መዝሙራት ዘዳዊት 140

መዝሙር ፡ ዘዳዊት ።

1እግዚኦ ፡ ጸራኅኩ ፡ ኀቤከ ፡ ስምዐኒ ፤
ወአፅምእ ፡ ቃለ ፡ ስእለትየ ፡ ዘጸራኅኩ ፡ ኀቤከ ።

2ተወከፈኒ ፡ ጸሎትየ ፡ ከመ ፡ ዕጣን ፡ በቅድሜከ ፤
አንሥኦ ፡ እደውየ ፡ መሥዋዕተ ፡ ሰርክ ።

3ሢም ፡ እግዚኦ ፡ ዐቃቤ ፡ ለአፉየ ፤
ወማዕጾ ፡ ዘዐቅም ፡ ለከናፍርየ ።

4ኢትሚጦ ፡ ለልብየ ፡ ውስተ ፡ ነገር ፡ እኩይ ፡
ወአመክንዮ ፡ ምክንያት ፡ ለኃጢአት ፡

5ምስለ ፡ ሰብእ ፡ ገበርተ ፡ ዐመፃ ፤
ወኢይትኀበር ፡ ምስለ ፡ ኅሩያኒሆሙ ።

6ገሥጸኒ ፡ በጽድቅ ፡ ወተዛለፈኒ ፡ በምሕረት ፤
ወቅብአ ፡ ኃጥኣንሰ ፡ ኢይትቀባእ ፡ ርእስየ ።

7እስመ ፡ ዓዲ ፡ ጸሎትየኒ ፡ ከመ ፡ ኢተሣሀሎሙ ፤
ተሰጥሙ ፡ በጥቃ ፡ ኰኵሕ ፡ ጽኑዓኒሆሙ ።

8ሰምዑኒ ፡ ቃልየ ፡ እስመ ፡ ተክህለኒ ።
ከመ ፡ ግዝፈ ፡ ምድር ፡ ተሠጥቁ ፡ ዲበ ፡ ምድር ፤

9ወተዘርወ ፡ አዕጽምቲሆሙ ፡ በኀበ ፡ ሲኦል ፡
እስመ ፡ ኀቤከ ፡ እግዚኦ ፡ እግዚኦ ፡ አዕይንትየ ፤
ብከ ፡ ተወከልኩ ፡ ኢታውፅኣ ፡ ለነፍስየ ።

10ዕቀበኒ ፡ አመሥገርት ፡ እንተ ፡ ኀብኡ ፡ ሊተ ፤
ወእማዕቀፎሙ ፡ ለገበርተ ፡ ዐመፃ ።

11ለይደቁ ፡ ውስተ ፡ መሥገርቶሙ ፡ ኃጥኣን ፤
እስመ ፡ አኀልፍ ፡ አነ ፡ ባሕቲትየ ።