ዘሚክያስ ነቢይ 3

1 ወይብል ፡ ስምዑ ፡ ዘንተ ፡ መኳንንተ ፡ ቤተ ፡ ያዕቆብ ፡ ወተረፈ ፡ ቤተ ፡ እስራኤል ፡ ኢኮነ ፡ ለክሙ ፡ አእምሮ ፡ ፍትሕ ። 2 እለ ፡ ትጸልዑ ፡ ሠናየ ፡ ወተኀሥሡ ፡ እኩየ ፡ ወትመሥጥዎሙ ፡ አምእስቲሆሙ ፡ እምላዕሌሆሙ ፡ ወሥጋሆሙኒ ፡ እምውስተ ፡ አዕፅምቲሆሙ ። 3 ወበከመ ፡ በልዑ ፡ ሥጋሆሙ ፡ ለሕዝብየ ፡ ወአውፅኡ ፡ አምእስቲሆሙ ፡ እምላዕለ ፡ አዕፅምቲሆሙ ፡ ወቀጥቀጡ ፡ አዕፅምቲሆሙ ፡ ወገመዱ ፡ መሌሊቶሙ ፡ ከመ ፡ ሥጋ ፡ ውስተ ፡ ጽሕርት ፡ ወከመ ፡ አባል ፡ ውስተ ፡ መቅፁት ። 4 [ቀዲሙ ፡] ከማሁ ፡ ይጸርኁ ፡ ኀበ ፡ እግዚአብሔር ፡ ወኢይስምዖሙ ፡ ወይመይጥ ፡ ገጾ ፡ እምኔሆሙ ፡ ይእተ ፡ አሚረ ፡ እስመ ፡ አሕሠሙ ፡ ገቢረ ፡ ላዕሌሆሙ ። 5 ከመዝ ፡ ይቤ ፡ እግዚአብሔር ፡ ላዕለ ፡ ነቢያት ፡ እለ ፡ ያስሕትዎሙ ፡ ለሕዝብየ ፡ እለ ፡ ይኔዝርዎሙ ፡ በስነኒሆሙ ፡ ወይሰብኩ ፡ ሎሙ ፡ ሰላመ ፡ ዘአልቦ ፡ ዘአዘዞሙ ፡ ወአንሥኡ ፡ ላዕሌሆሙ ፡ ቀትለ ። 6 በእንተ ፡ ዝንቱ ፡ ሌሊተ ፡ ይከውነክሙ ፡ ራእይክሙ ፡ ወጽልመተ ፡ ይከውነክሙ ፡ ሰገልክሙ ፡ ወየዐርቦሙ ፡ ፀሓይ ፡ ለነቢያት ፡ ወይጸልሞሙ ፡ መዓልት ። 7 ወይትኀፈሩ ፡ ሐላምያን ፡ ሕልመ ፡ ሐስት ፡ ወይሥሕቅዎሙ ፡ ለሰብአ ፡ ሰገል ፡ ወየሐምይዎሙ ፡ ለኵሎሙ ፡ ወአልቦ ፡ ዘያፀምኦሙ ። 8 እንከ ፡ ለእመ ፡ ኢመላእኩ ፡ ኀይለ ፡ መንፈሰ ፡ እግዚአብሔር ፡ ኀይለ ፡ ወፍትሐ ፡ ከመ ፡ ይንግርዎ ፡ ለያዕቆብ ፡ ኀጢአቶ ፡ ወለእስራኤል ፡ ጌጋዮ ። 9 ስምዑ ፡ ዘንተ ፡ መኳንንተ ፡ ቤተ ፡ ያዕቆብ ፡ ወተረፈ ፡ ቤተ ፡ እስራኤል ፡ እለ ፡ ታስቆርርዋ ፡ ለጽድቅ ፡ ወትገፈትእዋ ፡ ለርትዕ ፡ 10 እለ ፡ ተሐንጽዋ ፡ ለጽዮን ፡ በደም ፡ ወለኢየሩሳሌም ፡ በዐመፃ ። 11 ወመኳንንቲሃኒ ፡ በሕልያን ፡ ይኴንኑ ፡ ወካህናቲሃኒ ፡ በዐስብ ፡ ያወሥኡ ፡ ወነቢያቲሃኒ ፡ በወርቅ ፡ ያሰግሉ ፡ ወላዕለ ፡ እግዚአብሔር ፡ ያሰምኩ ፡ ወይብሉ ፡ አኮኑ ፡ እግዚአብሔር ፡ ምስሌነ ፡ ወኢይረክበነ ፡ እኩይ ። 12 በእንተ ፡ ዝንቱ ፡ በበይነ ፡ ዚአክሙ ፡ የሐርስዋ ፡ ለጽዮን ፡ ከመ ፡ ገራህት ፡ ወትከውን ፡ ኢየሩሳሌም ፡ ከመ ፡ ልገተ ፡ ዐቃቤ ፡ ቀምሕ ፡ ወደብረ ፡ ቤቱሂ ፡ ከመ ፡ ዖመ ፡ ገዳም ።