ዘአሞጽ ነቢይ 3

1 ስምዑ ፡ ዘንተ ፡ ነገረ ፡ ዘይቤለክሙ ፡ እግዚአብሔር ፡ ቤተ ፡ እስራኤል ፡ ወኵሉ ፡ ሕዝብ ፡ ዘአውፃእክዎሙ ፡ እምድረ ፡ ግብጽ ፡ እንዘ ፡ ይብል ። 2 ዳእሙ ፡ ኪያክሙ ፡ አእመርኩ ፡ እምኵሉ ፡ አሕዛበ ፡ ምድር ፡ በእንተ ፡ ዝንቱ ፡ አትቤቀለክሙ ፡ በእንተ ፡ ኵሉ ፡ ኀጢአትክሙ ። 3 የሐውሩኑ ፡ ካልኤ ፡ ኅቡረ ፡ እንዘ ፡ ኢይትራአዬ ። 4 ይጥኅርኑ ፡ አንበሳ ፡ በውስተ ፡ ግቡ ፡ በከ ፡ ዘአልቦ ፡ ዘይበልዕ ። ይሁብኑ ፡ ቃሎ ፡ እጓለ ፡ አንበሳ ፡ በውስተ ፡ ግበዐ ፡ በከ ፡ ዘአልቦ ፡ ዘይመሥጥ ። 5 ወይወድቅኑ ፡ ዖፍ ፡ ውስተ ፡ መሥገርት ፡ ዘኢተሠግረ ። ትትጋባእኑ ፡ መሥገርት ፡ ዘእንበለ ፡ ትእኅዝ ። 6 ወይነፍሑኑ ፡ ቀርነ ፡ በሀገር ፡ ወኢይደነግፁ ፡ አሕዛብ ። ወኢይመጽእኑ ፡ እኩይ ፡ ውስተ ፡ ሀገር ፡ ዘእግዚአብሔር ፡ ኢገብረ ። 7 እስመ ፡ አልቦ ፡ ዘይገብር ፡ እግዚአብሔር ፡ ዘኢከሠተ ፡ ወዘኢነገረ ፡ ለአግብርቲሁ ፡ ለነቢያት ። 8 ወአንበሳ ፡ ይጥኅር ፡ ወመኑ ፡ ኢይፈርሀ ፡ ወእግዚአብሔር ፡ ይነብብ ፡ ወመኑ ፡ ኢይትኔበይ ። 9 ዜንውዎሙ ፡ ለበሓውርተ ፡ ፋርስ ፡ ወለበሓውርተ ፡ ግብጽ ፡ ወበልዎሙ ፡ ተጋብኡ ፡ ውስተ ፡ ሰማርያ ፡ ወርእዬ ፡ ብዙኀ ፡ መንክረ ፡ በማእከላ ፡ ወትዕግልተ ፡ ዘውስቴታ ። 10 ወኢያእመረት ፡ ዘሀለወ ፡ ቅድሜሃ ፡ ይቤ ፡ እግዚአብሔር ፡ አሉ ፡ ይዘግቡ ፡ ዐመፃ ፡ ወሕርትምና ፡ ውስተ ፡ በሓውርቲሆሙ ። 11 በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ እግዚእ ፡ ጢሮስ ፡ በዐውድኪ ፡ ይማስን ፡ ምድርኪ ፡ ወይስዕሮ ፡ ለኀይልኪ ፡ እምኔኪ ፡ ወይትበረበር ፡ በሓውርትኪ ። 12 በእንተ ፡ ዝንቱ ፡ ይቤ ፡ እግዚአብሔር ፡ በከመ ፡ ያነግፍ ፡ ኖሳዊ ፡ እምአፈ ፡ አንበሳ ፡ ክልኤ ፡ እግረ ፡ ወርእሰ ፡ ከማሁ ፡ ደቂቀ ፡ እስራኤል ፡ ይወፅኡ ፡ እለ ፡ ይነብሩ ፡ በሰማርያ ፡ መንገለ ፡ አሕዛበ ፡ ደማስቆ ። 13 ስምዑ ፡ ካህናት ፡ ወናሁ ፡ ኣሰምዕ ፡ ለቤተ ፡ ያዕቆብ ፡ ይቤ ፡ እግዚአብሔር ፡ እግዚእ ፡ ዘኵሎ ፡ ይመልክ ። 14 እስመ ፡ በይእቲ ፡ ዕለት ፡ አመ ፡ ተበቀልክዎ ፡ ኀጢአቶ ፡ ለእስራኤል ፡ ወተበቀልኩ ፡ ምሥዋዓቲሁ ፡ ለቤቴል ፡ ወይትከሠት ፡ አቅርንተ ፡ ምሥዋዕ ፡ ወይወድቅ ፡ ውስተ ፡ ምድር ። 15 ወእካዕዎሙ ፡ ወእቀትሎሙ ፡ ለቤተ ፡ ምክራም ፡ ወለቤተ ፡ ሐጋይ ፡ ወይትኀጐሉ ፡ አብያት ፡ ዘቀርነ ፡ ነጌ ፡ ወይትዌሰኩ ፡ አብያት ፡ ካልኣን ፡ ብዙኃን ፡ ይቤ ፡ እግዚአብሔር ።