ዘአሞጽ ነቢይ 1

መጽሐፍ ፡ ዘአሞጽ ፡ ነቢይ ። 1 ቃለ ፡ አሞጽ ፡ ዘኮነ ፡ በእቃሬም ፡ ዘቴቁሔ ፡ ዘርእየ ፡ በእንተ ፡ ኢየሩሳሌም ፡ በመዋዕለ ፡ ዖዝያን ፡ ንጉሠ ፡ ይሁዳ ፡ ወበመዋዕለ ፡ ኢያሮብንም ፡ ወልደ ፡ ዮአስ ፡ ንጉሠ ፡ እስራኤል ፡ እምቅድመ ፡ ክልኤ ፡ ዓመት ፡ ዘድልቅልቅ ። 2 ወይቤ ፡ እግዚአብሔር ፡ እምጽዮን ፡ ነበበ ፡ ወእምኢየሩሳሌም ፡ ወሀበ ፡ ቃሎ ። ላሐወ ፡ መራዕየ ፡ ኖሎት ፡ ወየብሰ ፡ ርእሱ ፡ ለቀርሜሎስ ። 3 ወይቤ ፡ እግዚአብሔር ፡ በእንተ ፡ ሠላስ ፡ ኀጢአቶሙ ፡ ለደማስቆ ፡ ወበእንተ ፡ አርባዕ ፡ ኢይመይጦሙ ፡ እስመ ፡ ወሰርዎን ፡ በሞሰርተ ፡ ኀጺን ፡ ለፅኑሳተ ፡ ገለአድ ። 4 ወእፌኑ ፡ እሳተ ፡ ላዕለ ፡ ቤተ ፡ አዛኄል ፡ ወትበልዕ ፡ መሰረታቲሁ ፡ ለወልደ ፡ አዴር ። 5 ወእቀጠቅጥ ፡ መናስግቲሃ ፡ ለደማስቆ ፡ ወእሴርዎሙ ፡ ለአለ ፡ ይነብሩ ፡ ውስተ ፡ አሕቃላት ፡ በኀበ ፡ እሜትሮሙ ፡ ለአሕዛብ ፡ ሰብአ ፡ ከራን ፡ ወፄወዉ ፡ ጸረ ፡ ሕዝቦሙ ፡ ይቤ ፡ እግዚአብሔር ። 6 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአተ ፡ ጋዛ ፡ ወበእንተ ፡ አርባዕ ፡ ኢይመይጦሙ ፡ እስመ ፡ ፄወዉ ፡ ፄዋሁ ፡ ለሰሎሞን ፡ ከመ ፡ ይዕጽውዎሙ ፡ ውስተ ፡ ኢዶምያ ። 7 ወእፌኑ ፡ እሳተ ፡ ውስተ ፡ አረፋተ ፡ ጋዛ ፡ ወትበልዕ ፡ መሰረታቲሃ ። 8 ወእሴርዎሙ ፡ ለእለ ፡ ይነብሩ ፡ አዘጦን ፡ ወይጠፍኡ ፡ አሕዛበ ፡ አስቀሎን ፡ ወኣመጽእ ፡ እዴየ ፡ ላዕለ ፡ አቃሮን ፡ ወይጠፍኡ ፡ ምስለ ፡ ሕዝበ ፡ ኢሎፍሊ ፡ እለ ፡ ተርፉ ፡ ይቤ ፡ እግዚአብሔር ። 9 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአተ ፡ ጢሮስ ፡ ወበእንተ ፡ አርባዕ ፡ ኢይመይጥ ፡ እስመ ፡ ዐጸዉ ፡ ፄዋሁ ፡ ለሰሎሞን ፡ ውስተ ፡ ኢዶምያ ፡ ወኢተዘከሩ ፡ ኪዳነ ፡ አኀዊሆሙ ። 10 ወእፌኑ ፡ እሳተ ፡ ላዕለ ፡ አረፋተ ፡ ጢሮስ ፡ ወትበልዕ ፡ መሰረታቲሃ ። 11 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአተ ፡ ኢዶምያ ፡ ወበእንተ ፡ አርባዕ ፡ ኢይመይጦሙ ፡ እስመ ፡ ዴገኖ ፡ ለእኁሁ ፡ በኲናት ፡ ወአርኰሰ ፡ ማሕፀነ ፡ ዲበ ፡ ምድር ፡ ወበርበረ ፡ ዘይዛለፎ ፡ ወያደነግፆ ፡ ወዐቀቦ ፡ መራደ ፡ በዘ ፡ ይመጽእ ። 12 ወእፌኑ ፡ እሳተ ፡ ላዕለ ፡ ቴማን ፡ ወትበልዕ ፡ መሰረታተ ፡ አረፋቲሃ ። 13 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአቶሙ ፡ ለደቂተ ፡ አሞን ፡ ወበእንተ ፡ አርባዕ ፡ ኢይመይጥ ፡ እስመ ፡ አንቅዕዎን ፡ ለፅኑሳተ ፡ ገለአድ ፡ ከመ ፡ ያርሕበር ፡ ደወሎሙ ። 14 ወአነድድ ፡ እሳተ ፡ ላዕለ ፡ አረፋተ ፡ ራባ ፡ ወትበልዕ ፡ መሰረታቲሃ ፡ በውውዓ ፡ አመ ፡ ዕለተ ፡ ቀትል ፡ ወታድለቀልቅ ፡ በዕለተ ፡ ማኅለቅታ ። 15 ወይፄውውዎሙ ፡ ለነገሥቶሙ ፡ ወለመኳንንቲሆሙ ፡ ወለካህናቲሆሙ ፡ ኅቡረ ፡ ይቤ ፡ እግዚአብሔር ።