ዘሰፎንያስ ነቢይ 3

1 ዛቲ ፡ ሀገር ፡ ዐማፂት ፡ እንተ ፡ ትነብር ፡ ተአሚና ፡ እንተ ፡ ትብል ፡ በልባ ፤ አነ ፡ ከመ ፡ ወአልቦ ፡ እንተ ፡ ከማየ ፤ እፎ ፡ እንከ ፡ ተማሰነት ፡ ወኮነት ፡ ምርዓየ ፡ ለአርዌ ፡ ገዳም ፤ ወኵሉ ፡ ዘኀለፈ ፡ እንተ ፡ ላዕሌሃ ፡ ይትፋጸይ ፡ ወይጠፍሕ ፡ በእደዊሁ ። 2 ኦላሕይ ፡ ወሠናይት ፡ ርግብ ፡ ሀገር ፡ እንተ ፡ ኢትሰምዕ ፡ ወኢትትወከፍ ፡ ተግሣጸ ፡ ወኢትትወከል ፡ በእግዚአብሔር ፡ ወኢቀርበት ፡ ኀበ ፡ አምላካ ። 3 ወመላእክቲሃኒ ፡ በውስቴታ ፡ ይጥሕሩ ፡ ከመ ፡ አንበሳ ፡ ወዐበይታኒ ፡ ከመ ፡ ተኵላተ ፡ ዐረብ ፡ እለ ፡ ኢያበይቱ ፡ ሎሙ ፡ ለነግህ ። 4 ወነብያቲሃኒ ፡ ዕደው ፡ መስተእብዳን ፡ ካህናቲሃኒ ፡ ያረኵሱ ፡ መቅደሰ ፡ ወየዐልዉ ፡ ሕገ ። 5 ወጻድቅሰ ፡ በማእከላ ፡ ኢይገብር ፡ ዐመፃ ፡ ከመ ፡ በጽባሕ ፡ ይሁብ ፡ ኵነኔሁ ፡ ወኢይመውኦ ፡ እንከ ፡ ዐመፃ ። 6 ወነፃኅክዎሙ ፡ ለዕቡያን ፡ በሞት ፡ ወኣማስን ፡ በሓውርቲሆሙ ፡ ወኣበዲ ፡ ፍኖቶሙ ፡ ለግሙራ ፡ ከመ ፡ ኢይክሀሉ ፡ ኀሊፈ ፡ ውስቴታ ፤ ወኀልቀ ፡ አህጉሪሆሙ ፡ ወአልቦ ፡ ዘተርፈ ፡ ዘይነብሮን ። 7 ወእቤ ፤ ፍርሁኒ ፡ ወተወከፉ ፡ ተግሣጽየ ፡ ወኢትሤረዉ ፡ እምቅድመ ፡ አዕይንቲሃ ፡ ወለኵሉ ፡ ዘተበቀልክዋ ፤ ትደሉ ፡ ትጊሥ ፡ እስመ ፡ ማሰነ ፡ ኵሉ ፡ ሠርጾሙ ። 8 በእንተ ፡ ዝንቱ ፡ ተዐገሠኒ ፡ ለአሜ ፡ እትነሣእ ፤ ይቤ ፡ እግዚአብሔር ፤ ከመ ፡ እስዐር ፡ እስመ ፡ ኵነኔየ ፡ ላዕለ ፡ ማኅበረ ፡ አሕዛብ ፡ ከመ ፡ ይትመየጡ ፡ ነገሥት ፤ ወእክዑ ፡ ላዕሌሆሙ ፡ መቅሠፍተ ፡ መዐትየ ፡ እስመ ፡ ታጠፍኣ ፡ ለኵላ ፡ ምድር ፡ እሳተ ፡ ቅንአትየ ። 9 እስመ ፡ ይእተ ፡ አሚረ ፡ እመይጥ ፡ ልሳኖሙ ፡ ለኵሎሙ ፡ አሕዛብ ፡ በመዋዕሊሃ ፡ ከመ ፡ ኵሉ ፡ ይጸውዕ ፡ ስመ ፡ እግዚአብሔር ፡ ወከመ ፡ ይትቀነዩ ፡ ሎቱ ፡ በአሐዱ ፡ አርዑት። 