መዝሙራት ዘዳዊት 23

መዝሙር ፡ ዘዳዊት ፡ ዘቀዳሚተ
ሰንበት ።

1ለእግዚአብሔር ፡ ምድር ፡ በምልኣ ፤
ወዓለምኒ ፡ ወኵሎሙ ፡ እለ ፡ ይነብሩ ፡ ውስቴታ ።

2ወውእቱ ፡ በባሕር ፡ ሳረራ ፤
ወበአፍላግኒ ፡ ውእቱ ፡ አጽንዓ ።

3መኑ ፡ የዐርግ ፡ ውስተ ፡ ደብረ ፡ እግዚአብሔር ፤
ወመኑ ፡ ይቀውም ፡ ውስተ ፡ መካነ ፡ መቅደሱ ።

4ዘንጹሕ ፡ ልቡ ፡ ወንጹሕ ፡ እደዊሁ ።
ወዘኢነሥአ ፡ ከንቶ ፡ ላዕለ ፡ ነፍሱ ፤
ወዘኢመሐለ ፡ በጕሕሉት ፡ ለቢጹ ።

5ውእቱ ፡ ይነሥእ ፡ በረከተ ፡ እምኀበ ፡ እግዚአብሔር ፤
ወሣህሉኒ ፡ እምኀበ ፡ እግዚአብሔር ፡ አምላኩ ።

6ዛቲ ፡ ትውልድ ፡ ተኀሦ ፡ ሎቱ ፤
ወተኀሥሥ ፡ ገጾ ፡ ለአምላከ ፡ ያዕቆብ ።

7አርኅው ፡ ኆኃተ ፡ መኳንንት ፡
ወይትረኀዋ ፡ ኆኃት ፡ እለ ፡ እምፍጥረት ፤
ወይባእ ፡ ንጉሠ ፡ ስብሐት ።

8መኑ ፡ ውእቱ ፡ ዝንቱ ፡ ንጉሠ ፡ ስብሐት ።
እግዚአብሔር ፡ ኀያል ፡ ወጽኑዕ ፤
እግዚአብሔር ፡ ኀያል ፡ በውስተ ፡ ፀብእ ።

9አርኅው ፡ ኆኃተ ፡ መኳንንት ፡
ወይትረኀዋ ፡ ኆኃት ፡ እለ ፡ እምፍጥረት ፤
ወይባእ ፡ ንጉሠ ፡ ስብሐት ።

10መኑ ፡ ውእቱ ፡ ዝንቱ ፡ ንጉሠ ፡ ስብሐት ፤
እግዚአብሔር ፡ አምላከ ፡ ኀያላን ፡ ውእቱ ፡ ዝንቱ ፡ ንጉሠ ፡ ስብሐት ።