ዘእንባቆም ነቢይ 3

1ጸሎቱ ፡ ለእንባቆም
፡ ነቢይ ፡ ምስለ ፡ ስብሐተ
፡ እግዚአብሔር ።

2እግዚኦ ፡ ሰማዕኩ
፡ ድምፀከ ፡ ወፈራህኩ
፤ ወርኢኩ ፡ ግብረከ ፡
ወደንገፅኩ ፤ በማእከለ
፡ ክልኤ ፡ እንስሳከ ፡
ርኢኩከ ፡ ሶበ ፡ ይቀርብ
፡ ዓመቲሁ ፡ እሌብወከ
፡ ወሶበ ፡ ይበጽሕ ፡ ጊዜሁ
፡ እጤይቀከ ፤ ወሶበ ፡
ደንገፀት ፡ ነፍስየ ፡
እመንሱት ፡ ተዘከረኒ
፡ በምሕረትከ ።

3እግዚአብሔርሰ
፡ እምቴማን ፡ ይመጽእ
፡ ወቅዳስ ፡ እምደብረ
፡ ፋራን ፡ እምአህጉረ
፡ ይሁዳ ፤ ከደነ ፡ ሰማያተ
፡ ሥኑ ፡ ወመልአት ፡ ምድረ
፡ ስብሐቲሁ ።

4ወጸዳሉኒ ፡ ከመ
፡ ብርሃን ፡ ውእቱ ፤ አቅርንት
፡ ውስተ ፡ እደዊሁ ፡ ወረሰየ
፡ ፍቁረ ፡ በጽንዐ ፡ ኀይሉ
።

5ወየሐውር ፡ ቃል
፡ ቅድመ ፡ ገጹ ፡ ወይወፅእ
፡ ውስተ ፡ ገዳም ፡ እምድኅረ
፡ እገሪሁ ።

6ወሶበኒ ፡ ይቀውም
፡ ታድለቀልቅ ፡ ምድር
፡ ወሶበ ፡ ይኔጽር ፡ ይትመሰው
፡ አሕዛብ ፤ ወይትቀጠቀጡ
፡ አድባር ፡ በኀይሉ ፡
ወይትመሰው ፡ አውግር
፡ እለ ፡ እምዓለም ፡ ወርኢኩ
፡ ፍኖቶ ፡ ዘእምዓለም
።

7ወይደነግፁ ፡ አዕጻዳተ
፡ ኢትዮጵያ ፡ ወማኅደረ
፡ ምድረ ፡ ምድያም ።

8ኢትትመዐዕ ፡ ላዕለ
፡ አፍላግ ፡ እግዚኦ ፡
ወኢይኩን ፡ መዐትከ ፡
ላዕለ ፡ አፍላግ ፡ ወኢመቅሠፍትከ
፡ ላዕለ ፡ ባሕር ፤ እስመ
፡ ተጸዐንከ ፡ ዲበ ፡ አፍራሲከ
፡ ወአፍራሲከኒ ፡ መድኀኒት
፡ ውእቱ ።

9ወተረ ፡ ቀስቶ ፡
ወወሠቀ ፡ ቀስቶ ፡ ላዕለ
፡ በትሮሙ ፡ ወይሠጥቅ
፡ ምድረ ፡ አፍላግ ።

10ወይሬእዩከ ፡ ወይደነግፁ
፡ አሕዛብ ፡ ወይዘሮ ፡
ማይ ፡ ውስተ ፡ ፍኖት ፤
ወወሀበት ፡ ቀላይ ፡ ቃላ
፡ ወአልዐለት ፡ ግርማሃ
።

11ተንሥአ ፡ ፀሐይ
፡ ወወርኅኒ ፡ ቆመ ፡ በሥርዐቱ
፡ በመብረቀ ፡ አሕፃከ
፡ የሐውሩ ፡ ወበብርሃነ
፡ መብረቀ ፡ ወልታከ ።

12በኅዳጥ ፡ መዐትከ
፡ ላዕለ ፡ ምድር ፡ ወታወርዶሙ
፡ ለአሕዛብ ፡ ዘመዐትከ
።

13ወፃእከ ፡ ታድኅን
፡ ሕዝበከ ፡ ከመ ፡ ታድኅኖሙ
፡ ለቅቡኣኒከ ፤ ወወደይከ
፡ ውስተ ፡ ርእሶሙ ፡ ሞተ
፡ ፀዋገ ፡ ወአንሣእከ
፡ መኣስሪከ ፡ እስከ ፡
ክሳዶሙ ።

14ወመተርከ ፡ አርእስተ
፡ ኀያላን ፡ በድንጋፄ
፡ መያድለቀልቁ ፡ ባቲ
፤ ወያርኅዉ ፡ ልጓማቲሆሙ
፡ ከመ ፡ ነዳይ ፡ ዘይበልዕ
፡ ጽምሚተ ።

15ወተጸዐንከ ፡ አፍራሲከ
፡ በውስተ ፡ ባሕር ፡ ወየሀውኩ
፡ ማየ ፡ ብዙኀ ።

16ተዐቀብኩ ፡ ወደንገፀኒ
፡ ከርሥየ ፡ እምቃለ ፡
ጸሎተ ፡ ከናፍርየ ፡ ወቦአ
፡ ረዓድ ፡ ውስተ ፡ አዕጽምትየ
፡ ወበመትሕቴየ ፡ አንቀልቀለ
፡ ኀይልየ ፤ ወኣዐርፍ
፡ በዕለተ ፡ ምንዳቤየ
፡ ከመ ፡ እዕረግ ፡ ኀበ
፡ ሕዝብ ፡ ዘፈለስኩ ።

17እስመ ፡ በለስኒ
፡ ኢትፈሪ ፡ ወአልቦ ፡
ቀምሐ ፡ ውስተ ፡ ወይን
፡ ወሐሰት ፡ ግብራ ፡ ለዘይት
፡ ወገራውህኒ ፡ ኢይፈሪ
፡ እክለ ፤ ወአኅለቀ ፡
አባግዕ ፡ ሲሳዮ ፡ ወኢይረክቡ
፡ አልህምት ፡ ዘይቀምሑ
፡ ውስተ ፡ ምቅማሖሙ ።

18አንሰ ፡ በአግዚአብሔር
፡ እትፌሣ(ሕ) ፡ ወእትሐሠይ
፡ ዘአምላክየ ፡ ወመድኀንየ
።

19እግዚአብሔር ፡
አምላክየ ፡ ወኀይልየ
፡ ወያቀውሞን ፡ ለእገርየ
፡ ለዘላፉ ፡ ወያዐርገኒ
፡ ውስተ ፡ መልዕልት ፡
ከመ ፡ ይማእ ፡ በፍኖቱ
። = ።