ትምህርተ ኅቡአት

በስመ አብ ወወልድ ወመንፈስ ቅዱስ አሐዱ አምላክ አሜን። በእንተ ትምህርተ ኅቡአት ቅድመ ዘትትነገር እምጵርስፎራ ለምእመናን ኅቡአት። ትምህርተ ኅቡአትሰ ከመዝ ንግር ዘቅድመ ሀሎ ወይሄሉ ፤ ዘመጽአ ዘሐመ ወሞተ ወተቀብረ ወተንሥአ ፃዕረ ዘሞት ፈትሐ ወዘእሙታን ተንሥአ። ኢኮነ ባሕቲቱ ከዊኖ ሰብአ ዘእመንፈስ ቅዱስ ሥጋሁ ለአዳም ምስለ ነፍሱ ዘኢኀደገ ነፍሶ ውስተ ሞት ዘበመንፈስ ለአዳም ፀወኖ ወአሕየዎ። ዘለብሶ ለአዳም መዊቶ ሐይወ ዘዐርገ ውስተ ሰማያት ተዋሪዶ ለሞት እምድኅረ መስቀል ሞዐ በቲኮ ማእሠሮ ለሞት በእንተ ዘተኀየለነ ዲያቢሎስ ትካት በዝንቱ በእንተ ሕማሙ አርአየነ ሙስናሁ በቲኮ ኅምዘ ኃይሉ ሰጠጠ መሥገርቶ። ወገጹ ዘፍጹም በጽልመት ፈርሀ ወደንገፀ ዲያቢሎስ ርእዮ ብሑተ ልደት በሥጋ አምላክ በሲኦል። ወሪዶ ዘእምልዑላን ሰማያት ዘኢይትነገር ወሪዶ ሕሊናሁ ዘኢይትከፈል በአሐቲ ምክር ምስለ አቡሁ ሰማያተ ገብረ ምስለ አቡሁ አክሊሎሙ ለመላእክት ወለሊቃነ መላእክት ኃይል ለኃያላን ዐጽፍ ወለአጋእዝት መንፈስ ዘእምቅድመ ዓለም መንግሥቱ ሰፋኒት ለቅዱሳን እዘዝ። ሕሊናሁ ለአብ ዘኢይትረከብ ውእቱ ጥበቡ ለአብ ውእቱ ኃይሉ ውእቱ የማኑ ውእቱ ምክሩ ውእቱ ሕሊናሁ እደ መዝራዕት ዘአብ ከዊኖ እንከ። እነዘ ነአምን በሃይማኖቱ ንገኒ ከመ ውእቱ ብርሃን ሕፅበተ መድኃኒት ምሥዋር ረድኤት ወመምህር ዘይትቃወም ለነ ዘየዐሢ ተወካፊ ምፅንዓተ ቅጽርነ ውእቱ ኖላዊ ኆኅት አንቀጽ ፍኖተ ሕይወት ሲሳይ መስቴ መኰንን። ነአምን ሕማሞ ለዘኢየሐምም ዘተወልደ በሥጋ ዚኢይትወለድ መዊቶ ሕያው ወልደ አብ ተገምረ ዚኢይትገመር ዘኃጢአተነ ነሥአ እንዘ አልቦ ኃጢአት መዊቶ ሐይወ። እምሰማያት እምኀበ አብ አይኅዐ ፤ በሕማማተ ሥጋሁ ቤዘወነ ወደሞ ክቡረ መንፈሰ ሕይወት ፤ ወቅድሳተ መንፈስ ወኀበነ ወማየ መንጽሔ ዚአነ። ዘያበርህ ውስተ አልባቢሆሙ ለእለ ይፈርህዎ እስመ ምስሌሆሙ ለዝላፉ ሀሎ ዘረሰየነ ኒኪራነ እምኵሉ ፍኖተ ሰይጣን ኃዳፍ ነፍሳት ዘቦቱ ኵልነ ንትዌከል ዘንተ አምላከ። ከዊኖ እምቅድመ ዓለም ምስለ አብ ርእዮ ለዓለም በማእሰረ ኃጢአት እንዘ ይትኀጐል በኃይለ ጥበቡ አርዌ ይትከየድ በኢያእምሮ ጌጋይ ለሞት ተቀንየ። ፈቂዶ ይፈውስ ትዝምደ ሰብእ ተገምረ በማኅፀነ ድንግል