ዘኢዩኤል ነቢይ 2

1ንፍኁ
፡ ቀርነ ፡ በጽዮን ፡ ወስብኩ ፡ በደብረ ፡ መቅደስየ ፡ ወይደነግፁ ፡ ኵሎሙ ፡ እለ ፡ ይነብሩ ፡ ውስተ ፡ ምድር ፡ እስመ ፡ በጽሐት ፡

2ዕለተ ፡ እግዚአብሔር ፡ ወአልጸቀት ፡ ዕለተ ፡ ጽልመት ፡ ወዐውሎ ፡ ዕለተ ፡ ደመና ፡ ወጊሜ ፤ ከመ ፡ ጎሕ ፡ ይዘረው ፡ ውስተ ፡ አድባር ፡ ሕዝብ ፡ ብዙኅ ፡ ወጽኑዕ ፡ ዘኢኮነ ፡ ከማሁ ፡ እምፍጥረተ ፡ ዓለም ፡ ወኢይደግም ፡ እንከ ፡ እምድኅሬሁ ፡ እስከ ፡ ዓመተ ፡ ትውልደ ፡ ትውልድ ።

3በፍጽምሂ ፡ እሳት ፡ይበልዕ ፡ ወበከዋላኒ ፡ ያውዒ ፡ ነበልባል ፤ ከመ ፡ ገነተ ፡ትፍሥሕት ፡ ምድር ፡ ዘቅድሜሁ ፡ ያገብእ ፡ ድኅሬሁ ፡ ከመ ፡ ደብረ ፡ ሐሩር ፡ ወአልቦ ፡ ዘያመሥጥ ፡ እምኔሁ ።

4ከመ ፡ ገጸ ፡ ፈረስ ፡ ገጾሙ ፡ ወረዋጽያን ፡ ከመ ፡ አፍራስ ፡

5ወከመ ፡ ድምፀ ፡ ሰረገላ ፡ ውስተ ፡ አርእስተ ፡ አድባር ፡ ይሜርዱ ፡ ወከመ ፡ ድምፀ ፡ ነበልባለ ፡ እሳት ፡ እንተ ፡ ትበልዕ ፡ ብርዐ ፡ ወከመ ፡ ሰራዊት ፡ ብዙኃን ፡ ወጽኑዓን ፡ እለ ፡ ይትቃተሉ ፡ ውስተ ፡ መራድ ፡

6ወይትቀጠቀጡ ፡ አሕዛብ ፡ እምቅድመ ፡ ገጹ ፡ ወይከውን ፡ ገጸ ፡ ኵሎሙ ፡ ከመ ፡ ላህበ ፡ መቅጹት ።

7ወይረውጹ ፡ ከመ ፡ መስተቃትላን ፡ ወከመ ፡ ዕደው ፡ ተባዓን ፡ የዐርጉ ፡ አረፍተ ፡ ወኵሎሙ ፡ እንካ ፡ የሐውሩ ፡ በበፍኖቶሙ ፡ ወኢይትገሐሡ ፡ እምፍኖቶሙ ፡

8ወኢይትራሐቁ ፡ አሐዱ ፡ እምካልኡ ፤ ጽዉራኒሆሙ ፡ ንዋየ ፡ ሐቅሎሙ ፡ ይረውጹ ፡ ወያኀልቁ
፡ በሐጾሙ ፡

9ወያስተጋብኡ ፡ አህጉረ ፡ ወይረውጹ ፡ ዲበ ፡ አረፍት ፡ ወይበውኡ ፡ እንተ ፡ መስኮት ፡ ከመ ፡ ሰረቅት ።

10ወትደነግፅ ፡ ምድር ፡ እምቅድመ ፡ ገጾሙ ፡ ወታድለቀልቅ ፡ ሰማይ ፡ ወይጸልም ፡ ፀሓይ ፡ ወወርኅ ፡ ወይጠፍእ ፡ ብርሃኖሙ ፡ ለከዋክብት ።

11ወይሁብ ፡ እግዚአብሔር ፡ ቃሎ ፡ ቅድመ ፡ ገጸ ፡ ኀይሉ ፡ እስመ ፡ ብዙኅ ፡ ፈድፋደ ፡ ትዕይንቱ ፡ ወጽኑዕ ፡ ምግባረ ፡ ቃሉ ፡ እስመ ፡ ዐባይ ፡ ዕለተ ፡ እግዚአብሔር ፡ ወግርምት ፡ ወታስተርኢ ፡ ፈድፋደ ፡ ወምንት ፡ መጠና ።

12ይእዜኒ ፡ ይቤ ፡ እግዚአብሔር ፡ አምላክነ ፡ ተመየጡ ፡ ኀቤየ ፡በኵሉ ፡ ልብክሙ ፡ በጾም ፡ በላሕ ፡ ወበብካይ ፡

13ወሥጥጡ ፡ ልበክሙ ፡ ወአልቦ ፡ አልባሲክሙ ፡ ወተመየጡ ፡ ኀበ ፡ እግዚአብሔር ፡ አምላክክሙ ፡ እስመ ፡ መሓሪ ፡ ወመስተሣህል ፡ ውእቱ ፡ ርሑቀ ፡ መዓት ፡ ወብዙኀ ፡ ምሕረት ፡ ወጻድቅ ፡ ወይኔስሕ ፡ በእንተ ፡ እኪት ።

