ዘምልክያስ ነቢይ 3

1ናሁ ፡ አነ ፡
እፌኑ ፡ መልአክየ ፡ ወይሬኢ
፡ ፍኖተ ፡ ቅደመ ፡ ገጽከ
፤ ወይመጽእ ፡ ግብተ ፡
ውስተ ፡ ጽርሑ ፡ እግዚአብሔር
፡ ዘአንትሙ ፡ ተኀሥሡ
፡ ወመልአክ ፡ ሥርዐትየ
፡ ዘአንትሙ ፡ ትፈቅዱ
፤ ናሁ
፡ ይመጽእ ፤ ይቤ ፡ እግዚአብሔር
፡ ዘኵሎ ፡ ይመልክ ።

2ወመኑ ፡ ይትዔገሣ
፡ ለመዐተ ፡ ምጽአቱ ፤
ወመኑ ፡ ይትቃወማ ፡ ለእሳተ
፡ ርአየቱ ፤ እስመ ፡ ለሊሁ
፡ የሐውር ፡ ከመ ፡ እሳተ
፡ ምንሀብ ፡ ወከመ ፡ እለ ፡ የኀፅቡ
።

3ወይነብር ፡ ወይሰብክ
፡ ወያጸሪ ፡ ከመ ፡ ብሩር ፡ ወከመ
፡ ወርቅ ፡ ወይነጥፎሙ
፡ ለደቂቀ ፡ ሌዊ ፡ ወይሰጠዎሙ
፡ ከመ ፡ ወርቅ ፡ ወከመ
፡ ብሩር ፡ ወይከውንዎ
፡ ለእግዚአብሔር ፡ እለ
፡ ያበውኡ ፡ መሥዋዕተ
፡ በጽድቅ ።

4ወታሠምሮ ፡ ለእግዚአብሔር
፡ መሥዋዕተ ፡ ይሁዳ ፡
ወኤሩሳሌም ፡ በአምጣነ
፡ መዋዕለ ፡ ዓለም ፡ ወበከመ
፡ ዓመተ ፡ ቀዲሙ ።

5ወእመጽኦሙ ፡ ኀቤክሙ
፡ በፍሥሓ ፡ ወእከውኖሙ
፡ ለሰብአ ፡ ሥራይ ፡ ወለዘማዊያን
፡ ሰማዕቱ ፡ ሐሰት ፡ ወለእለ
፡ ይምሕሉ ፡ በስምየ ፡
በሐሰት ፡ ወለእለ ፡ የሀይድዎሙ
፡ ዐስበሙ ፡ ለዐሳብ ፡
ወለእለ ፡ ይኴርዕዎሙ
፡ ለእቤራት ፡ ወለእጓለ
፡ ማውታ ፡ ወለእለ ፡ ይመይጡ
፡ ፍትሐ ፡ ፈላሲ ፡ ወለእለ
፡ ኢይፈርሁ ፡ ስምየ ፤
ይቤ ፡ እግዚአብሔር ፡
ዘኵሎ ፡ ይመልክ ።

6በከመ ፡ አነ ፡
እግዚአብሔር ፡ አምላክክሙ
፡ ኢይትዌለጥ ።

7ከማሁ ፡ አንትሙሂ
፡ ደቀቀ ፡ ያዕቆብ ፡ ኢተኀድጉ
፡ ዐመፃ ፡ ዘአበዊክሙ
፡ እለ ፡ ዐለዉ ፡ ሕግየ
፡ ወኢዐቀብዎ ፤ ተመየጡ
፡ ኀቤየ ፡ ወእትመየጥ
፡ ኀቤክሙ ፤ ይቤ ፡ እግዚ
አብሔር ፡ ዘኵሎ ፡ ይመልክ
፤ ወአንትሙሰ ፡ ትብሉ
፤ በምንትኑ ፡ ንትመየጥ
።

8ወያዐቅጽኑ ፡ ሰብእ
፡ ለእግዚአብሔር ፤ ናሁኬ
፡ አንትሙ ፡ አዕቀጸክሙኒ
፤ ወናሁ ፡ ትብሉ ፤ በምንትኑ
፡ አዕቀጽናከ ፤ ዓሥራቲክሙኒ
፡ ወቀዳሚያቲክሙኒ ፡
ኀቤክሙ ፡ ውእቱ ።

