ጥበበ ሲራክ 50

1ስምዖን ፡ ወልደ ፡ . . . ካህን ፡ ዐቢይ ፤ ወበሕይወቱ ፡ ሐነጸ ፡ ቤተ ፤ ወበመዋዕሊሁ ፡ አጽንዐ ፡ ጽርሐ ።2ወከማሁ ፡ ሣረረ ፡ ዘይነውኆ ፡ ካዕበቶ ፤ ወገብረ ፡ ልብሰ ፡ ቀጢነ ፡ ዘይትዐጸፍ ፡ ካህን ።3ወበመዋዕሊሁ ፡ ሐነጸ ፡ አንቅዕተ ፡ ማያት ፤ ወዐዘቅትኒ ፡ ዘከመ ፡ ማየ ፡ ባሕር ፤ ብዝኁ ።4ዘይኄልዮሙ ፡ ለሕዝቡ ፡ እምነ ፡ ድቀት ፤ ወኀሠሠ ፡ አሠረ ፡ ሀገር ፡ ወቀተለ ።5ወተሰብሐ ፡ በሚጠቶሙ ፡ ለሕዝብ ፤ ወበመንወጦላዕተ ፡ አንቀጸ ፡ ቤት ።6ከመ ፡ ኮከበ ፡ ጽባሕ ፡ በውስተ ፡ ደመና ፤ ወከመ ፡ ወርኅ ፡ ምልእት ፡ በዕለተ ፡ ገሃህ ፤7ወከመ ፡ ፀሓይ ፡ እንተ ፡ ታበርህ ፡ በመቅደሱ ፡ ለልዑል ፤ ወከመ ፡ ስብሐተ ፡ ብርሃን ፡ በ[ቀስተ] ፡ ደመና ፡8ወከመ ፡ ጽጌ ፡ ረዳ ፡ በወርኀ ፡ ኔዎን ፤ ወከመ ፡ ዘይፈሪ ፡ ኀበ ፡ ሙሓዘ ፡ ማይ ፤ ወከመ ፡ ሠርጸ ፡ ሊባኖስ ፡ በመዋዕለ ፡ ማእረር ።9ወከመ ፡ ስኂን ፡ ውስተ ፡ እሳት ፡ ዲበ ፡ ማዕጠንት ፤ ወከመ ፡ ንዋየ ፡ ወርቅ ፡ ዝብጦ ፤10ወከመ ፡ ዕፀ ፡ ዘይት ፡ እንተ ፡ ሠረጸ ፡ ፍሬሃ ፤ ወከመ ፡ ዕንቍ ፡ ክቡር ፡ ውስተ ፡ ሰርጕ ፤ ወከመ ፡ ዕፀ ፡ ቄጵሮስ ፡ ነዋኅ ፡ በታሕተ ፡ ደመና ፤11ከማሁ ፡ ውእቱ ፡ ሶበ ፡ ይለብስ ፡ ልብሰ ፡ ክብሩ ፤ ወሶበ ፡ ይለብስ ፡ ሰርጐ ፡ ምክሑ ፤ ወሶበ ፡ የዐርግ ፡ ውስተ ፡ መዓርገ ፡ ምሥዋዕ ፤ ወተሰብሐ ፡ በልብሰ ፡ ቅድሳተ ፡ ስብሐት ፡12ሶበ ፡ ይትሜጦ ፡ ሥጋ ፡ መሥዋዕት ፡ እምእዴሆሙ ፡ ለካሀናት ፤ እንዘ ፡ ይቀውም ፡ ውስተ ፡ ምቅዋመ ፡ ግብሩ ፤ ወይቀውሙ ፡ ዐውዶ ፡ አኀዊሁ ፡ ወይኬልልዎ ፤ ወየዐውድዎ ፡ ከመ ፡ በቀልት ፡ ተመርት ፤13ወኵሎሙ ፡ ደቂቀ ፡ አሮን ፡ በትርሲቶሙ ፤ ወመባአ ፡ እግዚአብሔር ፡ ውስተ ፡ እደዊሆሙ ፤ በቅድመ ፡ ኵሉ ፡ ማኅበሮሙ ፡ ለእስራኤል ፤14ወይገብሩ ፤ ግብሮሙ ፡ በውስተ ፡ መሥዋዕት ፤ ወያሤንዬ ፡ መሥዋዕቶ ፡ ለልዑል ፡ ዘኵሎ ፡ ይመልክ ።15ወአንሥአ ፡ እዴሁ ፡ በሞጻሕት ፤ ወአውጽሐ ፡ በደመ ፡ አስካል ፤ ወይሰውጥ ፡ ውስተ ፡ መሠረተ ፡ ምሥዋዕ ፤ መዐዛ ፡ ሠናይ ፡ ለልዑል ፡ ለንጉሠ ፡ ኵሉ ፡ ነገሥት ።16ወያነብቡ ፡ ደቂቀ ፡ አሮን ፤ ወይነፍኁ ፡ በቀርነ ፡ ዝብጦ ፤ ወያሰምዑ ፡ ድምፆ ፡ በዐቢይ ፡ ቃል ፤ ተዝካረ ፡ በቅድመ ፡ ልዑል ።17ይእተ ፡ አሚረ ፡ ኅቡረ ፡ ያዐርፉ ፡ ኵሎሙ ፡ ሕዝብ ፤ ወይሰግዱ ፡ በገጾሙ ፡ ውስተ ፡ ምድር ፤ ወይገንዩ ፡ ለእግዚአብሔር ፡ እግዚኦሙ ፡ ለልዑል ፡ ዘኵሎ ፡ ይመልክ ።18ወይሴብሕዎ ፡ መዘምራን ፡ በቃሎሙ ፤ ወይመልእ ፡ ኵሎ ፡ ቤተ ፡ ዕበየ ፡ ጕማ ፡ ቃሎሙ ።19ወይጼልዩ ፡ ሕዝብ ፡ ኀበ ፡ እግዚአብሔር ፡ ልዑል ፤ ወይስእሉ ፡ ቅድሜሁ ፡ ለመሓሪ ፤ እስከ ፡ ይፌጽሙ ፡ በሕገ ፡ እግዚአብሔር ፤ ወይገብሩ ፡ ግብሮ ።20ወእምዝ ፡ ወረደ ፡ ወአንሥአ ፡ እዴሁ ፤ ላዕለ ፡ ኵሉ ፡ ማኅበሮሙ ፡ ለደቂቀ ፡ እስራኤል ፤ ከመ ፡ የሀቦሙ ፡ በረከተ ፡ እግዚአብሔር ፡ በከናፍሪሁ ፤ ወከመ ፡ ይትመክሑ ፡ በስሙ ።21ወደገሙ ፡ ሰጊደ ፤ ከመ ፡ ያርኢ ፡ ልዑል ፡ በረከቶ ።22ወይእዜኒ ፡ ባርክዎ ፡ ለአምላከ ፡ ኵሉ ፤ ዘይገብር ፡ ዐቢየ ፡ በኵለሄ ፤ ዘያነውኅ ፡ መዋዕሊነ ፡ እምከርሠ ፡ እምነ ፤ ወይገብር ፡ ምስሌነ ፡ በከመ ፡ ምሕረቱ ።23ወየሀበነ ፡ ትፍሥሕተ ፡ ልብ ፤ ወይ[ግበ]ር ፡ ሰላመ ፡ በመዋዕሊነ ፤ ወበላዕለኒ ፡ እስራኤል ፡ በአምጣነ ፡ መዋዕለ ፡ ዓለም ።24ወተአመነ ፡ ምስሌነ ፡ ምሕረቱ ፤ ወቤዘወነ ፡ በመዋዕሊነ ።25ክልኤተ ፡ አሕዛበ ፡ ጸልአት ፡ ነፍስየ ፤ ወሣልሶሙሰ ፡ ኢኮነ ፡ ሕዝበ ፤26እለ ፡ ይነብሩ ፡ ውስተ ፡ ደብረ ፡ ሰማርያ ፡ ወፍልስጥኤም ፤ ወሕዝበ ፡ አሞሬዎን ፡ እለ ፡ ይነብሩ ፡ ውስተ ፡ ሰቂማ ።27ትምህርተ ፡ ጥበብ ፡ ወተግሣጽ ፤ ጸሐፍኩ ፡ ውስተ ፡ ዝንቱ ፡ መጽሐፍ ፤ ኢያሱ ፡ ወልደ ፡ ሲራክ ፡ ወልደ ፡ አልዐዛር ፡ ዘኢየሩሳሌም ፤ ዘአንቅዓ ፡ ለጥበብ ፡ እምልቡ ።28ብፁዕ ፡ ዘይገብር ፡ ከመዝ ፡ ዘንተ ፤ ወዘይጠብብ ፡ ወየዐቅቦ ፡ ለዝንቱ ።29ዘዘንተ ፡ ገብረ ፡ ኵሎ ፡ ይክል ፤ እስመ ፡ ብርሃኑ ፡ ለእግዚአብሔር ፡ አሠሩ ።