ዘናሖም ነቢይ 2

1ኀልቍ ፡ ወተስዕረ
።

2ወዐርገ ፡ ዘይነፍሕ ፡ ውስተ ፡ ገጽከ ፡ ወያጠፍአከ
፡ በሕማም ፤ አስተሓይጽ ፡ ፍኖተከ ፡ ወአጽንዕ ፡ ሐቌከ ፤ አጥብዕ ፡ በኀይልከ ፡ በሕቁ ።

3እስመ ፡ ሜጦ ፡ እግዚአብሔር
፡ ለጽዕለትከ
፡ ያዕቆብ ፡ ከመ ፡ ጽዕለተ ፡ እስራኤል ፡ እስመ ፡ ነፂኀ ፡ ነፅኅዎሙ ፡ ወአማሰኑ ፡ አዕጹቂሆሙ ።

4ወላትወ ፡ ኀይሎሙ ፡ እምሰብእ ፡ ዕደው ፡ ኀያላን ፡ እለ ፡ ይትዌነዩ ፡ በእሳት ፡ ማእስረ ፡ ሰረገላቲሆሙ
፡ ለእመ ፡ ይትሬሰዩ ፡ ወአፍራስኒ
፡ ይትሀወክ ።

5ውስተ ፡ ፍናዋት ፡ ይደነግፁ ፡ ሰረገላት ፡ ወይትጓድኡ
፡ በፍኖት ፡ ገጾሙ ፡ ከመ ፡ ነበልባለ ፡ እሳት ፡ ወከመ ፡ መብረቅ ፡ ዘይረውጽ ።

6ወይዜከሩ ፡ መሳፍንቲሆሙ
፡ ወይሜምዑ
፡ ሞዐልተ ፡ ወይደክሙ ፡ በፍኖቶሙ ፡ ወይረውጹ ፡ ዲበ ፡ አረፋቲሃ ፡ ወያነብሩ ፡ መዓቅቢሆሙ ።

7ወይትረኀው ፡ አናቅጸ ፡ አህጉር ፡ ወወድቀ ፡ አብያተ ፡ መንግሥት ።

8ወተከሥተ
፡ ኀይል ፡ ወዐርገት ፡ ይእቲኒ ፤ ወአእማቲሃኒ
፡ ይመርሓሃ
፡ ወይነቅዋ
፡ ከመ ፡ ርግብ ፡ በልቦን ።

9ወነኔዌሰ ፡ ከመ ፡ ምጥማቃተ ፡ ማይ ፡ ማያ ፡ ወእሙንቱሂ
፡ ጐዩ ፡ ወኢቆሙ ፡ ወአልቦ ፡ ዘይትማየጥ ።

10በርበሩ ፡ ብሩረ ፡ ወወርቀ ፡ ወአልቦ ፡ ማኅለቅተ ፡ ሰርጓ ፡ ወክቡድ ፡ ኵሉ ፡ ንዋያ ፡ መፍትው ።

11ወተነግፈ ፡ ወተነዝፈ ፡ ወሐቄ ፡ ስነን ፡ ወድንጋፄ ፡ ልብ ፡ ወረዐደ ፡ ብርክ ፡ ወይቀጽዕ ፡ ኵሎ ፡ ሐቌ ፡ ወይከውን ፡ ገጸ ፡ ኵሉ ፡ ከመ ፡ ጸለሎ ፡ መቅጹት ።

12አይቴ ፡ ውእቱ ፡
ግበቢሆመ ፡
ለአናብስት ፡ ወአይቴ ፡ ይትረዐዩ ፡ እጓለ ፡ አናብስት ፤ አይቴ ፡ ሖረ ፡ አንበሳ ፡ ከመ ፡ ይባእ ፡ ህየ ፡ እጓለ ፡ አንበሳ ፡ ወአልቦ ፡ ዘይጌርም ።

13አንበሳኒይ ፡ መሠጠ ፡ ዘየአክሎ ፡ ለእጐሌሁ ። ወኀነቀ ፡ ለአንስቲያሁ
፡ ወመልአ ፡ ዘነዐወ ፡ ለእጐሊሁ ፡ ወግቦሂ ፡ እምነ ፡ ዘመሠጠ ።

14ናሁ ፡
አነ ፡ ላዕሌከ
፤ ይቤ ፡ እግዚአብሔር ፡ ዘኵሎ ፡ ይመልክ ፤ ወኣነድዶሙ ፡ በጢስ ፡ ለብዝኅከ ፡ ወትበልዖሙ
፡ ኲናት ፡ ለአናብስቲከ
፡ ወኣጠፍኣ
፡ እምድር ፡ ለማዕገትከ
፡ ወኢይሰማዕ
፡ እንከ ፡ ምግባሪከ ።