14መኑ ፡ ያአምር ፡ እመ ፡ ይመይጥ ፡ ወይኔስሕ ፡ ወያተርፍ ፡ ድኅሬሁ ፡ በረከተ ፡ ወመሥዋዕተ ፡ ወሞጻሕተ ፡ ለእግዚአብሔር ፡ አምላክነ ።

15ንፍኁ ፡ ቀርነ ፡ በጽዮን ፡ ቀድሱ ፡ ጾመ ፡ ወስብኩ ፡ ምህልላ ፡ ወአስተጋብኡ ፡ ሕዝበ ፡ ወቀድሱ ፡ ማኅበረክሙ ፤ ኅረዩ ፡ ሊቃውንተ ፡ ወአስተጋብኡ ፡ ሕፃናተ ፡ እለ ፡ ይጠብዉ ፡ ጥበ ፡ ወይፃእ ፡ መርዓዊ ፡ እምጽርሑ ፡ ወመርዓት ፡ እመንጦላዕታ ፡

17ወይብክዩ ፡ ካህናት ፡ እለ ፡ ይሠውዑ ፡ ለእግዚአብሔር ፡ በማእከለ ፡ አቅርንተ ፡ ምሥዋዕ ፡ ወይበሉ ፡ መሐክ ፡ እግዚኦ ፡ ሕዝበከ ፡ ወኢታኅስር ፡ ርስተከ ፡ ከመ ፡ ኢይንፅኅዎሙ ፡ አሕዛብ ፡ ከመ ፡ ኢይበሉ ፡ አሕዛብ ፡ አይቴ ፡ ውእቱ ፡ አምላኮሙ ።

18ወቀንአ ፡ እግዚአብሔር ፡ ለምድሩ ፡ ወመሐኮሙ ፡ ለሕዝቡ ።

19ወተሰጥዎሙ ፡ እግዚአብሔር ፡ ወይቤሎሙ ፡ ለሕዝቡ ፡ ናሁ ፡ እፌኑ ፡ ለክሙ ፡ እክለ ፡ ወወይነ ፡ ወዘይተ ፡ ወትጸግቡ ፡ ወኢይሬስየክሙ ፡ ጽዕለተ ፡ ለአሕዛብ ።

20ወእሰድዶሙ ፡ እምኔክሙ ፡ ለእለ ፡ መንገለ ፡ ደቡብ ፡ ወእሰድዶሙ ፡ ውስተ ፡ ምድረ ፡ በድው ፡ ወኣጠፍእ ፡ ፍጽሞ ፡ ውስተ ፡ ቀዳሚት ፡ ባሕር ፡ ወከዋላሁ ፡ ውስተ ፡ ደኃሪት ፡ ባሕር ፡ ወየዐርግ ፡ ጺአቱ ፡ ወየዐርግ ፡ ንስኀቱ ፡ እስመ ፡ አዕበየ ፡ ምግባሮ ።

21ተአመኒ ፡ ምድር ፡ ወተፈሥሒ ፡ ወተሐሠዪ ፡ እስመ ፡ አዕበየ ፡ እግዚአብሔር ፡ ከመ ፡ ይግበር ።

22ተአመኑ ፡ እንስሳ ፡ ገዳም ፡ እስመ ፡ ብዕለ ፡ አሕቃላተ ፡ በድው ፡ወፈርየ ፡ ዕፀወ ፡ ወይን ፡ ወበለስ ፡ ወሀቡ ፡ ኀይሎሙ ።

23ተፈሥሑ ፡ ወተሐሠዩ ፡ በእግዚአብሔር ፡ አምላክክሙ ፡ ደቂቀ ፡ ጽዮን ፡ እስመ ፡ ወሀበክሙ ፡ ሲሳየ ፡ ጽድቀ ፡ ወያዘንም ፡ ለክሙ ፡ ጸዳየ ፡ ወመፀወ ፡ ከመ ፡ ትካት ።

24ወይመልእ ፡ ዐውደ ፡ እክል ፡ ወይትከዐው ፡ ምክያደ ፡ ወይን ፡ ወዘይት ።

25ወእፈድየክሙ ፡ ህየንተ ፡ ዓመት ፡ ዘበልዐ ፡ አንበጣ ፡ ወደገቢያ ፡ ወዕፄ ፡ ወአናኳዕ ፡ ኀይልየ ፡ ዘፈነውኩ ፡ ላዕሌክሙ ።

26ወተሴሰዩ ፡ ወብልዑ ፡ ወጽገቡ ፡ ወሰብሑ ፡ ስመ ፡ እግዚአብሔር ፡ አምላክነ ፡ እስመ ፡ ገብረ ፡ ለነ 4961; መንክረ ፡ ወኢይኅፈሩ ፡ እንከ ፡ ሕዝብየ ፡ ለዓለም ።

27ወታአምሩ ፡ ከመ ፡ ሀለውኩ ፡ አነ ፡ ማእከለ ፡ እስራኤል ፡ ወአነ ፡ እግዚአብሔር ፡ አምላክክሙ ፡ ወአልቦ ፡ ባዕደ ፡ ዘእንበሌየ ፡ ወኢይትኀፈሩ ፡ እንከ ፡ ኵሉ ፡ ሕዝብየ ፡ ለዓለም ።