መጽሐፈ ነገሥት ፬ 10

1 ወቦቱ ፡ አካአብ ፡ ፸ደቂቀ ፡ ውስተ ፡ ሰማርያ ፡ ወጸሐፈ ፡ [ኢዩ ፡] መጽሐፈ ፡ ወፈነወ ፡ ውስተ ፡ ሰማርያ ፡ ኀበ ፡ መላእክተ ፡ ሰማርያ ፡ ወኀበ ፡ ሊቃናት ፡ ወኀበ ፡ ሐፀንቶሙ ፡ ለደቂቀ ፡ አካአብ ፡ ወጸሐፈ ፡ እንዘ ፡ ይብል ፤ 2 ይእዜኒአ ፡ እምከመ ፡ በጽሐት ፡ ዛቲአ ፡ መጽሐፍአ ፡ ኀቤክሙ ፡ ናሁ ፡ ሀለዉ ፡ ደቂቁ ፡ ለእግዚእክሙ ፡ ኀቤክሙ ፡ ወአፍራሲሁኒ ፡ ኀቤክሙ ፡ ወሰረገላቲሁኒ ፡ ወአህጉሪሁኒ ፡ ጽኑዓት ፡ ወንዋየ ፡ ሐቅሉኒ ። 3 ወርእዩ ፡ ለክሙ ፡ ዘይኄይስ ፡ ዘትፈቅዱ ፡ እምውስተ ፡ ደቁ ፡ ለእግዚእክሙ ፡ አንብርዎ ፡ ላዕለ ፡ መንበረ ፡ አቡሁ ፡ ወተቃተሉአ ፡ ለቤተ ፡ እግዚእክሙአ ። 4 ወፈርሁ ፡ ፈድፋደ ፡ ወይቤሉ ፡ ዘ፪ነገሥት ፡ ስእኑ ፡ ቀዊመ ፡ ቅድመ ፡ ገጹ ፡ እፎ ፡ እንከ ፡ ንሕነ ፡ ንክል ፡ ቀዊመ ፡ ቅድመ ፡ ገጹ ። 5 ወለአኩ ፡ መገብተ ፡ ቤቱ ፡ ወመገብተ ፡ ሀገር ፡ ወሊቃናት ፡ ወሐፀንቶሙ ፡ ኀበ ፡ ኢዩ ፡ እንዘ ፡ ይብሉ ፡ ንሕነሰአ ፡ አግብርቲከአ ፡ ንሕነ ፡ ወዘአዘዝከነ ፡ ንገብር ፡ ወአልቦ ፡ ብእሲ ፡ ዘናነግሥ ፤ ዘትፈቅድአ ፡ ግበርአ ። 6 ወእምዝ ፡ ጸሐፈ ፡ ሎሙ ፡ ኢዩ ፡ ካልእተ ፡ መጽሐፈ ፡ እንዘ ፡ ይብል ፡ እመሰኬአ ፡ እሊአየአ ፡ አንትሙ ፡ ትሰምዑኒ ፡ ቃልየ ፡ ምትሩ ፡ አርእስቲሆሙ ፡ ለደቂቀ ፡ እግዚእክሙ ፡ ወፈንዉ ፡ ኀቤየ ፡ ውስተ ፡ እስራኤል ፡ ጌሠምአ ፡ ዘጊዜ ፤ ወደቂቀ ፡ ንጉሥ ፡ ፸ዕደው ፡ እሙንቱ ፡ ጽኑዓነ ፡ ሀገር ። 7 ወሶበ ፡ በጽሐት ፡ መጽሐፍ ፡ ኀቤሆሙ ፡ ነሥእዎሙ ፡ ለደቂቀ ፡ ንጉሥ ፡ ወረገዝዎሙ ፡ ፸ዕደው ፡ ወሰቀሉ ፡ አርእስቲሆሙ ፡ ውስተ ፡ ዕፀወ ፡ ቀርጣልስ ፡ ወፈነውዎሙ ፡ ኀቤሁ ፡ ውስተ ፡ እስራኤል ። 8 ወበጽሐ ፡ ሐዋርያሁ ፡ ወነገሮ ፡ ወይቤሎ ፡ አምጻእኩ ፡ አርእስቲሆሙ ፡ ለደቂቀ ፡ ንጉሥ ፡ ወይቤሎ ፡ ንጉሥ ፡ ወጥኅዎሙ ፡ ምክዕቢተ ፡ በጽባሕ ፡ ኀበ ፡ አንቀጸ ፡ ሀገር ። 