ኦሪት ዘኍልቍ 35

1ወነበቦ ፡ እግዚአብሔር ፡ ለሙሴ ፡ በዐረበ ፡ ሞአብ ፡ በኀበ ፡ ዮርዳንስ ፡ ዘመንገለ ፡ ኢየሪኮ ፡ ወይቤሎ ፤

2አዝዞሙ ፡ ለደቂቀ ፡ እስራኤል ፡ ከመ ፡ የሀብዎሙ ፡ ለሌዋውያን ፡ እምውስተ ፡ ዘይትዋረሱ ፡ መክፈልቶሙ ፡ አህጉረ ፡ ዘውስቴቶን ፡ ይነብሩ ፡ ወአድያሚሆን ፡ ዘዐውዶን ፡ ለውእቶን ፡ አህጉር ፡ የሀብዎሙ ፡ ለሌዋውያን ።

3ወይኩኖሙ ፡ አህጉረ ፡ እለ ፡ ውስቴቶን ፡ ይነብሩ ፡ ወአዕጻዳቲሆን ፡ ይኩኖሙ ፡ ለላህሞሙ ፡ ወለእንስሳሆሙ ።

4ወደወሎን ፡ ለአህጉር ፡ እለ ፡ ትሁብዎሙ ፡ ለሌዋውያን ፡ እምነ ፡ ሀገሩ ፡ ትሜጥኑ ፡ በአፍአ ፡ እምዐውዱ ፤

5ዕሥራ ፡ ምእት ፡ በእመት ፡ እምዐረፍቱ ፡ ጽባሓዊ ፡ ለሀገር ፡ ወ፳፻በእመት ፡ እምገቦሁ ፡ ዘመንገለ ፡ አዜብ ፡ ወ፳፻በእመት ፡ እምገቦሁ ፡ ዘመንገለ ፡ ባሕር ፡ ወ፳፻በእመት ፡ እምገቦሁ ፡ ዘመንገለ ፡ መስዕ ፡ ወሀገሩ ፡ ማእከለ ፡ ዝንቱ ፡ ትኩንክሙ ፡ ወዘአምሳለ ፡ አህጉሮንሂ ።

6ትሁብዎሙ ፡ ለሌዋውያን ፡ ስሱ ፡ አህጉረ ፡ ዘምስካይ ፡ ዘትፈልጡ ፡ ከመ ፡ ይኩኖ ፡ ምስካይ ፡ ህየ ፡ ለቀታሊ ፡ ወዘእንበለ ፡ እላንቱ ፡ ዘትሁብዎሙ ፡ ባዕደ ፡ አህጉረ ፡ አርብዓ ፡ ወክልኤ ።

7ይከውን ፡ ኵሉ ፡ አህጉር ፡ ዘትሁብዎሙ ፡ ለሌዋውያን ፡ አርብዓ ፡ ወሰማኒ ፡ ወለእላንቱሂ ፡ አህጉር ፡ ምስለ ፡ አድያሚሆን ።

8ወአህጉር ፡ ዘትሁብዎሙ ፡ እምውስተ ፡ መክፈልቶሙ ፡ ለደቂቀ ፡ እስራኤል ፡ እምውስተ ፡ ዘብዙ ኅ ፡ ብዙኅ ፡ ወእምውስተ ፡ ዘውሑድ ፡ ውሑድ ፡ እምውስተ ፡ ርስቶሙ ፡ ዘተከፍሉ ፡ ዘዘ ፡ አሐዱ ፡ እምኔሆሙ ፡ የሀብዎሙ ፡ እምውስተ ፡ ርስቶሙ ፡ ለሌዋውያን ፡ አህጉረ ።

