ዘዘካርያስ ነቢይ 13

1 ይእተ ፡ አሚረ ፡ ይትረኀው ፡ ኵሉ ፡ በሓውርተ ፡ ቤተ ፡ ዳዊት ። 2 ወከመዝ ፡ ይከውን ፡ ይእተ ፡ አሚረ ፡ ወይጠፍእ ፡ አስማቲሆሙ ፡ ለጣዖታት ፡ እምኵሉ ፡ ምድር ፡ ወአልቦ ፡ ዘይዘክሮሙ ፡ እንከ ፡ ወኣውዕዮሙ ፡ እምድር ፡ ለሐሳዊያነ ፡ ነቢያት ፡ ወለመንፈሰ ፡ ሐሰት ። 3 ወእመቦቱ ፡ ዘተነበየ ፡ ብእሲ ፡ ይብልዎ ፡ አቡሁ ፡ ወእሙ ፡ እለ ፡ ወለድዎ ፤ <ኢይከውን ፡ እስመ ፡ ሐሰተ ፡ ተናገርከ ፡ በስመ ፡ እግዚአብሔር ፤ ወይረግዝዎ ፡ አቡሁ ፡ ወእሙ ፡ እለ ፡ ወለድዎ ፡> ሶበ ፡ ተነበየ ። 4 ይእተ ፡ አሚረ ፡ ወይትኀፈሩ ፡ ነቢያት ፡ ኵሎሙ ፡ በዘ ፡ ርእዩ ፡ ሶበ ፡ ተነበዩ ፡ ወይለብሱ ፡ ሠቀ ፡ ዘጸጕር ፡ እስመ ፡ ሐሰዉ ። 5 ወይብሉ ፡ እንከ ፤ አንሰ ፡ ኢኮንኩ ፡ ነቢየ ፤ ሰብአ ፡ ተወለድኩ ፡ እምንእስየ ። 6 ወእቤሎ ፤ ምንትኑዝ ፡ መቅሠፍት ፡ ዘማእከለ ፡ እደዊከ ፤ ወይብል ፤ ቈሰልኩ ፡ በቤተ ፡ ዐርክየ ። 7 ተንሥኢ ፡ ኲናት ፡ ላዕለ ፡ ኖሎት ፡ ወላዕለ ፡ ብእሴ ፡ ሀገሩ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ቅትልዎሙ ፡ ለኖሎት ፡ ቅትልዎሙ ፡ ወአስተጋብኡ ፡ አባግዐ ፡ ወኣመጽእ ፡ እዴየ ፡ ላዕለ ፡ ኖሎት ። 8 ወአስተጋብኦሙ ፡ እምኵሉ ፡ ምድር ፤ ይቤ ፡ እግዚአብሔር ፤ የኀልቅ ፡ ክልኤ ፡ እድ ፡ ወይተርፍ ፡ ውስቴታ ፡ ሣልስት ፡ እዴሃ ። 9 ወእወስዶሙ ፡ ውስተ ፡ እሳት ፡ ለእልክቱ ፡ ሣልስት ፡ እድ ፡ ወኣረስኖሙ ፡ ከመ ፡ ያረስንዎ ፡ ለብሩር ፡ ወእፈትኖሙ ፡ ከመ ፡ ይፈትንዎ ፡ ለወርቅ ፤ ወውእቱሰ ፡ ይጼውዕ ፡ ስምየ ፡ ወአነሂ ፡ እሰጠዎ ፡ ወእብል ፤ ሕዝብየ ፡ ውእቱ ፡ ዝንቱ ፤ ወውእቱኒ ፡ ይብለኒ ፤ እግዚአብሔር ፡ አምላክየ ፡ አንተ ።