10 እምአፍላገ ፡ ኢትዮጵያ ፡ ያመጽኡ ፡ ሎቱ ፡ መሥዋዕተ ። 11 ይእተ ፡ አሚረ ፡ ኢትትኀፈር ፡ እምኵሉ ፡ ጌጋይከ ፡ ዘአበስከ ፡ ሊተ ፤ ይእተ ፡ አሚረ ፡ ኣአትት ፡ እምኔከ ፡ ኀሳረ ፡ ጽዕለትከ ፡ ወኢትደግም ፡ እንከ ፡ አዕብዮ ፡ አፉከ ፡ ላዕለ ፡ ደብረ ፡ መቅደስየ ። 12 ወኣተርፍ ፡ ሕዝበ ፡ ብዙኃነ ፡ ለከ ፡ ዘይውኅጠከ ፤ ወይፈርሁ ፡ ስመ ፡ እግዚአብሔር ። 13 እለ ፡ ተርፉ ፡ እስራኤል ፤ ወኢይገብሩ ፡ እንከ ፡ ዐመፃ ፡ ወኢይነቡ ፡ ከንቶ ፡ ወኢይትረከብ ፡ ውስተ ፡ አፉሆሙ ፡ ልሳነ ፡ ጽልሑት ፤ ወይነብሩ ፡ ወይትረዐዩ ፡ ወአልቦ ፡ ዘይጌርሞሙ ፡ እንከ ። 14 ተፈሥሒ ፡ ወለተ ፡ ጽዮን ፡ ስብኪ ፡ ወለተ ፡ ኢየሩሳሌም ፤ ተፈሥሒ ፡ ወተሐሠይ ፡ በኵሉ ፡ ልብኪ ፡ ወለተ ፡ ኤሩሳሌም ። 15 እስመ ፡ አእተተ ፡ እግዚአብሔር ፡ ግፍዐኪ ፡ ወባልሐኪ ፡ እምእደ ፡ እኩይ ፤ ወይነግሥ ፡ እግዚአብሔር ፡ በማእከሌኪ ፡ ወኢትሬእዪ ፡ እንከ ፡ እኪተ ። 16 ይእተ ፡ አሚረ ፡ ይብላ ፡ እግዚአብሔር ፡ ለኤሩሳሌም ፤ አጥብዒ ፡ ጽዮን ፡ ወኢይድከማ ፡ እደዊኪ ። 17 እስመ ፡ እግዚአብሔር ፡ አምላክኪ ፡ ምስሌኪ ፡ ወውእቱ ፡ ይክል ፡ አድኅኖትኪ ፡ ወያመጽእ ፡ ላዕሌኪ ፡ ፍሥሓ ፡ ወይሔድሰኪ ፡ በፍቅሩ ፡ ወይትፌሣሕ ፡ ብኪ ፡ በሐሤት ፡ ከመ ፡ ዕለተ ፡ በዓል ። 18 ወኣስተጋብኦሙ ፡ ለቅጥቁጣንኪ ፤ አሌሎ ፡ ለዘ ፡ ነሥአ ፡ ጽዕለተ ፡ ላዕሌሃ ። 19 ናሁ ፡ አነ ፡ እገብር ፡ በውስቴትኪ ፡ ወበእንቲአኪ ፡ ይእተ ፡ አሚረ ፤ ይቤ ፡ እግዚአብሔር ፤ ወአድኅና ፡ ለግድፍት ፡ ወእትወከፋ ፡ ለምንድብት ፡ ወእሬስዮሙ ፡ ለምክሕ ፡ ወስሙያነ ፡ በኵሉ ፡ ምድር ። 20 ወይትኀፈሩ ፡ ብኪ ፡ ይእተ ፡ አሚረ ፡ አመ ፡ አሠነይኩ ፡ ለኪ ፡ ወአመ ፡ ተወከፍኩክሙ ፤ ወእሬስየክሙ ፡ ስሙያነ ፡ ወምክሐ ፡ ለአሕዛቢሃ ፡ አመ ፡ ሜጥኩ ፡ ፄዋክሙ ፡ በቅድሜክሙ ፤ ይቤ ፡ እግዚአብሔር ። = ።