የጥምቀት ማኅሌት

ሰላም ለአእዛኒክሙ አናቅፀ ጸሎት ሠናይ

ምስጢራተ ሰሚዕ ሥላሴ ዘይተልዎ ርዕይ

በአብትረ ያዕቆብ በርሃ ሥላሴክሙ ፀሐይ

ወተመሰሉ ሰብዓ ዐይን አባግዐ ላባ በማይ

ለሃበ አባግዕ ዘዮም ወጥምቀተ ዐባይ

መኑ ይወርድ ውስተ ቀላይ ክርስቶስ ውእቱ ዘወጽአ እማይ እመንፈስ ቅዱስ ሠለስቲሆሙ እለ አሐዱ እሙንቱ ሠለስቲሆሙ እለ ይከውኑ ሰማዕተ ሠለስቲሆሙ ሰሊሁ ወረደ መንፈስ ቅዱስ ከመ ይቀድስ ማያተ ስቡሕኒ ውእቱ ወልዑልኒ ውእቱ ለዓለም ጸጋ ወጽድቅ በኢየሱስ ክርሰቶስ ኮነ።

ማኅፀንኪ እግዝእትየ ማርያም ይከብር ምስብዒተ

እምጽርሐ አርያም ዘላዕሉ ወእምኪሩቤል ትርብዕተ

፱ ተ አውራኃ ወ ፭ ተ ዕለተ

ፆረ ዘኢይፀወር መለኮተ አግመረ ዘኢይትገመር እሳተ

ይትባረክ ስምኪ ማርያም ዘአውፃእክነ እምጸድፍ

በርኅራኄኪ ትሩፍ

ይዌድሱኪ ኪሩቤል በዘኢያረምም አፍ

ሐራ ሰማይ ትጉሃን እኁዛነ ሰይፍ

ዄላቋሆሙ አእላፍ

አምሳለ ደመና ይኬልሉኪ በክንፍ።

ሰላም ለዝክረ ስምኪ ዘመንክር ጣዕሙ

ለወልድኪ አምሳለ ደሙ

መሠረተ ሕይወት ማርያም ወጥንተ መድኃኒት ዘእምቀዲሙ

ኪያኪ ሠናይተ ዘፈጠረ ለቤዛ ዓለሙ

እግዚአብሔር ይትባረክ ወይትአኰት ስሙ።

ሰላም ለማየ ዮርዳኖስ ዮሐንስ ዘአተቦ

መንፈስ ቅዱስ ዘዐጥበቦ

ሶበ መጽአ ቃል ለተናብቦ

ነድ ለማየ ባህር ከበቦ

ማይ ኃበ የሐውጽ ጸበቦ

ርዕዩከ ማያት እግዚኦ

ርዕዩከ ማያተ ወፈርሁ

ደንገጹ ቀላያተ ማያተ ወደምፁ ማያቲሆሙ

ሰላም ለአጽፋረ እዴከ ዘሕበሪሆን ፀዓዳ

በምግባር ወግዕዝ እለ ይትወሐዳ

ኢየሱስ ክርስቶስ ምሥፍና አባሉ ለይሁዳ

ለመንግሥትከ ሰፋኒት እንዘ ይትመሐለሉ ዐውዳ ሰብአ ሰገል አወፈዩ ጋዳ።

አንፈርአፁ ሰብአ አገል አምኃሆሙ አምጽኡ መድምመ ረኪቦሙ ሕፃነ ዘተወልደ ለነ።

ክርስቶስ ተወልደ ክርስቶስ ተጠምቀ ወለደነ ዳግመ እማይ ወእመንፈስ ቅዱስ እሙነ ኮነ ለፀሐየ ጽድቅ አስተርዮተ አማን መንክር ጥምቀቱ

አቡን ሃሌ ሉያ ነአምን በአብ ወነአምን በወልድ ወነአምን በመንፈስ ቅዱስ እማርያም ዘተወልደ አፍቂሮ ኪያነ ኀቤነ በነቢያት ሰበኩ ለነ በዮርዳኖስ ተጠምቀ ከመ ይፈጽም ኵሎ ሕገ ወአስተርአየ ገሀደ።

በዮርዳኖስ ተጠምቀ ፈጺሞ ሕገ ወአስተርአየ ገሀደ።

እምሰማያት ወረደ ወእማርያም ተወልደ ከመ ይሰዐር መርገማ ለሔዋ ዲነ ዕፅ ተሰቅለ በሠላሳ ክረምት በዮርዳኖስ ተጠምቀ ወበነቢያት ሰበክዎ ወአስርአየ ገሀደ

አርእየነ እግዚኦ በሣህለከ ዮም ፍሰሐ ኮነ

በእንተ ልደቱ ለክርስቶስ ወበእንተ ጥምቀቱ

ሃሌ ሉያ ሃሌ ሉያ ሃሌ ሉያ ሃዲጎ ተስዐ

ወተስዐተ ነገድ ቆመ ማዕከለ ባህር ወወጽአ በሰላምእሬስዮ ወአነሂ በኵርየ እሬስዮ

ሃዲጎ ተስዐ ወተስዐተ ነገደ ቆመ ማዕከለ ባሕር ገብአ ወወጽአ በሰላም።