ተኀቢኦ ለኵሉ ኃይል እለ በሰማያት ማኅደር ወእለ ይትቃወማ ኃይል በኢያእምሮ ሠወሮሙ። ሥጋ ለብሰ ዘይማስን ወዘኢይማስን ለሥጋ መዋቲ ረሰዮ ዘኢይማስን ዘበአርአያ ሥጋ ዘመዋቲ ለአዳም አርአያ ዘኢይማስን ዘቦቱ በአርአያ ዘይማስን ተነሥተ። ወትእዛዛተ ጽድቅ በወንጌል መጠወ ዘውእቱ ጸዋዓ ዘበመንግሥት ንሕየው ተምሂረነ ወበውእቱ ወንጌል ማእሰረ ሰይጣን ተበትከ ከመ እሞት ሕይወተ ንትካፈል ወእምነ ኢያእምሮ ልቡና ንንሣእ። ውእቱሂ ከዊኖ ሰብአ ወልደ እግዚአብሔር አምላክ ዘተወልደ እምአዳም መዋቲ በአምሳሉ ተሰዊጦ ነሥአ ነሥአ ዘቀዳሚ ለተወልዶ ተፀንሰ ብእሴ። ዘውእቱ አምላክ ዘበአማን ዘበነቢያት አቅደመ ተዐውቆ ወበሐዋርያት ተሰብከ ወእመላእክት ተአኵተ ወእምኀበ ኵሎ ተሰብሐ። ተሰቅለ በእንቲአነ ወበመስቀሉ ኮነ ሕይወትነ ፣ ጽንዕነ ፣ ቤዛነ ዘውእቱ ምሥጢር ኅቡእ ፍሥሓ ዘኢይትዌዳእ ዘቦቱ። ኵሉ ነፍሰ ፍትወተ ሰብእ ያርኅቅ እምእግዚአብሔር ኢይክል ኪያሃ እንዘ ትፀውር ወትረ ዛ ይእቲ ስብሐት ፍቅር እምእግዚአብሔር ኢታሴስል። ወበእላ ከናፍር ፆታ ነጊር ኢይትከሀል ጥንቁቀ ዘእምትካት ኅቡአ ኮነ ይእዜሰ ክሡተ ምሥጢር ኮነ ለምእመናን አኮ ከመ ይትረአይ አላ ከመ ይትሐለይ ውእቱ ዝንቱ መስቀል ወቦቱ ንትመካሕ ከመ ንሰብሖ። ወቦቱ እለ ይጠመቁሂ ምእመናን ፍጹማን እምኵሉ ዘትነግረ ዘያስተርኢ ዘኢኮነ በአማን አድኀኑ ነፍሶሙ። በዝንቱ እለ ትጸንዑሁ ሕቱ ርእሰክሙ አፅምሙ አዕዛኒክሙ ወእለ ይትረአያ አዑሩ አዕይንቲክሙ እለ በገሃድ። ከመ ታእምሩ ፈቃዶ ለኢየሱስ ክርስቶስ ወኵሎ ምሥጢረ መድኃኒትክሙ ብእሲ ወአንስት ቅዱሳት እለ ሀሎክሙ ውስተ ተመክሖ በእግዚአብሔር። ያጽምእ ዘንተ ውሱጡ ለሰብእ ክርስቶስ ጸመደነ ለኀበ አቡሁ አቅረበነ መጺኦ እምድኅረ ሐመ ወወሪዶ ውስተ ሲኦል ዘውእቱ ነፍሰ ምውታን ፄወወ ለሕይወት። ርእዮ ሞት እንዘ ይወርድ በሥጋ ጌጋዮ ወአምሰሎ ወቦቱ ከመ ያለምድ ውሂጠ ርእየ በላዕሌሁ ስነ መለኮቱ ጸርሐ በቃል ዐቢይ እንዘ ይብል መኑ ውእቱ ዝንቱ ዘእምሥልጣንየ ሰብአ ለቢሶ ሊተ ሞዐኒ። መኑ ዝንቱ ዘእምሥልጣንየ ተውህቦ ሥጋ ለኀጒል ይምሥጠኒ መኑ ዝንቱ ዘምድረ ለብሰ ውእቱኬ ሰማያዊ ውእቱ መኑ ውእቱ ዝንቱ ዘበሙስና ተወልደ ውእቱሰ ኢይማስን መኑ ዝንቱ ዘነኪር እም ሕግየ መኑ ዝንቱ ዘእምዚአየ ይፄውው መኑ ዝንቱ ዘበኃይለ ነደ እሳት ምስለ ሞት ይትበአስ መኑ ዝንቱ ዘሞዖ ለጽልመት መኑ ውእቱ ዝንቱ ስብሐተ ሐዲስ ዘበአርአያዝ ተከልአኒ ገቢር ዘእፈቅድ። መኑ ዝንቱ እንበለ ኃጢአት ዘሞተ መኑ ዝንቱ ዘበበዝኀ ብርሃኑ ለጽልመት አዖሮ ዘኢኀደገኒ ለእሊአየ እስፍን አላ ኵሎ ለኀበ ሰማያት ይስሕብ እለ ተውህባኒ ነፍሳተ። መኑ ዝንቱ ስብሐት ዘይከልእ ሥጋ ኢትማስን መኑ ዝንቱ ዘለኪፎቶ ኢይክል ምንትኑ ዝንቱ ዘየዐውዶ ስብሐት ዘኢይትአተትዝ ተኀጐልኩ እምዝንቱ ወምእሊአሁ ዘአማስን በላዕሌሆሙ አልብየ። ዝንቱ ውእቱ ኢየሱስ ክርስቶስ ዘተሰቅለ ዘቦቱ ፀጋማይ የማናየ ኮነ ወታሕታይ ከመ ዘላዕላይ ወደኃራይ ከመ ዘቀዳማይ። እሙታን ተንሢኦ ሲኦለ ከይዶ በሞቱ ለሞት ደምሰሶ እምድኅረ ተንሥአ በሣልስት ዕለት አእኰቶ ለአብ እንዘ ይብል ዘአምላክ ቃል ጥዕጡዕ ከመዝ። አአኵተከ አብ አኮ በዝንቱ ከናፍር ውዱዳት ወአኮ በልሳነ ሥጋ ዘባቲ ጽድቅ ወሐሰት ይወጽእ ወኢበዝ ቃል ዘበኪነ ነፍሳት ግብር ይትገበር አላ በዝኩ ቃል። አአኵተከ ንጉሥ ዘብከ ይትዐወቅ ለኵሉ ወእንተ ኢትትዐወቅ ወእንተ ኢትወጽእ ውስተ መናፍስት ዘሥጋ። ዘበዕዝነ ሥጋ ኢተኀልፍ ወእንተ በዓለም ኢሀለወት ወበምድር ኢትትኀደግ አላ በዝኩ ቃል ዘበላዕሌነ መንፈስ ዘለከ ለባሕቲትከ ይትናገር አብ። ዘኪያከ ያፈቅር አብ ፤ ወዘኪያከ ይዌድስ ፤ ዘቦቱ ኵሉ ማኅበረ ቅዱሳን ኪያከ ይጼውዑ ዓርከ ኪያከ አበ ኪያከ መጋቤ ወኪያከ ረዳኤ። አምላክ ኵሉ እስመ ለከ ኵሉ ወኵሉ ብከ ዘሀሎ ለከ ወአልቦ ካልእ ዘኢኮነ ዘዚአከ ለባሕቲትከ ዘሀሎከ ለዓለም ዓለም። ያእምር እንከ ኖላዊ ወኵሉ ነፍሳተ ምሥጢር እምድኅረ ጸለየ ለአብ ከመ ታእምሩ ወትርአዩ አዐርግ ይቤ ኢየሱስ። ወበእንተዝ ይበል ኖላዌ መፍትው እንከ ነገረ ኅቡአት ከመ ታእምሩ መነሃ ትሳተፉ ለቅድሳት ወለመኑ ትገብሩ ተዝካሮ በአኰቴት። ወዓዲ ይንግር እንዘ ይብል ንሕነሂ አኀውየ ቦቱ ንፀወን ዘባሕቲቱ ሀብተ ተምሂረነ ኪያሁ ንንሣእ። ዘይቤ ከመ የሀበነ ዘዓይንኢርእየ ወዕዝን ኢሰምዐ ውስተ ልበ ሰብእ ዘኢተሐለየ ዘአስተዳለወ እግዚአብሔር ለእለ ያፈቅርዎ። በከመ ይቤ ሙሴ ባዕዳንሂ ነቢያት ንሕነሂ ቦቱ ተወኪለነ ሎቱ ነሀብ ስብሐተ ዘሎቱ ስብሐት ወጽንዕ ለዓለመ ዓለም።