መሓልየ መሓልይ 4

1 ነያ ፡ ሠናይት ፡ እንተ ፡ ኀቤየ ፡ ነያ ፡ ሠናይት ፤ አዕይንትኪ ፡ ዘርግብ ፡ እንበለ ፡ አርምሞትኪ ፤ ሥዕርትኪ ፡ ከመ ፡ መርዔተ ፡ አጣሊ ፡ እለ ፡ ተከሥታ ፡ እምአድባረ ፡ ገላዐድ ። 2 ስነንኪ ፡ ከመ ፡ መራዕይ ፡ እለ ፡ ተቀርፃ ፤ እለ ፡ ወፅኣ ፡ እምኅፃብ ፤ ኵሎን ፡ እለ ፡ ይመነትዋ ፡ ወአልቦ ፡ እምኔሆን ፡ መካን ። 3 ከመ ፡ ፍሕሶ ፡ ቀይሕ ፡ ከናፍርኪ ፡ ወንባብኪ ፡ አዳም ፤ ከመ ፡ ቅርፍተ ፡ ሮማን ፡ መላትሕኪ ፡ እንበለ ፡ አርምሞትኪ ። 4 ከመ ፡ ማኅፈደ ፡ ዳዊት ፡ ክሳድኪ ፡ እለ ፡ ተሐንጻ ፡ ውስተ ፡ ተልፍዮስ ፤ ዐሠርቱ ፡ ምእት ፡ ንዋየ ፡ ሐቅል ፡ ስቁል ፡ ውስቴቱ ፡ ኵሎን ፡ መዋጽፍተ ፡ ኀየልት ። 5 ክልኤ ፡አጥባትኪ ፡ ከመ ፡ ክልኤ ፡ እጒለ ፡ መንታ ፡ ዘወይጠል ፡ ዘይትረዐይ ፡ ውስተ ፡ ጽጌያት ። 6 እስከ ፡ ሶበ ፡ ያስተናፍስ ፡ ዕለት ፡ ወይትሐወስ ፡ ጽላሎት ፤ አሐውር ፡ ለልየ ፡ ኀበ ፡ ደብረ ፡ ከርቤ ፤ ውስተ ፡ አውግረ ፡ ስኂን ። 7 ኵለንታኪ ፡ ሠናይት ፡ እንተ ፡ ኀቤየ ፤ አልብኪ ፡ ነውረ ፡ ምንተሂ ፡ ላዕሌኪ ። 8 ንዒ ፡ እምሊባኖስ ፡ መርዓት ፤ ንዒ ፡ እምሊባኖስ ፤ ንዒ ፡ ወትወፅኢ ፡ እምቅድመ ፡ ሃይማኖት ፤ እምርእሰ ፡ ሳኔር ፡ ወኤርሞን ፤ እምግበበ ፡ ዐናብስት ፡ ወእምአድባረ ፡ አናምርት ። 9 አራኅራኅክኒ ፡ እኅትየ ፡ መርዓት ፤ አራኅራኅክኒ ፡ በምዕር ፡ በአዕይንትኪ ፤ በአሐቲ ፡ ንብረተ ፡ ክሳድኪ ። 10 ሚአዳም ፡ አጥባትኪ ፡ እኅትየ ፡ መርዓት ፤ ጥቀ ፡ አዳም ፡ አጥባትኪ ፡ እምወይን ፤ ወመዐዛ ፡ ዕፍረትኪ ፡ እምኵሉ ፡ አፈው ። 11 ጸቃውዕ ፡ ይውሕዝ ፡ እምከናፍርኪ ፤ ሐሊብ ፡ ወመዓር ፡ እምታሕተ ፡ ልሳንኪ ፤ ወጼና ፡ አልባስኪ ፡ ከመ ፡ ጼና ፡ ስኂን ። 12 ገነት ፡ ዕጽው ፡ እኅትየ ፡ መርዓት ፤ ገነት ፡ ዕጽው ፤ ዐዘቅት ፡ ኅትምት ፡ ፍናወ ፡ ዚአኪ ። 13 ገነት ፡ ምስለ ፡ ፍሬ ፡ አቅማሕ ፤ ቆዕ ፡ ምስለ ፡ ናርዶስ ። 14 ናርዶስ ፡ ወመጽርይ ፡ ቀጺሞት ፡ ወቀናንሞስ ፡ ምስለ ፡ ኵሉ ፡ ዕፀወ ፡ ሊባኖስ ፤ ከርቤ ፡ ወዓልወ ፡ ምስለ ፡ ኵሉ ፡ መቅድመ ፡ ዕፍረታት ። 15 ነቅዐ ፡ ገነት ፤ ዐዘቅተ ፡ ማየ ፡ ሕይወት ፡ ዘይውሕዝ ፡ እምሊባኖስ ። 16 ተንሥእ ፡ ሰሜን ፡ ወነዓ ፡ ደቡብ ፡ ንፋሕ ፡ ገነትየ ፡ ወየሐዝ ፡ አፈዋተ ፡ ዚአየ ፤ ለይረድ ፡ ወልድ ፡ እኁየ ፡ ውስተ ፡ ገነቱ ፡ ወይብላዕ ፡ እምፍሬ ፡ አቅማሒሁ ።