9 ወሶበ ፡ ጸብሐ ፡ ወጽአ ፡ ንጉሥ ፡ ኀበ ፡ አንቀጸ ፡ ሀገር ፡ ወይቤሎሙ ፡ ለኵሉ ፡ ሕዝብ ፡ ድኅንክሙ ፡ አንትሙ ፡ ናሁ ፡ አነ ፡ ዐለውኩ ፡ ቤተ ፡ አጋእዝትየ ፡ ወቀተልክዎሙ መኑ ፡ ቀተሎሙ ፡ እንከ ፡ ለእሉ ፡ ኵሎሙ ። 10 ናሁ ፡ ርእይዎ ፡ በእፎ ፡ ከመ ፡ ኢይወድቅ ፡ እምነ ፡ ቃሉ ፡ ለእግዚአብሔር ፡ ውስተ ፡ ምድር ፡ ዘነበበ ፡ እግዚአብሔር ፡ ላዕለ ፡ ቤተ ፡ አካአብ ፡ በውስተ ፡ እስራኤል ፡ ወገብረ ፡ እግዚአብሔር ፡ ኵሎ ፡ ዘነበበ ፡ በእደ ፡ ገብሩ ፡ ኤልያስ ። 11 ወቀተሎሙ ፡ ኢዩ ፡ ለኵሎሙ ፡ ሰብአ ፡ ቤቱ ፡ ለአካአብ ፡ እለ ፡ ተርፉ ፡ ውስተ ፡ እስራኤል ፡ ወለኵሎሙ ፡ ጽኑዓኒሁ ፡ ወለኵሉ ፡ ማኅፈሩ ፡ ወለኵሉ ፡ ካህናቲሁ ፡ ወኢያትረፈ ፡ እምኔሆሙ ፡ ወኢ፩ ። 12 ወተንሥአ ፡ ወሖረ ፡ ሰማርያ ፡ ወበጽሐ ፡ ቤተ ፡ ቃት ፡ ኀበ ፡ ኖሎት ፡ እለ ፡ ውስተ ፡ ፍኖት ። 13 ወረከቦሙ ፡ ኢዩ ፡ ለአኀዊሁ ፡ ለአካዝያስ ፡ ንጉሠ ፡ ይሁዳ ፡ ወይቤሎሙ ፡ መኑ ፡ አንትሙ ፡ ወይቤልዎ ፡ አኀዊሁ ፡ ለአካዝያስ ፡ ንጉሠ ፡ ይሁዳ ፡ ንሕነ ፡ ወወረድነ ፡ ንዜንዎሙ ፡ ዳኅናሆሙ ፡ ለዶቂቀ ፡ ንጉሥ ፡ ወለደቂቀ ፡ ኀያላኑ ። 14 ወአዘዘ ፡ የአኀዝዎሙ ፡ ሕያዋኒሆሙ ፡ ወረገዝዎሙ ፡ በቤተ ፡ ቃት ፡ ፵ወ፪ዕደው ፡ እሙንቱ ፡ ወኢያትረፈ ፡ እምኔሆሙ ፡ ወኢ፩ብእሌ ። 15 ወሖረ ፡ እምህየ ፡ ወረከቦ ፡ ለኢዮናዳብ ፡ ወልደ ፡ ሬካብ ፡ በፍኖት ፡ ተቀበሎ ፡ ወባረኮ ፡ ወይቤሎ ፡ ኢዩ ፡ ርቱዕኑ ፡ ልብከ ፡ ምስሌየ ፡ ከመ ፡ ርቱዕ ፡ ልብየ ፡ ምስሌከ ፡ ወይቤሎ ፡ ኢዮናዳብ ፡ እወ ፡ ወይቤሎ ፡ ኢዩ ፡ እመሰኬ ፡ አማንከ ፡ መጥወኒ ፡ እዴከ ፡ ወመጠዎ ፡ እዴሁ ፡ ወአዕረጎ ፡ ኀቤሁ ፡ ውስተ ፡ ሰረገላሁ ። 16 ወይቤሎ ፡ ነዓ ፡ ምስሌየ ፡ ወትሬኢ ፡ ዘከመ ፡ እቀንእ ፡ ለእግዚአብሔር ፡ ጻባኦት ፡ ወአጽዐኖ ፡ ምስሌሁ ፡ ውስተ ፡ ሰረገላሁ ። 