ተፈሥሒ ማርያም ዘዘወትር

ሰላም ለማርያም አጽፈ ወልድ ዋሕድ፤ ወመጾረ ሕያው ነድ። ለድንግልናሃ ይደሉ ሰጊድ፤ ለማርያም ዘይቤ ኢይሰግድ፤ ሞጸፈ መብረቅ በሊኅ በርዕሱ ለይረድ። ተፈሥሒ ማርያም ዘዘወትር ተፈሥሒ ማርያም ድንግልተ ሥጋ ወሕሊና፤ ተፈሥሒ ማርያም ወለተ ኢያቄም ወሐና፤ ጳጦስ አንቲ ዘአስተርአይኪ በደብረ ሲና ፤ ጎሞረ ወርቅየ መሥፈርቱ ለመና፤ ማርያም ለዕበየኪ ይደሉ መሐና። ተፈሥሒ ማርያም ዘዘወትር ተፈሥሒ ማርያም ድንግልተ ሕሊና ወሥጋ፤ ተፈሥሒ ማርያም እንበለ ሕፀፅ ወንትጋ፤ ተፈሥሒ አንቀጽ ዘኢተርኅወ መንሠጋ፤ ለነፍሰ ዙአየ ውስተ ሲዖል ኢይኀድጋ፤ ፍሬ ማሕፀንኪ ወልድ ይክፍለኒ ፀጋ፤ ኀበ ይገብሩ ኅሩያን እንግልጋ። ተፈሥሒ ማርያም ዘዘወትር ተፈሥሒ ማርያም ይደልወኪ ተፈሥሖ፤ ተራኅርኂ ድንግል ዘልማድኪ ተራኅርኆ ፤ ገብርኪ ኃጥእ ሶበ ጸራሕኩ በከልሖ፤ ለቃለ አፉየ ተወኪፈኪ ጽራሖ፤ ኦሆ ኦሆ በልኒ ኦሆ፤ ለቤተ መርዓየ እሁበከ መርኆ። ተፈሥሒ ማርያም ዘዘወትር ተፈሥሒ ማርያም ወለተ ሣራ ወርብቃ ፤ ተፈሥሒ ማርያም ለደወለ ርስት ማዕነቃ ፤ ለረዲኦትየ ፍጡነ እንዘ ትሠወጢ ከመ ባዛቃ፤ ተፈሥሒ ማርያም ወለተ ሣራ ወርብቃ ፤ ተፈሥሒ ማርያም ለደወለ ምስር ማዕንቃ ፤ ለረዲኦተየ ፍጡነ ብጽሒ በኢጐንድዮ ኀበ ሀሎኩ ጥቃ፤ እንተ ትሰወጢ ከመ ባዚቃ ፤ ብጽሒ በኢጐንድዮ ኀበ ሃሎኩ ጥቃ ፤ ከመ ትፈጽሚ ለልብየ ጻሕቃ፡፡ ከመ ትፈጽሚ ለልብየ ጻሕቃ። ተፈሥሒ ማርያም ዘዘወትር ተፈሥሒ ማርያም እንተ አልብኪ ምሳሌ፤ ተፈሥሒ ማርያም ታቦተ ኀርመት ወጽሌ፤ ተፈሥሒ ጽሪት ዘዕረፍትየ ቢረሌ፤ አስተበጽዕ አንሰ በጉባኤ ዘለኪ ድንጋሌ፤ ታቦተ በኢውላውሌ እንዘ እብል አሌ፤ አንግፍኒ በትንባሌ እምብካይ ወወይሌ። ተፈሥሒ ማርያም ዘዘወትር ተፈሥሒ ማርያም ዘአክናፈ ንጽሕኪ ምንታዌ፤ ዘአምሰጥኪ ቅድመ እምቂዓተ ሕምዘ ለአርዌ መጽሐፈ ብሥራት ይብሉኪ እለ ሀለዉ ምድረ ፄዋዌ፤ መክፈልተ ርስትየ አንቲ ማርያም እንተ አልብኪ ምንሳዌ፤ ዘፈለጠ ሊተ ኢያሱ ዘነዌ። ተፈሥሒ ማርያም ዘዘወትር ተፈሥሒ ማርያም መድኃኒተ አዳም ወሔዋ፤ ተፈሥሒ ማርያም ሐዳስዩ ጣዕዋ፤ ርጢነ መደኃኒት ወልድኪ ለቊስልየ ዘየሐይዋ፤ አውቅዪዮ በሰይፍኪ ለፀርየ ነዋ፤ ሰይጣን ስሙ ለነፍስየ ዕድዋ። ተፈሥሒ ማርያም ዘዘወትር ተፈሥሒ እብለኪ ማርያም በከመ ገብርኤል መልአክ፤ ቡርክት አንቲ እምአንስት ወፍሬ ከርሥኪ ቡሩክ፤ ለዕበየ ንግሥኪ ዘልፈ እንዘ እሰግድ በብረክ፤ አመስጥ አንሰ በጽንዕኪ ዘእምጸርየ ድሩክ፤ ዘይፈቅድ ይንዓወኒ በጽባሕ ወሠርክ። ተፈሥሒ ማርያም ዘዘወትር ተፈሥሒ ማርያም ሰርጐ አሮን ሌዋዊ፤ ተፈሥሒ ማርያም ወለተ ዳዊት ሰንቃዊ፤ ሙካፈ ስእለቱ ለኢዮብ አመ በቍስሉ ይደዊ፤ ከመ ትህጵይዮ ለፀርየ ነፍሳተ ብዘኃን ነዓዊ፤ በዲበ አብትር ቀስተኪ ቀስትዊ። ተፈሥሒ ማርያም ዘዘወትር ተፈሥሒ ማርያም ዘኢይኃልቅ ትፍሥሕትኪ፤ ተፈሥሒ ማርያም ዘኢይቀብል መዜገብኪ፤ ተፈሥሒ ማርያም ዘኢየሐጽጽ ዜክረ ውዳሴኪ፤ ኢትመንንኒ ለገብርኪ ዘአጥረየኒ ወልድኪ፤ እስመ አንቲ ሊተ ወአነ ዘለኪ። ተፈሥሒ ማርያም ዘዘወትር በመኑ እትሜካሕ ማርያም ዘንበሌኪ ምክሕየ፤ ቀርነ መድኃኒትየ፤ ብኪ ጸናዕኩ እምከርሠ እምየ፤ ማርያም ጠረጴዚሁ ለቍርባነ ወንጌል ብዕልየ፤ ውስተ እድኪ ገደፍኩ ነፍስየ ወሥጋየ። ተፈሥሒ ማርያም ዘዘወትር በመኑ እከብር ማርያም ዘእንበሌኪ ክብረ ኵሉ፤ ነቅዓ ምድር አንቲ ወጠለ ሰማይ ዘላዕሉ፤ አንቲ ውእቱ ለዳዊት ሰንጐ አክሊሉ፤ ብኪ እለ ተወከሉ ኢተኃፍሩ ወኢተሐጒሉ፤ መገቦሙ ወመርሆሙ ወልድኪ በሣህሉ። ተፈሥሒ ማርያም ዘዘወትር በመኑ እትፍሣሕ ማርያም ዘእንበሌኪ ፍሥክሐ፤ እንተ ወለድኪ መሲሐ፤ ከመ እግነይ ለኪ ምሕረተ ወፍትሐ፤ ሶበ እዛከር ርኅራኄኪ ንኅኑኃ ወዜኅዘኃ፤ እምሐኬቱ ኅሊናየ ነቅሐ። ምንተኑ አዓሥየኪ ዕሤተ፤ በእንተ ኵሉ ዘገበርኪ ሊተ፤ ማርያም ሠናይት ዘታፈቅሪ ምሕረተ፤ ሶበሰ ትትዓቀቢ ዘዙአየ ኀጢአተ፤ እምኢሐየውኩ አሐተ ሰዓተ። በሰላመ ገብርኤል መልአክ ኦ እግዜእትየ ማርያም ሰላምለኪ፣ ድንግል በኅሊናኪ ወድንግል በሥጋኪ፣ እመ እግዙአብሔር ጸባኦት ሰላም ለኪ፣ ቡርክት አንቲ እምአንስት ወቡሩክ ፍሬ ከርሥኪ፣ ተፈሥሒ ፍሥሕት ኦ ምልዕተ ጸጋ እግዙአብሔር ምስሌኪ። መስተብቊዕ ለንግሥተ ኵልነ ካህን ወካዕበ ናስተበቍዓ ለንግሥተ ኵልነ ማርያም እምነ ወእሙ ለእግዙእነ ወመድኃኒነ ኢየሱስ ክርስቶስ ንስእል ወነኃሥሥ ናስተበቍዕ ወንዌድስ ዕበየ ተአምራቲሃ ብዘኀ ለእመ ጸባኦት ንጉሥ እለ ትነብሩ ተንሥኡ ወእለ ታረምሙ አውሥኡ። ማርያምሃ በቃለ ስብሐት ጸውዑ ፤ ቁሙ ወአጽምኡ ተአምረ ድንግል ከመ ትስምዑ። ዲያቆን ጸልዩ ቅድመ ሥዕላ ለቅድስት ድንግል መራዕተ አብ ወእመ በግዑ። ሕዜብ ቡርክት አንቲ ማርያም፤ ንግሥት አንቲ ማርያም፤ ሠናይት አንቲ ማርያም፤ ወቡሩክ ፍሬ ከርሥኪ መድኃኔ ኵሉ ዓለም። ካህን ንዑ ንስግድ ወንግነይ ላቲ ፤ ንዑ ንትፈሣሕ ወንትሐሠይ ባቲ ፤ እስመ አምላክ ይእቲ ዘበድንግልና ክልኤቲ ዚቲ ይእቲ ትንቤቶሙ ለነቢያት ፤ ሞገሰ ስብከቶሙ ለሐዋርያት ፤ እሞሙ ለሰማዕት ፤ ወእኅቶሙ ለመላዕክት ፤ ላቲ ይደሉ ክብር ወስብሐት ወለወልዳ አምልኮ ወስግደት በምድር ወበሰማያት በባሕር ወበቀላያት ለዓለመ ዓለም። ሕዜብ አሜን