መጽሐፈ ነገሥት ፬ 17

1አመ ፡ ፲ወ፪ዓመተ
፡ መንግሥቱ ፡ ለአካዝ
፡ ንጉሠ ፡ ይሁደ ፡ ነግሠ
፡ ሆሴዕ ፡ ወልደ ፡ ኤላ
፡ በሰማርያ ፡ ለእስራኤል
፡ ፱ክረምተ ።

2ወገብረ
፡ እኩየ ፡ ቅድመ ፡ አዕይንቲሁ
፡ ለእግዚአብሔር ፡ ወባሕቱ
፡ ኢከመ ፡ ነገሥተ ፡ እስራኤል
፡ እለ ፡ እምቅድሜሁ ።

3ወዐርገ ፡ ስልምናሶር
፡ ንጉሠ ፡ ፋርስ ፡ ወኮኖ
፡ ሆሴዕ ፡ ገብረ ፡ ወአግብአ
፡ ሎቱ ፡ መሀና ።

4ወብእሶ
፡ ለንጉሠ ፡ ፋርስ ፡ እስመ
፡ ፈነወ ፡ ሐዋርያተ ፡
ኀበ ፡ ሰጎል ፡ ንጉሠ ፡
ግብጽ ፡ ወኢያምጽአ ፡
ሎቱ ፡ መሀና ፡ ለንጉሠ
፡ ፋርስ ፡ በውእቱ ፡ ዓመት
፡ ወተቃተሎ ፡ ንጉሠ ፡
ፋርስ ፡ ወአሰሮ ፡ ውስተ
፡ ቤተ ፡ ሞቅሕ ።

5ወዐርገ
፡ ንጉሠ ፡ ፋርስ ፡ ውስተ
፡ ኵሉ ፡ ምድር ፡ ወዐርገ
፡ ውስተ ፡ ሰማርያ ፡ ወተቃተለ
፡ ፫ዓመተ ።

6ወአመ ፡
፱ ፡ ዓመተ ፡ መንግሥቱ
፡ ለሆሴዕ ፡ ነሥኣ ፡ ንጉሠ
፡ ፋርስ ፡ ለሰማርያ ፡
ወአፍለሶሙ ፡ ለእስራኤል
፡ ብሔረ ፡ ፋርስ ፡ ወአንበሮሙ
፡ ውስተ ፡ አላሔ ፡ ወውስተ
፡ አቦር ፡ አፍላገ ፡ ጎዛን
፡ ወውስተ ፡ አድባረ ፡
ሜዶን ።

7ወአመ ፡ ይኤብሱ
፡ ደቂቀ ፡ እስራኤል ፡
ለእግዚአብሔር ፡ አምላኮሙ
፡ ዘአውፅኦሙ ፡ አምድረ
፡ ግብጽ ፡ እምታሕተ ፡
እዴሁ ፡ ለፈርዖን ፡ ንጉሠ
፡ ግብጽ ፡ ወኢፈርህዎ
፡ ለእግዚአብሔር ፡ ወአምላኩ
፡ ባዕደ ፡ አማልክተ ።

8ወሖሩ ፡ በሕገ ፡ አሕዛብ
፡ እለ ፡ አሰሰለ ፡ እግዚአብሔር
፡ እምቅድመ ፡ ገጾሙ ፡
ለደቂቀ ፡ እስራኤል ፡
ወኵሉ ፡ ዘገብሩ ፡ ነገሥተ
፡ እስራኤል ፤

9ወኵሉ
፡ ዘፈጠሩ ፡ ነገረ ፡ ደቂቀ
፡ እስራኤል ፡ ዘኢይፈቅድ
፡ እግዚአብሔር ፡ አምላኮሙ
፡ ወሐነጹ ፡ ሎሙ ፡ አብያተ
፡ አማልክት ፡ ውስተ ፡
ኵሉ ፡ አህጉሪሆሙ ፡ እምነ
፡ ማኅፈዶሙ ፡ ለሰብአ
፡ ዐይን ፡ እስከ ፡ አህጉረ
፡ ቅጽር ።

10ወገብሩ
፡ ሎሙ ፡ ምስለ ፡ ወአምለኩ
፡ ወአሕረሙ ፡ ዖመ ፡ ውስተ
፡ ኵሉ ፡ አድባር ፡ ነዋኅት
፡ ወአውግር ፡ ወታሕተ
፡ ኵሉ ፡ ዖም ፡ ጽፉቅ ።