17 ወቦአ ፡ ሰማርያ ፡ ወቀተለ ፡ ኵሎ ፡ ዘተረፈ ፡ ሰብኡ ፡ ለአካአብ ፡ ዘውስተ ፡ ሰማርያ ፡ እስከ ፡ ደምሰሶሙ ፡ በከመ ፡ ቃለ ፡ እግዚአብሔር ፡ ዘይቤሎ ፡ ለኤልያስ ። 18 ወወሐኮሙ ፡ ኢዩ ፡ ለኵሉ ፡ ሕዝብ ፡ ወይቤሎሙ ፡ አካአብሰ ፡ ውኁደ ፡ ተቀንየ ፡ ለበዓል ፡ ወኢዩስ ፡ ብዙኀ ፡ ይትቀነይ ፡ ሎቱ ። 19 ወይእዜኒ ፡ ጸውዑ ፡ [ሊተ ፡] ኵሎ ፡ ነቢያቲሁ ፡ ለበዓል ፡ ወኵሎ ፡ አግብርቲሁ ፡ ወኵሎ ፡ ማርያቶ ፡ ወአልቦ ፡ ዘተኀድጉ ፡ እስመ ፡ ዐቢይ ፡ መሥዋዕቱ ፡ ለበዓል ፡ ወኵሉ ፡ ዘኢመጽአ ፡ ይመውት ፤ ወኢዩሰ ፡ ተመየኖሙ ፡ ከመ ፡ ይቅትሎሙ ፡ ለኵሉ ፡ አግብርተ ፡ በዓል ። 20 ወይቤሎሙ ፡ ኢዩ ፡ አንጽሑ ፡ መሥዋዕተክሙ ፡ ለበዓል ፡ ወሰበኩ ፡ ሎሙ ። 21 ወለአከ ፡ ኢዩ ፡ ውስተ ፡ ኵሉ ፡ በሓውርተ ፡ እስራኤል ፡ ወመጽኡ ፡ ኵሎሙ ፡ አግብርተ ፡ በዓል ፡ ወኵሎሙ ፡ ነቢያቲሁ ፡ ወኢተኅደገ ፡ ወኢ፩እምውስቴቶሙ ፡ ብእሲ ፡ ዘኢመጽአ ፡ ወቦኡ ፡ ኵሎሙ ፡ ቤተ ፡ በዓል ፡ ወመልእዎ ፡ ለቤተ ፡ በዓል ፡ ኵለንታሁ ። 22 ወይቤሎ ፡ ኢዩ ፡ ለመጋቤ ፡ ቤተ ፡ መስተዓድ ፡ አውጽእ ፡ አልባሰ ፡ ለኵሉ ፡ አግብርተ ፡ በዓል ፡ ወአውፅአ ፡ ሎሙ ፡ ዘይዔርዘሙ ። 23 ወቦኡ ፡ ኢዩ ፡ ወኢዩናዳብ ፡ ወልዴ ፡ ሬካብ ፡ ውስተ ፡ ቤተ ፡ በዓል ፡ ወይቤሎሙ ፡ ለአግብርተ ፡ በዓል ፡ ተፋቀዱ ፡ ወአእምሩ ፡ እመበ ፡ ውስቴትክሙ ፡ እምነ ፡ አግብርተ ፡ እግዚአብሔር ፡ ዘእንበለ ፡ ባሕቲትክሙ ፡ አንትሙ ፡ ዳእሙ ፡ አግብርተ ፡ በዓል ፡ ወመሥዋዕትክሙ ፡ አልቦ ፡ ዘየሀሉ ፡ ዝየ ። 24 ወአዘዘ ፡ ኢዩ ፡ ፹ብእሴ ፡ ይቁሙ ፡ አፍአ ፡ ወይቤሎሙ ፡ ፩ብእሲ ፡ እመቦ ፡ ዘአምሠጠክሙ ፡ እምእሉ ፡ ዕደው ፡ እለ ፡ ኣወፅእ ፡ ኀቤክሙ ፡ አነ ፡ ነፍስክሙ ፡ ትመውት ፡ ህየንተ ፡ ነፍሱ ፡ ለውእቱ ፡ ዘአምሠጠክሙ ። 