ተፈሥሒ ማርያም ዘዘወትር

ሰላም ለማርያም አጽፈ ወልድ ዋሕድ፤ ወመንበረ/ወመጾረ ሕያው ነድ። ለድንግልናሃ ይደሉ ሰጊድ፤ ለማርያም ዘይቤ ኢይሰግድ፤ ሞጸፈ መብረቅ በሊኅ በርዕሱ ለይረድ።

ተፈሥሒ ማርያም ድንግልተ ሥጋ ወሕሊና፤ ተፈሥሒ ማርያም ወለተ ኢያቄም ወሐና፤ ጳጦስ አንቲ ዘአስተርአይኪ በደብረ ሲና ፤ ጎሞረ ወርቅየ መሥፈርቱ ለመና፤ ማርያም ለዕበየኪ ይደሉ መሐና።

ተፈሥሒ ማርያም ድንግልተ ሕሊና ወሥጋ፤ ተፈሥሒ ማርያም እንበለ ሕፀፅ ወንትጋ፤ ተፈሥሒ አንቀጽ ዘኢተርኅወ መንሠጋ፤ ለነፍሰ ዚአየ ውስተ ሲዖል ኢይኀድጋ፤ ፍሬ ማሕፀንኪ ወልድ ይክፍለኒ ፀጋ፤ ኀበ ይገብሩ/ይነብሩ ኅሩያን እንግልጋ።

ተፈሥሒ ማርያም ይደልወኪ ተፈሥሖ፤ ተራኅርኂ ድንግል ዘልማድኪ ተራኅርኆ ፤ ገብርኪ ኃጥእ ሶበ ጸራሕኩ በከልሖ፤ ለቃለ አፉየ ተወኪፈኪ ጽራሖ፤ ኦሆ ኦሆ በልኒ ኦሆ፤ ለቤተ መርዓየ እሁበከ መርኆ።

ተፈሥሒ ማርያም ወለተ ሣራ ወርብቃ ፤ ተፈሥሒ ማርያም ለደወለ ርስት ማዕነቃ ፤ ለረዲኦትየ ፍጡነ እንዘ ትሠወጢ ከመ ባዛቃ፤ ተፈሥሒ ማርያም ወለተ ሣራ ወርብቃ ፤ ተፈሥሒ ማርያም ለደወለ ምስር ማዕንቃ ፤ ለረዲኦተየ ፍጡነ ብጽሒ በኢጐንድዮ ኀበ ሀሎኩ ጥቃ፤ እንተ ትሰወጢ ከመ ባዜቃ ፤ ብጽሒ በኢጐንድዮ ኀበ ሃሎኩ ጥቃ ፤ ከመ ትፈጽሚ ለልብየ ጻሕቃ፡፡ ከመ ትፈጽሚ ለልብየ ጻሕቃ።

ተፈሥሒ ማርያም እንተ አልብኪ ምሳሌ፤ ተፈሥሒ ማርያም ታቦተ ኀርመት ወጽሌ፤ ተፈሥሒ ጽሪት ዘዕረፍትየ ቢረሌ፤ አስተበጽዕ አንሰ በጉባኤ ዘለኪ ድንጋሌ፤ በኢውላውሌ እንዘ እብል አሌ፤ አንግፍኒ በትንባሌ እምብካይ ወወይሌ።

ተፈሥሒ ማርያም ዘአክናፈ ንጽሕኪ ምንታዌ፤ ዘአምሰጥኪ ቅድመ እምቂዓተ ሕምዙ ለአርዌ መጽሐፈ ብሥራት ይብሉኪ እለ ሀለዉ ምድረ ፄዋዌ፤ መክፈልተ ርስትየ አንቲ ማርያም እንተ አልብኪ ምንሳዌ፤ ዘፈለጠ ሊተ ኢያሱ ዘነዌ።

ተፈሥሒ ማርያም መድኃኒተ አዳም ወሔዋ፤ ተፈሥሒ ማርያም ሐዳስዩ ጣዕዋ፤ ርጢነ መደኃኒት ወልድኪ ለቊስልየ ዘየሐይዋ፤ አውቅዪዮ በሰይፍኪ ለፀርየ ነዋ፤ ሰይጣን ስሙ ለነፍስየ ዕድዋ።

ተፈሥሒ እብለኪ ማርያም በከመ ገብርኤል መልአክ፤ ቡርክት አንቲ እምአንስት ወፍሬ ከርሥኪ ቡሩክ፤ ለዕበየ ንግሥኪ ዘልፈ እንዘ እሰግድ በብረክ፤ አመስጥ አንሰ በጽንዕኪ ዘእምጸርየ ድሩክ፤ ዘይፈቅድ ይንዓወኒ በጽባሕ ወሠርክ።

