ዘባሮክ 4

4 1 ዝውእቱ ፡ መጽሐፈ ፡ ትእዛዙ ፡ ለእግዚአብሔር ፡ ወየሐይዉ ፡ ዘለዓለም ፡ ኵሎሙ ፡ እለ ፡ የዐቅብዋ ፡ የሐይዉ ፡ ወእለሰ ፡ የኀድግዋ ፡ ይመውቱ ። 2ተመየጥ ፡ ያዕቆብ ፡ አኀዝ ፡ ወሑር ፡ በብርሃና ፡ 3ወኢተሀብ ፡ ለባዕድ ፡ ክብረከ ፤ ዘይኄይሰከ ፡ ለካልእ ፡ ሕዝብ ። 4ብፁዓን ፡ ንሕነ ፡ እስራኤል ፡ እስመ ፡ ተዐውቀ ፡ ሥምረቱ ፡ ለአምላክነ ፡ ላዕሌነ ። 5ተአመኑ ፡ ሕዝብየ ፡ ወተዘከሩ ፡ እስራኤልኒ ። 6ተሣየጥኩክሙ ፡ ለሕዝብ ፡ አኮ ፡ ለሀጕል ፡ ዳእሙ ፡ እስመ ፡ አምዓዕክምዎ ፡ ለእግዚአብሔር ፡ ገባእክሙ ፡ ለፀርክሙ ። 7ወወሐክምዎ ፡ ለፈጣሪክሙ ፡ ወሦዕክሙ ፡ ለአጋንንት ፡ ወአኮ ፡ ለእግዚአብሔር ፡ 8ወረሳዕክምዎ ፡ ለአምላክክሙ ፡ ዘሐፀነክሙ ፡ ለዓለም ፡ ወአተከዝክምዋ ፡ ለሐፂኒትክሙ ፡ ኢየሩሳሌም ፡ 9ሶበ ፡ ርእየት ፡ መቅሠፍተ ፡ እግዚአብሔር ፡ ዘመጽአክሙ ፤ ስምዑ ፡ ፈላስያነ ፡ ጽዮን ፡ አምጽአ ፡ ሊተ ፡ እግዚአብሔር ፡ ላሐ ፡ ዐቢየ ፡ 10ሶበ ፡ ርኢኩ ፡ ተፄውዎ ፡ አዋልድየ ፡ ወደቂቅየ ። 30ተአመኒ ፡ ኢየሩሳሌም ፡ ያስተፌሥሐኪ ፡ ዘሰመየኪ ። 31ወየኀስሩ ፡ እለ ፡ ሣቀዩኪ ፡ ወእለ ፡ ተፈሥሑ ፡ በድቀትኪ ። 32የኀስራ ፡ አህጉር ፡ እለ ፡ ቀነያ ፡ ደቂቀኪ ፡ ወእለ ፡ ተመጠዉ ፡ ውሉደኪ ። 36ነጽሪ ፡ ኢየሩሳሌም ፡ መንገለ ፡ ጽባሕ ፡ ወርእዪ ፡ ፍሥሓ ፡ ዘመጽአ ፡ ለኪ ፡ እምኀበ ፡ አምላክኪ ። 37ናሁ ፡ መጽኡ ፡ ደቂቅኪ ፡ ወተጋብኡ ፡ እለ ፡ ፈነውኪ ፡ እምጽባሕ ፡ እስከ ፡ ዐረብ ፡ በቃሉ ፡ ለቅዱስ ፡ ወይትፌሥሑ ፡ በስብሐተ ፡ እግዚአብሔር ።