ዘምልክያስ ነቢይ 2

1 ወይእዜኒ ፡ ዛቲ ፡ ትእዛዝ ፡ ለክሙ ፡ ለካህናት ። 2 ለእመ ፡ ኢሰማዕክሙ ፡ ወኢቦአክሙ ፡ ውስተ ፡ ልብክሙ ፡ ከመ ፡ ተሀቡ ፡ አኰቴተ ፡ ለስምየ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወእፌኑ ፡ ላዕሌክሙ ፡ መርገመ ፡ ወእረግማ ፡ ለበረከትክሙ ፡ ወእመይጣ ፡ ለበረከትክሙ ፡ ወኢትሄሉ ፡ እንከ ፡ ውስቴትክሙ ፡ እስመ ፡ ኢትሔልይዎ ፡ በልብክሙ ። 3 ናሁ ፡ አነ ፡ እመይጠክሙ ፡ ዘባነክሙ ፡ ወእዘሩ ፡ ኀፍረተ ፡ ውስተ ፡ ገጽክሙ ፡ ወኣኀስር ፡ በዓላቲክሙ ፡ ወእነሥአክሙ ፡ ኅቡረ ። 4 ወታአምሩ ፡ ከመ ፡ አነ ፡ ፈነውኩ ፡ ለክሙ ፡ ዘንተ ፡ ትእዘዘ ፡ ከመ ፡ የሀሉ ፡ ሥርዐትየ ፡ ኀበ ፡ ሌዋዊያን ፤ ይቤ ፡ እግዚአብሔር ፡ ዘኵሎ ፡ ይመልክ ። 5 ወይሄሉ ፡ ምስሌሁ ፡ ሥርዐትየ ፡ ዘሕይወት ፡ ወሰላም ፡ ወወሀብክዎ ፡ ፍርሀተ ፡ ይፍርሀኒ ፡ ወቅድመ ፡ ገጹ ፡ ለስምየ ፤ ወየሐውር ። 6 ሕገ ፡ ጽድቅየ ፡ ውስተ ፡ አፉሁ ፡ ወኢይትረከብ ፡ እንክ ፡ ዐመፃ ፡ ውስተ ፡ ከናፍሪሁ ፡ ዘእንበለ ፡ ርትዕ ፡ ወሰላም ፤ ወሖረ ፡ ምስሌየ ፡ ወለብዙኃን ፡ ሜጦሙ ፡ እምጌጋዮሙ ። 7 እስመ ፡ ከናፍሪሁ ፡ ለካህን ፡ የዐቅብ ፡ ምክረ ፡ ወየኀሥሥ ፡ ሕገ ፡ ውስተ ፡ ልቡ ፤ እስመ ፡ መልአከ ፡ እግዚአብሔር ፡ ዘኵሎ ፡ ይመልክ ፡ ውእቱ ። 8 ወአንትሙሰ ፡ ተገሐሥክሙ ፡ እምፍኖቱ ፡ ወአስራሕክምዎሙ ፡ ለብዙኃን ፡ በሕግ ፡ ወዐለውክሙ ፡ ሥርዐተ ፡ ሌዊ ፤ ይቤ ፡ እግዚአብሔር ፡ ዘኵሎ ፡ ይመልክ ። 9 ወአነሂ ፡ ረሰይኩክሙ ፡ ኅሱራነ ፡ ወዝርዋነ ፡ ውስተ ፡ ኵሉ ፡ አሕዛብ ፡ እስመ ፡ ኢዐቀብክሙ ፡ ፍናዊየ ፡ ወአድሎክሙ ፡ ለገጽ ፡ እምሕግ ። 10 አኮኑ ፡ አሐዱ ፡ እግዚአብሔር ፡ ፌጣሪክሙ ፡ ወአሐዱ ፡ አቡክሙ ፡ ለኵልክሙ ፤ እስመ ፡ ኵልክሙ ፡ ኀደግሙ ፡ ቢጸክሙ ፡ ወአርኰስክሙ ፡ ሕገ ፡ አበዊክሙ ። 11 ወተኀድገ ፡ ይሁዳ ፡ ወረኵሰ ፡ እስራኤል ፡ በእየሩሳሌም ፡ እስመ ፡ ገመነ ፡ ይሁዳ ፡ መቅደስየ ፡ በዘ ፡ አፍቀረ ፡ ወአጣዐወ ፡ ወአምለከ ፡ አማልክተ ፡ ነኪር ። 12 ለይሠርዎ ፡ እግዚአብሔር ፡ ለኵሉ ፡ ሰብእ ፡ ዘይገብሮ ፡ ለዝንቱ ፡ ግብር ፡ ወያኀስር ፡ እምአብያተ ፡ ያዕቆብ ፡ ወእምእለ ፡ ያመጽኡ ፡ መሥዋዕተ ፡ ለእግዚአብሔር ፡ ዘኵሎ ፡ ይመልክ ። 13 ወዘንተ ፡ ዘእጸልእ ፡ ትገብሩ ፡ ወደፈንክምዎ ፡ በአንብዕ ፡ ለምሥዋዐ ፡ እግዚአብሔር ፡ ወብካይ ፡ ወገዓር ፡ ወላሕ ፤ ዓዲ ፡ ይደልወክሙ ፡ እነጽር ፡ እንከሰ ፡ መሥዋዕተ ፡ ወእትሜጠው ፡ ኄረ ፡ እምእዴክሙ ። 14 ወትብሉ ፤ በእንተ ፡ ምንት ፤ እስመ ፡ እግዚአብሔር ፡ አስምዐ ፥ ማእከሌከ ፡ ወማእከለ ፡ ብእሲትከ ፡ እንተ ፡ ንእስከ ፡ እንተ ፡ ኀደጋ ፤ ወይእቲ ፡ ሱታፌከ ፡ ወብእሲትከ ፡ እንተ ፡ በሕግ ፡ አውሰብከ ፡ ይእቲ ። 15 ወአኮ ፡ ባዕድ ፡ ዘይገብሮ ፡ ለዝንቱ ፡ ወተረፈ ፡ መንፈስ ፤ ወትቤሉ ፡ ምንተ ፡ ይፈቅድ ፡ እግዚአብሔር ፡ ዘእንበለ ፡ ዘርአ ፤ ወተዐቀቡ ፡ በመንፈስክሙ ፡ ወኢትኅድግ ፡ ብእሲተከ ፡ እንተ ፡ አመ ፡ ንእስከ ። 16 ወእመሰ ፡ ጸላአከሃ ፡ ፈንዋ ፤ ይቤ ፡ እግዚአብሔር ፡ ዘኵሎ ፡ ይመልክ ፡ አምላከ ፡ እስራኤል ፡ እግዚእ ፤ ወይከድን ፡ ጽልሑተ ፡ ውስተ ፡ አልባሲሁ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወተዐቀቡ ፡ በመንፈስክሙ ፡ ወአበይክሙ ፡ ኀዲገ ። 17 እለ ፡ ታምዕዕዎ ፡ ለእግዚአብሔር ፡ በነገርክሙ ፡ ወትብሉ ፤ በእንተ ፡ ምንት ፡ አምዓዕናሁ ፤ እስመ ፡ ትብሉ ፤ ኵሉ ፡ ዘይገብር ፡ እኩየ ፡ ይኤድሞ ፡ ለእግዚአብሔር ፡ ወኪያሆሙ ፡ ይሠምር ፤ ወአይቴኑ ፡ እንክ ፡ አምላከ ፡ ጽድቅ ።