ዘአሞጽ ነቢይ 5

1 ስምዑ ፡ ቃለ ፡ እግዚአብሔር ፡ ዘኣመፅእ ፡ ላዕሌክሙ ፡ አነ ፡ ሰቆቃወ ። 2 ቤተ ፡ እስራኤል ፡ ወድቀ ፡ ወኢተንሥአ ፡ እንከ ። ድንግለ ፡ እስራኤል ፡ ድኅፀት ፡ በውስተ ፡ ምድራ ፡ ወኀጥአት ፡ ዘያነሥኣ ። 3 እስመ ፡ ከመዝ ፡ ይቤ ፡ እግዚአብሔር ፡ ሀገር ፡ እንተ ፡ እምውስቴታ ፡ ይወፅኡ ፡ ፲፻ ፡ ወይተርፉ ፡ ፻ ። ወእንተ ፡ እምኔሃ ፡ ይወፅኡ ፡ ፻ ፡ ወይተርፉ ፡ ፲ ፡ ለቤተ ፡ እስራኤል ። 4 ከመዝ ፡ ይቤ ፡ እግዚአብሔር ፡ ለቤተ ፡ እስራኤል ፡ ኅሡኒአ ፡ ወተሐይዉ ። 5 ወኢትኅሥሡ ፡ ቤቴል ፡ ወኢትሐሩ ፡ ገልገላ ። ወኢትዕርጉ ፡ ኀበ ፡ ዐዘቅተ ፡ ማሕላ ፡ እስመ ፡ ገልገሳኒአ ፡ ተፄወወት ፡ ወቤቱልኒአ ፡ ኮነት ፡ ከመ ፡ ዘኢሀለወት ። 6 ኅሥዎ ፡ ለእግዚአብሔር ፡ ወተሐይዉ ፡ ከመ ፡ ኢትንድድ ፡ ከመ ፡ እሳት ፡ ቤተ ፡ ዮሴፍ ፡ ወትበልዖ ፡ ወየኀጥኡ ፡ ዘያጠፍእ ፡ ሎሙ ፡ እሳቶሙ ፡ ለቤተ ፡ እስራኤል ። 7 እግዚአብሔር ፡ ዘይገብር ፡ ፍትሐ ፡ በሰማይ ፡ ወዘይሠይም ፡ ጽድቀ ፡ ውስተ ፡ ምድር ። 8 ዘይገብር ፡ ኵሎ ፡ ወያስተራትዕ ፡ ወይመይጥ ፡ በጽላሎቱ ፡ ነግሀ ፡ ወያጸልም ፡ መዐልተ ፡ ከመ ፡ ሌሊት ። ዘይጼውዖ ፡ ለማየ ፡ ባሕር ፡ ወይክዕዎ ፡ ውስተ ፡ ምድር ። እግዚአብሔር ፡ ዘኵሎ ፡ ይመልክ ፡ ስሙ ። 9 ዘያነሥአ ፡ ተጥቃጤ ፡ ላዕለ ፡ ኀያል ፡ ወኀሣረ ፡ ያመጽእ ፡ ላዕለ ፡ አጽዋን ። 10 እምኆኅት ፡ ጸልኡ ፡ ዘይጌሥጸሙ ፡ ወአስቆረሩ ፡ ቃለ ፡ ጽድቅ ። 11 እስመ ፡ ይኰርዑ ፡ ውስተ ፡ ርእስ ፡ ነዳይ ፡ ወነሣእክሙ ፡ ሕልያነ ፡ በኀቤሆሙ ፡ ወኀረይክሙ ፡ አብያተ ፡ ሠናያነ ፡ ትሐንጹ ፡ ወኢትኑበሩ ፡ ውስቴቶሙ ። ወትተክሉ ፡ ወይነ ፡ መፍትወ ፡ ወኢትሰትይዎ ፡ ለወይን ። 12 እስመ ፡ ርኢኩ ፡ ብዙኀ ፡ ኀጢአትክሙ ፡ ወዐዚየ ፡ ጌጋይክሙ ፡ ትከይድዎ ፡ ለጻድቅ ፡ ወትነሥኡ ፡ ቤዛ ፡ ወታቴክሉ ፡ ነዳየ ፡ በውስተ ፡ ኆኅት ። 13 በእንተ ፡ ዝንቱ ፡ ጠቢብኒ ፡ ያረምም ፡ እስመ ፡ እኩይ ፡ መዋዕሊሆሙ ። 