ዘሐጌ ነቢይ 2

1 አመ ፡ ተስዑ ፡ ለጽልመት ፡ ዘሳድስ ፡ ወርኅ ፡ ዘካልእት ፡ ዓመት ። በሳብዕ ፡ ወርኅ ፡ በሰዱሱ ፡ ለጽልመት ፡ ነበበ ፡ እግዚአብሔር ፡ በእደ ፡ ሐጌ ፡ ነቢይ ፡ ወይቤሎ ። 2 በሎሙ ፡ ለዝርባቤል ፡ ወልደ ፡ ሰላቲየል ፡ ዘሕዝበ ፡ ይሁዳ ፡ ወለዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ፡ ወለኵሎሙ ፡ እለ ፡ ተርፉ ፡ ሕዝብየ ፤ ይቤ ፡ እግዚአብሔር ። 3 መኑ ፡ እምኔክሙ ፡ ዘርእዮ ፡ ለዝንቱ ፡ ቤት ፡ ትርሲቶ ፡ ዘትካት ፤ ወእፎ ፡ ትሬእይዎ ፡ ይአዜ ፡ አንትሙ ፡ ከመዘ ፡ ኢሀሎ ፡ ቅድሜክሙ ። 4 ወይአዜኒ ፡ ጽናዕ ፡ ዝርባቤል ፤ ይቤ ፡ እግዚአብሔር ፡ ወይጽናዕ ፡ ዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ፡ ወይጽንዑ ፡ አሕዛብ ፡ ምድር ፤ ይቤ ፡ እግዚአብሔር ፤ ወግበሩ ፡ ወአነ ፡ ምስሌክሙ ፡ ሀሎኩ ፤ ይቤ ፡ እግዚአብሔር ፡ ዘኵሎ ፡ ይመልክ ። 5 ወመንፈስየ ፡ ይቀውም ፡ ማእከሌክሙ ፤ ተአመኑ ። 6 ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ዓዲ ፡ ምዕረ ፡ ወአነ ፡ ኣድለቀልቃ ፡ ለሰማይ ፡ ወለምድር ፡ ወለባሕር ፡ ወለየብስ ። 7 ወኣድለቀልቆሙ ፡ ለኵሎሙ ፡ አሕዛብ ፡ ወይመጽእ ፡ ድኅሬሆሙ ፡ ለኵሎሙ ፡ አሕዛብ ፤ ወእመልኦ ፡ ለዝንቱ ፡ ቤት ፡ ትርሲተ ፤ ይቤ ፡ እግዚአብሔር ፡ ዘኵሎ ፡ ይመልክ ። 8 ዚአየ ፡ ውእቱ ፡ ወርቅ ፡ ወብሩር ፤ ይቤ ፡ እግዚአብሔር ፡ ዘኵሎ ፡ ይመልክ ። 9 ወይኄይስ ፡ ትርሲቱ ፡ ለዝንቱ ፡ ቤት ፡ ደኃሪ ፡ እምቀዳሚ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወእሁብ ፡ ሰላመ ፡ ለዝንቱ ፡ ብሔር ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወሰላመ ፡ ለኵሎ ፡ ነፍስ ፡ እንተ ፡ ትገብር ፤ ወይትነሣእ ፡ ዝንቱ ፡ ሕዝብ ። 10 አመ ፡ ተስዑ ፡ ለጽልመት ፡ ታስዕ ፡ ወርኅ ፡ በካልእ ፡ ዓመተ ፡ መንግሥቱ ፡ ለዳርዮስ ፡ ኮነ ፡ ቃለ ፡ እግዚአብሔር ፡ ኀበ ፡ ሐጌ ፡ ነቢይ ፡ ወይቤሎ ። 11 ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፡ ተሰአሎሙአ ፡ ለካህናቲከ ፡ ሕገ ። 12 እመአ ፡ ለከፎ ፡ ለሰብእ ፡ ሥጋ ፡ ቅዱስ ፡ ጽንፈ ፡ ልብሱ ፡ ወለከፎ ፡ በዘፈረ ፡ ልብሱ ፡ እመሂ ፡ ኅብስት ፡ ወእመሂ ፡ ወይን ፡ ወእመሂ ፡ ብሱል ፡ ዘኮነ ፡ እክል ፡ ወእመሂ ፡ ቅብእ ፡ ቅዱስ ፡ ይትቄደስኑ ፤ ወይቤሉ ፡ ክህናት ፤ ኢይትቄደስ ። 