ልብ ወእስምዮ ለባሕራን ኅሩየ ዝኬ ውእቱ ዘተነግረ በመዋዕለ ትካት ለእስራኤል ኅብስተ መና ዘአውረደ በገዳም ወርእየቱ ከመ ተቅዳ ወከመ አያያተ መዓር ጥዑም ፈድፋደ።

ለአፃብዒከ መጽሐፈ እለ ለክዑ

እጕለ አባግዕ እምኖሎት በጊዜ ተመልዑ

ሚካኤል አንተ ለንጉሠ ነገሥት ምስዋዑ

አሣዕነ መድኃኒት ለእገርየ አጻብዒከ ይቅጽዑ

ከመ በፍናውየ የኀዝ ለሰላም ቅብዑ።

ቅዱሳት አጻብዒከ ለጽሒፈ መጽሐፍ እለ ተቀንያ

ወብፁዓት አዕይንቲከ ምሥጢረ መለኮት ዘርእያ

ሚካኤል መልአክ ወሐዋርያ።

አምኃ ሰላም አቅረብኩ ለመልክእከ ኵሉ

ለለአሐዱ ዘበበክፍሉ

ሚካኤል ክቡር ለልዑል መልክአ ኃይሉ

ተወኪፍከ አምኃየ እምኑኀ ሰማያት ዘላዕሉ

ዕሴተ ጸሎተየ ፈኑ ወአስብየ ድሉ

መልአከ ሰላምነ ሊቀ መላእክት ሚካኤል ሰዓል ወጸሊ በእንቲአነ አዕርግ ጸሎተነ ቅድመ መንበሩ ለንጉሥ ዓቢይ።

አመ ይሰቅልዎ አይሁድ ለእግዚእነ ሚካኤል አርመመ ወገብርኤል ተደመ ጸሀይ ጸልመ ወወርኀ ደመ ኮነ ወሪዶ እመስቀሉ አብርሃ ለኵሉ።

ይቤሎሙ ኢየሱስ ለአርዳኢሁ አዓርግ ወስተ ሰማይ ኀበ

አቡየ ወአቡክሙ ኀበ አምላኪየ ወአምላክክሙ ዘንተ እንከ

ይቤሎሙ ዐርገ ውስተ ሰማያት ካዕበ ይመጽእ በዘዚአሁ

ስብሐተ ሠርጐሙ ለሐዋርያት ብርሃኖሙ ለእለ ውስተ ጽልመት መድኃኔ ነገሥት ክብሮሙ ለመላእክት ኖላዊሆሙ ለአሕዛብ ለከ ስብሐት።ሚካኤል እመላእክት መኑ ከማከ ክቡር፤ መኑ ከማከ ልዑል።

ንግበር በዓለ በትፍሥሕት ዮም እስመ ተንሥአ እግዚእነ ወመድኃኒነ ኢየሱስ ክርስቶስ ዘተሰቅለ በእንተ አፍቅሮተ ሰብእ። ተንሥአ ክርስቶስ እሙታን ዐርገ በስብሐት ውስተ ሰማያት ዘይሴብሕዎ ሊቃነ መላእክት በግርምት ዓውድ ሎቱ ንፌኑ ስብሐተ ወአኰቴተ።

ሞዖ ለሞት እግዚአ ለሰንበት ተንሥአ ወልድ በሣልስት ዕለት ፈጺሞ ሥርዓተ አርቲዖ ሃይማኖተ ኀበ አቡሁ ዐርገ ሰማያተ ጰራቅሊጦሰሃ መንፈሰ ጽድቅ አውረደ።

ግበሩ በዓለክሙ በትፍሥሕት

ዮም በዛቲ ዕለት ሰንበተ ክርስቲያን

ግበሩ በዓለክሙ በትፍሥሕት

ዘሐመ ወሞተ ሲኦለ ወሪዶ ሙቁሐነ ፈትሐ ሙቁሐነ ግበሩ በዓለክሙ በትፍሥሕት

ዓርገ በስብሐት ውሰተ ሰማያት ተኰነኑ ሎቱ መላእክት ግበሩ በዓለክሙ በትፍሥሕት

ፋሲካ ፋሲካ ፋሲካ ተዝካረ ትንሣኤሁ ለመድኃኒነ።

ዐርገ እምኀቤሆሙ ወይቤሎሙ ጰራቅሊጦስሃ

እፌኑ ለክሙ ዘይሄሉ ዘልፈ ምስሌክሙ

ኢየኀድገክሙ ዕጓለ ማውታ ትኩኑ

ዘኢይክል ዓለም ነሢኦቶ።

ዘምሩ ለእግዚአብሔር ጻድቃኑ

እስመ ተንሥአ ክርስቶስ እሙታን

ዘምሩ ለእግዚአብሔር ጻድቃኑ

በህየ ሰበረ ኆኀተ ብርት ወበህየ አውጽአ ዘቀዳሚ ልህኵቶ

ዘምሩ ለእግዚአብሔር ጻድቃኑ

አርአዮ ለቶማስ ርግዘተ ገቦሁ ወለእንድርያስ ቅንዋተ እደዊሁ

ዘምሩ ለእግዚአብሔር ጻድቃኑ

ዐርገ በስብሐት ውስተ ሰማያት በ ፵ ዕለት ምስለ መላእክት

ዘምሩ ለእግዚአብሔር ጻድቃኑ ወግነዩ ለዝክረ ቅድሳቱ

መልአከ ሰላምነ ሊቀ መላእክት ሚካኤል፣ሰአል ወጸሊ በእንቲአነ። አዕርግ ጸሎተነ ቅድመ መንበሩ ለንጉሥ ዓቢይ።

ኅብስተ እምሰማይ ወሀቦሙ፤ ሃሌሉያ፣

ወኅብስተ መላእክቲሁ በልዑ እጓለ እመሕያው፣

ሃሌሉያ፣ ወወሀቦሙ ለፍትውቶሙ፣

ወኢያኀጥኦሙ እምዘፈቀዱ፣

እንዘ ሚካኤል የሐውር፣

ቅድመ ትዕይንቶሙ ለእሥራኤል።

1. ሀበነ ሰላመከ ሰላመከ ንጸውዕ ስመከ

ኖላዊነ ኄር ኖላዊነ ኄር።

2. ባሕህራንኒ ይቤ ዘነገደ ባሕረ

ርኢክዎ ለሚካኤል ወስዕንኩ ጠይቆቶ ስዕንኩ

3. መልአከ ሰላምነ መልአከ ሰላምነ ።

ሊቀ መላእክት ሚካኤል ሰአል ወጸሊ በእንቲአነ።

4. አመ ይሰቅልዎ አይሁድ ለእግዚእነ

ሚካኤል አርመመ ወገብርኤል ተደመ።

5. ወሪዶ እመስቀሉ ወሪዶ እመስቀሉ

እመስቀሉ አብርሃ ለኵሉ

እመስቀሉ አብርሃ ለኵሉ።