ዘአሞጽ ነቢይ 2

1 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአተ ፡ ሞአብ ፡ ወበእንተ ፡ አርባዕ ፡ ኢይመይጥ ፡ እስመ ፡ አውዐዩ ፡ አዕፅምቲሁ ፡ ለንጉሠ ፡ ኢዶምያ ፡ ለግምስስ ። 2 ወእፌኑ ፡ እሳተ ፡ ላዕለ ፡ ሞአብ ፡ ወትበልዕ ፡ መሰረታቲሃ ፡ ለአህጉሪሃ ፡ ወትመውት ፡ ሞአብ ፡ በድከም ፡ በውውን ፡ ወበቃለ ፡ ቀርን ። 3 ወእሴርዎሙ ፡ ለመኳንንቲሃ ፡ ወለኵሎሙ ፡ መላእክቲሃ ፡ ምስሴሆሙ ፡ ይቤ ፡ እግዚአብሔር ። 4 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአቶሙ ፡ ለደቂቀ ፡ ይሁዳ ፡ ወበእንተ ፡ አርባዕ ፡ ኢይመይጦሙ ፡ እስመ ፡ ዐለዉ ፡ ሕገ ፡ እግዚአብሔር ፡ ወኢዐቀቡ ፡ ትእዛዞ ፡ ወአስሐቶሙ ፡ ከንቶሆሙ ፡ ዘገብሩ ፡ አበዊሆሙኒ ፡ ተለዉ ፡ ድኅሬሆሙ ። 5 ወእፌኑ ፡ እሳተ ፡ ላዕለ ፡ ይሁዳ ፡ ወትበልዕ ፡ መሰረታቲሃ ፡ ለኢየሩሳሌም ። 6 ከመዝ ፡ ይቤ ፡ እግዚአብሔር ፡ በእንተ ፡ ሠላስ ፡ ኀጢአቶሙ ፡ ለእስራኤል ፡ ወበእንተ ፡ አርባዕ ፡ ኢይመይጦሙ ፡ እስመ ፡ ኢያግብኡ ፡ ወርቆ ፡ በጽድቅ ፡ ኃምስ ፡ በእንተ ፡ አሳአኒሆሙ ። 7 በዘ ፡ ይከይዱ ፡ ምድረ ፡ ወይኰርዑ ፡ አርአስተ ፡ ነዳያን ፡ ወይመይጡ ፡ ፍትሐ ፡ ምስኪናን ፡ ወአብ ፡ ወወልዱ ፡ ይበውኡ ፡ ኀበ ፡ አሐቲ ፡ ብእሲት ፡ ከመ ፡ ያርኵሱ ፡ ስመ ፡ አምላኮሙ ። 8 ወየአስሩ ፡ አልባሲሆሙ ፡ ወይገብሩ ፡ መንጦላዕተ ፡ ውስተ ፡ ምሥዋዕ ፡ ወይሰትዩ ፡ ወይነ ፡ ትዕግልት ፡ በቤተ ፡ አምላኮሙ ። 9 ወአንሰ ፡ አጥሩአክዎሙ ፡ ለአሞሬዎን ፡ ዘኑኁ ፡ ከመ ፡ ኑኀ ፡ አርዝ ፡ ወጽንዑ ፡ ከመ ፡ አውልዕ ፡ ወአጥፋእኩ ፡ ፍሬሁ ፡ እምላዕሌሁ ፡ ወሥርዉሂ ፡ በታሕቴሁ ። 10 ወአነ ፡ ኣውፃእክዎሙ ፡ እምድረ ፡ ግብጽ ፡ ወወሰድክዎሙ ፡ ገዳመ ፡ አርብዓ ፡ ዓመተ ፡ ከመ ፡ አውርሶሙ ፡ ምድረ ፡ አሞሬዎን ። 11 ወነሣእኩ ፡ እምደቂቆሙ ፡ ለነቢያት ፡ ወእምወራዙቲሆሙ ፡ እለ ፡ ይትቄደሱ ። ኢኮነሁ ፡ ከመዝ ፡ ደቂቀ ፡ እስራኤል ፡ ይቤ ፡ እግዚአብሔር ። 12 ወታሰትይዎሙ ፡ ወይነ ፡ ለቅዱሳን ፡ ወትክልእዎሙ ፡ ለነዚያት ፡ ወትብልዎሙ ፡ ኢትትነበዬ ። 13 በእንተ ፡ ዝንቱ ፡ ናሁ ፡ አነ ፡ ኣንኰረኵረክሙ ፡ በታሕቴክሙ ፡ ከመ ፡ ዘያንኰረኵር ፡ ሰረገላ ፡ ዘምሉእ ፡ ሕለተ ። 14 ወኢይክል ፡ ረዋጺ ፡ አምስጦ ፡ ወኀያልኒ ፡ ኢይእኅዝ ፡ በጽንዑ ። ወመስተቃትልኒ ፡ ኢያድኅን ፡ ነፍሶ ። 15 ወነዳፊኒ ፡ ኢይቀውም ፡ ወረዋጺኒ ፡ ኢያመስጥ ፡ ወመስተጽዕንኒ ፡ ኢያወፅእ ፡ ነፍሶ ። 16 ወዘጽኑዕ ፡ ኢይረክብዎ ፡ ለልብ ፡ በኀይል ፡ ዘዕራቁ ፡ ይዴግን ፡ ውእተ ፡ አሚረ ፡ ይቤ ፡ እግዚአብሔር ።