ጥበበ ሲራክ 14

1ብፁዕ ፡ ዘኢይድኅፅ ፡ በአፉሁ ፤ ወለኃጥእሰ ፡ ኢያደነግጾ ፡ ሐዘን ።2ብፁዕ ፡ ዘኢያሐዝን ፡ ነፍሶ ፤ ወዘኢሀጕለ ፡ ተስፋሁ ።3ለብእሲ ፡ ዘኢያአምር ፡ ቃለ ፡ ኢይደልዎ ፡ ብዒል ፤ ወለብእሲ ፡ ጠዋዒ ፡ ኢይደልዎ ፡ ንዋይ ።4ዘይቄቅያ ፡ ለነፍሱ ፡ ይዘግብ ፡ ለባዕድ ፤ ወካልእ ፡ ይፈግዕ ፡ በንዋዩ ።5ዘለነፍሱ ፡ ይጠውዕ ፡ ለመኑ ፡ ሀለዎ ፡ ይጸጉ ፤ ወዘኢይትፌሣሕ ፤ በንዋዩ ፡6አልቦቱ ፡ ዘየአክዮ ፡ ለዘይጠውዕ ፡ ለነፍሱ ፤ ወውእቱ ፡ ይከውና ፡ [ፍዳሃ ፡ ለእከዩ ።] 7 ወሶበኒ ፡ ያሜኒ ፡ እመ ፡ ረስዐ ፡ ዳእሙ ፡ ያሤኒ ፤ ወድኅረ ፡ ያዐውቅ ፤ እከዪሁ ።8እኩይ ፡ ዐይነ ፡ ጠዋዒ ፤ ዘይመይጥ ፡ ገጾ ፡ ወይትዔወር ፡ ነፍሶ ።9ኢያጸግቦ ፡ ክፍሉ ፡ ለዐይነ ፡ ሥሡዕ ፤ ወእከየ ፡ ልቡ ፡ ያቌቍዖ ፡ አዕፅምቲሁ ።10ዐይኑ ፡ ለሐማሚ ፡ ይጠውዕ ፡ እክለ ፤ ወይደነጹ ፡ በውስተ ፡ ማእድ ።11ወልድየ ፡ በአምጣነ ፡ ትክል ፡ አስተዳልዋ ፡ ለነፍስከ ፤ ወአብእ ፡ መባአ ፡ ለእግዚአብሔር ፡ በዘይደልወከ ።12ወተዘከር ፡ ከመ ፡ ኢይጐነዲ ፡ ሞት ፤ ወኢተሐዘብከ ፡ ዕለተ ፡ መዊት ።13እንበለ ፡ ትሙት ፡ አሠኒ ፡ ለቢጽከ ፤ ወበአምጣነ ፡ ትክል ፡ ስፋሕ ፡ እዴከ ፡ ወሀብ ።14ወኢትትኀጣእ ፡ [አም]ዕለተ ፡ ትፍሥሕት(ከ) ፤ ወመክፈልተ ፡ ሠናይ ፡ ኢያምሥጥከ ።15አኮኑ ፡ ለባዕድ ፡ ተኀድጎ ፡ ለጻማከ ፤ ወኵሎ ፡ ትግባረከ ፡ ይትካፈሉ ፡ መዋርስቲከ ።16ንሣእ ፡ ወሀብ ፡ ወአስተፍሥሓ ፡ ለነፍስከ ፤ እስመ ፡ አልቦ ፡ ዘትረክብ ፡ ትፍሥሕተ ፡ በውስተ ፡ መቃብር ።17ኵሉ ፡ ዘነፍስ ፡ ይበሊ ፡ ከመ ፡ ልብስ ፤ እስመ ፡ ትእዛዘ ፡ ሕግ ፡ ተፈጥረ ፡ ሞተ ፡ ትሙት ።18ከመ ፡ ቈጽለ ፡ ዕፅ ፡ ዘጽፉቅ ፡ ቈጽሉ ፤ ዘቀዳሚ ፡ ይትነገፍ ፡ ወደኃሪ ፡ ይሠርጽ ፤ ከማሁ ፡ ኵሉ ፡ ትውልድ ፡ ዘሥጋ ፡ ወደም ፤ ዝክቱ ፡ ይትወለድ ፡ ወዝክቱ ፡ ይመውት ።19ኵሉ ፡ ግብር ፡ ይበሊ ፡ ወየኀልቅ ፤ ወገባሪሁኒ ፡ የኀልፍ ፡ ምስሌሁ ።20ወባሕቱ ፡ ብጹዕ ፡ ብእሲ ፡ እንዘ ፡ ጠቢብ ፡ ውእቱ ፡ ዘሞተ ፤ ወዘተምህረ ፡ ወዐቀበ ፡ ጥበቢሁ ፤21ወዘይኄሊ ፡ ፍናዊሃ ፡ ለጥበብ ፡ በልቡ ፤ ወይትሜሀር ፡ ኅቡኣቲሃ ።22ትልዋ ፡ ድኅሬሃ ፡ ወኅሥሥ ፡ አሠራ ፤ ወዕቀብ ፡ ፍናዊሃ ።23ዘይሔውጽ ፡ እንተ ፡ መሳክዊሃ ፡ ወያፀምእ ፡ በውስተ ፡ አናቅጺሃ ፤24ወዘየኀድር ፡ ቅሩበ ፡ ቤታ ፤ ወይተክል ፡ መታክሊሁ ፡ ውስተ ፡ አረፋቲሃ ፤25ወያቀውም ፡ ደብተራሁ ፡ ውስተ ፡ እደዊሃ ፤ ወየኀድር ፡ ውስተ ፡ መኃድሪሃ ፡ ሠናይ ፤26ወያነብር ፡ ውሉዶ ፡ ውስተ ፡ ጽላሉታ ፤ ወይበይት ፡ ታሕተ ፡ አዕጹቂሃ ፤27ወያጸልል ፡ እምነ ፡ መርቄ ፡ ታሕቴሃ ፤ ወያዐርፍ ፡ በውስተ ፡ ክብራ ።