11ወዐጠኑ ፡ ህየ ፡ ውስተ
፡ ኵሉ ፡ አብያተ ፡ አማልክቲሆሙ
፡ በከመ ፡ አሕዛብ ፡ እለ
፡ አሰሰለ ፡ እግዚአብሔር
፡ እምቅድመ ፡ ገጾሙ ፡
ወገብሩ ፡ ምሕራማተ ፡
ወጸቈኑ ፡ ከመ ፡ ያምዕዕዎ
፡ ለእግዚአብሔር ።

12ወተቀንዩ ፡ ለአማልክት
፡ ዘይቤሎሙ ፡ እግዚአብሔር
፡ ዑቁ ፡ ኢትግበሩ ፡ ዘነገረ
፡ ለእግዚአብሔር ።

13ወተካየዶሙ ፡ እግዚአብሔር
፡ ለእስራኤል ፡ ወለይሁዳ
፡ በአደ ፡ ኵሎሙ ፡ ነቢያቲሁ
፡ እንዘ ፡ ኵሎሙ ፡ ይሰምዑ
፡ ወይቤሎሙ ፡ ተመየጡ
፡ እምፍኖትክሙ ፡ እኪት
፡ ወዕቀቡ ፡ ፍናውየ ፡
ወትእዛዝየ ፡ ወኵነኔየ
፡ ወኵሎ ፡ ሕግየ ፡ ዘአዘዝክዎሙ
፡ ለአበዊክሙ ፡ ወኵሎ
፡ ዘለአኩ ፡ ሎሙ ፡ ምስለ
፡ አግብርትየ ፡ ነቢያት
።

14ወኢሰምዑ ፡ ወአጽንዑ
፡ ዘባናቲሆሙ ፡ እምዘባናተ
፡ አበዊሆሙ ።

15ወኵሎ
፡ ኪዳነ ፡ ዘተካየዶሙ
፡ ኢዐቀቡ ፡ ወተለዉ ፡
ከንቶ ፡ ወኮኑ ፡ ከንቶ
፡ ወተለዉ ፡ አሕዛበ ፡
እለ ፡ ዐውዶሙ ፡ ዘአዘዞሙ
፡ እግዚአብሔር ፡ ከመ
፡ ኢይግበሩ ፡ ከማሆሙ
።

16ወኀደጉ ፡ ትእዛዘ
፡ እግዚአብሔር ፡ አምላኮሙ
፡ ወገብሩ ፡ ሎሙ ፡ ስብኮ
፡ ፪እጐልተ ፡ ወገብሩ
፡ ሎሙ ፡ ምሕራማተ ፡ ዖም
፡ ወሰገዱ ፡ ለኵሉ ፡ ኀይለ
፡ ሰማይ ፡ ወአምላክዎ
፡ ለበዓል ።

17ወሦዑ
፡ ሎሙ ፡ ደቂቆሙ ፡ ወአዋልዲሆሙ
፡ በእሳት ፡ ወያስተቃስሙ
፡ ወያሰግሉ ፡ ወተሠየጡ
፡ ከመ ፡ ይግበሩ ፡ እኩየ
፡ ቅድመ ፡ እግዚአብሔር
፡ ወከመ ፡ ያምዕዕዎ ።

18ወተምዐ ፡ እግዚአብሔር
፡ ፈድፋደ ፡ ላዕለ ፡ እስራኤል
፡ ወገደፎሙ ፡ እምቅድመ
፡ ገጹ ፡ ወኢተርፉ ፡ እንበለ
፡ ነገደ ፡ ይሁዳ ፡ ባሕቲቶሙ
።

19ወይሁዳኒ ፡ ኢዐቀቡ
፡ ትእዛዘ ፡ እግዚአብሔር
፡ አምላኮሙ ፡ ወሖሩ ፡
በግዕዞሙ ፡ ለእስራኤል
፡ ዘገብሩ ፡ ወኀደግዎ
፡ ለእግዚአብሔር ።

20ወተምዕዐ ፡ እግዚአብሔር
፡ ላዕለ ፡ ኵሉ ፡ ዘርአ
፡ እስራኤል ፡ ወሆኮሙ
፡ ወአግብኦሙ ፡ ውስተ
፡ እዴሆሙ ፡ ለእለ ፡ ይትማሠጥዎሙ
፡ እስከ ፡ ገደፎሙ ፡ እምቅድመ
፡ ገጹ ።

