ጥበበ ሲራክ 48

1ወተንሥአ ፡ ኤልያስ ፡ ነቢይ ፡ ዘከመ ፡ እሳት ፤ ወቃሉኒ ፡ ከመ ፡ ነድ ፡ ያውዒ ።

2ወአምጽአ ፡ ረኃበ ፡ ላዕሌሆሙ ፤ ወበቅንአቱ ፡ አውኀዶሙ ።

3ወበቃለ ፡ እግዚአብሔር ፡ ከልኦ ፡ ለሰማይ ፤ ወአውረደ ፡ እሳተ ፡ እምሰማይ ፡ ሥልሰ ።

4እፎ ፡ ተሰባሕከ ፡ ኤልያስ ፡ በስብሐቲከ ፤ ወመኑ ፡ ተመክሐ ፡ ከማከ ።

5ዘአንሥአ ፡ በድነ ፡ እምነ ፡ ምውታን ፤ ወእምነ ፡ መቃብርኒ ፡ በቃለ ፡ ልዑል ።

6ወአውረዶሙ ፡ ለነገሥት ፡ ውስተ ፡ ሞት ፤ ወለክቡራን ፡ እምነ ፡ ዓራታቲሆሙ ።

7ዘያ[ፀምእ ፡] ኵነኔ ፡ በሲና ፤ ወበኮሬብኒ ፡ ፍትሐ ፡ ወበቀለ ።

8ዘይቀብኦሙ ፡ ለነገሥት ፡ ወይትፈደዮሙ ፤ ወተዐልዉ ፡ ነቢያት ፡ እምኔሁ ።

9ዘዐርገ ፡ በነደ ፡ እሳት ፤ በሰረገላት ፡ ወበአፍራስ ፡ ዘእሳት ።

10ዘአጽሐፈ ፡ ኵነኔ ፡ ለዕድሜሁ ፤ ከመ ፡ ያቍርር ፡ መዐተ ፡ እምቅድመ ፡ መቅሠፍት ፤ ወከመ ፡ ያግብእ ፡ ልበ ፡ አብ ፡ ኀበ ፡ ውሉድ ፤ ወከመ ፡ ያቅሞሙ ፡ ለአሕዛበ ፡ ያዕቆብ ።

11ብፁዓን ፡ እለ ፡ ያአምሩክ ፤ ወእለ ፡ ስርግዋን ፡ በፍቅርከ ፤ ወንሕነሂ ፡ ሕይወተ ፡ ነሐዩ ፡ (በእንቲአከ) ።

12ኤልያስ ፡ ዘዐርገ ፡ በነደ ፡ እሳት ፤ ወኤልሳዕኒ ፡ ዘመልአ ፡ ላዕሌሁ ፡ እምነ ፡ መንፈሱ ፡ (ቅዱስ) ፤ ወበመዋዕሊሁኒ ፡ ኢያደንገጽዎ ፡ መላእክት ፤ ወአልቦ ፡ ዘተዐገሎ ፡ ወኢመኑሂ ።

13ወእምኵሉ ፡ ነገር ፡ አልቦ ፡ ዘተስእኖ ፤ ወመዊቶሂ ፡ ተነበየ ፡ በድኑ ።

14ወበሕይወቱሄሂ ፡ ገብረ ፡ ነኪረ ፤ ወበሞቱሂ ፡ ዕጹብ ፡ ግብሩ ።

15ወምስለዝ ፡ ኵሉ ፡ ኢነስሑ ፡ ሕዝብ ፤ ወኢኀደጉ ፡ ጌጋዮሙ ፤ እስከ ፡ ተፄወዉ ፡ እምነ ፡ ብሔሮሙ ፤ ወተዘርዉ ፡ ውስተ ፡ ኵሉ ፡ ምድር ፤ ወተርፉ ፡ ኅዳጣን ፡ እምውስተ ፡ ሕዝብ ፤ ወመልአ[ክ] ፡ እምነ ፤ ቤተ ፡ ዳዊት ።

16ወቦ ፡ እምውስቴቶሙ ፡ እለ ፡ ገብሩ ፡ ሠናየ ፤ ወቦ ፡ እለ ፡ አብዝኅዋ ፡ ለኀጢአት ።

17ወሕዝቅያስኒ ፡ አጽንዐ ፡ ሀገሮ ፤ ወአብአ ፡ ማየ ፡ ማእከላ ፤ ወአውቀረ ፡ ኰኵሐ ፡ በኀጺን ፤ ወሐነጸ ፡ ምዕቃለ ፡ ማይ ።

18ወዐርገ ፡ ስናክሬም ፡ በመዋዕሊሁ ፤ ወለአኮ ፡ ለረፍስቂስ ፡ ወሖረ ፡ ኀቤሁ ፤ ወአንሥአ ፡ እዴሁ ፡ ላዕለ ፡ ጽዮን ፤ ወተዘኀረ ፡ ወአዕበየ ፡ አፉሁ ።

19ወውእተ ፡ አሚረ ፡ ደንገጸሙ ፡ ልቦሙ ፡ ወእደዊሆሙ ፤ ወሐሙ ፡ ከመ ፡ እንተ ፡ ትወልድ ።

20ወጸውዕዎ ፡ ለእግዚአብሔር ፡ ለመሓሪ ፤ ወአንሥኡ ፡ እደዊሆሙ ፡ ኀቤሁ ፤ ወፍጡነ ፡ ሰምዖሙ ፡ ቅዱስ ፡ እምሰማይ ፤ ወቤዘዎሙ ፡ በእደዊሁ ፡ ለ[ኢሳይያስ] ።

21ወቀተሎሙ ፡ ተዓይኒሆሙ ፡ ለፋርስ ፤ ወቀጥቀጦሙ ፡ መልአኩ ።

22እስመ ፡ ገብረ ፡ ሕዝቅያስ ፤ ዘይኤድሞ ፡ ለእግዚአብሔር ፤ ወአጽንዐ ፡ [እኂዘ ፡] ፍናዌ ፡ ዳዊት ፡ አቡሁ ፤ በከመ ፡ አዘዘ ፡ ኢሳይያስ ፡ ነቢይ ፤ ወምእመን ፤ ውእቱ ፡ ወዐቢይ ፡ ራእዩ ።

23ወተፀርዐት ፡ ፀሓይ ፡ በመዋዕሊሁ ፤ ወወሰኮ ፡ ዓመቲሁ ፡ ለንጉሥ ።

24ወበዐቢይ ፡ መንፈስ ፡ ርእየ ፡ ደኃሪተ ፤ ወአስተፍሥሖሙ ፡ ለእለ ፡ ይላሕዉ ፡ በጽዮን ።

25ወነገረ ፡ ዘይከውን ፡ ለዓለም ፤ ወዘኒ ፡ ኅቡእ ፡ ዘእንበለ ፡ ይኩን ።