ዘእንባቆም ነቢይ 1

ዘእንባቆም ፡ ነቢይ ። 1 ተረፈ ፡ ዘርእየ ፡ እንባቆም ፡ ነቢይ ። 2 እስከ ፡ ማእዜኑ ፡ እግዚኦ ፡ ንኬልሕ ፡ ወኢትሰምዐነ ፡ ነአወዩ ፡ ኀቤከ ፡ ተገፊዐነ ፡ ወኢታድኅነነ ። 3 ለምንት ፡ እንከ ፡ አርአይከነ ፡ ስራሐ ፡ ወሕማመ ፡ ከመ ፡ እርአይ ፡ ኀሳረ ፡ ወሕርትምና ፤ በቅድሜየ ፡ ኮነ ፡ ፍትሕ ፡ ወመኰንንኒ ፡ ይትሐለይ ። 4 በእንተ ፡ ዝንቱ ፡ ዐለዉ ፡ ሕገከ ፡ ወኢይወፅእ ፡ ፍትሐ ፡ ጻድቅ ፡ እስመ ፡ ኃጥእ ፡ ይትኤገሎ ፡ ለጻድቅ ፤ በእንተ ፡ ዝንቱ ፡ ይወፅእ ፡ ፍትሕ ፡ ግፍቱእ ። 5 ርእዩኬ ፡ እለ ፡ ታስተሐቅሩ ፡ ወነጽሩ ፡ ወአንክሩ ፡ መንክረ ፡ ወትማስኑ ፤ እስመ ፡ ግብረ ፡ እገብር ፡ አነ ፡ በመዋዕሊክሙ ፡ ዘኢታአምሩ ፡ ወእመሂ ፡ ነገሩክሙ ። 6 ናሁ ፡ እፌኑ ፡ ላዕሌክሙ ፡ ፋርስ ፡ መስተቃትላነ ፡ ሕዝበ ፡ መሪራነ ፡ ወረዋጽያነ ፡ እለ ፡ የሐውሩ ፡ በስፍሐ ፡ ምድር ፡ ከመ ፡ ይረሱ ፡ አብያተ ፡ ዘኢኮነ ፡ ዚአሆሙ ። 7 ግሩም ፡ ራእዩ ፡ ወእምውስቴቱ ፡ ይከውን ፡ ፍትሑ ፡ ወተረፋሂ ፡ እምኔሁ ፡ ይወፅእ ። 8 ወይሰርር ፡ ከመ ፡ ነምር ፡ አፍራሲሆሙ ፡ ወይበድሩ ፡ እምተኵላተ ፡ ዐረብ ፤ ወይሰርሩ ፡ ከመ ፡ ንስር ፡ ዘይጔጕእ ፡ ለበሊዕ ፡ ወይበጽሑ ፡ እምርሑቅ ፡ አፍራሲሆሙ ። 9 ወይበጽሖሙ ፡ ጥፍአት ፡ ለኃጥኣን ፡ እለ ፡ ይትቃወሙ ፡ ፍጽመ ፡ ቅድመ ፡ ገጾሙ ፡ ወያስተጋብኡ ፡ ፄዋሆሙ ፡ ከመ ፡ ኆጻ ። 10 ወውእቱሰ ፡ ይነግሥ ፡ ሎሙ ፡ ወይፈግዕ ፡ ላዕሌሆሙ ፡ ወኀያላን ፡ ተውኔቱ ፡ ወይሳለቅ ፡ ላዕለ ፡ ኵሉ ፡ አጽዋኒሆሙ ፡ ወይደፍኖሙ ፡ በመሬት ፡ ወይእኅዞሙ ። 11 ወእምዝ ፡ ይመይጥ ፡ መንፈሶ ፡ ወየኀልፍ ፡ ወያመሥጥ ፤ ዛቲ ፡ ኀይሉ ፡ ለአምላክየ ። 12 አኮኑ ፡ አንተ ፡ ቀደምከ ፡ እግዚኦ ፡ አምላክየ ፡ ቅዱስ ፡ ወኢትመውት ፤ እግዚኦ ፡ ለኵነኔ ፡ ሠራዕካሁ ፡ ወፈነውከኒ ፡ ከመ ፡ እዝልፍ ፡ በተግሣጹ ። 13 በዐይን ፡ ንጹሕ ፡ ከመ ፡ ኢይነጽር ፡ ውስተ ፡ እኩይ ፡ ወሕማም ፡ ወጻዕር ፤ ለምንት ፡ እንከ ፡ ታረምም ፡ እንዘ ፡ ትሬእዮሙ ፡ ለእለ ፡ ያስተአክዩ ፡ ወይውኅጦ ፡ ኃጥእ ፡ ለጻድቅ ። 14 ወትሬስዮሙ ፡ ከመ ፡ ዓሣተ ፡ ባሕር ፡ ወከመ ፡ አርዌ ፡ ዘአልቦ ፡ መኰንነ ። 15 በመሥገርቱ ፡ አውፅአ ፡ ያኅልቆ ፡ ወሰሐቦ ፡ በመርበብቱ ፡ ወአስተጋብአ ፡ በመሥገርቱ ። 16 በእንተ ፡ ዝንቱ ፡ ይትፌሣሕ ፡ ልቡ ፡ በእንተ ፡ ዝንቱ ፡ ይሠውዕ ፡ ለመሥገርቱ ፡ ወየዐጥን ፡ ለመርበብቱ ፡ እስመ ፡ ቦሙ ፡ አስብሑ ፡ መክፈልቶ ፡ ወኀርየ ፡ ሲሳዮ ። 17 በእንተ ፡ ዝንቱ ፡ ይረብብ ፡ መሥገርቶ ፡ ወዘልፈ ፡ ይቀትሎሙ ፡ ለአሕዛብ ፡ ወኢይምህኮሙ ።