ተፈሥሒ ማርያም ሰርጐ አሮን ሌዋዊ፤ ተፈሥሒ ማርያም ወለተ ዳዊት ሰንቃዊ፤ ሙካፈ ስእለቱ ለኢዮብ አመ በቍስሉ ይደዊ፤ ከመ ትህጵይዮ ለፀርየ ነፍሳተ ብዘኃን ነዓዊ፤ በዲበ አብትር ቀስተኪ ቀስትዊ።

ተፈሥሒ ማርያም ዘኢይኃልቅ ትፍሥሕትኪ፤ ተፈሥሒ ማርያም ዘኢይቀብል መዝገብኪ፤ ተፈሥሒ ማርያም ዘኢየሐጽጽ ዝክረ ውዳሴኪ፤ ኢትመንንኒ ለገብርኪ ዘአጥረየኒ ወልድኪ፤ እስመ አንቲ ሊተ ወአነ ዘለኪ።

በመኑ እትሜካሕ ማርያም ዘንበሌኪ ምክሕየ፤ ቀርነ መድኃኒትየ፤ ብኪ ጸናዕኩ እምከርሠ እምየ፤ ማርያም ጠረጴዛሁ ለቍርባነ ወንጌል ብዕልየ፤ ውስተ እድኪ ገደፍኩ ነፍስየ ወሥጋየ።

በመኑ እከብር ማርያም ዘእንበሌኪ ክብረ ኵሉ፤ ነቅዓ ምድር አንቲ ወጠለ ሰማይ ዘላዕሉ፤ አንቲ ውእቱ ለዳዊት ሠርጐ አክሊሉ፤ ብኪ እለ ተወከሉ ኢተኃፍሩ ወኢተሐጒሉ፤ መገቦሙ ወመርሆሙ ወልድኪ በሣህሉ።

በመኑ እትፌሣሕ ማርያም ዘእንበሌኪ ፍሥሓ፤ እንተ ወለድኪ መሲሐ፤ ከመ እሕሊ ለኪ ምሕረተ ወፍትሐ፤ ሶበ እዜከር ርኅራኄኪ ንኅኑኅ ወዝኅዙኅ፤ እምሐኬቱ ኅሊናየ/ልቡናየ ነቅሐ።

ምንተኑ አዓሥየኪ ዕሤተ፤ በእንተ ኵሉ ዘገበርኪ ሊተ፤ ማርያም ሠናይት ዘታፈቅሪ ምሕረተ፤ ሶበሰ ትትዓቀቢ ዘዚአየ ኀጢአተ፤ እምኢሐዮኩ አሐተ ሰዓተ።

በሰላመ ገብርኤል መልአክ ኦ እግዜእትየ ማርያም ሰላምለኪ፣ ድንግል በኅሊናኪ ወድንግል በሥጋኪ፣ እመ እግዚአብሔር ጸባኦት ሰላም ለኪ፣ ቡርክት አንቲ እምአንስት ወቡሩክ ፍሬ ከርሥኪ፣ ተፈሥሒ ፍሥሕት ኦ ምልዕተ ጸጋ እግዚአብሔር ምስሌኪ።

ወካዕበ ናስተበቍዓ ለንግሥተ ኵልነ ማርያም እምነ ወእሙ ለእግዚእነ ወመድኃኒነ ኢየሱስ ክርስቶስ ንስእል ወነኃሥሥ ናስተበቍዕ ወንዌድስ ዕበየ ተአምራቲሃ ብዙኅ ለእመ ጸባኦት ንጉሥ እለ ትነብሩ ተንሥኡ ወእለ ታረምሙ አውሥኡ። ማርያምሃ በቃለ ስብሐት ጸውዑ ፤ ቁሙ ወአጽምኡ ተአምረ ድንግል ከመ ትስምዑ።

ጸልዩ ቅድመ ሥዕላ ለቅድስት ድንግል መራዕተ አብ ወእመ በግዑ።

ቡርክት አንቲ ማርያም፤ ንግሥት አንቲ ማርያም፤ ሠናይት አንቲ ማርያም፤ ወቡሩክ ፍሬ ከርሥኪ መድኃኔ ኵሉ ዓለም።

ንዑ ንስግድ ወንግነይ ላቲ ፤ ንዑ ንትፈሣሕ ወንትሐሠይ ባቲ ፤ እስመ አምላክ ይእቲ ዘበድንግልና ክልኤቲ ዚቲ ይእቲ ትንቤቶሙ ለነቢያት ፤ ሞገሰ ስብከቶሙ ለሐዋርያት ፤ እሞሙ ለሰማዕት ፤ ወእኅቶሙ ለመላዕክት ፤ ላቲ ይደሉ ክብር ወስብሐት ወለወልዳ አምልኮ ወስግደት በምድር ወበሰማያት በባሕር ወበቀላያት ለዓለመ ዓለም።

አሜን