9ወተዐውሮ ፡ ተዐወርክሙ
፡ ወአንትሙ ፡ አዕቀጽክሙኒ
፡ ኪያየ ፤ ወዓመቲሁኒ
፡ ኀልቀ ።

10ወአባእክሙ ፡ ኵሎ
፡ ማአረረክሙ ፡ ውስተ
፡ መዛግብት ፡ ወይከውን
፡ በርበረ ፡ ውስተ ፡ ቤቱ
፤ ሐልይዎኬ ፡ ለዝንቱ
፤ ይቤ ፡ እግዚአብሔር
፡ ዘኵሎ ፡ ይመልክ ፤ ለእመ
፡ ኢያርኀውኩ ፡ ለክሙ
፡ አስራበ ፡ ሰማይ ፡ ወእሱጥ
፡ ለክሙ ፡ በረከትየ ፡
እስከ ፡ የአክለክሙ ።

11ወእሁበክሙ ፡ ለሲሳይክሙ
፡ ወኢያማስን ፡ ለክሙ
፡ ፍሬ ፡ ምድርክሙ ፡ ወኢያዐብር
፡ ወይነክሙ ፡ ዘውስተ
፡ ገዳም ፤ ይቤ ፡ እግዚአብሔር
፡ ዘኵሎ ፡ ይመልክ ።

12ወያስተበፅዐክሙ
፡ ኵሉ ፡ አሕዛብ ፡ እስመ
፡ ምድር ፡ ሥምርት ፡ እንተ
፡ እምርት ፡ አንትሙ ፤
ይቤ ፡ እግዚአብሔር ፡
ዘኵሎ ፡ ይመልክ ።

13ወአክበድክሙ ፡
ላዕሌየ ፡ ነገረክሙ ፤
ይቤ ፡ እግዚአብሔር ፤
ወትቤሉ ፤ በምንት ፡ ሐመይናከ
።

14እስመ ፡ ትቤሉ ፤
ከንቶ ፡ ዘተቀነይነ ፡
ለእግዚአብሔር ፡ ወምንተ
፡ ረባሕነ ፡ ዘዐቀብነ
፡ ትእዛዞ ፤ ናሁ ፡ ተቀነይነሂ
፡ እስመ ፡ ተቀነይነ ፡
ቅድሜሁ ፡ ለእግዚአብሔር
።

15ወናሁ ፡ ዮም ፡
ናስተበፅዕ ፡ ባዕደ ፡
ወየሐንጹ ፡ ወይገብሩ
፡ ስመ ፡ ሎሙ ፡ ወተቃወምዎ
፡ ለእግዚአብሔር ፡ ወድኅኑ
።

16ከመዝ ፡ ሐመይዎ
፡ እለ ፡ ይፈርህዎ ፡ ለእግዚአብሔር
፡ አሐዱ ፡ አሐዱ ፡ ምስለ
፡ ካልኡ ፡ ወርእየ ፡ እግዚአብሔር
፡ ወሰምዐ ፡ ወጸሐፈ ፡
መጽሐፈ ፡ ተዝካር ፡ ቅድሜሁ
፡ ለእለ ፡ ይፈርህዎ ፡
ለእግዚአብሔር ፡ ወለእለ
፡ ኢይፈርሁ ፡ ስሞ ።

17ወይከውኑ ፤ ይቤ
፡ እግዚአብሔር ፡ ዘኵሎ
፡ ይመልክ ፤ ለእመ ፡ እገብር
፡ አነ ፡ ሕይወተ ፡ ወአኀርዮሙ
፡ በከመ ፡ ያበድር ፡ ብእሲ
፡ ወልዶ ፡ ዘይትቀነይ
፡ ሎቱ ።

18ወትትመየጡ ፡ ወትሬእዩ
፡ ማእከለ ፡ ጽድቅ ፡ ወማእከለ
፡ ኀጢአት ፡ ወማእክለ
፡ ዘይትቀነይ ፡ ለእግዚአብሔር
፡ ወማእከለ ፡ ዘኢይትቀነይ
።