መሓልየ መሓልይ 6

1 አይቴ ፡ ኀለፈ ፡ ወልድ ፡ እኁኪ ፡ ወንኅሥሦ ፡ ምስሌኪ ፤ ወአይቴ ፡ ሖረ ፡ ወልድ ፡ እኁኪ ፡ ሠናይት ፡ እምአንስት ። 2 ወልድ ፡ እኁየ ፡ ወረደ ፡ ውስተ ፡ ገነቱ ፡ ውስተ ፡ አብያተ ፡ አፈው ፤ ይርዐይ ፡ ገነተ ፡ ወያስተጋብእ ፡ ጽጌያተ ። 3 አነ ፡ ለወልድ ፡ እኁየ ፡ ወወልድ ፡ እኁየ ፡ ሊተ ፤ ዘይሬዒ ፡ ውስተ ፡ ጽጌያት ። 4 ሠናይት ፡ አንቲ ፡ እንተ ፡ ኀቤየ ፡ ከመ ፡ ሥምረት ፤ አዳም ፡ ከመ ፡ ኢየሩሳሌም ፤ ወድንግፅት ፡ ከመ ፡ ብጽዐት ። 5 ሚጢ ፡ አዕይንተኪ ፡ እምአንጻርየ ፡ እስመ ፡ እማንቱ ፡ አስረራኒ ፤ ሥዕርትኪ ፡ ከመ ፡መርዔተ ፡ አጣሊ ፡ እለ ፡ አስተርአያ ፡ እምአድባረ ፡ ገላዐድ ። 6 ስነንኪ ፡ ከመ ፡ መራዕይ ፡ እለ ፡ ተቀርፃ ፤ እለ ፡ ዐርጋ ፡ እምኅፃብ ፤ ኵሎን ፡ እለ ፡ ይመነትዋ ፡ ወአልቦ ፡ እምኔሆን ፡ መካን ። 7 ከመ ፡ ፍሕሶ ፡ ቀይሕ ፡ ከናፍርኪ ፡ ወንባብኪ ፡ አዳም ፤ ከመ ፡ ቅርፍተ ፡ ሮማን ፡ መላትሒኪ ፡ እንበለ ፡ አርምሞትኪ ። 8 ስሳ ፡ እማንቱ ፡ ንግሥታት ፡ ወሰማንያ ፡ ዕቁባት ፤ አዋልድ ፡ እለ ፡ አልቦን ፡ ኍልቈ ። 9 አሐቲ ፡ ይእቲ ፡ ርግብየ ፡ ፍጽምት ፤ አሐቲ ፡ ይእቲ ፡ ለእማ ፤ ወኅሪት ፡ ይእቲ ፡ ለእንተ ፡ ወለደታ ፤ ርእያሃ ፡ አዋልድ ፡ ወአስተብፅዓሃ ፡ ንግሥታት ፡ ወዕቁባት ፡ ወደሳሃ ። 10 መኑ ፡ ይእቲ ፡ ዛቲ ፡ እንተ ፡ ትሔውጽ ፡ ከመ ፡ ጎሕ ፤ ሠናይት ፡ ከመ ፡ ወርኅ ፡ ብርህት ፡ ከመ ፡ ፀሐይ ፤ ድንጋፄ ፡ ከመ ፡ ሥርዐት ። 11 ውስተ ፡ ገነተ ፡ ከርካዕ ፡ ወረደ ፡ ወልድ ፡ እኑየ ፡ ውስተ ፡ ዘርአ ፡ ሙሐዝ ፤ ይርአይ ፡ እመ ፡ ጸገየ ፡ ወይን ፡ ወእመ ፡ ፈረየ ፡ ሮማን ፤ በህየ ፡ እሁብ ፡ አጥባትየ ፡ ለከ ። 12 ነፍስየ ፡ ኢያእመረት ፡ ረስየኒ ፡ ሰረገላተ ፡ አሚናዳብ ።