21ወአልቦ ፡
እምቤተ ፡ ዳዊት ፡ ዘእንበለ
፡ እስራኤል ፡ ወአንገሥዎ
፡ ለኢዮርብዓም ፡ ወልደ
፡ ናባጥ ፡ ወአኅደጎሙ
፡ ለእስራኤል ፡ ተሊዎቶ
፡ ለእግዚአብሔር ፡ ወአስሐቶሙ
፡ በዐቢይ ፡ ጌጋይ ።

22ወተለዉ ፡ ደቂቀ ፡
እስራኤል ፡ ኵሎ ፡ ኀጢአቶ
፡ ለኢዮርብንም ፡ ዘገብረ
፡ ወኢኀዶጉ ፡ ኪያሁ ፤

23እስከ ፡ ገደፎሙ ፡
እግዚአብሔር ፡ ለእስራኤል
፡ እምቅድመ ፡ ገጹ ፡ በከመ
፡ ነበበ ፡ እግዚአብሔር
፡ በእደ ፡ ኵሉ ፡ አግብርቲሁ
፡ ነቢያት ፤ ወፈለሱ ፡
እስራኤል ፡ እምብሔሮሙ
፡ ለብሔረ ፡ ፋርስ ፡ እስከ
፡ ዮም ።

24ወወሰዶሙ
፡ ንጉሠ ፡ ፋርስ ፡ እምባቢሎን
፡ ለአኩንታ ፡ ወእምነ
፡ ኤላ ፡ ወእምኤማት ፡
ወሴፋራሔም ፡ ወአንበሮሙ
፡ ውስተ ፡ አህጉረ ፡ ሰማርያ
፡ ህየንቴሆሙ ፡ ለደቂቀ
፡ እስራኤል ፡ ወወረስዋ
፡ ለሰማርያ ፡ ወተካፈልዋ
፡ ወነበሩ ፡ ውስተ ፡ አህጉሪሃ
።

25ወእምዝ ፡ በቀዳሚ
፡ ንብረቶሙ ፡ ኢፈርህዎ
፡ ለእግዚአብሔር ፡ ወፈነወ
፡ እግዚአብሔር ፡ ዐናብስተ
፡ ላዕሌሆሙ ፡ ወቀተልዎሙ
።

26ወይቤ ፡ ልዎ ፡ ለንጉሠ
፡ ፋርስ ፡ እልክቱ ፡ አሕዛብ
፡ እለ ፡ አፍለስከ ፡ ወአንበርከ
፡ ውስተ ፡ አህጉረ ፡ ሰማርያ
፡ ወኢያእመሩ ፡ ሕጎ ፡
ለአምላ[ከ] ፡ ውእቱ ፡ ብሔር
፡ ወፈነወ ፡ ዐናብስተ
፡ ላዕሌሆሙ ፡ ወበልዕዎሙ
፡ ወቀተልዎሙ ፡ እስመ
፡ ኢያእመሩ ፡ ሕጎ ፡ ለአምላ[ከ]
፡ ውእቱ ፡ ብሔር ።

27ወአዘዘ ፡ ንጉሠ ፡
ፋርስ ፡ ይንሥኡ ፡ እምውስተ
፡ አይሁድ ፡ ፩ካህነ ፡
ወይሰዱ ፡ ወያንብሮ ፡
ምስሌሆሙ ፡ ወይምሀ[ሮ]ሙ
፡ ሕጎ ፡ ለአምላ[ከ] ፡ ብሔር
።

28ወወሰዱ ፡ ፩ካህነ
፡ እምውስተ ፡ እለ ፡ አፍለሱ
፡ እምሰማርያ ፡ ወአንበርዎ
፡ ውስተ ፡ ቤቴል ፡ ወመሀሮሙ
፡ ውእቱ ፡ ካህን ፡ ከመ
፡ ይፍርህዎ ፡ ለእግዚአብሔር
።

29ወገብሩ ፡ በበሕዘቢሆሙ
፡ አማልክቲሆሙ ፡ ወአንበርዎሙ
፡ ውስተ ፡ አብያተ ፡ አማልክት
፡ ዘገብሩ ፡ ሰብአ ፡ ሰማርያ
፡ ወበበ ፡ ሕዘቢሆሙ ፡
ወአህጉሪሆሙ ፡ እለ ፡
ውስቴቶን ፡ ይነብሩ ።

