መልክአ ሥዕል

ኦ ርኅሩኀነ ልቡና አፍቅሮተ ሰብእ ልማድክሙ፤ በጥቡዕ ልብ ንስእለክሙ፤ ሥሉስ ቅዱስ ምሕረትክሙ አዝንሙ፤ ክሣደ ፀርነ በሰይፍክሙ ግዝሙ፤ ወዲበ ርእስነ ዓዲ እድክሙ ሢሙ። መልክአ ሥዕል ኦ ርኅርኅተ ሕሊና አፍቅሮተ ሰብእ ልማዳ፤ ሰአሊተ ምሕረት ይእቲ ሐፁረ መስቀል ዘየዓውዳ ንትቀበላ ንዑ ለወለተ ዳዊት ዘይሁዳ፤ መጽአት ነዋ ኅቡረ ምስለ ወልዳ፤ ናንፈርዕፅ ቅድመ ሥዕላ እንዘ ንሁብ ጋዳ፤ ለለጌሠሙ ትመስል እንግዳ። መልክአ ሥዕል ኦ ርኅርኅተ ሕሊና ዘሕገ ልማዳ ምሕረት፤ ለኵሉ ፍጥረት፤ ንሳለማ ንዑ ለሥዕለ ማርያም ቡርክት፤ ወለሥዕለ ወልዳ ፀባዖት ፤ ወለሥዕለ ጊዮርጊስ ሰማዕት፤ ሥዕለ ሚካኤል ወገብርኤል ወሩፋኤል ዘራማ ኃይላት። መልክአ ሥዕል ኦ ርኅርኅተ ሕሊና ፍቅርኪ ያነድድ አማዑተ፤ ከዊኖ እሳተ፤ ንጽሐ ድንግልናኪሰ እንተ ኢያእመረ ርስሐተ፤ ማርያም ግበሪ ሠናያተ ኵሎ ዕለተ፤ ሞትሰ ድልው ሊተ፤ ባሕቱ ለንሥሓ ጽንሕኒ ንስቲተ። መልክአ ሥዕል ኦ ርኅርኅተ ሕሊና ለእግዙአብሔር አስከሬኑ፤ እንተ ኢያውዓየኪ እሳተ ርስኑ፤ መሐርኒ ድንግል ወተሣሃልኒ በበዘመኑ፤ ለእመ መሐርክኒ እግዜእትየ ዘይኴንነኒ መኑ፤ ኰናኔ ሥጋ ወነፍስ ወልድኪ አኮኑ። መልክአ ሥዕል ኦ ርኅርኅተ ሕሊና እንተ ኤልያስ ደመና፤ ወለተ ኢያቄም ወሐና፤ ማርያም ዑጽፍት ወኁብርት በቅድስና፤ ሶበ ነጸረኪ ሙሴ በሲና፤ ኅትምት በድንግልና አልባቲ ሙስና። መልክአ ሥዕል ተአምርኪ ብዘኅ ዘአልቦ ፍጻሜ፤ በርኅበ ዓለም ሰፈነ አምሳለ ደመና ወጊሜ፤ ማርያም ድንግል ደብተራ ጳውሎስ ዘብሔረ ሮሜ ተማሕፀንኩ በሕፃንኪ ዘሐዘለቶ ሰሎሜ፤ እንበለ ንሥሓ ኢይሙት ወስክኒ ዕድሜ። መልክአ ሥዕል ቅድመ ሥዕልኪ እሰግድ ወአስተበርክ ክሡተ፤ ቅድመ ማኅበራንኪ እሉ እንዘ እቀውም ድርገተ፤ ፈጻሚተ መፍቅድ ማርያም እስእለኪ ስእለተ፤ ፀግውኒ እግዜእትየ ለዓለመ ዓለም ሕይወተ፤ እምእደ እኩያን አጽራርየ አድኅነኒ ሊተ። መልክአ ሥዕል ቅድመ ሥዕልኪ እሰግድ ወለሥዕለ ወልድኪ እገኒ ፤ ማርያም ድንግል ማርያም እመ አዶኒ፤ ማዕበለ ጌጋይ ጽኑዕ እስመ ለአስጥሞ በጽሐኒ፤ ሐመርየኒ ፤ ማዕዶትየኒ ሃይማኖትየኒ ፤ ማርያም ዘእንበሌኪ አልብየ ምንትኒ። መልክአ ሥዕል ሰላም ለሥዕልኪ ዘይኤድም ለንጻሬ፤ ዓዲ ሰላም ወለሥዕለ ወልድኪ በኁባሬ፤ አክሊለ ሢመቱ ለጴጥሮስ ማርያም እንተ ትፀድሊ እምወራውሬ፤ ለተአምርኪ ባቊዕ ሶበ ናቄርብ ዜማሬ፤ ክድንኒ ለአግብርትኪ ሣህለኪ ጶደሬ። መልክአ ሥዕል ሰላም ለሥዕልኪ መዓዚ ቅዳሴ ዘቦቱ፤ ወለሥዕለ ወልድኪ ሰላም ዘያስተፍሥሕ ሥነ ርእየቱ፤ ለሐዋርያ እንድርያስ ቀዳማዊ ማርያም ሃይማኖቱ፤ ናሁ ገደፍኩ ሕይወትየ ቅድመ ተአምርኪ ዜንቱ፤ ዓለሙኒ ኃላፊ ንብረቱኒ ኃላፊ እስመ ኵሉ ኃላፊ ውእቱ። መልክአ ሥዕል ሰላም ለሥዕልኪ ዘክንፈ መላእክት ምጽላሉ፤ ወጸዳለ ክርስቶስ ሥነ ጸዳሉ፤ እመ ያዕቆብ በፀጋ ማርያም እግዜእተ ኵሉ፤ ናሁ አግብርትኪ በቃለ ማኅሌት ይብሉ፤ ስብሐት ወክብር ወሰጊድ ለመንግሥትኪ ይደሉ። መልክአ ሥዕል ሰላም ለሥዕልኪ ወለሥዕለ ወልድኪ ዘሰአሞ፤ ዮሐንስ ርኄ ዮሐንስ ቀናንሞ፤ ለዜ ወልድኪ መሐሪ ኅሩመ በቀል ወተቀይሞ፤ ማርያም ሀብኒ በእድኪ እንዘ ትጼውኢ ስሞ፤ ሥጋሁ ቅዱሰ ወክቡረ ደሞ። መልክአ ሥዕል ሰላም ለሥዕልኪ ወለሥዕለ ወልድኪ በመትሎ፤ እንተ ነገደ ወሖረ መንገለ አቃርዮስ ሀሎ፤ ኀበዜ ወልድኪ ፈጣሪ ናትናኤል ዘይትዌከሎ፤ ከመ የሀበኒ ጽድቆ ወይጸግወኒ ሣህሎ፤ ድንግል በእንቲአየ አብዜኂ ተንብሎ። መልክአ ሥዕል ሰላም ለሥዕልኪ ሐፈ ማኅየዌ፤ በጼድንያ ወግብፅ ዘአውኀዘት በኢሕሳዌ፤ ለመጸብሐዊ ማቴዎስ ማርያም እንተ ረሰይኪዮ ወንጌላዌ፤ ይኩነኒ ዘልፈ ጸሎትኪ እምዘመነ ኵሉ ምንሳዌ፤ ዐቃቤ ዘመዓልት ወዘሌሊት ሀላዌ። መልክአ ሥዕል ሰላም ለሥዕልኪ ሶበ ጸለየት ማርታ፤ አጽኒና ርእሳ ከመ ትትመጦ ስእለታ፤ ምክሐ ታድዎስ አንቲ ማርያም ወሞገሰ ቶማስ ስሙየ መንታ፤ አመ ኢታድኅን እም ወለታ፤ ወአመ ታገብእ ምድር ማኅፀንታ፤ ኩንኒ ለመዋቲ ሐገፋ ወወልታ። መልክአ ሥዕል ሰጊድ ወአምኃ ይደሉ ለሥዕልኪ፤ ወለሥዕለ ክርስቶስ ወልድኪ፤ ወይነ በርተሎሜዎስ አንቲ ማርያም ዘያስተፍሥሕ ጣዕመ ፍቅርኪ፤ አንብርኒ ከመ ኅልቀት በውሣጤ ርኅሩኅ ልብኪ፤ ወከመ ማዕተብ ፁርኒ በመዜራዕትኪ። መልክአ ሥዕል ሰላም ለሥዕልኪ ዘመዓድም ብርሃኑ፤ ወፍትው ሞገሰ ሥኑ፤ ሃይማኖተ ፊልጶስ አንቲ ማርያም ከመ ጳውሎስ ይዛኑ፤ ሕማምኑ መጥባህትኑ ፃዕርኑ፤ አኅድጎ ፍቅርኪ ዘይክለኒ መኑ። መልክአ ሥዕል ሰላም ለሥዕልኪ ቦ ጊዛ ዘትትናገር፤ ወቦ ጊዛ ዘትክዑ ደመ ተአምር፤ ማርያም ስብሕት ወውድስት እመ እግዙአብሔር፤ ለማትያስ ሙቁሕ ወለያዕቆብ ውጉር፤ እስመ አንቲ ሞገሶሙ በሰማይ ወበምድር። መልክአ ሥዕል በኢትዮጵያ ወግብፅ ወሶርያ በአንጾኪያ ወሮም፤ ለሥዕላትኪ ዘሀለዋ ማርያም ሰላም፤ ምስለ ኤጲስ ቆጶስ ያዕቆብ ዘኢየሩሳሌም፤ ይምጽኡ ኀቤነ ዘእምኀቤኪ ለባርኮትነ ዮም፤ ማርቆስ ዘአንበሳ ወሉቃስ ዘላህም። መልክአ ሥዕል ሰላም ለሥዕልኪ እንተ ሠዐላ በእዱ፤ ሉቃስ ጠቢብ ዘእምወንጌላውያን አሐዱ፤ አመ ተቀብዑ ማርያም እምሐፈ ሥዕልኪ ቅብዐ ናርዱ በሕማም እኩይ እለ ደወዩ ወውህዱ፤ ፅዑራነ ዓለም ጥዕዩ ወጥቀ ፈድፈዱ። መልክአ ሥዕል ሰላም ለሥዕልኪ ወለሥዕለ ወልድኪ አልፋ፤ ማርያም ዘኮንኪ ለኃጥአነ ምድር ተስፋ፤ እመቦ እምሰብእ ዘይሜንና ወዘይገድፋ፤ ለተአምርኪ ባቍዕ እንተ ደቅስዮስ ጸሐፋ፤ ውጉዘ ይኩን በቃሎሙ ለሳውል ወኬፋ። መልክአ ሥዕል ተማኅፀንኩ እግዜእትየ ማርያም በመልክአ ሥዕልኪ ዚቲ፤ እንዘ እሰግድ ቅድሜሃ ወእትጋነይ ላቲ፤ ማርያም ድንግል ማርያም ወለተ ማቲ፤ ቤዚ ቤዚ ቤዚ ነፍሰ ኵሉ መዋቲ፤ በሰማይኒ ወበምድር አንቲ። መልክአ ሥዕል ሰላም ሰላም ለመልክአ ሥዕልኪ ኵሉ፤ እምነ ፀሐይ ወወርኅ ዘያበርህ ሥነ ፀዳሉ፤ ወበእንተዜ ማርያም ስብሐተ ዙአኪ ይብሉ፤ እስመ አባልኪ ለእግዙአብሔር አባሉ፤ ማርያም በረከትኪ ምስሌነ የሃሉ።