ዘዮናስ ነቢይ 3

1 ወኮነ ፡ ቃለ ፡ እግዚአብሔር ፡ ዳግመ ፡ ኀበ ፡ ዮናስ ፡ ወይቤሎ ። 2 ተንሥእ ፡ ወሖር ፡ ነኔዌ ፡ ሀገረ ፡ ዐባየ ፡ ወስብክ ፡ ሎሙ ፡ በከመ ፡ ዘቀዲሙ ፡ ስብከት ፡ ዘእቤለከ ፡ አነ ። 3 ወተንሥአ ፡ ዮናስ ፡ ወሖረ ፡ ነኔዌ ፡ በከመ ፡ ይቤሎ ፡ እግዚአብሔር ፤ ወነኔዌሰ ፡ ዐባይ ፡ ሀገር ፡ ውእቱ ፡ ለእግዚአብሔር ፡ መጠነ ፡ ምሕዋረ ፡ ሠሉስ ። 4 ወአልጺቆ ፡ ይባእ ፡ ሀገረ ፡ ሰበከ ፡ ምሕዋረ ፡ ዕለት ፡ ወይቤ ፤ እስከ ፡ ሠሉስ ፡ መዋዕል ፡ ትትገፈታእ ፡ ነኔዌ ። 5 ወተአምኑ ፡ ሰብአ ፡ ነኔዌ ፡ በቃለ ፡ እግዚአብሔር ፡ ወሰበኩ ፡ ጾመ ፡ ወለብሱ ፡ ሠቀ ፡ ንኡሶሙ ፡ ወዐቢዮሙ ። 6 ወሰምዐ ፡ ንጉሠ ፡ ነኔዌ ፡ ወተንሥአ ፡ እምነ ፡ መንበሩ ፡ ወለብሰ ፡ ሠቀ ፡ ወአእተተ ፡ አልባሲሁ ፡ ወነበረ ፡ ውስተ ፡ ሐመድ ። 7 ወሰበከ ፡ ንጉሥ ፡ ለነኔዌ ፡ ወለዐበይቱ ፡ ወይቤ ፤ ሰብእ ፡ ወእንስሳ ፡ ወላህም ፡ ወአባግዕ ፡ ኢይብልዑ ፡ ወኢምንተኒ ፡ ኢይትረዐዩ ፡ ወኢይስተዩ ፡ ማየ ። 8 ወለብሱ ፡ ሠቀ ፡ ሰብእ ፡ ወእንስሳ ፡ ወአውየዉ ፡ ኀበ ፡ እግዚአብሔር ፡ ኅቡረ ፡ ወኀደጉ ፡ ኵሎ ፡ እከየ ፡ ምግባሮሙ ፡ ወዐመፃ ፡ ዘውስተ ፡ እደዊሆሙ ፡ ወይቤሉ ። 9 መኑ ፡ ያአምር ፡ እመ ፡ ይኔስሕ ፡ እግዚአብሔር ፡ ወይመይጥ ፡ መቅሠፍተ ፡ መዐቱ ፡ ወኢንመውት ፡ እንከ ። 10 ወርእየ ፡ እግዚአብሔር ፡ ምግበሮሙ ፡ ከመ ፡ ነስሑ ፡ እምፍኖቶሙ ፡ እኩይ ፤ ወእግዚአብሔርኒ ፡ ነስሐ ፡ እምነ ፡ ዘነበበ ፡ እኩየ ፡ ከመ ፡ ይግበር ፡ ላዕሌሆሙ ፡ ወኢገብረ ፡ እኩየ ።