30ወሰብአ ፡ ባቢሎን ፡
ገብርዋ ፡ ለሰከተቤናሆን
፡ ወሰብአ ፡ ኵቱ ፡ ገብርዋ
፡ ለኤርጌት ፡ ወሰብአ
፡ ኤማት ፡ ገብርዋ ፡ ለኤሴማት
።

31ወሰብአ ፡ ኤዌዎን
፡ ገብርዋ ፡ ለኤብላዘር
፡ ወለትርቃት ፡ ወለሌፍሮን
፡ በኀበ ፡ ሦዑ ፡ ውሉዶሙ
፡ ባእሳት ፡ ለአድራሜሌክ
፡ ወእኔሜሌክ ፡ አማልክተ
፡ ሴፋርም ።

32ወተፀምዱ
፡ ለእግዚአብሔር ፡ እሙንቱ
፡ ወአማልክቲሆሙ ፡ አንበሩ
፡ ውስተ ፡ አብያት ፡ ዘሰማርያ
፡ ዘአማልክቲሆሙ ፡ በበሕዘቢሆሙ
፡ ለለአህጉሪሆሙ ።

33ወፈርሁ ፡ እግዚአብሔር
፡ እንዘ ፡ አማልክቲሆሙ
፡ ያመልኩ ፡ በሕገ ፡ አሕዛብ
፡ እለ ፡ አፍለሱ ፡ በህየ
፡ እስከ ፡ ዮም ።

34ወይፈርህዎ
፡ እሙንቱ ፡ ወለሊሆሙ
፡ ይገብሩ ፡ በሕጎሙ ፡
ዘያለምዱ ፡ ወበሕገ ፡
እግዚአብሔር ፡ ወበትእዛዙ
፡ ዘአዘዞሙ ፡ ለደቂቀ
፡ ያዕቆብ ፡ ወሰመዮ ፡
ስሞ ፡ እስራኤል ።

35ወተካየደ ፡ እግዚአብሔር
፡ ኪዳነ ፡ ምስሌሆሙ ፡
ወአዘዞሙ ፡ ወይቤሎሙ
፡ ኢትፍርሁ ፡ ባዕደ ፡
አማልክተ ፡ ወኢትስግዱ
፡ ሎሙ ፡ ወኢታምልክዎሙ
፡ ወኢትሡቡ ፡ ሎሙ ።

36ዘእንበለ ፡ ለእግዚአብሔር
፡ ዘአውፅአክሙ ፡ እምድረ
፡ ግብጽ ፡ በዐቢይ ፡ ኀይል
፡ ወበመዝራዕቱ ፡ ልዑል
፡ ሎቱ ፡ ፍርህዎ ፡ ወሎቱ
፡ ስግዱ ፡ ወሎቱ ፡ ሡዑ
።

37ወዕቀቡ ፡ ኵሎ ፡
ኵነኔሁ ፡ ወሕጎ ፡ ወትእዛዞ
፡ ዘጸሐፈ ፡ ለክሙ ፡ ከመ
፡ ትግበርዎ ፡ ኵሎ ፡ መዋዕሊክሙ
፡ ወኢትፍርሁ ፡ ባዕደ
፡ አማልክተ ።

38ወኢትርስዑ
፡ ኪዳነ ፡ ዘተካየደክሙ
፡ ወኢትፍርሁ ፡ ባዕደ
፡ አማልክተ ።

39ዘእንበለ
፡ ለእግዚአብሔር ፡ አምላክክሙ
፡ ኪያሁ ፡ ፍርህዎ ፡ ወውእቱ
፡ ያድኅነክሙ ፡ እምነ
፡ ኵሉ ፡ ፀርክሙ ።

40ወኢታፅምእዎሙ ፡ ሕጎሙ
፡ ዘከመ ፡ ይገብሩ ፡ እሙንቱ
።

41ወነበሩ ፡ እሉ ፡
ሕዝብ ፡ እንዘ ፡ ይፈርህዎ
፡ ለእግዚአብሔር ፡ ወለአማልክቲሆሙ
፡ ይትቀነዩ ፡ ወውሉዶሙኒ
፡ ወውሉደ ፡ ውሉዶሙኒ
፡ በከመ ፡ ገብሩ ፡ አበዊሆሙ
፡ ገብሩ ፡ እሙንቱ ፡ እስከ
፡ ዮም ።