9ወነበቦ ፡ እግዚአብሔር ፡ ለሙሴ ፡ ወይቤሎ ፤

10ንግሮሙ ፡ ለደቂቀ ፡ እስራኤል ፡ ወበሎሙ ፡ ናሁ ፡ ተዐድዉ ፡ አንትሙ ፡ ዮርዳንስ ፡ ውስተ ፡ ምድረ ፡ ከናአን ።

11ወፍልጡ ፡ ለክሙ ፡ አህጉረ ፡ ምስካይ ፡ ከመ ፡ ይኩንክሙ ፡ ኀበ ፡ ይሰኪ ፡ ህየ ፡ ቀታሊ ፡ ኵሉ ፡ ዘቀተለ ፡ ነፍሰ ፡ በኢያእምሮ ።

12ወይኩናክሙ ፡ ውእቶን ፡ አህጉር ፡ ምስካየ ፡ እምነ ፡ አበ ፡ ደም ፡ ከመ ፡ ኢይሙት ፡ ቀታሊ ፡ እስከ ፡ ይቀውም ፡ ቅድመ ፡ ትዕይንት ፡ ወይትሐተት ።

13ወውእቶን ፡ አህጉር ፡ እለ ፡ ትሁቡ ፡ ስሱ ፡ አህጉረ ፡ ምስካይ ፡ ይኩናክሙ ።

14ሠላሰ ፡ አህጉር ፡ ትፈልጡ ፡ በማዕዶተ ፡ ዮርዳንስ ፡ ወሠላሰ ፡ አህጉር ፡ ትፈልጡ ፡ በምድረ ፡ ከናአን ።

15ምስካይ ፡ ይኩኖሙ ፡ ለደቂቀ ፡ እስራኤል ፡ ለግዩርኒ ፡ ወለፈላሲኒ ፡ ዘሀለወ ፡ ኀቤክሙ ፤

16ይኩኖሙ ፡ ምስካየ ፡ እላንቱ ፡ አህጉር ፡ ከመ ፡ ይስኪ ፡ ህየ ፡ ኵሉ ፡ ዘቀተለ ፡ መንፈሰ ፡ በኢያእምሮ ።

17ወእመሰ ፡ በንዋየ ፡ ሐፂን ፡ ዘበጦ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።

18ወለእመኒ ፡ በእብን ፡ ወገሮ ፡ አው ፡ አውደቀ ፡ ላዕሌሁ ፡ እምውስተ ፡ እዴሁ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።

19ወለእመኒ ፡ በንዋየ ፡ ዕፅ ፡ ዘበጦ ፡ ወሞተ ፡ አው ፡ አውደቀ ፡ ላዕሌሁ ፡ እምውስተ ፡ እዴሁ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።

20ወአበ ፡ ደም ፡ ለሊሁ ፡ ይቅትሎ ።

21ወእመኒ ፡ ጸልኦ ፡ ይጸልኦ ፡ ወአውደቀ ፡ ላዕሌሁ ፡ ዘኮነ ፡ ንዋየ ፡ እንዘ ፡ ይፀንሖ ፡ ወሞተ ፤

22ቀታሊ ፡ ውእቱ ፡ ይቅትልዎ ፡ ለዘባጢ ፡ እስመ ፡ ቀታሊ ፡ ውእቱ ፤ ሞተ ፡ ለይሙት ፡ ዘቀተለ ፡ ወአበ ፡ ደም ፡ ለይቅትሎ ፡ በኀበ ፡ ረከቦ ።

23ወእመሰ ፡ ግብት ፡ ውእቱ ፡ እንዘ ፡ ኢይጸልእ ፡ ወአውደቀ ፡ ላዕሌሁ ፡ ዘኮነ ፡ ንዋየ ፡ እንዘ ፡ ኢይጸንሖ ፤

24አው ፡ በዘ ፡ ኮነ ፡ እብን ፡ ወሞተ ፡ ቦቱ ፡ ወቀተሎ ፡ እንዘ ፡ ኢያአምር ፡ ወኢኮነ ፡ ጸላኢሁ ፡ ወኢይፈቅድ ፡ ያሕስም ፡ ላዕሌሁ ፤