13 ወይቤሎሙ ፡ መልአክ ፤ እመኬ ፡ ለከፎ ፡ ርኩስ ፡ ወሥኡብ ፡ ነፍስ ፡ ለነፍስ ፡ ይረኵስኑአ ፡ እምኵሉ ፡ ዝንቱ ፤ ወይቤሉ ፡ ክሀናት ፤ ይረኵስአ ። 14 ወይቤሎሙ ፡ መልአክ ፤ ከማሁኬአ ፡ ዝንቱ ፡ ሕዝብ ፡ ወነገድ ፡ በቅድሜየ ፤ ይቤ ፡ እግዚአብሔር ፤ ወከማሁኬ ፡ ኵሉ ፡ ግብረ ፡ እደዊሆሙ ፡ ወኵሉ ፡ ዘቀርቦሙ ፡ ይረኵስ ፡ በእንተ ፡ ተረፎሙ ፡ ዘበጽባሕ ፡ ይሣቀዩ ፡ በቅድመ ፡ ሕማሞሙ ፤ ወትጸልእዎሙ ፡ ለእለ ፡ ይጌሥጽዎሙ ፡ በአናቅጽ ። 15 ወይእዜኒ ፡ ሐልዩ ፡ በልብክሙ ፡ ዘእምአሜ ፡ ቀዳሚት ፡ ዕለት ፡ ወዘእምቅድሜሁ ፤ ዘእንበለ ፡ ያንብሩ ፡ እብነ ፡ ዲበ ፡ እብን ፡ ውስተ ፡ ቤተ ፡ እግዚአብሔር ። 16 መኑ ፡ አንትሙ ፡ አመ ፡ ትዘርኡ ፡ ሰገመ ፡ ዕሥራ ፡ ወታአትዉ ፡ ዕሥረ ፡ ሰገመ ፤ ወትበውኡ ፡ ኀበ ፡ ምክያድ ፡ ትቅድሑ ፡ ኀምሳ ፡ ወትቀድሑ ፡ ዕሥራ ። 17 ቀሠፍኩክሙ ፡ በዐባር ፡ ወበበረድ ፡ በኵሉ ፡ ተግበረ ፡ እደዊክሙ ፡ ወኢነሳሕክሙ ፡ ወኢተመየጥክሙ ፡ ኀቤየ ፤ ይቤ ፡ እግዚአብሔር ፡ ዘኵሎ ፡ ይመልክ ። 18 ሐልዪ ፡ በልብክሙ ፡ ዘእምአሜ ፡ ቀዳሚት ፡ ዕለት ፡ ወዘእምቅድሜሃ ፡ ዘእምአሜ ፡ ተሱዑ ፡ ለጽልመት ፡ ታስዕ ፡ ወርኅ ፡ ዘእምአመ ፡ ሣረሩ ፡ ቤተ ፡ እግዚአብሔር ፤ ተዘከርዎ ፡ በልብክሙ ። 19 ወትሬእዩ ፡ በውስተ ፡ ምክያደ ፡ እክል ፡ ወወይን ፡ ወበለስ ፡ ወሮማን ፡ ወዘይት ፡ ወኵሎ ፡ ዕፀ ፡ ዘይፈሪ ፡ እባርክ ፡ እምዮም ። 20 ወኮነ ፡ ቃለ ፡ እግዚአብሔር ፡ በዳግም ፡ ኀበ ፡ ሐጌ ፡ ነቢይ ፡ አመ ፡ ተሱዑ ፡ ለጽልመት ፡ ወርኅ ፡ ወይቤሎ ፡ ለመልአክ ። 21 በሎ ፡ ለዝርባቤል ፡ ወልደ ፡ ሰላቲየል ፡ ዘሕዝበ ፡ ይሁዳ ፤ ናሁ ፡ ኣድለቀልቃ ፡ ለሰማይ ፡ ወለምድር ፡ ወለባሕር ፡ ወለየብስ ። 22 ወእገፈትእ ፡ መናብርተ ፡ ነገሥት ፡ ወእገፈትእ ፡ ሰረገላ ፡ ወመስተጽዕናነ ፡ በአፍራሲሆሙ ፤ ወይወርዱ ፡ መስተጽዕናን ፡ በአፍራሲሆሙ ፡ [ወይወርዱ ፡ መስተጽዕናን ፡] ምስለ ፡ አስያፊሆሙ ፡ ኀበ ፡ ቢጾሙ ። 23 ይእተ ፡ አሚረ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወኣነሥአከ ፡ ዝሩባቤል ፡ ወልደ ፡ ሰላቲየል ፡ ወእሬስየከ ፡ ከመ ፡ ማዕተብ ፡ እስመ ፡ ኪያከ ፡ ኀረይኩ ፤ ይቤ ፡ እግዚአብሔር ፡ ዘኵሎ ፡ ይመልክ ። = ።