ጥበበ ሲራክ 1

ጥበበ
፡ ጥበበ ፡ ኢያሱ ፡ ወልደ ፡ ሲራክ ።

1ቀዳሚሃ ። ኵላ ፡ ጥበብ ፡ እምኀበ ፡ እግዚአብሔር ፡ ይእቲ ፤ ወምስሌሁ ፡ ሀለወት ፡ ለዓለም ።

2ኆጻ ፡ ባሕር ፡ ወነጠብጣበ ፡ ዝናም ፡ ወመዋዕለ ፡ ዓለም ፡ መኑ ፡ ጐለቄ ።

3ሉዓሌ ፡ ሰማይ ፡ ወራሕበ ፡ ምድር ፡ ወዕመቀ ፡ ቀላይ ፡ ወለጥበብ ፡ መኑ ፡ ሰፈሮሙ ።

4ቀዳሜ ፡ ኵሉ ፡ ተፈጥረት ፡ ጥበብ ፤ ወኅሊናሃ ፡ ለጥበብ ፡ ዘእምፍጥረተ ፡ ዓለም ።

6ሥርዋ ፡ ለጥበብ ፡ ለመኑ ፡ ተከሥተ ፤ ወመኑ ፡ አእመረ ፡ ምክራ ።

8አሐዱ ፡ [ጠቢ]ብ ፡ ወፈድፋደ ፡ ግሩም ፡ ውእቱ ፤ ወይነብር ፡ ላዕለ ፡ መንበሩ ፡ ውእቱ ።

9ወእግዚአብሔር ፡ ለሊሁ ፡ ፈጠራ ፤ ወርእያ ፡ ወሰፈራ ።

10ወሶጣ ፡ ላዕለ ፡ ኵሉ ፡ ግብሩ ፤ ምስለ ኵሉ ፡ ዘሥጋ ፡ በከመ ፡ ሀብቱ ፤ ወወሀባ ፡ ለኵሉ ፡ እለ ፡ ያፈቅርዎ ።

11ፈሪሀ ፡ እግዚአብሔር ፡ ክብር ፡ ውእቱ ፡ ወምክሕ ፤ ወትፍሥሕት ፡ ውእቱ ፡ ወአክሊለ ፡ ሐሤት ።

12ፈሪሀ ፡ እግዚአብሔር ፡ ትፍሥሕተ ፡ ልብ ፡ ውእቱ ፤ ወይሁብ ፡ ሐሴተ ፡ ወያስተፌሥሕ ፡ ወያነውኅ ፡ መዋዕለ ፡ ሕይወት ።

13ለፈራሄ ፡ እግዚአብሔር ፡ ይሤኒ ፡ ደኃሪቱ ፤ ወይትባረክ ፡ አመ ፡ ዕለተ ፡ ሞቱ ።

14ቀዳሚሃ ፡ ለጥበብ ፡ ፈሪሀ ፡ እግዚአብሔር ፤ ወተፈጥረት ፡ ምስለ ፡ ምእመናን ፡ አምከርሠ ፡ እሞሙ ።

15ወምስለ ፡ እጓለ ፡ እመሕያው ፡ ተፈጥረት ፡ መሠረታ ፡ ለዓለም ፤ ወተአምነት ፡ ምስለ ፡ ዘርኦሙ ።

16ጸጊቦታ ፡ ለጥበብ ፡ ፈሪሀ ፤ እግዚአብሔር ፤ ወታረውዮሙ ፡ እምነ ፡ ቀምሓ ።

17ምሉእ ፡ ትፍሥሕት ፡ ውስተ ፡ ኵሉ ፡ አብያቲሃ ፤ ወውስተ ፡ አዕጻዳቲሃ ፡ ምሉእ ፡ ፍሬሃ ።

18አክሊላ ፡ ለጥበብ ፡ ፈሪሀ ፡ እግዚአብሔር ፤ ዘያመጽኣ ፡ ለሰላም ፡ ወይፌውስ ፡ ወያሐዩ ።

19ወርእያ ፡ ወሰፈራ ፤ ወአውሐዘ ፡ ነቅዐ ፡ አአምሮ ፡ ወምክረ ፡ ጥበብ ፤ ወአዕበዮሙ ፡ ለእለ ፡ ያጸንዕዋ ፡ ወአክበሮሙ ።

20ሥርዋ ፡ ለጥበብ ፡ ፈሪሀ ፡ እግዚአብሔር ፤ ወአዕጹቂሃኒ ፤ ያነውኅ ፡ መዋዕለ ፡ ሕይወት ።

21ኢይክል ፡ መዓትም ፡ ወዐማፂ ፡ ጸዲቀ ፤ እስመ ፡ በጊዜ ፡ ይትመዓዕ ፡ ይከውኖ ፡ ድቀቱ ።

22እስከ ፡ ተኀልፍ ፡ ጊዜሃ ፡ ተዐገሣ ፡ ለመዐት ፤ ወድኅረ ፡ ያስተፌሥሐከ ።

23እስከ ፡ ትረክብ ፡ ጊዜሁ ፡ ኅባእ ፡ ነገረከ ፤ ወይትናገሩ ፡ ብዙኃን ፡ በጥበብከ ።

24ውስተ ፡ መዛግብቲሃ ፡ ለጥበብ ፡ ትምህርተ ፡ አምሳል ፤ ያስቆርሮ ፡ ኃጥእ ፡ ለፈራሄ ፡ እግዚአብሔር ።

25አመ ፡ ታፈቅራ ፡ ለጥበብ ፡ ዕቀብ ፡ ትእዛዞ ፤ ወእግዚአብሔር ፡ ይሁበከሃ ።

26ጥበብኒ ፡ ወአእምሮኒ ፡ ፈሪሀ ፡ እግዚአብሔር ፡ ውእቱ ፤ ወፈቃዱሂ ፡ ሃይማኖት ፡ ወየውሀት ።

27ኢትርሳዕ ፡ ፈሪሀ ፡ እግዚአብሔር ፤ ወኢትፀመዶ ፡ በክልኤ ፡ ልብ ።

29እንዘ ፡ ትናፍቅ ፡ ኢትደቅ ፡ ውስተ ፡ አፈ ፡ ሰብእ ፤ ወዕቀብ ፡ ከናፍሪከ ።

30ወኢታዕቢ ፡ ርእሰከ ፡ ከመ ፡ ኢትኅሰር ፤ ወከመ ፡ ኢትደቅ ፡ ነፍስከ ። ወይከሥተከ ፡ እግዚአብሔር ፡ ኅቡኣቲከ ፤ ወበማእከለ ፡ ብዙኃን ፡ ያወድቀከ ። እስመ ፡ በፍርሀተ ፡ እግዚአብሔር ፡ ኢመጻእከ ፤ ወምሉእ ፡ ኍሕሉት ፡ ውስተ ፡ ልብከ ።