14 ኅሡ ፡ ሠናየ ፡ ወአኮ ፡ እኩየ ፡ ከመ ፡ ትሕየዉ ፡ እስከ ፡ ማእዜ ፡ ይሄሉ ፡ እግዚአብሔር ፡ ምስሌክሙ ፡ ዘኵሎ ፡ ይመልክ ፡ በከመ ፡ ትቤሉ ። 15 ጸላእነ ፡ እኩየ ፡ ወአፍቀርነ ፡ ሠናየ ፡ ወአግብኡ ፡ ፍትሐ ፡ በኀበ ፡ አናቅጺክሙ ፡ ዮጊ ፡ ይሣሀለክሙ ፡ እግዚአብሔር ፡ አምላክ ፡ ዘኵሎ ፡ ይመልክ ፡ ለተረፈ ፡ ዮሴፍ ። 16 በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፡ ውስተ ፡ ኵሉ ፡ መርሕባ ፡ ብካይ ፡ ወውስተ ፡ ኵሉ ፡ ፍኖታ ፡ አውያት ። ይላሑ ፡ ሐረሳዊ ፡ ወይበኪ ። 17 ወእለሂ ፡ ያአምሩ ፡ ሰቆቃወ ፡ ይበኪዩ ፡ ውስተ ፡ ኵሉ ፡ ፍኖተ ፡ እስመ ፡ ኣኀልፍ ፡ እንተ ፡ ማእከሌከ ፡ ይቤ ፡ እግዚአብሔር ። 18 አሌ ፡ ሎሙ ፡ ለእለ ፡ ይፈትውዋ ፡ ለዕለተ ፡ እግዚአብሔር ፡ አኮኑ ፡ ጽልመት ፡ ይእቲ ፡ ወኢኮነት ፡ ብርሃነ ፡ ወቆባር ፡ ይእቲ ። 19 ከመ ፡ ሶበ ፡ ይጐይይ ፡ ሰብእ ፡ እምአንበሳ ፡ ወይረክብ ፡ ድበ ፡ ወይበውእ ፡ ውስተ ፡ ቤት ፡ ወያሰምክ ፡ እዴሁ ፡ በአረፍት ፡ ወይነስኮ ፡ አርዌ ፡ ምድር ። 20 ከማሁኬ ፡ ጽልመት ፡ ይእቲ ፡ ዕለተ ፡ እግዚአብሔር ፡ ወኢኮነት ፡ ብርሃነ ፡ ወቆባር ፡ ይእቲ ፡ ወአልባ ፡ ጸዳለ ። 21 ጸላእኩ ፡ ወአርሐቁ ፡ በዓለቲክሙ ፡ ወኢያጼኑ ፡ መዐዛ ፡ ምሥዋንቲክሙ ። 22 ወእመኒ ፡ አምጻእክሙ ፡ ሊተ ፡ መሥዋዕቲክሙ ፡ ወቍርባናቲክሙ ፡ ኢይትሜጠዎ ፡ ለክሙ ፡ ወኢይኔጽር ፡ መሥዋዕተ ፡ መድኀኒትክሙ ። 23 አርሕቁ ፡ እምኔየ ፡ ቃለ ፡ ማሕሌትክሙ ፡ ወኢያጸምእ ፡ መዝሙረ ፡ መሰንቆክሙ ። 24 ወይውሕዝ ፡ ፍትሕ ፡ ከመ ፡ ማይ ፡ ወጽድቅኒ ፡ ከመ ፡ ውኂዘ ፡ በድው ። 25 ቦኑ ፡ ዘአባእክሙ ፡ ሊተ ፡ መሥዋዕተ ፡ ወቍርባነ ፡ በግዳም ፡ ዓርብዓ ፡ ዓመተ ፡ ቤተ ፡ እስራኤል ፡ ይቤ ፡ እግዚአብሔር ። 26 ወነሣእክሙ ፡ ደብተራ ፡ ሞሎሕ ፡ ወኮከበ ፡ አምላክሙ ፡ ሬፎን ፡ ዘገበርክሙ ፡ በአምሳሊሁ ። 27 ወኣፍለስክሙ ፡ ውስተ ፡ ደማስቆ ፡ ይቤ ፡ እግዚአብሔር ፡ ዘኵሎ ፡ ይመልክ ፡ ስሙ ።