ዘኢዩኤል ነቢይ 4

1 እስመ ፡ ይእተ ፡ አሚረ ፡ አነ ፡ በእማንቱ ፡ መዋዕል ፡ እመይጥ ፡ ፄዋ ፡ ይሁዳ ፡ ወኢየሩሳሌም ፡ ወኣስተጋብኦሙ ፡ ለኵሉ ፡ አሕዛብ ፡ ወኣወርዶሙ ፡ ቈላተ ፡ ዮሳፋጥ ፡ ወእትዋቀሶሙ ፡ በህየ ፡ በእንተ ፡ ሕዝብየ ፡ ወበእንተ ፡ ርስትየ ፡ እስራኤል ፡ በኀበ ፡ ተዘርዉ ፡ በውስተ ፡ አሕዛብ ፡ ወተካፈሉ ፡ ምድርየ ፡ ወተዓፀዉ ፡ ዲበ ፡ ሕዝብየ ፡ ወወሀቡ ፡ ደቂቆሙ ፡ ለዘማት ፡ ወሤጡ ፡ አዋልዲሆሙ ፡ በወይን ፡ ወሰትዩ ። 4 ምንተ ፡ ብየ ፡ ምስሌክን ፡ ጢሮስ ፡ ወሲዶና ፡ ወኵሉ ፡ ገሊላ ፡ ዘኢሎፍሊ ፤ በቀለኑ ፡ እንከ ፡ ትትቤቀሉኒ ፡ ወቂመኑ ፡ ትትቄየሙኒ ፤ ፍጡነ ፡ ወጕጉአ ፡ እፈድየክሙ ፡ ፍዳክሙ ፡ ዲበ ፡ ርእስክሙ ። 5 ናሁ ፡ ነሣእክሙ ፡ ወርቅየ ፡ ወብሩርየ ፡ ወዓሥራቲየ ፡ መሠንዮ ፡ አባእክሙ ፡ ቤተክሙ ። 6 ወሤጥክምዎሙ ፡ ለደቂቀ ፡ ይሁዳ ፡ ወለደቂቀ ፡ ኢየሩሳሌም ፡ ኀበ ፡ ደቂቀ ፡ አረሚ ፡ ከመ ፡ ታጥፍእዎሙ ፡ እምብሔሮሙ ። 7 ናሁ ፡ እነሥኦሙ ፡ አነ ፡ እምውእቱ ፡ ብሔር ፡ ኀበ ፡ ሤጥክምዎሙ ፡ ህየ ፡ ወእፈድየክሙ ፡ ፍዳክሙ ፡ ዲበ ፡ ርእስክሙ ። 8 ወእትቤቀሎሙ ፡ ለደቂቅከሙ ፡ ወለአዋልዲክሙ ፡ በእዴሆሙ ፡ ለደቂቀ ፡ ይሁዳ ፡ ወእትቤቀለክሙ ፡ በኀበ ፡ ፄወዉክሙ ፡ በውስተ ፡ አሕዛብ ፡ ርሑቃን ፡ ነዋኀእስመ ፡ እግዚአብሔር ፡ ነበበ ። 9 ስብኩ ፡ ዘንተ ፡ውስተ ፡ አሕዛብ ፡ ዐሥሩ ፡ፀብአ ፡ ወአንሥኡ ፡ መስተቃትላነ ፡ ወአውፅእዎሙ ፡ ወይዕረጉ ፡ ኵሉ ፡ ዕደው ፡ መስተቃትላን ። 10 ወማሕረስክሙኒ ፡ አግብሩ ፡ ኰያንወ ፡ ወማዕፅድክሙኒ ፡ አግብሩ ፡ ረምሐ ፡ ድኩምኒ ፡ ይበል ፡ ጽኑዕ ፡ አነ ። 11 ወይትጋብኡ ፡ ኵሉ ፡ አሕዛብ ፡ ወይሖሩ ፡ ይዕግቱ ፡ ወይትጋብኡ ፡ ህየ ፤ የዋሃን ፡ ይኩኑ ፡ መስተባእሳነ ። 