ዘባሮክ 3

3 1 እግዚኦ ፡ ዘትነግሥ ፡ ለኵሉ ፡ አምላከ ፡ እስራኤል ፡ ነፍስ ፡ ሕዝንት ፡ ወመንፈስ ፡ ትክዝት ፡ ጸርኀት ፡ ኀቤከ ። 2ስማዕ ፡ እግዚኦ ፡ ወተሣሀል ፡ እስመ ፡ አበስነ ፡ ቅድሜከ ፡ 3እስመ ፡ አንተ ፡ ዘትነብር ፡ ለዓለም ፡ ወንሕነሰ ፡ ንትሀጐል ፡ ለዝላፋ ። 4እግዚኦ ፡ ዘትነግሥ ፡ ለኵሉ ፡ አምላከ ፡ እስራኤል ፡ ስማዕ ፡ ጸሎተ ፡ ምውታን ፡ እስራኤል ፡ ወደቂቀ ፡ እለ ፡ ጌገዩ ፡ በቅድሜከ ፡ ወኢሰምዑ ፡ ቃለከ ፡ ወተለወነ ፡ እኩይ ፡ 5ወኢ[ት]ዘከር[ኒ] ፡ ኀጢአተ ፡ አበዊነ ፤ ተዘከር ፡ እዴከ ፡ ወስመከ ፡ በዝ ፡ መዋዕል ፡ 6እስመ ፡ አንተ ፡ እግዚአብሔር ፡ አምላክነ ፡ ወንሴብሐከ ፡ እግዚኦ ። 7እስመ ፡ በእንተ ፡ ዝንቱ ፡ ወደይከ ፡ ፍርሃተከ ፡ ውስተ ፡ ልብነ ፡ ከመ ፡ ንጸውዕ ፡ ስመከ ፡ ወንሰብሕከ ፡ በኀበ ፡ አፍለሱነ ። 9ስማዕ ፡ እስራኤል ፡ ትእዛዘ ፡ ሕይወት ፡ ወአፅምእ ፡ ምክረ ፡ ጥበብ ። 10ምንት ፡ ውእቱ ፡ እስራኤል ፡ ወለምንት ፡ ውስተ ፡ ብሔረ ፡ ፀር ፡ ሀሎ ፡ ወበልየ ፡ በብሔረ ፡ ነኪር ፡ ወረኵሰ ፡ ምስለ ፡ አብድንት ፡ 11ወተኈለቈ ፡ ምስለ ፡ እለ ፡ ውስተ ፡ ሲኦል ፡ 12ወኀደገ ፡ ነቅዐ ፡ ሕይወት ። 13ሶበሁ ፡ ሖርከ ፡ ፍኖተ ፡ እግዚአብሔር ፡ እምነበርከ ፡ ለዓለም ፡ በሰላም ። 14ተመሀር ፡ አይቴ ፡ ውእቱ ፡ ጥበብ ፡ ወአይቴ ፡ ውእቱ ፡ ኀይል ፡ ወአይቴ ፡ ውእቱ ፡ ምክር ፡ ወአእምሮ ፡ ወአይቴ ፡ ውእቱ ፡ ሐይው ፡ ለነዋኅ ፡ መዋዕል ፡ ወአይቴ ፡ ውእቱ ፡ ብርሃነ ፡ አዕይንት ፡ ወሰላም ። 15መኑ ፡ ረከበ ፡ ብሔራ ፡ ወመኑ ፡ ቦአ ፡ ውስተ ፡ መዛግብቲሃ ። 16አይቴ ፡ እሙንቱ ፡ መላእክተ ፡ አሕዛብ ፡ እለ ፡ ቀነይዎሙ ፡ ለአራዊተ ፡ ገዳም ፡ 17ወተዋነይዎሙ ፡ ለአዕዋፈ ፡ ሰማይ ። 19ኀልቁ ፡ ወወረዱ ፡ ሲኦል ፡ ወተንሥኡ ፡ ህየንቴሆሙ ፡ ካልኣን ። 20ወርእዩ ፡ ብርሃነ ፡ ንኡሳን ፡ ወነበሩ ፡ ውስተ ፡ ምድሮሙ ፡ ወፍኖተ ፡ ጥበብሰ ፡ ኢያእመሩ ፡ 21ወአሠራሂ ፡ ኢረከቡ ፡ ወኢተወክፍዋ ፡ ደቂቆሙ ፡ ወርሕቁ ፡ እምነ ፡ ፍኖቶሙ ። 22ወኢሰምዑ ፡ ከናአን ፡ ወኢርእዩ ፡ ቴሞና ፡ 23ወደቂቀ ፡ አጋር ፡ እለ ፡ ኀሠሥዋ ፡ ለጥበብ ፡ ዲበ ፡ ምድር ። 24እስራኤል ፡ እፎ ፡ ዐቢይ ፡ ቤተ ፡ እግዚአብሔር ፡ ወነዋኅ ፡ ብሔሩ ፡ 25አልቦ ፡ ማኅለቅተ ፡ ወላዕሉሂ ፡ አልቦ ፡ መስፈርተ ። 29መኑ ፡ ዘዐረገ ፡ ሰማየ ፡ ወነሥኣ ፡ ወአውረዳ ፡ እምነ ፡ ደመናት ። 30መኑ ፡ ዐደወ ፡ ባሕረ ፡ ወረከባ ፡ ወአምጽኣ ፡ በወርቅ ፡ ቀይሕ ። 31አልቦ ፡ ዘያአምር ፡ ፍኖታ ፡ ወዘይኄልዮ ፡ ለአሠራ ። 32ዘኵሎ ፡ ያአምር ፡ ያአምራ ፡ ወረከባ ፡ በጥበቡ ፡ ዘፈጠራ ፡ ለምድር ፡ ወለዓለም ። 33ወይፌኑ ፡ ብርሃኖ ፡ ወየሐውሩ ፡ 34ወከዋክብትኒ ፡ ያበርሁ ፡ በጊዜሆሙ ፡ ወይትፌሥሑ ፡ ወይጼውዖሙ ፡ ወይብሉ ፡ መጻእነ ። 35ውእቱ ፡ አምላክነ ፡ እስመ ፡ አልቦ ፡ ባዕድ ፡ ዘይመስል ፡ ኪያሁ ። 36ውእቱ ፡ ረከባ ፡ ለኵሉ ፡ ፍኖተ ፡ ጥበብ ፡ ወወሀቦ ፡ ለያዕቆብ ፡ ቍልዔሁ ፡ ወለእስራኤል ፡ ፍቁሩ ። 37ወእምዝ ፡ አስተርአየ ፡ ውስተ ፡ ምድር ፡ ወኮነ ፡ ከመ ፡ ሰብእ ።