መጽሐፈ ነገሥት ፬ 7

1ወይቤሎ ፡ ኤልሳዕ
፡ ስማዕ ፡ ቃለ ፡ እግዚአብሔር
፡ ከመዝ ፡ ይቤ ፡ እግዚአብሔር
፡ ጌሰመአ ፡ ዘጊዜአ ፡
መስፈርተ ፡ ስንዳሌአ
፡ በሰቅልአ ፡ ትከውንአ
፡ ወ፪መስፈርተ ፡ ሰገምአ
፡ በሰቅልአ ፡ ይትወሀብአ
፡ በአንቀጸ ፡ ሰማርያ
።

2ወአውሥአ ፡ ዝክቱ
፡ ዘያሰምክ ፡ ንጉሥ ፡
ላዕለ ፡ እዴሁ ፡ ወይቤሎ
፡ ለኤልሳዕ ፡ ለእመ ፡
አውሐዘ ፡ እግዚአብሔር
፡ አስራበ ፡ እክል ፡ እምሰማይ
፡ ኢይከውን ፡ ከመዝ ፡
ነገር ፡ ዘትብል ፡ ወይቤሎ
፡ ኤልሳዕ ፡ ሀለወከ ፡
ትርአዮ ፡ በአዕይንቲከ
፡ ወኢትጥዐሞ ።

3ወሀለዉ
፡ ፬ዕደው ፡ እለ ፡ ለምጽ
፡ ኀበ ፡ አንቀጸ ፡ ሀገር
፡ ወተባሀሉ ፡ በበይናቲሆሙ
፡ ምንት ፡ ያነብረነ ፡
ዝየ ፡ ለነ ፡ እስከ ፡ ንመውት
።

4እመኒ ፡ ቦእነ ፡ ሀገረ
፡ ንመውት ፡ በረኃብ ፡
በህያ ፡ እስመ ፡ ርኁብ
፡ ሀገር ፡ ወእመኒ ፡ ነበርነ
፡ ዝየ ፡ ንመውት ፡ ወይእዜኒ
፡ ንዑ ፡ ንሖር ፡ ውስተ
፡ ተዓይኒሆሙ ፡ ለሶርያ
፤ እመ ፡ አሕየዉነ ፡ ነሐዩ
፡ ወእመኒ ፡ ቀተሉነ ፡
ንመውት ።

5ወተንሥኡ
፡ በውስተ ፡ ጽልመት ፡
ወቦኡ ፡ ውስተ ፡ ተዓይነ
፡ ሶርያ ፡ ወበጽሑ ፡ ሶርያ
፡ ወአልቦ ፡ ዘረከቡ ፡
በህየ ።

6እስመ ፡ አስምዖሙ
፡ እግዚአብሔር ፡ ለተዓይነ
፡ ሶርያ ፡ ድምፀ ፡ ሰረገላት
፡ ወድምፀ ፡ አፍራስ ፡
ወድምፀ ፡ ሰራዊት ፡ ብዙኅ
፡ ወይቤሉ ፡ ሶርያ ፡ በበይናቲሆሙ
፡ ይእዜ ፡ ዐሰቦሙ ፡ ላዕሌነ
፡ ንጉሠ ፡ እስራኤል ፡
ለንጉሠ ፡ ኬጤዎን ፡ ወንጉሠ
፡ ግብጽ ፡ ከመ ፡ ይሩዱነ
።

7ወመምሁ ፡ ወተንሥኡ
፡ ወጐዩ ፡ በውስተ ፡ ጽልመት
፡ ወኀደጉ ፡ ተዓይኒሆሙ
፡ ወአፍራሲሆሙኒ ፡ ወአእዱጊሆሙኒ
፡ በከመ ፡ ሀለወ ፡ ወአምሰጡ
፡ በነፍሶሙ ።

8ወቦኡ
፡ እልክቱ ፡ እለ ፡ ለምጽ
፡ ውስተ ፡ ትዕይንት ፡
ወቦኡ ፡ ውስተ ፡ አሐቲ
፡ ደብተራ ፡ ወበልዑ ፡
ወሰትዩ ፡ ወነሥኡ ፡ እምህየ
፡ ወርቀ ፡ ወብሩረ ፡ ወአልባሰ
፡ ወሖሩ ፡ ወቦኡ ፡ ውስተ
፡ ካልእት ፡ ትዕይንት
፡ ወነሥኡ ፡ እምህየኒ
፡ ወሖሩ ፡ ወኀብኡ ።

9ወተባሀሉ ፡ በበይናቲሆሙ
፡ አኮ ፡ ከመዝ ፡ ዘንገብር
፡ ንሕነ ፤ ዛቲ ፡ ዕለት
፡ ቡርክት ፡ ይእቲ ፤ ወለእመ
፡ አርመምነ ፡ ወጸናሕነ
፡ እስከ ፡ ይጸብሕ ፡ ጌጋየ
፡ ይከውነነ ፤ ንዑ ፡ ይእዜ
፡ ንባእ ፡ ወንዜኑ ፡ ለቤተ
፡ ንጉሥ ።

10ወቦኡ ፡
ወዐውየዉ ፡ ኀበ ፡ አንቀጸ
፡ ሀገር ፡ ወዜነዉ ፡ ወይቤሉ
፡ ቦእነ ፡ ውስተ ፡ ትዕይንቶሙ
፡ ለሶርያ ፡ ወአልቦ ፡
ዘረከብነ ፡ በህየ ፡ ሰብአ
፡ ወአልቦ ፡ ድምፀ ፡ ሰብእ
፡ በህየ ፡ ዘእንበለ ፡
አፍራስ ፡ ወአእዱግ ፡
ወተዓይኒሆሙ ፡ ከማሁ
፡ ሀለወ ።

11ወቦኡ ፡
በጸውት ፡ ውስጠ ፡ ወዜነዉ
፡ ለቤተ ፡ ንጉሥ ።

12ወተንሥአ ፡ ንጉሥ ፡
በሌሊት ፡ ወይቤሎሙ ፡
ለደቁ ፡ እንግርክሙኑ
፡ ዘከመ ፡ ይሬስዩነ ፡
ሶርያ ፤ አእመሩነ ፡ ዘከመ
፡ ርኅብነ ፡ ወወፅኡ ፡
እምውስተ ፡ ተዓይኒሆሙ
፡ ወተኀብኡ ፡ ውስተ ፡
ገዳም ፡ እንዘ ፡ ይብሉ
፡ ይወዕኡ ፡ እምሀገሮሙ
፡ ወንእኅዞሙ ፡ ሕያዋኒሆሙ
፡ ወእምዝ ፡ ንበውእ ፡
ሀገሮሙ ።

13ወአውሥአ
፡ ፩እምውስተ ፡ ደቁ ፡
ወይቤሎ ፡ ይንሥኡ ፡ ፭አፍራሰ
፡ እምውስተ ፡ እለ ፡ ተርፉ
፡ ዝየ ፡ እምኀበ ፡ ኵሎ
፡ እስራኤል ፡ ወይሖሩ
፡ ህየ ፡ ወይርአዩ ።

14ወነሥኡ ፡ ፪መስተጽዕናነ
፡ አፍራስ ፡ ወፈነዎሙ
፡ ንጉሠ ፡ እስራኤል ፡
ይዴግንዎ ፡ ለንጉሠ ፡
ሶርያ ፡ ወይቤሎሙ ፡ ሖሩ
፡ ርእዩ ።

15ወሖሩ ፡
ወዴገንዎሙ ፡ እስከ ፡
ተከዜ ፡ ዮርዳኖስ ፡ ወረከቡ
፡ ኵሎ ፡ ፍኖቶሙ ፡ ምሉአ
፡ አልባሰ ፡ ወንዋየ ፡
ዘገደፉ ፡ ሶርያ ፡ ሶበ
፡ ደንገፁ ፤ ወገብኡ ፡
እልክቱ ፡ እለ ፡ ተፈነዉ
፡ ወዜነውዎ ፡ ለንጉሠ
፡ እስራኤል ።

16ወወፅኡ
፡ ሕዝብ ፡ ወበርበሩ ፡
ተዓይኒሆሙ ፡ ለሶርያ
፡ ወተሠይጠ ፡ መስፈርተ
፡ ስንዳሌ ፡ በሰቅል ፡
አሐቲ ፡ በከመ ፡ ይቤ ፡
እግዚአብሔር ፡ ወካዕባ
፡ ለይእቲ ፡ በአ ፡ አሕቲ
፡ ሰቅል ።

17ወፈነዎ
፡ ንጉሥ ፡ ለዝክቱ ፡ ወዓሊሁ
፡ ዘያሰምክ ፡ ንጉሥ ፡
ላዕለ ፡ እዴሁ ፡ ከመ ፡
ይቁም ፡ ውስተ ፡ አንቀጽ
፡ ወአጠቅዎ ፡ ሕዝብ ፡
በውስተ ፡ አንቀጽ ፡ ወኬድዎ
፡ ወሞተ ፡ በከመ ፡ ነበበ
፡ ብእሴ ፡ እግዚአብሔር
፡ በከመ ፡ ይቤሎ ፡ ሶበ
፡ ለአክዎ ፡ ኀቤሁ ።

18ወኮነ ፡ በከመ ፡ ይቤሎ
፡ ኤልሳዕ ፡ ለንጉሥ ፡
ካዕባ ፡ ለይእቲ ፡ መስፈርተ
፡ ሰገም ፡ በአሐቲ ፡ ሰቅል
፡ ወምዕሬሃ ፡ ለይእቲ
፡ መስፈርተ ፡ ስንዳሌ
፡ በአሐቲ ፡ ሰቅል ፡ ዘይቤሎ
፡ ጌሰመ ፡ ዘጊዜ ፡ ይሠየጥ
፡ በአንቀጸ ፡ ሰማርያ
።

19ወአውሥአ ፡ ውእቱ
፡ ወዓሌ ፡ ንጉሥ ፡ ወይቤሎ
፡ ለእመ ፡ አውሐዘ ፡ እግዚአብሔር
፡ አስራበ ፡ ሰማይ ፡ እክለ
፡ ኢይከውን ፡ ከመዝ ፡
ነገር ፡ ዘትብል ፡ ወይቤሎ
፡ ኤልሳዕ ፡ ሀለወከ ፡
ትርአዮ ፡ በአዕይንቲከ
፡ ወኢትጥዕሞ ።

20ወኮነ
፡ ከማሁ ፡ ወኬድዎ ፡ ሕዝብ
፡ በውስተ ፡ አንቀጽ ፡
ወሞተ ።