25 ወእምዝ ፡ ሶበ ፡ አኅለቁ ፡ ገቢረ ፡ መሥዋዕት ፡ ወይቤሎሙ ፡ ኢዩ ፡ ለወዓሊሁ ፡ ወለሐራሁ ፡ ባኡ ፡ ወቅትልዎሙ ፡ ወአልበ ፡ ዘያመሥጠክሙ ፡ እምኔሆሙ ፡ ወቀተልዎሙ ፡ በኀጺን ፡ ወገደፍዎሙ ፡ ወዓሊሁ ፡ ወሐራሁ ፡ ወቦኡ ፡ ሀገረ ። 26 ወአውዐዩ ፡ ቤተ ፡ በዓል ፡ ወኵሎ ፡ ንዋዮ ፡ ወኵሎ ፡ አልባሲሁ ። 27 ወአውደቁ ፡ ኵሎ ፡ አምሳሊሁ ፡ ለበዓል ። 28 ወእማሰኖ ፡ ኢዩ ፡ ለበዓል ፡ ይእተ ፡ አሚረ ፡ እምነ ፡ እስራኤል ። 29 ወባሕቱ ፡ ኢዩ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ፡ ኢየኀድጎሙ ፡ ኢዩ ፡ እምቅድሜሆሙ ፡ ለእልክቱ ፡ እጐልት ፡ እለ ፡ ወርቅ ፡ አሐቲ ፡ እንተ ፡ ውስተ ፡ ቤቴል ፡ ወአሐቲ ፡ እንተ ፡ ውስተ ፡ ዳን ። 30 ወይቤሎ ፡ እግዚአብሔር ፡ ለኢዩ ፡ እስመ ፡ አሠነይከ ፡ ገቢረ ፡ ቅድመ ፡ አዕይንትየ ፡ ወኵሎ ፡ ዘኀለይኩ ፡ በልብየ ፡ ገበርከ ፡ ላዕለ ፡ ቤተ ፡ አካአብ ፡ እስከ ፡ ራብዕ ፡ ትውልድከ ፡ ይነብሩ ፡ ላዕለ ፡ መንበረ ፡ እስራኤል ። 31 ወኢተዐቀበ ፡ ኢዩ ፡ ከመ ፡ ይሖር ፡ በሕገ ፡ እግዚአብሔር ፡ አምላከ ፡ እስራኤል ፡ በኵሉ ፡ ልቡ ፤ ኢኀደገ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ። 32 ወይእተ ፡ አሚረ ፡ አኀዘ ፡ ይቅትሎሙ ፡ እግዚአብሔር ፡ ለእስራኤል ፡ ወቀተሎሙ ፡ አዛሔል ፡ በውስተ ፡ ኵሉ ፡ በሓውርቲሆሙ ፡ ለእስራኤል ፤ 34 እምጽባሐ ፡ ዮርዳኖስ ፡ ወኵሉ ፡ ብሔረ ፡ ገለአድ ፡ ዘጋድ ፡ ወዘሮቤል ፡ ወዘምናሴ ፡ እምአሮኤር ፡ እንተ ፡ ውስተ ፡ ከንፈረ ፡ አርኖን ፡ ዘገለአድ ፡ ወባሳን ። 35 ወኵሉ ፡ ነገሩ ፡ ለኢዩ ፡ ወኵሉ ፡ ዘገብረ ፡ ወኵሉ ፡ ኀይሉ ፡ ወኵሉ ፡ ዘቀተለ ፡ ዝውእቱ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 36 ወሰከበ ፡ ኢዩ ፡ ምስለ ፡ አበዊሁ ፡ ወተቀብረ ፡ ውስተ ፡ ሰማርያ ፡ ወነግሠ ፡ ኢዮአካስ ፡ ወልዱ ፡ ህየንቴሁ ። 37 ወ፳ወ፰ክራማተ ፡ ነግሠ ፡ ኢዩ ፡ ለእስራኤል ፡ በሰማርያ ።