ዘባሮክ 2

2 2 ወበጽሐነ ፡ ዘጽሑፍ ፡ ውስተ ፡ ኦሪተ ፡ ሙሴ ፡ 3ወበልዐ ፡ ሰብእ ፡ ሥጋ ፡ ደቂቁ ፡ ወአዋልዲሁ ፡ 4ወዘረወነ ፡ እግዚአብሔር ፡ ውስተ ፡ አሕዛብ ፡ ዘዐውድነ ። 8ወኢተጋነይነ ፡ ለእግዚአብሔር ፡ ወኢኀደግነ ፡ እከየ ፡ ልብነ ። 11ወይእዜኒ ፡ እግዚኦ ፡ አምላከ ፡ እስራኤል ፡ ዘአውፃእከ ፡ ሕዝበከ ፡ እምድረ ፡ ግብጽ ፡ በእድ ፡ ጽንዕት ፡ ወበትእምርት ፡ ወበመንክር ፡ ወበኀይል ፡ ዐቢይ ፡ ወበመዝራዕት ፡ ልዑል ፡ 12አቍርር ፡ መዐተከ ፡ እምኔነ ፡ እስመ ፡ ኅዳጥ ፡ ተረፍነ ፡ በውስተ ፡ አሕዛብ ፤ 14 ወስማዕ ፡ ጸሎተነ ፡ ወአድኅነነ ፡ 15እስመ ፡ አንተ ፡ እግዚአብሔር ፡ አምላክነ ። 16ነጽር ፡ እግዚኦ ፡ እምቤተ ፡ መቅደስከ ። 17አኮ ፡ እለ ፡ ውስተ ፡ ሲኦል ፡ ዘይሴብሑከ ፤ 18 ዳእሙ ፡ ነፍስ ፡ እንተ ፡ ድኅነት ፡ ወነፍስ ፡ እንተ ፡ ርኅበት ፡ እንተ ፡ ጸግበት ፡ ታአኵተከ ፡ እግዚአብሔር ። 21ከመዝ ፡ ይቤ ፡ እግዚአብሔር ፡ አፅምኡ ፡ እዘኒክሙ ፡ ወተቀነዩ ፡ ለንጉሠ ፡ ባቢሎን ፡ ወትነብሩ ፡ ውስተ ፡ ምድር ፡ እንተ ፡ ወሀብክዎሙ ፡ ለአበዊክሙ ። 22ወእመ ፡ ኢሰማዕክሙ ፡ ቃለ ፡ እግዚአብሔር ፡ ወኢተቀነይክሙ ፡ ለንጉሠ ፡ ባቢሎን ፡ 23የኀልቅ ፡ [እምነ ፡] አህጉረ ፡ ይሁዳ ፡ ወአፍኦሃኒ ፡ ለኢየሩሳሌም ፡ ቃለ ፡ ፍሥሓ ፡ ወሐሤት ፤ ቃለ ፡ መርዓዊ ፡ ወመርዓት ፡ ወኵሉ ፡ ምድር ፡ ይከውን ፡ በድወ ። 24ወኢሰማዕነ ፡ ቃለከ ፡ ወኢተቀነይነ ፡ ለንጉሠ ፡ ባቢሎን ፡ ወበጽሐነ ፡ ዘነበብከ ፡ በእደ ፡ አግብርቲከ ፡ ነቢያት ፡ ከመ ፡ ያወፅኡ ፡ አዕፅምተ ፡ ነገሥት[ነ] ፡ ወአዕፅምተ ፡ አበዊነ ፡ እምነ ፡ መካኖሙ ። 25ወናሁ ፡ ገደፍዎሙ ፡ ውስተ ፡ ዋዕየ ፡ መዓልት ፡ ወቍረ ፡ ሌሊት ፡ ወተፄወውነ ፡ ወሞትነ ፡ እኩየ ፡ ሞተ ፡ በረኃብ ፡ ወበኲናት ። 30ወአእመርክዎሙ ፡ ከመ ፡ ኢይሰምዑኒ ፡ እስመ ፡ ሕዝብ ፡ ጽኑዓነ ፡ ክሳድ ፡ እሙንቱ ። 31ወያአምሩ ፡ ከመ ፡ [አነ ፡] እግዚአብሔር ፡ አምላኮሙ ፡ ወእሁቦሙ ፡ ልበ ፡ ወእዝነ ፡ ለሰሚዕ ፡ 32ወይሴብሑኒ ፡ በብሔር ፡ በኀበ ፡ አፍለስክዎሙ ፡ ወይዜከሩ ፡ ስምየ ፡ 33ወየኀድጉ ፡ እከየ ፡ ምግባሮሙ ፡ ወይዜከሩ ፡ ፍኖተ ፡ አበዊሆሙ ፡ እለ ፡ አበሱ ፡ ቅድመ ፡ እግዚአብሔር ። 34ወኣገብኦሙ ፡ ብሔረ ፡ ኀበ ፡ መሐልኩ ፡ ለአበዊሆሙ ፡ ለአብርሃም ፡ ወለይስሐቅ ፡ ወለያዕቆብ ፡ ወይኴንንዋ ፡ ወኣበዝኆሙ ፡ ወኢይውኅዱ ። 35ወእሠርዕ ፡ ሎሙ ፡ ሥርዐተ ፡ ዘለዓለም ፡ ከመ ፡ እኩኖሙ ፡ አምላኮሙ ፡ ወእሙንቱኒ ፡ ይኩኑኒ ፡ ሕዝብየ ፡ ወኢያወፅኦሙ ፡ እንከ ፡ ለሕዝብየ ፡ እስራኤል ፡ እምብሔሮሙ ፡ ዘወሀብክዎሙ ።