25ወይሕትቱ ፡ ትዕይንት ፡ ማእከለ ፡ ቀታሊ ፡ ወማእከለ ፡ አበ ፡ ደም ፡ በከመ ፡ ዝንቱ ፡ ፍትሕ ።

26ወያድኅንዎ ፡ ትዕይንት ፡ ለዘ ፡ ቀተለ ፡ እምነ ፡ አበ ፡ ደም ፡ ወይወስድዎ ፡ ትዕይንት ፡ ውስተ ፡ ሀገረ ፡ ምስካይ ፡ ኀበ ፡ ይሰኪ ፡ ወይነብር ፡ ህየ ፡ እስከ ፡ ይመውት ፡ ካህን ፡ ዐቢይ ፡ ዘቀብእዎ ፡ በቅብአ ፡ ቅድሳት ።

27ወለእመሰ ፡ ወፅአ ፡ አፍአ ፡ ቀታሊ ፡ ውእተ ፡ አድዋለ ፡ ሀገር ፡ እንተ ፡ ውስቴታ ፡ ሰከየ ፡ ህየ ፤

28ወረከቦ ፡ አበ ፡ ደም ፡ በአፍአ ፡ ውስተ ፡ አድዋለ ፡ ሀገረ ፡ ምስካዩ ፡ ወቀተሎ ፡ አበ ፡ ደም ፡ ለቀታሊ ፡ አልቦ ፡ ጌጋየ ።

29እስመ ፡ ውስተ ፡ ሀገረ ፡ ምስካዩ ፡ ይነብር ፡ እስከ ፡ ይመውት ፡ ካህን ፡ ዐቢይ ፡ ወእምድኅረ ፡ ሞተ ፡ ካህን ፡ ዐቢይ ፡ ይገብእ ፡ ውስተ ፡ ምድረ ፡ ብሔሩ ፡ ወከመዝ ፡ ይኩንክሙ ፡ ፍትሐ ፡ ኵነኔ ፡ በመዋዕሊክሙ ፡ በኵሉ ፡ በሓውርቲክሙ ።

30ኵሉ ፡ ዘቀተለ ፡ መንፈሰ ፡ ወዘለፎ ፡ ማኅተት ፡ ቅትልዎ ፡ ለቀታሊ ፡ ወስምዕ ፡ አሐዱ ፡ ኢይከውን ፡ ማሕተተ ፡ ለአቅትሎ ፡ መንፈስ ።

31ወኢትንሥኡ ፡ ቤዛ ፡ በእንተ ፡ ነፍስ ፡ በኀበ ፡ ቀታሊ ፡ ዘጌጋዩ ፡ ለመዊት ፡ ሞተ ፡ ለይሙት ።

32ወኢትንሥኡ ፡ ቤዛ ፡ ከመ ፡ ታጕይይዎ ፡ ውስተ ፡ ሀገረ ፡ ምስካይ ፡ ከመ ፡ ይንበር ፡ ካዕበ ፡ ውስተ ፡ ምድር ፡ እስከ ፡ ይመውት ፡ ካህን ፡ ዐቢይ ።

33ወኢትግበርዋ ፡ ቀታሊተ ፡ ለምድርክሙ ፡ እንተ ፡ ውስቴታ ፡ ትነብሩ ፡ እስመ ፡ ውእቱ ፡ ደም ፡ ዘይሬስያ ፡ ቀታሊተ ፡ ለምድር ፡ ወኢትሰሪ ፡ ሎቱ ፡ ምድር ፡ ለዘ ፡ ከዐወ ፡ ደመ ፡ ላዕሌሃ ።

34ወኢትገምንዋ ፡ ለምድር ፡ እንተ ፡ ውስቴታ ፡ ትነብሩ ፡ ወእንተ ፡ ውስቴታ ፡ አነ ፡ አኀድር ፡ ምስሌክሙ ፡ እስመ ፡ አነ ፡ ውእቱ ፡ እግዚአብሔር ፡ ዘየኀድር ፡ ማእከሎሙ ፡ ለደቂቀ ፡ እስራኤል ።