12 ወይትነሥኡ ፡ ኵሉ ፡ አሕዛብ ፡ ወየዐርጉ ፡ ቈላተ ፡ ዮሳፋጥ ፡ እስመ ፡ ህየ ፡ እነብር ፡ ወኣስተዋቅሦሙ ፡ ለኵሉ ፡ አሕዛብ ፡ ወእለ ፡ አድያም ። 13 ፈንዉ ፡ ማዕፅደ ፡ እስመ ፡ በጽሐ ፡ ማእረር ፤ ባኡ ፡ ኪዱ ፡ እስመ ፡ መልአ ፡ ምክያድ ፡ ወተክዕወ ፡ እምነ ፡ ምክያዳት ፡ ናሁ ፡ በዝኀ ፡ እከዮሙ ። 14 ወውዑ ፡ በቈላተ ፡ ቅሥት ፡ ወደምፁ ፡ እስመ ፡ አልጸቀት ፡ ዕለተ ፡ እግዚአብሔር ፡ በውስተ ፡ ቈላተ ፡ ቅሥት ። 15 ፀሓይ ፡ ወወርኅ ፡ ይጸልሙ ፡ ወለከዋክብትኒ ፡ የዐርብ ፡ ብርሃኖሙ ። 16 ወይኬልሕ ፡ እግዚአብሔር ፡ እምጽዮን ፡ ወእምኢየሩሳሌም ፡ ይሁብ ፡ ቃሎ ፡ ወያድለቀልቅ ፡ ሰማይ ፡ ወምድር ፡ ወእግዚአብሔርሰ ፡ ይምሕክ ፡ ሕዝቦ ፡ ወያጸንዖሙ ፡ እግዚአብሔር ፡ ለደቂቀ ፡ እስራኤል ። 17 ወታአምሩ ፡ ከመ ፡ አነ ፡ ውእቱ ፡ እግዚአብሔር ፡ አምላክክሙ ፡ ዘየኀድር ፡ ውስተ ፡ ጽዮን ፡ በደብረ ፡ መቅደስየ ፡ ወትከውን ፡ ኢየሩሳሌም ፡ ሀገረ ፡ ቅድስተ ፡ ወኢየኀልፍ ፡ እንከ ፡ እንተ ፡ ውስቴታ ፡ ዘእምካልእ ፡ ሕዝብ ። 18 ወይከውን ፡ ይእተ ፡ አሚረ ፡ ያንጸፈጽፍ ፡ መዓር ፡ እምአድባር ፡ ወይውኅዝ ፡ ሐሊብ ፡ እምውስተ ፡ አውግር ፡ ወይነቅዕ ፡ ማይ ፡ ኵሎ ፡ በሓውርተ ፡ ይሁዳ ፡ ወይፈለፍል ፡ ነቅዕ ፡ ወይወፅእ ፡ እምቤተ ፡ እግዚአብሔር ፡ ወይሰቂ ፡ ፈለገ ፡ ሰኪኖን ። 19 ወይማስን ፡ ብሔረ ፡ ግብጽ ፡ ወይከውን ፡ በድወ ፡ ኢዶምያ ፡ ወይጠፍኡ ፡ በኀጢአቶሙ ፡ ለደቂቀ ፡ ይሁዳ ፡ እስመ ፡ ከዐዉ ፡ ደመ ፡ ጻድቅ ፡ ውስተ ፡ ምድሮሙ ። 20 ወይሁዳሰ ፡ ለዓለም ፡ ትነብር ፡ ወኢየሩሳሌምኒ ፡ ለትውልደ ፡ ትውልድ ። 21 ወእትቤቀል ፡ ደሞሙ ፡ ወኢያነጽሕ ፡ እስመ ፡ እግዚአብሔር ፡ የኀድር ፡ ውስተ ፡ ጽዮን ።